Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 4 , 2017

‘Wanyish Yom Yiwachipa’

‘Wanyish Yom Yiwachipa’

“Wanyish yom yiwachipa kumusadil [Yehova].”MATEU 5:33.

MIMINY: 18, 51

1. (a) Yom ik ya mutapu umwing yasalay Jefite ni Ana? (Tal chipich cha kwinsambishin.) (b) Yipul ik yikwakulau mu mutu wa mulong winou?

JEFITE wading ntakel utakamena ni mwin kurish njit wa usu. Ana wading mband wikepishina wamulamang nfumwend nawamp ni chikumbu chend. Awonsu aad amwifukwilang Yehova. Pakwez, asala kand chom chikwau cha mutapu umwing. Jefite ni Ana achipa kudi Yehova, ni muntu ni muntu wawanyisha kuchip kwend nich kushinshaman. Adi yilakej yiwamp kudi amakundj nau amband nlel atondina kuchip kudi Yehova. El chad twambambinany yakul ku yipul yisatu ey: Machip chom ik? Mulong wak kuchip kudi Nzamb udi mulong ukash? Yom ik tukwilejina kudi Jefite ni Ana?

2, 3. (a) Machip chom ik? (b) Bibil ulondin ik piur pa kuchip kudi Nzamb?

2 Mu Bibil, kuchip kudi kushilamu kukash tusadining kudi Nzamb. Chilakej, muntu ukutwish kushilamu kudi Yehova anch ukuwanyish yom kampand, ukupan yom kampand, ukwipan mu mudimu kampand, ap ukulik kusal yom kanang. Machip akat kumasalang mu kusadin want ipau. Kwikil muntu usadishiningau ya ku usu chakwel achip. Pakwez anch muntu watond kusal mwamu, Yehova umening kuchip kwend mudi  kushilamu kukash kufanyidinay muntu kulimish ni kuwanyish. Mu Bibil, machip madi mazu makatay kulonday muntu anch ukusal ap kakusalap yom kampand. (Disambishil 14:22, 23; Hebereu 6:16, 17) Yom ik yilondinay Bibil piur pa usey ukash tufanyidina kulam nich kushilamu kwetu kudi Nzamb?

3 Mu yijil ya Moses, tutangin ang anch muntu wachip kudi Yehova, “kangal ndiy wez wapipej dizu diend, bwat, pakwez ukez kusal yom yawonsu mudi mwayilondilay ku kan kwend.” (Kuchind Michid 30:2) Kupwa Salomon wafunda anch: ‘Anch washilamu kudi Nzamb, wanyish kushilamu kwey swa, mulong Nzamb kakatilap ayisup. Wanyish yom yiwachipa.’ (Mulej 5:4) Yesu wafundisha anch kuchip kudi Nzamb udi mulong ukash palonday anch: “En akulejanya kal kand, anshankuretu ayileja pakur anch: ‘Kangal wajip kushilamu kwey, pakwez wanyish yom yiwachipa kumusadil [Yehova] .’”—Mateu 5:33.

4. (a) Mulong wak kuchip kudi Nzamb udi mulong ukash? (b) Yom ik tukimbina kwilej piur pa Jefite ni Ana?

4 Chidi chakin anch tufanyidin kukwat ni usey nakash kushilamu kwawonsu kutusadining kudi Yehova. Mutapu tukwatining machip metu ukweting chibachikin pa urund wetu wa piswimp ni Yehova. David wovikesha nawamp pipulay anch: ‘Ov nany ukukandama ku mukandu wa Yehova? Ov nany ukwimana mwi ndond yend yitumbila?’ Ni wakula palonday anch Yehova ukwitiyij muntu mwawonsu “wakad [kuchip kwa] makasu.” (Kuseng 24:3, 4) Kuchip ik kumwing kwasalay Jefite ni Ana? Ov chading chiyiswakedin kuwanyish machip mau?

