“Ndiy wayovila riy. . . . Chad ndiy wasambisha kuyilej yom yivud.”​—MAR. 6:34.

MUMINY 70 Kimbany Antu a Kashinsh

YIDIA MU MUTU WA MULONG WINOU *

1. Mwikadil ik wa pakampwil wa wuntu wa Yesu? Rumburil.

MWIKADIL wa pakampwil nakash wa wuntu wa Yesu udi ukaliweny wend wa kwijik milong yawonsu turishina nich mulong tudi antu akad kuwanyin. Padingay pa divu, Yesu wading kusangar “pamwing nau antu asangera” ni kwov “ushon pamwing nau antu ovila ushon.” (Rom 12:15) Chilakej, pachirikau in kwilejend 70 nich musangar mulong awanyisha nawamp chisend chau cha mudimu wa kulejan, Yesu “wasangara mu spiritu utumbila.” (Luka 10:17-21, TMK) Ku mutambu ukwau, pamanay ushon wadingau nich antu mulong wa rufu ra Lazar, Yesu “wova ushon, wanenganana nakash.”​—Yoh. 11:33.

2. Yom ik yamukwasha Yesu kumekesh ranaken mulong wa antu akwau?

2 Yom ik yamukwasha Yesu kwikal ni riy ni ranaken mu mashakamin mend nau antu akad kuwanyin? Chakusambish chidi mulong Yesu wading uyikatin antu. Mudi mwalejanangau mu mutu wa mulong watakelang, Yesu ‘wasangera mu antu awonsu.’ (Jnsw. 8:31) Rukat rend mulong wa antu ramubachika kwijik nawamp mutapu ukatau antu kutong. Kambuy Yohan urumburil anch: “Wading wij yom yawonsu yidia mu michim yau [antu].” (Yoh. 2:25) Yesu wading ni ranaken mulong wa antu akwau. Antu amana rukat radingay nich piur pau ni itiya uruu wa Want. Anch niyetu twakudish ranaken rijim mulong wa antu, tukutwish kuyikwash chisu tudia mu mudimu wa kulejan.​—2 Tim. 4:5.

3-4. (a) Anch tukwet ranaken, mutapu ik tukumana mudimu wa kulejan? (b) Yom ik tukushinshikina mu mutu wa mulong winou?

3 Kambuy Paul wading wij anch wading ni chisend cha kusal mudimu wa kulejan, niyetu twij anch tukwet chisend cha kusal mudimu wa kulejan. (1 Kor. 9:16) Chawiy, anch tukwet ranaken, tukusalap kwetu mudimu wa kulejan anch mulong chidi chisend pakwez tukusal mwamu mulong tukatin  kuyikwash antu. Tukukat kumekesh anch tuyibangidin antu ni tukatin kuyikwash. Twij anch “chiyukish cha mwin kupan chipandakenamu cha mwin kutambul.” (Mid. 20:35) Anch twalejan mulong tukatin kuyikwash antu, tukusanger mudimu wa kulejan.

4 Mu mutu wa mulong winou, tukushinshikin mutapu wa kumekesh ranaken mu mudimu wa kulejan. Chakusambish, tukuman yom tukutwisha kwilejin ku mutapu wiyovay Yesu piur pa antu. Kupwa, tukushinshikin mitapu yinying tukutwisha kwimburij chilakej cha Yesu.​—1 Pita 2:21.

YESU WAMEKESHANG RANAKEN MU MUDIMU WA KULEJAN

Ranaken ramubachika Yesu kulejan uruu wongojina (Tal paragraf wa 5-6)

5-6. (a) Anany amekeshinau ranaken kudi Yesu? (b) Mulong wak Yesu wayovila antu ading afundishinay riy, mudi mwasambelau kulejan mu Isay 61:1, 2?

