“En awonsu ikalany nich . . . [ranaken].”​—1 PITA 3:8.

MUMINY 90 Tukasikeshijanany Umwing ni Mukwau

YIDIA MU MUTU WA MULONG WINOU *

1. Kukwatijan ni 1 Pita 3:8, mulong wak tukat kusanger kwikal pamwing nau antu abangidina yovil yetu ni ukash wetu?

TUKAT kwov musangar wa kwikal pakach pa antu akata kubangin yovil yetu ni ukash wetu. Akat kusal usu wa kwitek pa ndond yetu, kujingunin yom tutongina ni mutapu twiyovila. Akat kujingunin yom tukweta nich kuswir ni akat kutukwash—yisu yimwing kurutu tuyita ukwash winou. Tukat kuyijikitish kamu nakash antu akata kumekesh anch ‘atwanakedin.’ *Tang 1 Pita 3:8.

2. Mulong wak tufanyidin kusal usu chakwel tumekesha ranaken?

2 Mulong tudi in Kristu, etu awonsu tufanyidin kwitek pa ndond ya antu akwau, charumburik anch kuyanaken. Chakin kamu, chiswapelingap kusal mwamu chisu chawonsu. Mulong wak? Diyingishin dimwing didi anch mulong tudi antu akad kuwanyin. (Rom 3:23) Chawiy tufanyidin kurish ni yovil yetu ya chivadik ya kwitongin ching ayinetu. Chikwau kand, antu amwing pakach petu akutwish kukangany kumekesh ranaken mulong wa mutapu wayililau ap mulong wa yom yayishikena mu mwom. Kupwa kand, tukutwish kwikal ni yibachikin ya antu tushicha nau. Mu machuku minam ma nsudien, antu avud kakatap kubangin yovil ya antu akwau. Chawiy, adi “in kwikat ayinau.” (2 Tim. 3:1, 2) Yom ik yikutwisha kutukwash kupandikan yom yitukangeshina kumekesh ranaken mulong wa antu akwau?

3. (a) Mutapu ik tukutwisha kuwapish mutapu wetu wa kumekesh ranaken? (b) Yom ik tukwisambina mu mutu wa mulong winou?

3 Tukutwish kuwapish mutapu wetu wa kumekesh ranaken mu  kumwimburij Yehova Nzamb ni Mwanend Yesu Kristu. Yehova udi Nzamb wa rukat, ni utushidin chilakej chiwamp cha kubangin yovil ya antu akwau. (1 Yoh. 4:8) Yesu wimburija nawamp wuntu wa Tatukwend. (Yoh. 14:9) Padingay pa divu wamekesha nawamp mutapu ukutwishay muntu kumekesh ranaken. Mu mutu wa mulong winou, tukwisambin mutapu wamekeshay Yehova ni Yesu anch akat kubangin yovil ya antu akwau. Kupwa tukwisambin mutapu tukutwisha kwimburij yilakej yau.

CHILAKEJ CHA YEHOVA CHA KUYIMEKESHIN ANTU AKWAU RANAKEN

4. Isay 63:7-9 umekeshin mutapu ik anch Yehova ukat kubangin yovil ya atushalapol end?

4 Bibil ufundishin anch Yehova ukat kubangin yovil ya atushalapol end. Chilakej, shinshikin mutapu wiyovay Yehova chisu chadingau in Isarel mu yakamish kushalijan. Bibil ulondin anch: ‘Mu mar mau mawonsu, ndiy wamana nau mar.’ (Tang Isay 63:7-9.) Kupwa, kusutil muprofet Zakariy, Yehova walonda anch chisu chayimeshangau antu mar, chading mudi niyend akat kumumesh mar. Yehova wayileja atushalapol end anch: ‘Muntu mwawonsu ukupukwinanya en, upukwin ku kan a dis kam.’ (Zak. 2:8) Mazu makash mud ik mamekeshina mutapu ubangidinay Yehova antu end!

Mulong wa ranaken Yehova wayikwola in Isarel mu uswik mu Idjibit (Tal paragraf wa 5)