AWANYISHA MACHIP MAU KUDI NZAMB

5. Yom ik yachipay Jefite? Yibudikin ik yikalaku?

5 Jefite washilamu kudi Yehova padingay piswimp ni kurish nau in Amon. Muchid winou wading wa akankuny a antu a Nzamb. (Ankalansambu 10:7-9) Jefite wamwilembila Yehova chakwel awina njit, ni wachipa ang: “Anch ey wez wayipan in Amon mu chikas cham, chawiy pinikuchirika kwi njit muntu mwawonsu ukubudika ku chis cham mulong wa kwinsankan ndiy winiwa ukwikala wa [Yehova].” Nzamb wakula ku malembil ma Jefite ni wamukwasha kuwin njit. Pachirikay Jefite kwol kwend, mwanend changadim wading ukatinay nakash weza kumusankan. Mwan winou ndiy wading ufanyidina “kwikal wa [Yehova].” (Ankalansambu 11:30-34) Chinech chading chirumburikin ik kudi mwan winou?

 

6. (a) Mutapu ik chading chiswakela kudi Jefite ni mwanend kuwanyish kuchip kwend kudi Nzamb? (b) Yom ik twilejina piur pa machip madia mu Kuvurik Yijil 23:21, 23 ni mu Kuseng 15:4?

6 Mwan mband wa Jefite wading ufanyidin kuya ku dizang kumusadin Yehova chisu chawonsu mulong wa kuwanyish kuchip kwa tatukwend. Ov, Jefite washilamu pakad kutong yikushikena? Bwat. Pakwez, pamwing ap Jefite wading wij anch mwanend  changadim wafanyina kwez wa kusambish mulong wa kumusankan. Ap anch wading wij ap bwat, kuwanyish kuchip kwend kudi Yehova chadingap chiswapela kudi Jefite ni mwanend. Jefite pamumanay mwanend changadim, walonda anch wamuletina mar nakash. Mwanend waya “ni kudil mulong ukufa wakad kwijik ikundj.” Mulong wak? Jefite kadingap ni mwan ikundj, ni kand mwanend mband kafanyinap kwachik ni kuval. Dijin dia Jefite dia mu dijuku diafanyina kushadik. Pakwez Jefite ni mwanend changadim ijika anch kuwanyish kuchip kwinoku kwading kwa usey nakash kusutamu yovil yau. Jefite walonda anch: “Mulong nachipil kal kurutu [kwa Yehova], chawiy kinikutwishap kand kuchirish kuchip kwam.” Mwanend walonda anch: “Sal kwey kudi am mudi [mudia] dizu diabudika mu kan mwey.” (Ankalansambu 11:35-39) Jefite ni mwanend changadim ading antu ashinshamena, katongap ap pakemp kulik kuwanyish machip mau kudi Nzamb ap anch chading chiyikasikedin kusal mwamu.—Tang Kuvurik Yijil 23:21, 23; Kuseng 15:4.

7. (a) Yom ik yachipay Ana, ni mulong wak? Mutapu ik mwawanyishay kuchip kwinoku? (b) Kuchip kwa Ana kwarumburika chom ik kudi Samwel? (Tal mazu ma kwinshin.)

7 Ana niyend wachipa kudi Yehova mu chisu chadingay mu yakamish mu mwom wend. Wading umen mar nakash mulong kadingap kuval, ni ading kumuswingish ni kumusip mulong wa yom yiney. (1 Samwel 1:4-7, 10, 16) Wamuleja Yehova mutapu wading wiyovilay, ni washilamu anch: “A! [Yehova] Mwin Dikand! Ez utal pa ushon wamam, mwilomb wey, ni kwinvurik. Kangal wanvuramen am, mwilomb wey, pakwez wez upanang mwan ikundj kudi am, mwilomb wey. Chawiy am nikez kamupan kudi [Yehova] machuku mawonsu ma mwom wend, ni diyemb kidikez kasutap ku mutu kwend.” * (Tal mazu ma kwinshin.) (1 Samwel 1:11) Yehova watesha malembil ma Ana, ni muvu walondulaku, Ana wavala mwan ikundj dijin diend Samwel. Ana wasangara nakash! Pakwez, kavuramenap kuchip kwend kudi Nzamb. Pavadikay mwanend ikundj, walonda anch: “Mulong namwita kudi [Yehova].”—1 Samwel 1:20.

