Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 4 , 2017

Ov, Ukat Kumekesh Kutentam kwa Yehova?

Ov, Ukat Kumekesh Kutentam kwa Yehova?

‘Nikadilejan dijin dia Yehova . . . , Nzamb ushinshamena wakad kuburen kutentam.’—KUVURIK YIJIL 32:3, 4.

MIMINY: 5, 46

1, 2. (a) Kuburen kutentam kwa mutapu ik kwamanay Nabot nau anend? (b) Mikadil ik yaad tukwileja mu mutu wa mulong winou?

ANTU aad ayimp amufundin ikundj umwing anch wasalang yom yiyimp nakash. Yom yilondinau yidi yamakasu. Pakwez ikundj winou amufish kal nich ni afanyidin kuyijip. Tong mutapu wiyovau antu akatining kutentam pamanau muntu winou wakad mulong nau anend akat kuyas mayal chakwel afa! Chinech chidiap kwau chishimu. Yidi yom yakin yamushikena kashalapol ushinshamena wa Yehova utazukinau anch Nabot, wadingaku chisu chadingay Akab Mwant mu Isarel.—1 Ant 21:11-13; 2 Ant 9:26.

2 Mu mutu wa mulong winou, tukwilej yom yamushikena Nabot. Tukwisambin kand kurumbuk kukash kwasalay mukurump umwing ushinshamena wa chikumangen cha win Kristu cha mu mivu chitot ya kusambish. Yilakej yiney yaad  yikutufundish mutapu ukweta kwikepish ni kulikishin kwa kwikatin usey anch twakimb anch twimburija kutentam kwa Yehova.

KUBUREN KUTENTAM KUYIMP NAKASH

3, 4. Nabot wading muntu wa mutapu ik, ni mulong wak walika kulandish chir chend cha nviny kudi Mwant Akab?

3 Nabot wading ushinshamena kudi Yehova chisu chalondulangau in Isarel avud chilakej chiyimp cha Mwant Akab ni mukajend, Mwant Mwad muyimp Jezabel. Ifukwilang nzamb wa makasu Bal ni kamulimishangap Yehova ni yijil yend. Pakwez Nabot wakwata nich usey urund wend ni Yehova kusutamu mwom wend.

4 Tang 1 Ant 21:1-3. Palonday Akab anch alanda chir cha Nabot cha nviny ap aswimpa ni chir chikwau chiwamp cha nviny, Nabot walika. Mulong wak? Wamurumburila nich kalimish anch: “Chakapuk chaya mwa, [Yehova] anlama chakwel kangal napan uswan wa angakiril am kudi ey!” Nabot walika kuswimp chir chalonday Mwant Akab mulong yading yikwatijadinap ni chijil cha Yehova mulong wa in Isarel chilondina anch kangal kulandish chikupu uswan wa dijuku diau wayishilau. (In Levi 25:23; Kuchind Michid 36:7) Chimeken kamu patok anch Nabot wading umuziyidin Yehova.

5. Yom ik yasalay Jezabel mulong wa kutambul chir cha nviny cha Nabot?

5 Palikay Nabot kulandish chir chend cha nviny, Mwant Akab ni mukajend asala yom yiyimp nakash. Chakwel atambula chir cha nviny, Mwant mwad Jezabel wayileja antu aad anch amufunda Nabot mulong wa uyimp wakad kusalay. Mudi chibudikin, Nabot nau anend ayijipa. Yom ik yasalay Yehova mulong wa kuburen kutentam kuyimp nakash mudi kwinoku?

KUTENTAM KWA NZAMB

6, 7. Mutapu ik wamekeshay Yehova anch ukatining kutentam, ni mulong wak chom chinech chakasikesha dijuku dia Nabot nau arund nend?

6 Kapamp kamwing Yehova wamutuma Elija chakwel amulonda Akab. Elija wamuleja Akab anch wading mwin kujipan ni mwij. Mupak ik wakwatay Yehova? Akab, mukajend, nau anend afanyina kuyijip, mudi mwamujipau Nabot nau anend.—1 Ant 21:17-25.

