Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 4 , 2017

‘Nzuj wa Mangand Mawonsu’ Usadining Chisu Chawonsu Yom Yitentamina

‘Nzuj wa Mangand Mawonsu’ Usadining Chisu Chawonsu Yom Yitentamina

“Ndiy udi diyal, mudimu wend uwanyidin, mulong jinjil jend jawonsu jidi [jitentamina].”—KUVURIK YIJIL 32:4.

MIMINY: 12, 11

1. Mutapu ik wamekeshay Aburaham anch wachingejina kutentam kwa Yehova? (Tal chipich cha kwinsambishin.)

‘NZUJ wa mangand mawonsu kakusalap chitentamina?’ (Disambishil 18:25) Muntu ushinshamena Aburaham kipulap chipul chinech mulong wading widjidjekin. Pakwez, chipul chend chamekesha anch wading nich kashinsh anch Yehova ukurumburish musumb wa Sodom ni Gomor nich kutentam kuwanyidina. Wading wij anch Yehova kakutwishap ‘kujip in kutentam pamwing nau antu ayimp.’ Chinech chading chom ‘chakad kutongin’ kudi Aburaham. Kupwa, Yehova walonda amwinend anch: ‘Ndiy udi diyal, mudimu wend uwanyidin, mulong jinjil jend jawonsu jidi jitentamina. Udi Nzamb ushinshamena, kakwetap kuyip, udi mwin kutentam ni mwin kuying.’—Kuvurik Yijil 31:19; 32:4.

2. Mulong wak chikasiken kudi Yehova kwikal wakad kutentam?

2 Mulong wak Aburaham wading nich kashinsh anch Yehova usadining chisu chawonsu yom yitentamina? Mulong Yehova  udi chilakej chijim cha kutentam. Chawiy, mulong mbil ja Yehova jiding chisu chawonsu jitentamina, ukurumburish kamu milong mu mutapu uwanyidina. Bibil ulondin anch: “Ndiy ukatil kutentam ni uyakin.”—Kuseng 33:5.

3. Let chilakej chimekeshina kulik kutentam mu mangand nlel.

3 Chikasikeshin kwijik anch Yehova uding chisu chawonsu utentamina. Pakwez, mangand nlel mizwil nich kuburen kutentam. Chilakej, antu akutwish ayikwat ni kuyitek mu rukan mulong wa yom yiyimp yakadiau kusal. Mudi chibudikin kupwa kwa kukimb win kashinsh piur pa antu inay, akat kutan anch amwing kakwetap kwau milong, pakwez yom yiney yikat kusadik kupwa kwa kusutish mivu yivud mu rukan. Kuburen kutentam mudi kwinoku kukat kuletish ujim. Pakwez, kudi kand mutapu ukwau wa kuburen kutentam ukutwisha watukasiken kujijamen. Mutapu ik winou?

KUBUREN KUTENTAM MUKACH MWA CHIKUMANGEN

4. Mutapu ik ukutwishau kupak ritiy ra mwin Kristu?

4 In Kristu akat kuchingej kuman kuburen kutentam kumwing pol pa chikumangen cha win Kristu. Pakwez, ritiy retu akutwish kuripak anch twaman yom yimekena anch yidi yakad kutentam yasadik mukach mwa chikumangen. Anch yom yiney yashiken, mutapu ik ukusala? Ukulik anch yom yiney yikupwakesh?

5. Mulong wak tukutwishap kukashimuk anch twaman yom yakad kutentam mu chikumangen?

5 Etu awonsu tudi antu akad kuwanyin ni tukat kurumbok, chawiy chikutwish chashiken anch muntu atusadin mu mutapu wakad kutentam ap niyetu tukutwisha twamusadin muntu mukwau mu mutapu wakad kutentam mu chikumangen. (1 Yohan 1:8) Ap anch yom yiney yishikedining pachipatu, in Kristu ashinshamena kakushimokangap ap kwipwakal anch kuburen kutentam kwashiken. Yehova watwinkisha kal yiyul ya kusadin yidia mu Bibil chakwel yitukwasha kushal ashinshamena anch twaman kuburen kutentam kudi akadivar nau anambaz netu.—Kuseng 55:12-14.

