Yang pafundinau anch yidiamu

Yang pafundinau anch yidiamu

El Muchim Wey wa Kwipan Umutumbish Yehova!

El Muchim Wey wa Kwipan Umutumbish Yehova!

‘Mulong antu ipanin kwa kwikatin, mutumbishany Yehova!’ —ANKALANSAMBU 5:2.

MIMINY: 40, 10

1, 2. (a) Yom ik yalonday Elifaz ni Bilidad piur pa mutapu umeningay Nzamb mudimu wetu? (b) Yom ik yalonday Yehova pa mulong winou?

KWASUTIN kal mivu yivud, antu asatu aya kwambamb ni kashalapol ushinshamena wa Nzamb utazukinau anch Job. Umwing utazukinau anch, Elifaz mwin Tema, wamwipula Job yipul yimwing ya usey anch: ‘Ov, muntu umwing niyend ukwet ukwash kudi Nzamb? Ov muntu ukweta manangu ukwet usey kudi ndiy? Ov, komb Mwin Dikand Diawonsu usanger mulong wa kutentam kwey? Ov, chom ik chisakidilay ku yaku yey yiwanyidina?’ (Job 22:1-3) Elifaz watonga anch chakul chading bwat. Muntu mukwau wa pakach pau wading, Bilidad mwin Shuwak, nindiy wawejaku anch chikasiken kuyiman antu kudi Nzamb anch atentamin.—Tang Job 25:4.

Mikadil yawonsu yiwamp ap ukaliweny wawonsu tukweta yidiokil kudi Nzamb, ni ukat kushinshikin mutapu tuyisadidina yom yiney

2 Elifaz ni Bilidad asala usu chakwel Job iyova anch usu usadinay mulong wa kumusadin Yehova udi kwau wa chamwamu. Antu inay akimba anch Job itiyija anch tukwetingap usey nakash kudi Nzamb kusutamu amakej, angej ap aminany. (Job 4:19; 25:6) Alonda mwamu mulong ading ikepishin? (Job 22:29)  Chidi chakin anch Yehova udi mujim nakash ni etu tudi akemp nakash tukutwishap kwisikan nend. Anch tudi piur pa mukandu ap anch tudi mu avion tukat kutadin pa dididish, tukwijik kamu anch tudi akemp ni tukwetap usey. Pakwez wawiy mutapu wiyovilingay Yehova piur pa usu wetu tusadining mulong wa kumusadin ni mudimu ukash tusadining mulong wa Want? Bwat! Yehova wamuleja Elifaz, Bilidad, ni muntu wa kasatu, Sofar, anch alonda makasu. Kupwa Nzamb walonda anch wading umusangaredin Job ni wamutazuka anch “kashalapol wam.” (Job 42:7, 8) Chawiy tukutwish kwikal ni kashinsh anch ‘Nzamb ukat kuyisadin’ antu akad kuwanyin.

‘CHOM IK UMWINKISHINA?’

3. Yom ik yalonday Elihu piur pa usu tusadina mulong wa kumusadin Yehova? Yom ik yakimbay kulond?

3 Nsand umwing utazukinau anch Elihu wading uteshin mambamb mading pakach pa Job nau antu asatu. Papwa mambamb, Elihu wamwipula Job piur pa Yehova anch: “Anch ey utentamin, chom ik [umwinkishina]? Ap chom ik chikwakay ku makas mey?” (Job 35:7) Elihu niyend wakimba kulond anch usu wetu tusadina mulong wa kumusadin Yehova udi wa chamwamu? Bwat. Yehova kamuyulap Elihu, mudi mwayisalay antu akwau asatu. Elihu wading ni chitongijok chishalijadina ni chawawiy. Walonda anch Yehova kakwetap kuswir anch etu tumwifukwil. Yehova uwanyishin yom yawonsu. Kwikil chom tukutwisha kusal chikutwisha kumupitish ap kumwinkish usu. Pakwez mikadil yawonsu yiwamp ap ukaliweny wawonsu tukweta yidiokil kudi Nzamb, ni ukat kushinshikin mutapu tuyisadidina yom yiney.