5 Shinshikin chilakej chimwing cha mutapu wamekeshay Yesu ranaken. Dichuku dimwing, Yesu ni in kwilejend aziya nakash mulong alejana pakad kupim. Kadingap ni “chisu cha kudia.” Chawiy Yesu waya ni in kwilejend “kwi ndond yau ayinau” mulong wa ‘kwiswedishaku pakemp.’ Pakwez, chisak cha antu chayilondula kwi ndond kwayau. Payimanay antu inay, mutapu ik wiyovay Yesu ni yom ik yasalay? “Ndiy wayovila riy * mulong ading mudi amikoku akad kafung. Chad ndiy wasambisha kuyilej yom yivud.”​—Mar. 6:30-34.

6 Mulong wak Yesu wova riy ap ranaken mulong wa antu inay? Wamana anch antu inay “ading mudi amikoku akad kafung.” Pamwing ap Yesu wamana anch amwing pakach pau ading atuzwendj ni asalang midimu yikash mulong wa kuwanyish maswir ma majuku mau. Ni pamwing ap akwau ading akwet ushon mulong wa rufu ra antu akatinau. Anch mwawiy, Yesu wafanyina kutesh nawamp milong yau. Mudi twisambinang mu mutu wa mulong watakelang, Yesu warisha pamwing ap ni milong mudi yiney. Mulong Yesu wading ubangidin yovil ya antu akwau, chinech chamubachika kuyilej uruu wading ufanyidina kuyikasikesh.​—Tang Isay 61:1, 2.

7. Mutapu ik tukutwisha kwimburij chilakej cha Yesu?

 7 Yom ik twilejidina ku chilakej cha Yesu? Mudi Yesu, niyetu atunyingumukin kudi antu adia “mudi amikoku akad kafung.” Antu inay arishin ni milong yivud nakash. Pakwez etu tukwet yom yiswirikedinau​—uruu wa Want. (Kuj. 14:6) Chawiy tukat kumwimburij mwant wetu ni tulejen rusangu ruwamp mulong tukat “kumwovil chimanamar riy, ni uburedina kand.” (Kus. 72:13) Tuyovidin antu riy ni tukatin kusal chom kanang mulong wa kuyikwash.

MUTAPU TUKUTWISHA KUMEKESH RANAKEN

Shinshikin maswir ma muntu ni muntu (Tal paragraf wa 8-9)

8. Mutapu ik umwing tukutwisha kumekesh ranaken chisu tudia mu mudimu wa kulejan? Let chilakej.

8 Yom ik yikutwisha kutukwash chakwel tuyimekeshina antu ranaken mu mudimu wa kulejan? Tufanyidin kwitek pa ndond ya antu tutanina mu mudimu wa kulejan ni kuyisadin mu mutapu tukatina anch niyetu atusadina. * (Mat. 7:12) El tushinshikinany mitapu yinying ya pakampwil tukutwisha kusal mwamu. Chakusambish, tufanyidin kushinshikin maswir ma muntu ni muntu. Chisu tulejena rusangu ruwamp, mudimu wetu ufaniken ni wa dokiter. Dokiter muwamp ukat kushinshikin maswir ma muyej ni muyej. Ukat kwipul yipul ni ukat kumutesh nawamp chisu chirumburilay muyej piur pa mayej mend. Pa ndond pa kumwinkish muyej mon, dokiter ukutwish kusutish chisu mulong wa kushinshikin yijingidij yimekeshina mayej ni kupwa ukutwish kumwinkish chad mon. Chilik chimwing, tukutwish kusadin niyetu mutapu winou mulong wa kusambish mambamb ni muntu mwawonsu tutanina mu mudimu wa kulejan. Tufanyidin kusal usu wa kwijik mashakamin ni yitongijok ya muntu ni muntu.