5. Let chilakej chimekeshina mutapu wasalay Yehova mulong wa kuyikwash atushalapol end ading amena mar.

5 Yehova ukat kusal yom yivud kusutamu kwau ching kuyanaken atushalapol end. Ukat kusal chom kanang mulong wa kuyikwash. Chilakej, pading pamenau in Isarel mar mudi aswik mu Idjibit, wamana mutapu wading umenau mar ni wakwata mupak wa kuyikwol. Yehova wamuleja Moses anch: “Am namen kal mar ma antwam. . . . Nateshil kal kudil kwau . . . nij mar mau. Katat nez kal pansh mulong wa kuyikamunin ku chikas cha in Idjibit.” (Kub. 3:7, 8) Mulong Yehova wayovila antu end ranaken, wayikwola mu uswik. Kupwa kwa yitot ya mivu, in Isarel ayirishikisha nakash kudi akankuny nau padingau mwi Ngand ya Kushilamu. Mutapu ik wasalay Yehova? Ndiy “wayovila riy ku kwinan kwau, mulong wa in kuyimesh mar ni kuyakamish.” Chikwau kand, ranaken ramubachika Yehova kuyikwash antu end. Watuma ankalansambu (anzuj) mulong wa kuyipandish in Isarel ku makas ma akankuny nau.—Ank. 2:16, 18.

6. Let chilakej chimekeshina mutapu wabanginay Yehova yovil ya muntu wading ni yitongijok yiyimp.

 6 Yehova ukat kubangin yovil ya antu end—ap anch yitongijok yau yidingap chisu chawonsu yiwamp. Shinshikin chilakej cha Yona. Nzamb wamutuma muprofet winou kulejan uruu wa dirumburish kudi in Ninive. Chisu chakarumukau Yehova wakwata mupak wa kulik kuyishesh. Pakwez, Yona kasangarap piur pa mupak winou. Mulong uruu wend walejanay wawanyinap “ndiy wova ujim nakash.” Pakwez Yehova washimpisha muchim pantaliken ni Yona ni wamukwasha kuswimp yitongijok yend. (Yona 3:10–4:11) Mu kusut kwa chisu, Yona watesha yom yading yimufunidishinau kudi Yehova ni amusadina kand kudi Yehova mulong wa kufund rusangu riner mulong wa kutaninamu kwetu.—Rom 15:4. *

7. Mutapu ukatay Yehova kuyisadin antu end utwinkishin kashinsh ik?

7 Mutapu ukatay Yehova kuyisadin antu end utwinkishin kashinsh anch ukat kuyibangin atushalapol end. Ukat kushinshikin mar ni kusansan kwa umwing ni umwing wa pakach petu. Yehova “wij muchim wa muntu ni muntu.” (2 Jsng. 6:30) Ukat kwijik yitongijok yetu yijingamina, yovil yetu yikash, ni mimbu yetu. Ni ‘ndiy kakwitiyap anch atwoza kusutamu usu wetu.’ (1 Kor. 10:13) Chakin kamu kushilamu kwinoku kutukasikeshin nakash!

CHILAKEJ CHA YESU CHA KUYIMEKESHIN ANTU AKWAU RANAKEN

8-10. Yom ik yimwing yamukwasha Yesu kuyibangin antu akwau nakash?

8 Padingay pa divu, Yesu wabanginang nakash yovil ya antu akwau. Kudi yom yisatu yamukwasha Yesu kuyibangin antu akwau. Chakusambish, mudi twamanang kwinsambishin, Yesu wamekesha kamu wuntu wa Tatukwend wa mwiur. Yesu wading uyikatin antu mudi Tatukwend. Ap anch wasangara mulong wamukwasha Yehova kusal yom, Yesu ‘wasangera kand mwa antu awonsu.’ (Jnsw. 8:31) Rukat ramubachika Yesu kubangin yovil ya antu akwau.

9 Cha kaad, mudi Yehova, Yesu ukutwish kwijik muchim wa muntu. Ukutwish kwijik yitongijok ni yovil ya muntu. (Mat. 9:4; Yoh. 13:10, 11) Chawiy pajinguninay Yesu anch antu ading ovil ushon nakash, ranaken ramubachika kuyongoj.—Isay 61:1, 2; Luka 4:17-21.

10 Cha kasatu, Yesu amwinend warisha ni yakamish yimwing yirishiningau nich antu. Chilakej, chimeken anch Yesu wapamina mu dijuku dia atuzwendj. Kusutil kusal mudimu pamwing ni tatukwend wamulila, Josef, Yesu wileja mutapu wa kusal mudimu ukash wa makas. (Mat. 13:55; Mar. 6:3) Chimeken kand anch Josef wafa kurutu kwa Yesu kupwish mudimu wend panap pansh. Chawiy chimeken anch Yesu niyend wiyova nayimp mulong wa rufu ra mukatish nend. Ni Yesu wading wij mutapu chidia chikash kwikal mu dijuku mudia antu akweta yitongijok kushalijan piur pa relijon. (Yoh. 7:5) Yishiken yiney ni yikwau kand yamukwasha Yesu kwijik yakamish ni yovil yikatau kurish nich antu.