4. Mutapu ik wiyovilingay Yehova anch twikal antu awamp kudi akwetu?

4 Pitumekeshining rukat rishinshamena kudi antu amwifukwidina Yehova, umening yisal yiney mudi tuyisadin kudi ndiy. Tutangin mu Jinswir 19:17 anch: “Mwin kumwovil kazwendj riy ukat kumusondjik [Yehova, ni Yehova] ukez kamuchirishin mulong wa chom chasalay.” Yehova ukat kushinshikin chisu chawonsu tukata kumekesh ranaken kudi akwetu. Ap anch udi Sakatang wa mangand mawonsu, Yehova umening yisal yiney mudi muntu umusondjikin ndiy, ni ukat kuyichirish nich yipan yiwamp yivud. Yesu Mwan a Nzamb, niyend witiyija yom yiney.—Tang Luka 14:13, 14.

5. Yipul ik tukushinshikina?

5 Pakur, Yehova wamutazuka muprofet Isay chakwel amutuma ni amusadina mu mutapu wa pakampwil. (Isay 6:8-10) Isay witiyija kutazuk kwinoku ni walonda anch: “Yam unou, ntuma.” Nlel unou, Yehova uyinkishin antu ashinshamena mutapu wa kusal mudimu wend. Tunan twa atushalapol a Yehova amekeshin anch akwet chitongijok mudi chadingay nich Isay. Itiyin yisend kwa kwikatin mulong wa kumusadin Yehova mu mitapu yivud ni mu jindond kushalijan ni akat kurish ni yom yikash yikata kuyishiken ni yakamish. Pakwez muntu ukutwish walond amwinend  anch: ‘Nikat kusangerang kusal mudimu wa Yehova kwa kwikatin, pakwez yom nisadina yikwet kamu usey? Ap anch nidiaku ap bwat, Yehova kakusalap anch mudimu wend usadik?’ Ov, wiyovilap kal mutapu winou? El twisambinany yom yimwing yayishikena atushalapol a Yehova aad a pakur mu mwom wau, Debora ni Barak, ni mutapu yikutwisha kutukwash kwakul ku yipul yiney.

NZAMB UKAT KUSWIMP WOM KU KUTAKAMAN

6. Mulong wak chading chimeken anch chiswapel kudi chisak cha amasalay a Jabin kuyiwin in Isarel?

6 Barak wading mwin Isarel warishang njit, ni Debora wading muprofet mband. Mu mivu 20, mwant wa in Kanan dijin diend Jabin “wayimesha in Isarel mar.” Amasalay a Jabin ading akwet chisum nakash chawiy in Isarel ading ashicha mu mal mau ovang wom wa kushemunik mu yikumbu yau. Amasalay a Jabin ading ni matemb ma njit 900 makweta makupkup ma utad ujal, pakwez in Isarel kadingap ni mat mulong wa kurish nich ap nkibu ja kwiking nich ayinau.—Ankalansambu 4:1-3, 13; 5:6-8. * (Tal mazu ma kwinshin.)

7, 8. (a) Chom ik chakusambish chamulejau Barak kudi Yehova? (b) Mutapu ik wayiwinau amasalay a Jabin kudi in Isarel? (Tal chipich cha kwinsambishin.)

7 Mu kuyifanikesh nau amasalay a Jabin, in Isarel amekana anch aziyin ni aswapel kuyiwin. Pakwez Yehova wamuleja Barak kusutin muprofet mband Debora anch: “Yang, ukayikumangej antwey amakundj awonsu ku mukandu wa Tabor, wakatambulap antu 10 000 a muchid wa Nefitali ni a muchid wa Zabulon am nikukubachikinay Sisera, kalal wa njit wa Jabin, en ukusankanijanany nend nich matend ni yisak yend ku wit wa Kison. Am nikumupan mu makas men.”—Ankalansambu 4:4-7.