7 Dijuku dia Nabot nau arund nend ova ushon nakash mulong wa yom yasalay Akab. Pakwez Yehova wamana kuburen kutentam ni pakad kulab wakula pa mulong winou. Yiney yafanyina kuyikasikesh. Pakwez, kwikepish kwau ni ruchingej rau mudiay Yehova akupaka pamwing ap kusutin yom yasadika kurutu.

Elija wamuleja Akab anch mulong wikepishang, Yehova kakumupupap

8. Mutapu ik wasalay Akab pateshay uruu wa Yehova, ni chibudikin chading ik?

8 Pateshay Akab yom yalonday Yehova kumusal, “wapwola yidjal yend, wadjal yinzany, wajil yakudia, walal nich yinzany, wading ni kwend kwa ushon.” Akab wikepisha! Chibudikin ik chikalaku? Yehova wamuleja Elija anch: “Mulong wishikumwish kal ku mes kwam kinikuletap kand mar mu  chirung chend, ching mu chirung cha mwanend ikundj, mwawiy mwinimwa munikeza kalet mar mu dijuku diend.” (1 Ant 21:27-29; 2 Ant 10:10, 11, 17) Yehova, ‘ukata kushinshikin michim,’ ndiy ukata kuman chitudia chakin, wamovila Akab riy.—Jinswir 17:3.

KWIKEPISH KUDI DIKING

9. Mulong wak kwikepish kwafanyina kwikal diking ku dijuku dia Nabot nau arund nend?

9 Patesha dijuku dia Nabot nau arund nend anch dijuku dia Akab kakudipupap kushik ni pakufay Akab, chinech chafanyina kupak ritiy rau mudiay Nzamb. Pakwez kwikepish kwafanyina kuyikwash kuking ritiy rau. Mulong wak? Anch ading ikepishina, afanyina kudandamen kumwifukwil Yehova, ni kwitiyij anch chikasiken kudi Nzamb kuburen kutentam. (Tang Kuvurik Yijil 32:3, 4.) Kurutu oku, dijuku dia Nabot dikwikal ni yiyukish pakuyimanau akatish nau avumbuk. Kukez kwikal kutentam kuwanyidina mulong wa Nabot nau anend. (Job 14:14, 15; Yohan 5:28, 29) Muntu wikepishina wijing anch ‘Nzamb ukez karumburish yisalijok yetu yawonsu, ni yawonsu yitwasala ku ujindj mulong wa kwijik  anch yidi yiwamp ap yiyimp.’ (Mulej 12:14) Yehova ukat kushinshikin yom yitwakad etu kwijik. Chawiy kwikepish kukutuking chakwel tulika kushadish ritiy retu mudiay Yehova.

Kwikepish kutukingin chakwel tulika kushadish ritiy retu mudiay Yehova

10, 11. (a) Yom ik yikutwisha kupak kutentam kwetu? (b) Kwikepish kukutwish kutuking mu mitapu ik?

10 Mutapu ik ukusala anch amakurump akwat mupak wakad ey kutesh nawamp ap wakad ey kwitiy? Chilakej, yom ik ukusala anch ey ap muntu mukwau ukatina washadish chisend chend mu mudimu wa Yehova? Ukusal nchik anch mbay ney wa uruw, mwaney ikundj ap mband, murund ney wa piswimp amwopat mu chikumangen chadi ey walik kwitiy mupak wa amakurump? Yom ik ukusala anch watong anch amakurump a chikumangen arumbukin pamwovidinau muntu wasadina chitil riy? Yom mudi yiney yikutwish yapak ritiy rey mudiay Yehova ni mutapu utenchikinay chikumangen chend nlel. Kwikepish kukukukwash mutapu ik anch akupak ni yom mudi yiney? El tushinshikinany mitapu yaad.