6, 7. Kuburen kutentam ik kwamanay mukadivar umwing mu chikumangen, ni mikadil ik yamukwasha?

6 Tushinshikinany yom yamanay Willi Diehl. Kusambish mu muvu wa 1931, Mukadivar Diehl wasadina nich kushinshaman ku Betel wa Bern, mwi ngand ya Suisse. Mu muvu wa 1946, wileja Shikol ya chinan ya Gilead mu New York, U.S.A. Papwishay shikol yiney, amutuma mu mudimu wa munyingumuku mwi ngand ya Suisse. Mu rusangu rend ra mwom, Mukadivar Diehl walonda anch mwi Ngond wa 5, 1949, walejana ku mutiy wa Suisse anch ukimbin kwatan. Akadivar ading atakedina amuleja anch amutambul kal yisend yend yawonsu. Amwitiya kusal ching mudimu wa uchibol. Mukadivar Diehl walonda anch “kangitiyijap kusal ma diskur. Antu avud katulangwishangap kand, atukwata mudi antu opatinau kal mu chikumangen.”

7 Mutapu ik wasalay Mukadivar Diehl? Walonda anch: “Twading twij anch kwatan kakujidikinap kwau mu Bibil, chawiy twipana mu malembil ni kumuchingejin Yehova.” Ap anch akadivar amwing kateshap kwau nawamp chitongijok cha Yehova piur pa uruw, pikwasuta chisu atesha chadi yom  nawamp, amuchirishina Mukadivar Diehl yisend yend. Yehova wamufuta mulong wa kushinshaman kwend. * (Tal mazu ma kwinshin.) El twiyipulany ayinetu anch: ‘Ang naman kuburen kutentam mudi kwinoku, niyam nikushimpish muchim ni kuchingel anch Yehova arijek yom yiney? Anch nikwichingejin amwinam ni kusal usu wa kurish mulong wa kuburen kutentam kwinoku?’—Jinswir 11:2; tang Mike 7:7.

Vurik anch mulong wa kuburen kuwanyin, tukutwish twatesh yom nayimp ni tukutwishap kwijik nawamp yom yawonsu piur pa mulong kampand

8. Mulong wak tukutwish kutong nayimp anch etu ap antu akwau atusadidin mu mutapu wakad kutentam?

8 Anch watong anch kudi kuburen kutentam mu chikumangen, vurik anch ukutwish widimb. Mulong wak? Mulong tudi antu akad kuwanyin ni tukutwish twatesh yom nayimp. Tukutwishap kand kwijik yom yin yawonsu. Pakwez ap anch twij yom nawamp ap bwat, tufanyidin kumulembil Yehova piur pa mulong winou, kumuchingejin, ni kushal ashinshamena. Chinech chikutukwash kulik ‘kumujimen Yehova.’—Tang Jinswir 19:3.

9. Yilakej ik tukushinshikina mu mutu wa mulong winou ni ulondwilaku ou?

9 El twilejinany ku yilakej yisatu ya kuburen kutentam kwamanau antu a Yehova a pasak. Mu mutu wa mulong winou, tukushinshikin rusangu ra Josef mwijukuril wa Aburaham ni yom yamanay kudi anamakwend. Mu mutu wa mulong ulondwilaku, tukwisambin mutapu wamusadinau Mwant Akaz kudi Yehova ni yom yamanay kambuy Pita ku Antiosh wa ku Siria. Pitwisambidina yilakej yiney, kimb mitapu ukutwisha kumuchingejin Yehova ni kuchidij urund wey ni ndiy paukumana anch akusadidin mu mutapu wakad kutentam.

JOSEF AMUSADINA MU MUTAPU WAKAD KUTENTAM

10, 11. (a) Kuburen kutentam ik kwamanay Josef? (b) Mutapu ik wadingay nich Josef chisu chadingay mu rukan?