8 Atazuka antu ading akatina, ni antu 10 000 akumangana ku Mukandu wa Tabor. Kupwa Barak nau antwend aya kurish njit nau amasalay a akankuny nau kwi ndond yitazukinau anch Tanach. (Tang Ankalansambu 4:14-16.) Yehova wayikwasha in Isarel? Mwaning. Kapamp kamwing kweza rinkind wa ruval ni ndond ya kurishin njit yading yiumina yikala malau. Chinech chayikwasha in Isarel kuwin. Barak wayilondula amasalay a Sisera mu ma kilometre 24, mwi njil yawonsu kushik ni kwi ndond kutazukinau anch Haroset. Ndond yimwing mwi njil ditemb dia Sisera diajama mu malau. Wadiokala pa ditemb ni wachin mau waya ku Zanamin, piswimp ni ku Kadesh. Kwinikwa Sisera waya kujingam mu mwinkand wa mband utazukinau anch Jayel. Sisera wading waziyang kal nakash ni walala tul. Pading palelay, Jayel nich kutakaman wamujipa. (Ankalansambu 4:17-21) Yehova wayikwasha kamu in Isarel kuyiwin akankuny nau! * (Tal mazu ma kwinshin.)

YITONGIJOK YISHALIJADINA NAKASH PIUR PA MUDIMU WA KWIKATIN

9. Yom ik twilejina mu Ankalansambu 5:20, 21 piur pa njit jarishau ni Sisera?

9 Twilejin yom yivud nakash piur pa yom yijimbwilau mu Ankalansambu shapitre wa 4 mu kutang shapitre ulondwilaku. Ankalansambu 5:20, 21 utulejin anch: “Atutumbu a mwiur arisha njit, kudiokal mu jinjil jau  arisha nend Sisera. Wit wa Kison wayikomba shitit.” Chinech chirumburikin anch angel ayikwasha in Isarel chisu charishau njit, ap chirumburikin anch kwading mayal madiokala mwiur? Bibil karumburilap yom yiney. Pakwez chiwapin kutong anch Yehova wapandisha antwend panakishay ruval muvud pa ndond ni pa chisu chiwanyidina chakwel matemb ma njit 900 masambish kujamijam. Mu Ankalansambu 4:14, 15, tutangin tupamp tusatu anch Yehova ndiy wapana usu kudi in Isarel chakwel awin. Kwikil ap mwin Isarel umwing wa pakach pa in kwikatin 10 000 wafanyina kupan usu mulong wa kuwin.

10, 11. Meroz wading ik? Ni mulong wak aushinga?

10 El tushinshikinany katat chom chimwing chisangareshena nakash. Kupwa kwa in Isarel kuwin, Debora ni Barak awanga miminy ya kumutumbish nich Yehova. Awanga anch: “Muruu wa mwiur wa [Yehova] walonda anch ‘mashing kudi Meroz, mashing kudi antwau mulong awiy kezap kumukwash [Yehova], kumukwash [Yehova] kurish nau in dikand.’”—Ankalansambu 5:23.

11 Meroz wading chakin chom ik? Tukwetap kashinsh mulong wa chom chinech. Pakwez kushing kwa Meroz kwasadika chakwel ulika kand kwikalaku. Chimeken anch Meroz wading musumb mwading antu alika kwipan kwa kwikatin kudi Barak mulong wa kuya kurish njit. Mulong antu 10 000 ipana kwa kwikatin mulong wa kurish nau in Kanan, antu a ku Meroz atesha kutazuk kwayitazukau in kwikatin. Ap kand Meroz ukutwish kwikal musumb mwachininay Sisera chakwel alik kumujip kudi Barak. Pamwing ap antu a mu Meroz ading ni mutapu wa kumukwat Sisera pakwez kasalap mwamu. Tong mutapu wamumanau mwin kurish njit winou uswejina ukat kuchin mau mulong wa kupandish mwom wend mu jinjil jau! Afanyina kusal chom chimwing chimekeshina anch akwashin chitongijok cha Yehova. Anch asala mwamu, ing Yehova wakimba kuyifut. Pakwez chisu chadingau ni mutapu wa kusal chom kanang mulong wa Yehova, awiy kasalap. Chimeken anch antu a mu Meroz ading ashalijangen kamu ni Jayel, muntu wasala nich kutakaman.—Ankalansambu 5:24-27.