9. Chisu tudia mu mudimu wa kulejan, yom ik tufanyidina kwipuk kutong? Rumburil.

9 Anch watan muntu mu mudimu wa kulejan, kangal watong anch wij mashakamin mend, yitiyij yend ni mulong wak witiyijinay yom yiney. (Jnsw. 18:13) Pakwez ufanyidin kumwipul yipul nich nkeu mulong wa kwijik chom kanang piur pa muntu winou ni yom yitiyijinay. (Jnsw. 20:5) Anch chitwishikin kukwatijan ni yaku ya kwol kwen, mwipula piur pa mudimu wend, dijuku diend, yom yamushikena kal mu mwom ni yitongijok yend piur pa yom kanang. Anch twipul yipul, tuyinkishin antu mutapu wa kutulej mulong wak akwet kuswir kwa kutesh rusangu ruwamp. Anch twijik yom yiney, tukutwish kumekesh ranaken mulong wa maswir mau ma pakampwil ni kuyikwash mudi mwasalay Yesu.​—Ilakej ni 1 Korint 9:19-23.

Tongijokin pa mashakamin makutwishay kwikal nich muntu ukimbina kulej uruu (Tal paragraf wa 10-11)

10-11. Kukwatijan ni 2 Korint 4:7, 8, wisu mutapu ukwau tukutwisha kumekesh ranaken? Let chilakej.

10 Cha kaad, sal usu wa kutongin piur pa mutapu udia mashakamin mau. Yisu yimwing, tukutwish kutesh nawamp milong yirishinau nich. Chikwau kand, niyetu tukat kurish  ni milong yirishinau nich antu awonsu mulong niyetu tudi antu akad kuwanyin. (1 Kor. 10:13) Twij nawamp anch mu mangand minam, mwom uswapelap bwat. Tukat kutwish kujijaman kusutil ukwash wa Yehova. (Tang 2 Korint 4:7, 8.) Pakwez tongijokin piur pa antu akad kwikal ni urund wa piswimp ni Yehova. Chikutwish kuyikasiken nakash kushakam mu mangand minam pakad ukwash wa Nzamb. Mudi Yesu, tukat kuyovil riy ni tukatin kuyilej “rusangu ruwamp, rawiy kamu rusangu ra chisambu.”​—Isay 52:7.

11 Shinshikin chilakej cha mukadivar Sergey. Kurutu ileja uyakin, Sergey wading muntu ukweta usany ni wakad kulondolang. Chading chimukasikedin kwambamb ni antu akwau. Mu kusut kwa chisu, witiya kwilej Bibil. Sergey ulondin anch: “Pinasambisha kwilej Bibil, nileja anch in Kristu akwet chisend cha kuyilej antu akwau piur pa ritiy rau. Namana chakin kamu anch nikutwishap kusal mwamu.” Pakwez, watongijokina nakash piur pa antu akad kal kuteshap uyakin ni wamana kamu anch mashakamin mau mafanyidin kwikal makash mulong kamwijap Yehova. Ulondin kand anch: “Yom yisu nileja yanletina musangar nakash ni chisambu cha mukach. Nijika anch antu akwau akwet niyau kuswir kwa kwilej uyakin mudi winou.” Pading payila ranaken ra Sergey kupandakan, washikena kuman anch ukwet kutakaman kupandakena mulong wa kulejan. Sergey ulondin anch: “Nashimoka nakash pinamana anch kwambamb nau antu akwau piur pa Bibil kwasala anch nikala ni kutakaman. Ni kwambamb nau antu akwau piur pa yitiyij yam kwakasikesha ritiy ram.” *

Chitining chisu chakwel muntu aya kurutu mu spiritu (Tal paragraf wa 12-13)

12-13. Mulong wak tufanyidin kushimpish muchim chisu tuyifundishina antu mu mudimu wa kulejan? Let chilakej.

12 Cha kasatu, ikal mwin kushimpish muchim chisu ufundishina antu. Vurik anch, pamwing ap kandikal ilejangap uyakin umwing wa Bibil utwija nawamp. Ni avud pakach pau akatin nakash yitiyij yau. Akutwish kutong anch relijon wau chidi chom cha usey nakash chiyisadina anch ikala mu uumwing ni majuku mau, yishankur yau ni kwikal kand mu uumwing ni antu ashichau nau. Mutapu ik tukutwisha kuyikwash?