Ana witiyija kupan yom ya usey nakash mulong wa kuwanyish kushilamu kwend kwasalay kudi Nzamb

8. (a) Ov, chading chiswapel kudi ana kuwanyish kuchip kwend? (b) Kuseng 61 ukuvurishin mutapu ik chilakej chiwamp cha Ana?

8 Pawanyishay Samwel mivu piswimp yisatu, Ana wasala mudi mwashilayimu kudi Yehova. Wamutwala Samwel kudi Mwin Kupesh Mujim Eli ku dizang dia ku Silo ni wamuleja anch: “Nalembilang mulong wa kuval mwan winou, chawiy [Yehova] wanginkishin kal am chinamwita. Katat namuchirishinay kal [Yehova]. Mu machuku mend mawonsu ma mwom wend, namuchirish kal kudi [Yehova].” (1 Samwel 1:24-28)  Kudiosh pinipa, Samwel washakama ku dizang. Bibil ulondin anch “nsand Samwel wakudila kurutu kwa [Yehova].” (1 Samwel 2:21) Chadingap chiswapela kudi Ana kuwanyish machip mend. Chirumburikin anch kafanyinap kwikal ni mutapu wa kusutish chisu dichuku diawonsu pamwing ni mwanend wading ukatinay nakash. Kafanyinap kuman mutapu wading upaminay mwanend. Pakwez Ana wawanyisha kamu machip mend kudi Yehova. Witiyija kupan yom ya usey nakash mulong wa kuwanyish kushilamu kwend kwasalay kudi Nzamb.—1 Samwel 2:1, 2; tang Kuseng 61:1, 5, 8.

Ukat kuwanyish machip mey wasala kudi Yehova?

9. Yom ik tukwisambina?

9 Katat twatesha kal mutapu udia kuchip kudi Yehova mulong ukash, elany tushinshikinany yipul ey: Machip ik tukutwisha kusal nlel? Mupak ik tufanyidina kukwat mulong wa kuwanyish machip minam?

MACHIP MEY MA KWIPAN

Machip mey ma kwipan (Tal paragraf wa 10)

10. Machip ik ma usey mukutwishay kusal mwin Kristu? Machip minam marumburikin ik?

10 Machip ma usey makutwishay mwin Kristu kusal madi ma kapan mwom wend kudi Yehova. Mu malembil ma mu ujindj, muntu ushidiningamu kusadin mwom wend  mulong wa kumusadin Nzamb chikupu, chikalap nchik milong yikutwisha kushiken. Yesu walonda anch tufanyidin “kwitun” ayinetu, chirumburikin anch tushidinamu kumutek Yehova pa ndond ya kusambish, pa ndond pa kwitek etu ayinetu. (Mateu 16:24, TMK.) Kusambish pa dichuku dinidia, “tudi ayen a [Yehova].” (Rom 14:8) Tukat kukwat kwipan kwetu nich usey nakash. Tukat kwiyov mudi mwiyovay nfund a kuseng palonday anch: ‘Nikamuchirishin Yehova ik ku yom yawonsu yiwamp yansadilay? Nikuwanyish machip mam kudi Yehova kurutu kwa antwend awonsu.’—Kuseng 116:12, 14.

11. Yom ik yashikena pa dichuku dia kubatishau?

11 Wapanin kal mwom wey kudi Yehova ni wamekeshin kal patok kwipan kwey kusutin dibatish mu mem? Anch mwawiy, chinech chidi chiwamp nakash! Uvurikin pipulay mukadivar wading usadina diskur dia dibatish anch wipanin kal amwiney kudi Yehova ni anch wading wij kurumburik kwa “kwipan kwey ni dibatish kukumekeshin mudi umwing wa atuman a Yehova”? Piwakula anch mwaning, antu awonsu ading pinipa ijika anch wapana kal mwom wey ni wading uwanyidin kutambul dibatish mudi mwin kusal mudimu uwanyidina wa Yehova. Wamusangaresha kamu Yehova nakash!