Tufanyidin kushinshikin chitongijok chetu piur pa kumusadin Yehova

12. Yitongijok ik ya antu kushalijan yidia mu Ankalansambu 5:9, 10? Mutapu ik kukutwisha kwikal ni usu padi etu?

12 Mu Ankalansambu 5:9, 10, tumen anch chitongijok cha in kwikatin 10 000 chading chishalijadin nakash ni chitongijok cha antu alika kwipan. Debora ni Barak ayibaza ‘in kutakel a mu Isarel, ipana ayinau kwa kwikatin.’ Ading kamu ashalijadin nakash nau ‘in kwendil pa ayimbur atok,’ iyova niyau anch ading akwet usey nakash mulong wa mudimu wa kwikatin. Antu inay ayilejen mudi ‘antu ashicha pa yikit,’ ni ‘ayila mwi njil,’ asangaredin mwom uwamp ushalijangena ni wa in kwikatin. Chinyim nau in kwikatin aya pamwing ni Barak mulong wa kurish ku mikandu ya mayal ya Tabor ni mwi nkurubuk yikweta chitosh ya Kison. Ayileja antu ading akatina mwom uwamp anch: ‘Tongany!’ Afanyina kubabal ni kutong piur pa mitapu yadingau nich ya kwipan yashadishau palikau kwipan mu mudimu wa Yehova. Nlel, niyetu tufanyidin  kwishinshikin mulong wa chitongijok chetu piur pa kumusadin Nzamb.

13. Mutapu ik wading ushalijangena chitongijok cha muchid wa Ruben, wa Dan, ni wa Aser ni chitongijok cha muchid wa Zabulon ni wa Nefitali?

13 In kwikatin 10 000 ading ni mutapu wa kuman ayinau mutapu wasalay Yehova mudi Mukaleng Nyikel. Afanyina kuyilej antu akwau piur pa yom yiney chisu chalejanau ‘yisalijok yitentamina ya Yehova.’ (Ankalansambu 5:11) Chinyim ni yom yiney, muchid wa Ruben, wa Dan, ni wa Aser atongina nakash pa mapit mau, mudi amikoku au, maat mau, ni yau yau ya atuwit pa ndond pa kutong piur pa mudimu. (Ankalansambu 5:15-17) Michid yawonsu yadingap mwamu. Muchid wa Zebulon ni wa Nefitali ‘itiya kufa’ mulong wa kumukwash Debora ni Barak. (Ankalansambu 5:18) Tukutwish kwilej dilejan dia usey kusutin yitongijok yiney yishalijadina piur pa kusal mudimu wa kwikatin.

‘MUTUMBISHANY YEHOVA!’

14. Mutapu ik tumekeshina anch tukwashin ukaleng wa Yehova nlel?

14 Nlel, tukwashinap winyikel wa Yehova kusutin mu kurish. Pakwez, tumekeshin ukwash wetu mu kulejan nich kutakaman ni mushiku. Kudi maswir nakash ma in kwikatin mu mudimu wa Yehova kusutamu pakur. Mamiliyon ma akadivar, anambaz nau ansand ipanin kwa kwikatin mu midimu kushalijan ya chisu chawonsu. Chilakej, avud adi ayibol, asadin ku Betel, asadin mudimu wa kutung Yot ya Want, ni ipanin kwa kwikatin ku yitentam. Amakurump amwing asadin mudimu ukash mu Komite wa Ukwash ku Milong ya Opital ni akwau akat kutenchik yitentam. Tukutwish kwikal ni kashinsh anch Yehova ukat kutusanger mulong tumusadidin kwa kwikatin mu mitapu yawonsu yiswirikedina ni kakezap kuvuramen usu wetu tusadina.—Hebereu 6:10.