 13 Tong piur pa kufanikesh oku: Yom ik yikata kusadik anch akimbin kudiosh chilal chikur mulong wa kutekap chisu? Yisu yivud, akat kutung chilal chisu padandamedinau antu kusadil chilal chikur. Anch chilal chisu chapwa kutung, akutwish chad kudiosh chilal chikur. Chilik chimwing, kurutu kwa kumulej muntu chakwel alikap yitiyij yend “yikur,” tufanyidin chakusambish kumukwash kukat ni kwijik uyakin “usu” charumburik anch mafundish ma Bibil mading makad kwijikay chisu twasambisha kwilej nend. Kupwa ukutwish kwikal chad tayad mulong wa kulikap yitiyij yend yikur. Chikutwish kwit chisu mulong wa kumukwash muntu chakwel aswimpa.​—Rom 12:2.

14-15. Mutapu ik tukutwisha kuyikwash antu ija yom yikemp ap akad kwijik chom ap chimwing piur pa ruchingej ra kushakam chikupu mu paradis panap pansh? Let chilakej.

14 Anch twikal ashimpishina muchim pantaliken nau antu tutanina mu mudimu wa kulejan, tukutwishap kuchingej anch antu inay itiya uyakin wa Bibil kapamp ka kusambish kauteshau kal. Pakwez, ranaken rikutubachik kuyikwash kutongijokin pa yom yilondinay Bibil pakemp pakemp mu chisu kanang. Mudi chilakej, shinshikin mutapu tukutwisha kutongijok ni muntu piur pa ruchingej ra mwom wa chikupu mu paradis panap pa divu. Antu avud ij yom yikemp ni akwau kijap chom ap chimwing piur pa mafundish minam. Akutwish kutong anch ang muntu wafa, kakutwishap kand kwikal mwom. Ap akutwish kutong anch antu awonsu awamp akuya mwiur. Mutapu ik tukutwisha kuyikwash?

15 Mukadivar umwing ulejen mutapu ukatay kuyikwash antu kutesh nawamp ruchingej ra kushakam chikupu panap pa divu. Chakusambish ukat kutang Disambishil 1:28. Kupwa, ukat kumwipul muntu anch, ndond ik ni mashakamin ma mutapu ik makatay Nzamb anch antu ikala nich. Antu avud akwiling anch: “Pa divu ni wakata anch antu ikala ni mashakamin mawamp.” Kupwa mukadivar ukat kutang Isay 55:11 ni kwipul anch, ov, chitongijok cha Nzamb chaswimpa. Muntu ukwakul anch bwat. Kupwa mukadivar ukat kutang Kuseng 37:10, 11 ni kwipul piur pa mutapu ukwikala mashakamin ma antu mu machuku ma kurutu. Kusadin Bibil mu mutapu winou kwayikwashin kal antu avud kwijik anch Nzamb ukatin anch antu awamp ashakama chikupu mu Paradis panap pa divu.

Chisal chiwamp, mudi kufund mukand ukasikeshina, chikutwish kulet yibudikin yiwamp (Tal paragraf wa 16-17)

16-17. Kukwatijan ni chitongijok chidia mu Jinswir 3:27, yom ik yimwing tukutwisha kusal mulong wa kumekesh anch tuyibangidin antu akwau? Let chilakej.

16 Cha kanying, tongin pa yom ukutwisha kusal mulong wa kumekesh anch uyibangidin antu. Chilakej, ov, tukat kuyang kuyital antu pa chisu chakad kuwanyin? Tukutwish kwit dilikishin ni kumulej muntu anch tukwez kumutal pa chisu chiwamp. Chidi nchik anch mwin chikumbu ukwet kuswir kwa kumukwash kamudimu kakemp? Ap chidi nchik anch muntu kakutwishap kushemunik ku chikumbu mulong wa mayej ap upal? Mu yishiken mudi yiney, tufanyidin kumukwash muntu.​—Tang Jinswir 3:27.