12. (a) Yipul ik tufanyidina kwiyipul? (b) Pita watukasikesha kukudish mikadil ik?

12 Piwatambula dibatish washilamu kudi Yehova anch ukusadin mwom wey mulong wa kumusadin ndiy ni kusal yawonsu ukutwisha mulong wa kulondul mbil jend. Pakwez dibatish didi kwau nsambishil. Pasutina chisu, etu awonsu tufanyidin kwishinshikin ayinetu. Tukutwish kwiyipul anch: ‘Kudiosh natambwila dibatish kushik ni nlel mutapu ik uyila kurutu urund wam ni Yehova? Ov, nidandamedin kumusadin nich muchim wam wawonsu? (Kolosay 3:23) Nikat kulembil chisu chawonsu? Nikat kutang Bibil dichuku diawonsu? Nikat kukumangan chisu chawonsu? Nikat kwipan mu kusal mudimu wa kulejan chisu chawonsu mudi muchifanyidina? Ap nashadishin kal musangar wam mulong wa midimu yiney?’ Kambuy Pita watubabesha anch kudi ubaj anch twaziy kusal mudimu wetu mulong wa Yehova. Tukutwish kwiyep yom yiney anch twakimb anch tusala mudimu nakash mulong wa kupam mu ritiy, kwikal ni ronganyin, ni kwipan kwa winzamb.—Tang 2 Pita 1:5-8.

13. In Kristu ipana kal ni abatishau kal afanyidin kwijik ik?

13 Kudiosh pitwachipa mulong wa kumusadin Yehova, chikasiken kuchirikin. Muntu ukutwisha kuziy mulong wa kumusadin Yehova ap ukuziya kushakam mudi mwin Kristu kakutwishap kulond anch kipanap kwend chakin kudi Nzamb ni anch dibatish diend diadingap diwanyidina. * (Tal mazu ma kwinshin.) Anch muntu wipana kal kudi Yehova wasala chitil chijim, ukwirumburilap amwinend kudi Yehova ni chikumangen. (Rom 14:12) Tufanyidinap kwikal mudi antu alonday Yesu anch: “Ey washil kal rukat rey ruwading nich pakusambish.” Pakwez tukatin ndiy alonda piur petu anch: “Nij yisalijok yey yawonsu, ni rukat rey, ni ritiy rey. Nij kand kuziyil kwey ku mudimu, ni kudandamen kwey, katat ey usadil yom yivud kupandakan ya kusambish.”  (Kujingunik 2:4, 19) Tukatin kumusangaresh Yehova kusutin mu kushakam ni mushiku kukwatijan ni kwipan kwetu.

KUCHIP KWEY MULONG WA URUW

Kuchip mulong wa uruw (Tal paragraf wa 14)

14. Kuchip ik kwa kaad kwa usey nakash kukutwishay kusal muntu? Mulong wak?

14 Kuchip kwa kaad kwa usey nakash kukutwishay kusal muntu, kudi kuchip mulong wa uruw. Uruw chidi chom chitumbila. Yehova umening machip ma uruw mudi mulong ukash nakash. Anch ngatan ni ngachik achip, ashilamu kal kurutu kwa Yehova ni kurutu kwa antu awonsu adiap. Akat kushilangamu yisu yawonsu anch akumekeshijadin rukat, kulamijan nawamp, ni kulimishijan umwing ni mukwau chisu chikushakamau pamwing panap pansh mu uruw mudi mwatenchikay Nzamb. Amwing kakutwishap kamu kulond mazu minam mudi mu mafundinau, pakwez akutwish kudandamen kulam kuchip kwau kurutu kwa Nzamb. Anch asal machip minam akutwish chadi kwikal ikundj ni mband atijadina. Uruw urumburikin kushakam pamwing machuku mawonsu. (Disambishil 2:24; 1 Korint 7:39) Yesu walonda anch: “Muntu kafanyidinap kwauril antu abombakeshay kal Nzamb.” Ambay a uruw atijana kal kafanyidinap kutong ang anch uruw wau wendinap nawamp, afanyidin kulikijan.—Marko 10:9.