10 Josef wading kashalapol ushinshamena wa Yehova wamana kuburen kutentam kudi angendj. Pakwez chamwovisha kuyip nakash kwading kuburen kutentam kwamusadinau kudi anamakwend. Padingay Josef ni mivu 17, anamakwend amukwata ku usu ni amulandisha mudi muswik. Kupwa amutwala mu Idjibit. (Disambishil 37:23-28; 42:21) Kupwa, mwi ngand ya wingendj yiniya, Josef amudimbena anch wakimba kulal ni mband umwing ku usu ni amuteka mu rukan pakad kumurumburish. (Disambishil 39:17-20) Josef wamana mar mudi muswik ni mudi muntu wa rukan mu mivu piswimp 13. Malejan ik tukutwisha kwilejin ku yom yamushikena Josef yikutwisha kutukwash anch atusadin nich kuburen kutentam kudi akadivar netu?

 11 Padingay Josef mu rukan, nfansey wa mwant nindiy amuteka mu rukan. Uchuku umwing, nfansey walata chilat, chawiy Yehova wamukwasha Josef kuchirumburil. Josef warumburila anch nfansey akumubudish mu rukan ni ukuya kand kumusadin Farao. Josef wasadina mutapu winou mulong wa kumurumburil muntu winou mulong wend. Tukutwish kwilej yom yivud kadiap ching mulong wa yom yalonday pakwez mulong kand wa yom yalikay kulond.—Disambishil 40:5-13.

12, 13. (a) Mutapu ik twija anch Josef kitiyap kuburen kutentam? (b) Josef walika kulond yom ik kudi nfansey?

12 Tang Disambishil 40:14, 15. Ijik anch Josef walonda anch ‘ankwata ku usu.’ Dizu disadidinay Bibil pinap dikutwish kurumburik anch “kwiy.” Chimeken kamu patok anch amusadina nich kuburen kutentam. Josef walonda kand patok anch kafilap kwend nich uyimp wa mufundinau. Chawiy chamulejay nfansey anch amulondin kudi Farao. Chisu chading chitongijok chend? Walonda anch: “Chakwel niyam andioshap mu chikumbu chinech.”

13 Ov, Josef witiya yom yamushikena pakad kusal usu wa kusal chom kanang? Bwat! Josef wading wij anch amusadina nich kuburen kutentam nakash. Chawiy charumburilay mulong wend kudi nfansey,  nich ruchingej anch muntu winou ukutwish kumukwash. Pakwez ijik anch Mifund yilejenap anch Josef wamulejamu muntu mukwau, ap Farao, anch anamakwend amukwata ku usu. Chawiy, pezau anamakwend mu Idjibit ni kuchirish chisambu pamwing ni Josef, Farao wayaka nawamp ni wayitazuka kushakam nau mu Idjibit ni kusanger “yiwamp yawonsu ya mwi ngand.”—Disambishil 45:16-20.

Mboj jikutwish kupandakesh mulong (Tal paragraf wa 14)

14. Yom ik yikutuchidija chakwel tulik kulond yom yiyimp anch twaman kuburen kutentam mu chikumangen?

14 Anch twatong anch twamen kuburen kutentam mu chikumangen, tufanyidin kubabal chakwel kangal tulet mboj piur pa yom yiney. Chawiy, tufanyidin kwit ukwash kudi amakurump ni kuyilej anch mukadivar wasadin chitil chijim. (In Levi 5:1) Pakwez, yisu yivud anch chidiap chitil chijim, chikutwish kuswapal kuchirish chisambu ni mukadivar pakad kumulejamu muntu mukwau ap amakurump a chikumangen. (Tang Mateu 5:23, 24; 18:15.) El tushalany ashinshamena ni kusadin mbil ja mu Bibil mu milong yiney. Yisu yimwing tukutwish kuman anch twatesha nayimp piur pa mulong kampand ni katusadinap kwetu nich kuburen kutentam. Kupwa tukusangar anch twasalap mulong winou upandakana kuyip mu kulond yom yiyimp piur pa mukadivar netu! Vurik anch ap anch tuyingin nich ap tufil nich, kulond yom yiyimp kudiap kupwish mulong. Kwikal ashinshamena kudi Yehova ni kudi akadivar netu kukutuchidij ku kurumbuk mudi kwinoku. Nfund a kuseng walonda anch kudi muntu “ukata kwendil mu kashinsh.” Muntu mudi winou “ndiy wakad kufukej nich rudim rend, ap kusal nayimp kudi murund nend.”—Kuseng 15:2, 3; Jakobu 3:5.