Mutapu ik ukusala anch amakurump akwat mupak wakad ey kwitiy? (Tal paragraf wa 10, 11)

11 Chakusambish, anch twikepishin, tukwitiy anch twijap kwetu yom yawonsu. Ap anch twatong anch twij yom yawonsu piur pa mulong winou, tufanyidin kwijik anch ching kwend Yehova ndiy wijing yidinga mu muchim wa muntu. (1 Samwel 16:7) Anch twavurik yom yiney, tukwijik nich kwikepish anch tukwet mimbu ni tufanyidin kuwapish mutapu wetu wa kutong. Cha kaad, anch twaman kuburen kutentam, kwikepish kukutukwash kuziyin ni kushimpish muchim ni kuchingel anch Yehova awapisha mulong winou. Bibil ulondin ang: “Anch ey wamulimish Nzamb, yom yawonsu yikwikal kwau nawamp.” Bibil ulondin kand anch: “Pakwez kiyikwikalap yiwamp kudi mukayitil. Mwom wend ukat kusut mau.” (Mulej 8:12, 13) Anch twashal ikepishina, tukutaninamu ni muntu ni muntu ukutaninamu.—Tang 1 Pita 5:5.

RUBABEK MU CHIKUMANGEN

12. Rusangu ik tukushinshikina katat, ni mulong wak?

12 In Kristu akusambish a mu Antiosh wa ku Siria amana yom yapaka kwikepish kwau ni rusot rau ra kulikishin. El tushinshikinany rusangu riner ni turisadinany mulong wa kushinshikin mwikadil wetu wa kulikishin. Chikutwish kutukwash kwijik mulong wak Yehova ukutwish kusadin antu akad kuwanyin pakad kupipej mbil jend.

13, 14. Yisend ik yadingay nich kambuy Pita, ni mutapu ik wamekeshay anch wading utakamen?

13 Kambuy Pita wading mukurump wa chikumangen wading wijau nawamp kudi in Kristu akusambish. Wading murund wa Yesu ni amwinkisha yisend yikweta usey nakash. (Mateu 16:19) Chilakej, mu muvu wa 36, Pita amwinkisha chisend cha kumufundish Korney nau antu awonsu ading mu chikumbu chend. Mulong wak chisend chinech chading cha pakampwil? Mulong Korney kadingap mwin Yuda; wading Mukamuchid wakad kutwalau kumukand. Patambulay Korney nau antu awonsu ading  mu chikumbu chend spiritu utumbila, Pita wamana anch chifanyidin kuyibatish mudi in Kristu. Chawiy chalonday ang: “Anch antu inay atambul kal [Spiritu] Utumbila mudi mutwatambula etu. Ov, nany ukutwisha kuyikangesh kuyibatish nich mem?”—Midimu 10:47.

14 Mu muvu wa 49, atwimbuy nau amakurump a mu Yerusalem akumangana pamwing mulong wa kukwat mupak wa kwijik anch chifanyidin kuyitwal in Kristu Akamichid ku mukand. Mu chikumangan chinicha, Pita wayivurisha akadivar nich kutakaman anch wimenap amwinend mutapu watambulau Akamichid akad kutwalau ku mukand spiritu utumbila. Yom yamanay Pita yawiy yakwasha chisak chitakedila kukwat mupak wau. (Midimu 15:6-11, 13, 14, 28, 29) In Kristu in Yuda nau Akamichid afanyina kujikitish mulong Pita wading utakamen palonday yom yiney. Chading chifanyidin kuyiswapel in Kristu inay akusambish kutek ruchingej mudiay muntu winou ushinshamena ni waswila kal mu spiritu!—Hebereu 13:7.

15. Kurumbuk ik kwasalay Pita padingay ku Antiosh wa ku Siria? (Tal chipich cha kwinsambishin.)

15 Machuku makemp kupwa kwa chikumangan mu Yerusalem, Pita waya ku Antiosh wa ku Siria. Padingay kwinikwa, wasutisha chisu nau akadivar nend Akamichid. Tukutwish kutong mutapu wakatau kwilejin ku ronganyin ra Pita ni ku yom yading yijay. Pakwez, afanyina kushimok ni kunenganan palikay Pita kudia nau pamwing. Pita wayibachika in Kristu akwau in Yuda ni Barnabas chakwel niyau asala mwamu. Mulong wak mukurump winou mwin Kristu waswila kal mu spiritu wasala kurumbuk kujim mudi kwinoku kwafanyina kwauril chikumangen? Yom ik tukutwisha kwilejin ku kurumbuk kwa Pita yikutukwasha anch tukwet ushon mulong wa mazu malondangay ap yisal yasalangay mukurump wa chikumangen?