15. Mulong wak in Kristu kakatap kuman uruw mudi mu umeningau mu mangand minam?

15 Chawiy, mulong tudi antu akad kuwanyin, kwikiling uruw uwanyidina. Chawiy chilondinay Bibil anch antu atijadina “akez kuman mar” yisu yimwing. (1 Korint 7:28) Nlel mu mangand, antu avud akwet mwikadil uyimp piur pa uruw. Akat kutong ang anch yom yendinap nawamp akutwish kwau kujip uruw wau. Pakwez kiwawiyap mutapu umeningau amakundj nau amband in Kristu uruw. Ijing anch asala kal machip mulong wa uruw kurutu kwa Nzamb. Anch alik kuwanyish machip minam, chikwikal mudi amudimba ndiy, ni Nzamb ukisining antu in kudimban. (In Levi 19:12; Jinswir 6:16-19) In Kristu atijadina kal afanyidin kuvurik mazu ma kambuy Paul malondina anch: ‘Ang watil kal mband, kangal wamulik.’ (1 Korint 7:27) Paul walonda mwamu mulong wading wij anch Yehova ukisining kujip uruw pakad mulong wakad kuwanyin.—Malakiy 2:13-16.

16. Yom ik yilondinay Bibil piur pa kujip uruw ni kwaurik?

16 Yesu wafundisha anch diyingishin dimwing dia mu Bibil dia kujip uruw didi ang anch mbay umwing wa uruw wasal masandj chadi mbay wa uruw mukwau wakad mulong walik kumulikishin. (Mateu 19:9; Hebereu 13:4) Chidi nchik piur pa kwaurik kwa ambay a uruw? Bibil ulejen patok mulong winou. (Tang 1 Korint 7:10, 11.) Kwikil diyingishin dia mu Bibil dilejena piur pa kwaurik mu uruw. Pakwez, yisu yimwing kukutwish kushiken milong yikusala anch mwin Kristu iyova anch chidi kamu cha usey kwaurik ni mbay nend wa uruw. Chilakej, amwing akutwish kuman anch mwom yau ap urund wau ni Yehova ukutwish kwikal mu ubaj nakash anch ashakam pamwing ni mbay wa uruw muyimp ap wapumbukina kal. * (Tal mazu ma kwinshin.)

17. Yom ik yifanyidinau kusal ambay a uruw in Kristu chakwel uruw wau ulab?

17 Anch ambay a uruw aya kudi amakurump  a chikumangen kwit yiyul piur pa mutapu wa kulam uruw wau, amakurump akutwish kuyipul ambay inay anch atadin kal video ulondina anch, Qu’est ce que le vrai amour? Ni anch ilejin kal broshir ulondina anch, Dijuku Diey Dikutwish Kwikal Nich Musangar. Yom yiney yikasikeshidin pa mbil ja mu Bibil jikutwisha kukwash uruw chakwel ukasikan. Ambay a uruw amwing alonda anch: “Kudiosh kamu twasambishina kwilej broshir winou, uruw wetu udi mu musangar kusutamu pakur.” Nambaz umwing wasadinakal mivu 22 mu uruw watonga anch uruw wend wading piswimp kufa. Kupwa kwa kutal video, walonda anch: “Etu awonsu ading atubatisha kal, pakwez twadingap kovijan. Video weza kamu mu chisu chiwanyidina! Katat twovijadin chadi nawamp nakash mu uruw.” Chakin kamu, anch ikundj ni mband asadin mbil ja Yehova mu uruw wau, urund wau ukwikal ni musangar ni ukukasikan.