VURIK URUND WEY WA USEY NAKASH

15. Urund wa Josef ni Yehova wading chiyukish mutapu ik?

15 Tukutwish kwilejin dilejan dikwau dia usey kusutil Josef. Mu mivu 13 yamanay mar mulong wa kumusadin nich kuburen kutentam, Josef wamekesha anch wamana milong mudi mwading mumenay Yehova. (Disambishil 45:5-8) Kamufishap nich Yehova piur pa mulong wend. Mwawiy, Josef kuvuramenap kuburen kutentam kwamusadinau, pakwez kafundakeshap. Cha usey nakash, kalikap kurumbok ni yisalijok yiyimp ya antu akwau yimwaurila kudi Yehova. Kushinshaman kwa Josef kwamwinkisha mutapu wa kuman kurijek kuburen kutentam kudi Yehova ni chiyukish kudi amwinend ni dijuku diend.

Josef kalikap kuburen kuwanyin ni yisalijok yiyimp ya antu akwau yimwaurila kudi Yehova

16. Mutapu ik tukutwisha kusej piswimp nakash kudi Yehova anch twaman kuburen kutentam mu chikumangen?

16 Mutapu wawiy umwing, tufanyidin kulam nawamp ni kuchidij urund wetu ni Yehova. Tufanyidinap kulik kurumbok kwa akadivar netu kutwauril ni Nzamb tukatining ni tukata kwifukwil. (Rom 8:38, 39) Pakwez, anch twaman kuburen kutentam  mu chikumangen, tufanyidin kumwimburij Josef ni kusej piswimp ni Yehova. Sal usu wa kuman yom mudi mumenay Yehova. Kupwa kwa kusal yawonsu tufanyidina kusal mulong wa kupwish milong kulondwish mbil ja mu Bibil, tufanyidin kusha milong mu makas ma Yehova. Tukutwish kwikal ni kashinsh anch Yehova ukupwish milong mu chisu chiwanyidina ni mu mutapu uwamp.

MUCHINGEJINA ‘NZUJ WA MANGAND MAWONSU’

17. Mutapu ik tukutwisha kumekesh anch tukwet ruchingej mudiay ‘Nzuj wa mangand mawonsu’?

17 Pitudia mu mangand minam mayimp, tukutwish kuchingejin kuman kuburen kutentam. Pachipatu, ey ap muntu mukwau wija ukutwish kuman yom yimekena mudi ya kuburen kutentam mu chikumangen. Pakwez kangal wipwakal. (Kuseng 119:165) Pakwez shal ushinshamena kudi Nzamb, kulembil chakwel akukwasha, ni kumuchingejin ndiy. Vurik anch mulong wa kuburen kuwanyin, ukutwish watesh yom nayimp ni pamwing ap ukutwishap kwijik nawamp yom yawonsu piur pa mulong kampand. Imburij chilakej cha Josef ni ipuk kulond mazu mayimp, makutwisha mapandikesh mulong. Kupwa, pa ndond pa kwichengejin amwiney, kwat mupak wa kushal ushinshamena ni kuchingel nich kushimpish muchim chakwel Yehova apwisha mulong. Chawiy ukwikal ni dilau dia Yehova ni chiyukish chend, mudi mwadingay nich Josef. Ukwikal nich kashinsh anch Yehova, ‘Nzuj wa mangand mawonsu,’ usadining chisu chawonsu yom yitentamina, “mulong jinjil jend jawonsu jidi [jitentamina].”—Disambishil 18:25; Kuvurik Yijil 32:4.

18. Yom ik tukushinshikina mu mutu wa mulong ulondwilaku ou?

18 Mu mutu wa mulong ulondwilaku ou tukushinshikin yilakej yaad ya kuburen kutentam pakach pa antu a Yehova a pasak. Yilakej yiney yikutukwash kuman mutapu ukutwisha kutukwash kwikepish ni dilikishin kwimburij chitongijok cha Yehova piur pa kuburen kutentam.

^ par. 7 Tal rusangu ra mwom ra Willi Diehl, rilondina anch,‘ Jéhovah est mon Dieu en qui je me confierai,’ mu Chinong cha Kalam cha 1, Ngond wa 11, 1991, mu Français.