Away from the crowd, Jesus compassionately heals a deaf man (See paragraph 11)

11. Chisu ik chamekana kamu patok ranaken ra Yesu? Rumburil. (Tal chipich cha kwinsambishil.)

11 Ranaken ra Yesu ramekanang nakash chisu chasalangay yilay. Yesu kasalangap kwend yilay mulong kwau chimufanyidin kusal mwamu. Ndiy ‘wayovila riy nakash’ antu ading amena mar. (Mat. 20:29-34; Mar. 1:40-42) Chilakej, tongin yovil yadingay nich Yesu chisu chadiokalay mu chisak cha antu waya kuns mulong wa kumwok kajikamatu ap chisu chamuvumbulay mwan ikundj umwing kusu wa mwadiamufu. (Mar. 7:32-35; Luka 7:12-15) Yesu witeka pa ndond ya antu inay ni wakata kuyikwash.

12. Yohan 11:32-35 umekeshin mutapu ik ranaken ra Yesu mulong wa Mart ni Mariy?

 12 Yesu wamekesha ranaken mulong wa Mart ni Mariy. Pamanay mutapu wading wovilau ushon mulong wa rufu ra mwanamakwau Lazar, “Yesu wadila.” (Tang Yohan 11:32-35.) Kadilap kwend mulong wa rufu ra murund nend wa piswimp. Mulong wading wij kwend anch ukumuvumbul. Pakwez Yesu wadila mulong wamana mutapu wading wiyovilau arund nend nayimp mulong wa rufu ra mpanyau Lazar.

13. Mulong wak tudi akasikeshinau kwijik anch Yesu ukat kuyanaken antu?

13 Kwijik anch Yesu wading kwitek pa ndond ya antu akwau kutukasikeshin nakash. Chakin kamu, tudiap antu awanyidina mudi Yesu. Pakwez, tumukatin mulong wayisadina antu akwau nich ranaken. (1 Pita 1:8) Twiyovil akasikeshinau kwijik anch katat ukat kuyikel mudi Mwant wa Want wa Nzamb. Piswimp ap ukupwish mar mawonsu. Mulong Yesu wading mudi muntu pa divu, ndiy kamu uwanyidina kuyidiosh antu mu mar ni kudiosh kusansan kukash kudiokila ku winyikel wa Satan. Chawiy, tudi ayukina kwikal ni Nyikel ukutwisha “kutwovil riy mulong wa kuziy kwetu.”—Heb. 2:17, 18; 4:15, 16.

IMBURIJ CHILAKEJ CHA YEHOVA NI YESU

14. Kukwatijan ni Efes 5:1, 2, tukat kwiyov abachikinau kusal yom ik?

14 Anch twatongijokin pa chilakej cha Yehova ni Yesu, tukat kwiyov abachikinau kumekesh ranaken mulong wa antu akwau. (Tang Efes 5:1, 2.) Tukutwishap kwijik muchim wa muntu mudi mukatau awiy kusal. Chikalap nchik mwamu, tukutwish kusal usu wa kutesh yovil ni kwijik maswir ma antu akwau. (2 Kor. 11:29) Chinyim nau antu in choy adia mu mangand, tufanyidin kusal usu wa ‘kutal dis, kangal mu kusanger ching pa yom yetu ayinetu, pakwez kand mu kusanger pa yom ya antu akwau.’—Fil. 2:4.

(Tal paragraf wa 15-19) *

15. Pakampwil anany afanyidina kumekesh ranaken?

15 Amakurump a chikumangen afanyidin pakampwil kumekesh ranaken. Ij anch akwet chisend cha kupan kuchind mulong wa amikoku ayinkishau kulam. (Heb. 13:17) Mulong wa kuyikwash akadivar nau anambaz, amakurump afanyidin kwikal in ranaken. Mutapu ik ukutwishau amakurump kumekesh ranaken?

16. Yom ik yikatay kusal mukurump ukweta ranaken, ni mulong wak chidi cha usey kusal mwamu?

16 Mukurump mwin ranaken ukat kusutish chisu pamwing nau akadivar ni anambaz nend. Ukat kuyipul yipul ni kuyitesh nawamp ni kushimpish muchim. Chidi cha usey nakash kusal mwamu pakampwil anch mukoku umwing ukat kurumburil piur pa yitongijok ni yovil yend. (Jnsw. 20:5) Anch mukurump wa chikumangen wasambish kusutish chisu kwa kwikatin pamwing nau akadivar nend, akumuchingejin nakash, akuta nend urund ni akukasikesh rukat rau.—Mid. 20:37.