 17 Nambaz umwing wamana yibudikin yiwamp nakash kupwa kwa kusal chom kanang chiwamp chading chimekena anch chikwetap usey. Mulong wa ranaken, wafunda mukand ku dijuku diafisha mwan. Mu mukand winou watekamu maverse mamwing mwongojina. Yom ik yasala dijuku dined? Maku wa mu dijuku dined diafisha wafunda anch: “Nad niyovil nayimp nangalosh. Nitongidinap anch ukwet chitongijok kanang piur pa mutapu twiyovang mulong wa mukand wey. Nijikitishin nakash mulong wa mukand wey watwongojang nakash. Nangalosh natangang mukand wey tupamp 20 ni kusut. Nikutwishap kurumburil mutapu watwongojang mukand winou. Tukujikitishin ni muchim wetu wawonsu.” Pakad kwidjidjek, tukutwish kuman yibudikin yiwamp anch twitek pa ndond ya antu akwau amena mar ni kusal chom kanang mulong wa kuyikwash.

LAM CHITONGIJOK CHISIKENA CHA CHISEND CHEY

18. Kukwatijan ni 1 Korint 3:6, 7, chitongijok ik chisikena tufanyidina kwikal nich?

18 Chakin kamu, tufanyidin kwikal ni chitongijok chisikena cha chisend chetu mu mudimu wa kulejan. Tukutwish kusal chom kanang mulong wa kuyikwash antu kwilej piur pa Nzamb, pakwez tufanyidin kwijik anch kiyetwap tusadina mudimu upandikena kujimb. (Tang 1 Korint 3:6, 7.) Yehova ndiy ukata kuyipwit antu. (Yoh. 6:44) Ni kupwa, muntu ni muntu ukutwish kwitiy ap kulik rusangu ruwamp kulondwish mutapu udia muchim wend. (Mat. 13:4-8) Vurik anch antu avud kitiyap uruu wa Yesu​—ap anch wading Mulej mujim! Chakin kamu, tufanyidinap kuziy anch antu avud tusadina usu wa kukwash alik kwau kutesh uruu.

19. Yiyukish ik yikata kudiokal ku kumekesh ranaken mu mudimu wa kulejan?

19 Tukwikal ni yibudikin yiwamp anch twamekesh ranaken mu mudimu wa kulejan. Tukusanger nakash mudimu wa kulejan. Tukwikal ni yiyukish yipandikena yikata kudiokal ku kupan. Ni tukusal anch chiyiswapel antu akweta ‘muchim uwanyidina mulong wa mwom wa chikupu’ kwitiy rusangu ruwamp. (Mid. 13:48) Chawiy “yisu yawonsu [tukweta mutapu] chifanyidin etu kusal nawamp kudi antu awonsu, pakwez kupandakan kudi anamakwetu in ritiy.” (Gal. 6:10) Kupwa tukwikal ni musangar wa kumutumbish Tatukwetu wa mwiur.​—Mat. 5:16.

MUMINY 64 Kwipan ni Musangar mu Mudimu wa Kwangul

^ par. 5 KURUMBURIL KWA MAZU KANANG: Kukwatijan ni rusangu riner, riy rirumburikin kwikal ni yovil yikash mulong wa muntu umena mar ap usadidinau mu mutapu uyimp. Yovil mudi yiney yikutwish kumubachik muntu kusal yawonsu yikutwishay mulong wa kuyikwash antu.

^ par. 5 Tal mutu wa mulong ulondina anch “Mekesh Yaku Yiwamp mu Mudimu Wey wa Kulejan” udia mu Chinong cha Kalam cha 1 Ngond wa 5, 2014.

^ par. 8 Tal Chinong cha Kalam cha 1 Ngond wa 8, 2011, paj wa 21-22 mu Français.

^ par. 11 Chisu tumekeshina ranaken, tukutwish kupandakesh musangar wetu mu mudimu wa kulejan​—ni antu avud akusanger kutesh uruu wetu. Mulong wak? Mu mutu wa mulong winou, tukushinshikin yom tukutwisha kwilejin ku chilakej cha Yesu ni mitapu yinying ya pakampwil tukutwisha kumekesh anch tubangidin yovil ya antu tutanina mu mudimu wa kulejan.