Kurutu kwa kukwat mupak, tong piur pa mutapu ukutwisha mupak winou kwikal ni chibachikin mu dijuku diey ni mu chikumangen (Tal paragraf wa 15)

15. Mutapu ik tukutwisha kwikal ni kashinsh anch tushadishinap musangar wetu mu mudimu wa Yehova?

 15 Tufanyidin kushinshikin chitongijok chetu piur pa mudimu wa kwikatin. Tukutwish kwiyipul anch: ‘Nilikining anch akwetu asala mudimu nakash? Nipanin nakash mulong wa kukimb yom ya ku mujimbu pa ndond pa kumusadin Yehova? Ap nikat kwimburij ritiy ni kutakaman kwa Barak, Debora, Jayel, nau in kwikatin 10 000 mu kusadin yawonsu nikweta mulong wa kumusadin Yehova? Nikat kutong mulong wa kushemunikin mu musumb ukwau ap ngand yikwau mulong wa kukimb nfalang jivud chakwel nikala ni mwom uwamp? Anch mwawiy, nikat kumulembilang Yehova piur pa mutapu ukutwisha kushemunik kwinoku kwikal ni chibachikin mu dijuku diam ni mu chikumangen?’ * (Tal mazu ma kwinshin.)

16. Ap anch Yehova ukwet yom yawonsu, yom ik tukutwisha kumwinkish?

16 Yehova utwinkishining usey upandakena patulikiningay anch tukwasha winyikel wend. Kudiosh kamu chisu cha Adam ni Ev, Djabul ukatining anch antu ikala ku mutambu wend chakwel amubwambwila Yehova. Pakwez anch twakwash winyikel wa Yehova, tumulejin Satan patok anch ku mutambu wa nany tudia. Ritiy retu ni kushinshaman kwetu yitubachikin kwikal in kwikatin mu mudimu wa Yehova, ni chinech chikat kumusangaresh nakash. (Jinswir 23:15, 16) Nzamb wetu ukutwish kusadin ukwash wetu ushinshamena ni kuziyin kwetu mulong wa kumwakul Satan ku kusarumun kwend. (Jinswir 27:11) Kuziyin kwetu chidi chom tukutwisha kumwinkish Yehova mulong chikwet usey kudi ndiy ni chikat kumuletin musangar nakash.

17. Yom ik yitufundishinay Ankalansambu 5:31 piur pa yom yikusadika kurutu oku?

17 Kurutu oku muntu win mwawonsu pa divu ukusanger winyikel wa Yehova. Mutapu tutadina kurutu mulong wa chisu chinicha! Twiyovil mudi Debora ni Barak, awanga anch: “Mwamu mukat kujiyau akankuny ney awonsu, A! [Yehova], pakwez arund ney akat kwikal mudi muten muukata kubudik nich usu wau!” (Ankalansambu 5:31) Chinech chikusadik pakujiyishay Yehova mangand mayimp ma Satan. Anch njit ja Armagedon jasambish, Yehova kakwikalap ni kuswir kwa antu akwipana kwa kwikatin mulong wa kuyijip akankuny. Pakwez, ‘tukwiman’ ni “kuman dipandish dia [Yehova].” (2 Jinsangu 20:17) Pa chisu chinech, tukwet mitapu yiwamp ya kukwash winyikel wa Yehova nich kutakaman ni mushiku.

18. Mutapu ik ukutwishau kutaninamu antu akwau mu mudimu wey wa kwikatin?

18 Debora ni Barak asambisha kuwang muminy wa kuwin mulong wa kumutumbish Yehova, kadiap mulong wa kuyitumbish antu. Awanga anch: ‘Mulong antu ipanin kwa kwikatin, mutumbishany Yehova!’ (Ankalansambu 5:1, 2) Mutapu wawiy umwing, anch twamusadin Yehova mu mutapu win wawonsu uswirikedinay, antu akwau niyau akutwish kwikal akasikeshinau chakwel ‘amutumbish Yehova!’

^ par. 6 Kupkup chidi chikung chambukina, chilemp ni yisu yimwing chifumbining. Makupkup minam ading amakasin ku matemb ma njit, amatekang ku makar. Matemb minam mikalang mashiny ma kushesh nich yom.

^ par. 8 Ukutwish kutang yivud piur pa jinsangu jinej jisangareshina mu Chinong cha Kalam cha 1, Ngond wa 8, 2015, paj 12-15, mu Français.

^ par. 15 Tal mutu wa mulong ulondina anch “Yakamish Piur pa Nfalang” mu nimero wa Chinong cha Kalam cha 1, Ngond wa 7, 2015.