MACHIP MA ANTU ADIA MU MUDIMU WA PAKAMPWIL WA CHISU CHAWONSU

18, 19. (a) Yom ik yisadinau anvaj in Kristu avud? (b) Yom ik yilondinau piur pa antu adia mu mudimu wa pakampwil wa chisu chawonsu?

18 Kwinsambishin twisambinang machip masalay Jefite ni Ana. Mulong wa machip minam, mwan changadim wa Jefite ni mwan ikundj wa Ana asadina mwom yau mulong wa kumusadin Yehova mu mitapu ya pakampwil. Anvaj avud in Kristu nlel akat kuyikasikesh anau kusal mudimu wa chisu chawonsu ni kupan mwom yau mu mudimu umusadidinau Nzamb. Ni tufanyidin etu awonsu kuyikasikesh ansand inay chakwel adandamena kusal mudimu wau.—Ankalansambu 11:40; Kuseng 110:3.

Machip ma antu adia mu mudimu wa pakampwil wa chisu chawonsu (Tal paragraf wa 19)

19 Nlel kudi antu piswimp 67000 pa Mangand Mawonsu asadina Mudimu wa Pakampwil wa Chisu Chawonsu wa Atuman a Yehova. Amwing asadidin ku Betel ap mudimu wa kutung ap kand mu mudimu wa munyingumuku. Akwau akat kusal mudimu ukash mudi in kufumban mulong wa kusal mudimu wa kulejan, ayibol a pakampwil, amishoner, atushalapol akata kusadin ku Yot ya Yitentam, ap atushalapol asadidina ku shikol ya in kwilej Bibil. Umwing ni umwing pakach pau wasala kal “Machip ma Kuziyin ni ma Uzwendj.” Mu machip minam, ashilamu kal kusal mudimu nakash ku chisend chin chawonsu chikuyinkishau kusal mu mudimu wa Yehova, kwikal ni mashakamin maswapela, ni kakusalangap mudimu wa ku mujimbu ching anch ayitiyij. Kadiap antu adia a pakampwil, pakwez yisend yau, yawiy yimenau mudi ya pakampwil. Adi ikepishina ni akwatin kal mupak wa kuwanyish machip mau padiau mu mudimu wa pakampwil wa chisu chawonsu.

20. Mutapu ik tufanyidina kuman machip metu twasala kudi Nzamb? Mulong wak?

20 Mu mutu wa mulong winou, twisambin kal machip masatu tukutwisha kusal kudi Nzamb. Pamwing ap twasadin kal machip mamwing pakach pa machip minam. Twij anch tufanyidin kukwat machip metu nich usey ni tufanyidin kusal yawonsu tukutwisha mulong wa kumalam nawamp. (Jinswir 20:25) Anch tulaminap nawamp machip metu twasala kudi Yehova, kututwish kwikal yibudikin yiyimp. (Mulej 5:6) Chawiy el twikala mudi nfund a kuseng wamuleja Yehova anch: “Am nikez kawang kushiman ku dijin diey pichuku pichuku ni kuwanyish [kuchip] kwam kudi Ey.”—Kuseng 61:8,TMK.

^ par. 7 Ana washilamu kudi Yehova ang anch waval mwan ikundj, ukwikal mwin Nazir. Chinech chirumburikin anch mwanend ikundj wafanyina kwipan ni kuya ndond kanang mulong wa kumusadin Yehova.—Kuchind Michid 6:2, 5, 8.

^ par. 13 Mulong kuding yom yivud yifanyidinau kushinshikin amakurump pamwing ni muntu kurutu amwitiyija kutambul dibatish, chawiy chikasikening kuman anch dibatish dia muntu kanang diadingap diwanyidina.

^ par. 16 Tal buku “Ilamany Ayinen mu Rukat ra Nzamb,” paj wa 219-221.

Jefite ni mwanend changadim ading antu ashinshamena, katongap ap pakemp kulik kuwanish machip mau kudi Nzamb