Mutapu ik wafanyinau kusal in Kristu Akamichid arumbukinau kudi Pita mu kuyisadin pakad kutentam?

16. Mutapu ik wamukwashau Pita, ni yom yiney yiletin yipul ik?

16 Tang Galatia 2:11-14. Pita wova wom wa antu. (Jinswir 29:25) Pita wading wij mutapu wading wiyovilay Yehova piur pa Akamichid. Pakwez, wading ukwet wom anch in Kristu in Yuda atwadinau kal ku mukand akutwish kutong nayimp pa kudiokalau ku Yerusalem anch amutan ukat kwibomb pamwing nau in Kristu Akamichid. Kambuy Paul wamwela Pita anch wading mwin rubabek. Mulong wak? Mulong Paul watesha mutapu wayilondinau Akamichid kudi Pita mu chikumangan chasadika mu Yerusalem mu muvu wa 49. (Midimu 15:12; Galatia 2:13) Mutapu ik wafanyinau kusal in Kristu Akamichid arumbukinau kudi Pita? Ov, afanyina kwilik anch yom yiney yiyipwakesh? Pita wafanyina kushadish yisend yend mulong wa kurumbuk kwend?

 IKAL MWIN KULIKISHIN

17. Pita wataninamu mutapu ik mu kulikishin kwa Yehova?

17 Pita wading muntu wikepishina ni witiya ukwash wa Paul. Bibil kalondinap anch Pita washadisha yisend yend. Pakwez, amupepila chakwel afunda mikand yaad mu Bibil. Mu mukand wend wa kaad, ulondin piur pa Paul mudi ‘mwanamakwetu mukatish.’ (2 Pita 3:15) Kurumbuk kwa Pita kwafanyina kuyisal in Kristu Akamichid nayimp. Pakwez, Yesu, udia mukurump wa chikumangen, wadandamena kumusadin. (Efes 1:22) Akadivar nau anambaz a mu chikumangen ading ni mutapu wa kumwimburij Yesu ni Tatukwend mu kumulikishin Pita. Nich ruchingej rawonsu, kwikil muntu ap umwing witiya anch kurumbuk kwa muntu wakad kuwanyin kumupwakesh.

18. Chisu ik tukutwisha kwikal ni kuswir kwa kwimburij kutentam kwa Yehova?

18 Kwadingap amakurump awanyidina mu chikumangen cha win Kristu cha kusambish, ni nlel kwikil amakurump awanyidina mu chikumangen cha win Kristu. Bibil ulondin anch: “Etu awonsu tukat kurumbok mu mitapu yivud.” (Jakobu 3:2) Chinech chiswapel kwijik, pakwez yom ik tukutwisha kusal anch twaman kurumbok kwa mukadivar? Ov, tukwimburij kutentam kwa Yehova? Chilakej, mutapu ik ukusala anch mukurump wa chikumangen wapan chakul chimekeshina kasolikany? Ukwilikidij wipwakala anch mukurump wa chikumangen walond pakad kutong chom chikutwisha kukwovish ushon ap chikukusala nayimp? Pa ndond pa kutong mau mau anch mukadivar winou kawanyidinap kwikal mukurump, ov, ukutwish kushimpish muchim ni kumuchingel Yesu udia mukurump wa chikumangen? Pa ndond pa kushinshikin kurumbuk, ukutwish kuvurik mudimu wasadinay kal mukadivar mu mivu yivud nich kushinshaman? Anch mukadivar wakurumbukinang wadandamen kusal mudi mukurump ap amwinkish yisend yikwau, ukutwish kumusanger? Anch wamulikishin kwa kwikatin, ukumekesh anch wimburijin kutentam kwa Yehova.—Tang Mateu 6:14, 15.

19. Tufanyidin kukwat mupak wa kusal ik?

19 Mulong tukatin kutentam, tutadin kurutu dichuku dikudioshay Yehova kuburen kutentam kuletishinay Satan ni mangand mend mayimp. (Isay 65:17) Kusambish kamu pinap, anch twaman kuburen kutentam, tufanyidin kwijik nich kwikepish anch tukutwishap kwijik yom yawonsu ni kuyilikishin antu aturumbukinang. Anch twasal mwamu, tukwimburij chitongijok cha Yehova piur pa kutentam.