17. Mwikadil ik ukwetingau amakurump ukatau kusanger akadivar nau anambaz avud? Let chilakej.

17 Akadivar nau anambaz avud akat kulond anch mwikadil ukatau kusanger nakash kudiau amakurump a chikumangen kudi kubangin yovil ya antu akwau. Mulong wak? Adelaide ulondin anch: “Mulong chikat kusal anch chiswapala kwambamb nend mulong wij anch ukukutesh.” Ulondin kand anch: “Ukutwish kuman anch amakurump akubangidin kusutil mutapu ukatau kwakul chisu wambambina nau.” Mukadivar umwing umekeshina kujikitish mulong wa mutapu wamusadinau kudi mukurump ulondin anch: “Namana mansoj mamwichikin mukurump umwing mu mes panading nimulejina mulong wam. Nikudandamen kuvurik chisu chawonsu yom yiney.”—Rom 12:15.

18. Mutapu ik tukutwisha kukudish ranaken mulong wa antu akwau?

 18 Chakin kamu, kadiap kwau ching amakurump awiy afanyidina kumekesh ranaken. Etu awonsu tukutwish kukudish mwikadil winou. Mutapu ik? Sal usu wa kwijik milong yirishinau nich antu a mu dijuku diey ni yirishinau nich akadivar nau anambaz netu. Yibangina an akemp adia mu chikumangen, pamwing nau antu ayedina, ananapina kal, ni antu afishina anamakwau. Yipula mulong wa kwijik mutapu udiau. Yitesha nawamp chisu chikulejinau mutapu wiyovilau. Mekesh kamu patok anch uteshin nawamp milong yirishinau nich. Kupwa sal usu wa kuyikwash. Anch twasal mwamu, tumekeshin rukat rakin kusutin mu yisal.—1 Yoh. 3:18.

19. Mulong wak tufanyidin kwikal aswakela kuyikwash antu akwau?

19 Tufanyidin kwikal aswakela kuyikwash antu akwau. Mulong wak? Mulong antu akweting mwikadil kushalijan pantaliken ni milong yau. Amwing akatining kulond patok, pakwez akwau kakatiningap kulond patok piur pa milong yau. Chawiy ap anch tukatin kuyikwash, tufanyidinap kuyipul yipul yikutwisha kusal anch ifisha nich ap ova usany. (1 Tes. 4:11) Ap chisu chikatau antu akwau kutulej mutapu wiyovilau, tukutwish kuman yisu yimwing anch tufanyidinap kwitiy yitongijok yau. Pakwez tufanyidin kwijik anch wawiy mutapu wiyovilau. Tufanyidin kwikal aswakela kutesh ni ashimpishina muchim pa kulond.—Mat. 7:1; Jak. 1:19.

20. Yom ik tukwisambina mu mutu wa mulong wambakedinap?

20 Tufanyidin kumekesh ranaken mu chikumangen, pakwez tufanyidin kand kumekesh mwikadil winou uwamp mu mudimu wa kulejan. Mutapu ik tukutwisha kumekesh ranaken chisu twikadishila antu in kwilej? Tukwisambin chipul chinech mu mutu wa mulong wambakedinap.

MUMINY 130 Ikal Mwin Kulikishin

^ par. 5 KURUMBURIL KWA MAZU KANANG: Kumekesh ‘ranaken’ kurumburikin kusal usu wa kutesh mutapu wiyovilay muntu mukwau ni kusal usu wa kwiyov mudi mwiyovilay. (Rom 12:15) Mu mutu wa mulong winou, ‘ranaken’ ni ‘kubangin’ yirumburishin chom chimwing.

^ par. 1 Yehova wamekesha kand ranaken kudi atushalapol akwau ashinshamena ading aziyina ap ovila wom. Tongijokin pa rusangu ra Ana (1 Sam. 1:10-20), Elija (1 Ant 19:1-18), ni Ebed Melek (Jer. 38:7-13; 39:15-18).

^ par. 6 Yehova ni Yesu akat kubangin yovil ya antu akwau. Mu mutu wa mulong winou tukwisambin yom tukutwisha kwilejin ku yilakej yau. Tukwisambin kand mulong wak tufanyidin kubangin yovil ya antu akwau ni mutapu tukutwisha kusal mwamu.

^ par. 65 KURUMBURIL KWA YIPICH Paj wa 18: Yikumangan yikata kusadik ku Chot cha Want yikat kutwinkish mitapu yivud ya kutanijan nau ambay netu. Tumen (1) mukurump wa chikumangen ukat kwambamb ni mwin kulejan nsangarum pamwing ni makwend, (2) tatuku ni mwanend mband akat kumukwash nambaz ipal chakwel aya andama mu motak, ni (3) amakurump a chikumangen aad akat kumutesh nawamp nambaz ukimbina ukwash.