‘Mulong wak ulabin? Tumbuk, akubatish.’—MIDIMU 22:16.

MIMINY: 51, 135

1. Yom ik yikimbiningau anvaj in Kristu kwikal nich kashinsh kurutu kwa anau kutambul dibatish?

“MWA angond avud nadandamenang kumulej Tatuku ni Maku anch nikimbin kutambul dibatish, niyau anlejang piur pa mulong winou. Awiy akimbang kwikal nich kashinsh anch nij usey wa mupak winou. Machuku ma ngond 31, Ngond wa 12, 1934, diading dichuku dia usey nakash mu mwom wam mulong diawiy dichuku diambatishau.” Wawiy mutapu warumburilay nambaz Blossom Brandt yom yasadika chisu chakwatay mupak wa kutambul dibatish. Nlel kand, anvaj afanyidin kuyikwash anau kukwat mipak ya manangu. Anch mwan walab kutambul dibatish pakad diyingishin diwamp dia kuchingel, chinech chikutwish kuyipish urund wa mwan ni Yehova. (Jakobu 4:17) Kurutu anau atambula dibatish, anvaj akweta manangu akimbining kamu kwikal nich kashinsh anch mwanau ikundj ap mband  wawanyidin kal kamu kwikal mwin kwilej wa Kristu.

2. (a) Milong ik yamenau atulam a minyingumuku amwing? (b) Yom ik tukwileja mu mutu wa mulong winou?

2 Atulam a minyingumuku amen anch an abarika kal usand ni akweta mivu piswimp 20 kand kal kwau atambula dibatish ap anch apamidin mu uyakin. Yisu yivud, ansand inay akat kuya ku yikumangan, mu mudimu wa kulejan ni akat kulond ayinau anch adi Atuman a Yehova. Pakwez kudi yom kanang yisadina anch alika kwipan ayinau kudi Yehova ni kutambul dibatish. Mayingishin mamwing, chidi mulong anvaj atongining anch anau kand kal awanyin kutambul dibatish. Mu mutu wa mulong winou, tukwilej yom yinying yiyikangeshining anvaj amwing kuyikasikesh anau kutambul dibatish.

OV, MWANAM WAPAMIN KAL?

3. Anvaj a Blossom ading iyakamishin piur pa chom ik?

3 Anvaj a Blossom twajimbulang mu paragraf wa kusambish, ading akamin mulong wa kwijik anch mwanau wading wapamin kal kamu mulong wa kwijik chirumburikina kutambul dibatish ni kwijik mutapu udia chisend chinech mulong ukash. Mutapu ik ukutwishau anvaj kwijik anch mwanau wawanyidin kal kamu kwipan amwinend kudi Yehova?

4. Mutapu ik ukutwisha mbil ya Yesu yidia mu Mateu 28:19, 20 kuyikwash anvaj nlel?

4 Tang Mateu 28:19, 20. Bibil kalondinap anch muntu afanyidin kumubatish ching anch wawanyish mivu kanang. Pakwez chidi chiwamp kudi anvaj kutong nawamp chirumburikina kwikadish in kwilej. Mu dizu dia Grek, mazu ‘kwikadish in kwilej’ masadidinau mu Mateu 28:19 marumburikin kumufundish muntu ni chitongijok cha kumukwash ikala mwin kwilej Bibil ap mwin kwilej wa Yesu. Maverse makwau mu shapitre winou mamekeshin anch mwin kwilej udi muntu wilejina ni uteshina yom yafundishay Yesu ni ukatina kumuziyin. Kudiosh kamu chisu chikatau kuvadik an, anvaj afanyidin kuyifundish ni chitongijok cha kuyikwash kwipan ayinau kudi Yehova ni kwikal in kwilej a Kristu. Chakin kamu, abebe kawanyidinap kutambul dibatish. Pakwez, Bibil umekeshin anch ap an achidia kal an akemp akutwish kutesh ni kukat uyakin wa Bibil.

5, 6. (a) Yom yilondinay Bibil piur pa Timote yitushikijin kwijik yom ik piur pa dibatish? (b) Wisu mutapu uwamp kudi anvaj akweta manangu wa kuyikwash anau?

5 Timote wading mwin kwilej wipana kumusadin Yehova pading pachidiay mwanikanch. Kambuy Paul walonda anch Timote wasambisha kwilej uyakin wa dizu dia Nzamb “kudiokal ku wanikanch.” Tatukwend a Timote kamusadinangap Yehova, pakwez makwend ni ngakend mband amukwasha Timote kukat Dizu dia Nzamb. Mudi chibudikin, wikala ni ritiy rikash. (2 Timote 1:5; 3:14, 15) Wading uchid nsand wa mivu piswimp 20 chisu chawanyishay yom yitinau mulong wa kutambul yisend ya pakampwil mu chikumangen.—Midimu 16:1-3.

6 An awonsu kadingap mutapu umwing. Awonsu kakatap kuswa ni mivu yimwing. An amwing akat kutesh uyakin, akat kukwat mipak ya manangu ni akat kuyibatish pachidiau anikanch. Akwau akat kuchingel anch apamaku bil chad lel atambul dibatish. Anvaj in manangu kakatap kuyishindin anau chakwel atambul dibatish. Pakwez, akat kumukwash mwan ni mwan kuya kurutu kukwatijan  ni ronganyin rend. Anvaj akat kusangar anch anau asadin Jinswir 27:11. (Tang.) Pakwez afanyidin kuvurik anch chitongijok chau chidi cha kuyikwash anau kwikal in kwilej. Pakwetau chitongijok chinech mu manangu, akutwish kwiyipul anch: ‘Ov, mwanam wij kamu yom yivud mulong wa kwipan amwinend kudi Yehova ni kutambul dibatish?’

OV, MWANAM WIJ KAMU YOM YIVUD?

7. Ov, muntu ufanyidin kwijik yom yin yawonsu yifundishinay Bibil kurutu atambula dibatish? Rumburil.

Mwin kwilej mwawonsu wa Kristu ufanyidin kudandamen kwilej ap kupwa kwa kutambul dibatish

7 Anvaj payifundishinau anau, akat kuyikwash mulong ijika kamu uyakin nawamp. Ronganyin riner rikuyibachik an kwipan ayinau kudi Nzamb. Pakwez chinech chirumburikinap anch mwan ufanyidin kwijik yom yawonsu piur pa mafundish ma Bibil kurutu kwa kukwat mupak wa kwipan ni kutambul dibatish. Mwin kwilej mwawonsu wa Kristu ufanyidin kudandamen kwilej ap kupwa kwa kutambul dibatish. (Tang Kolosay 1:9, 10.) Chawiy yom ik yifanyidinay muntu kwijik kurutu kwa kutambul dibatish?

8, 9. Yom ik yamushikena kalam wa rukan mu musumb wa Filip ni yom ik tukutwisha kwilejin ku yom yiney?

8 Yom yashikena ku dijuku dimwing pasak yikutwish kuyikwash anvaj nlel. (Midimu 16:25-33) Mu muvu wa 50, Paul waya mu musumb wa Filip mu weny wend wa kaad wa umishoner. Padingay kwinikwa, ndiy ni Silas ayidimbena makasu, ayikwata ni ayiteka mu rukan. Chad uchuku, kwasadika kuzal kukash kwa divu kwanzurila yis yawonsu ya rukan. Kalam wa rukan watonga anch antu adia mu rukan awonsu achin kal ni wakimba kwijip. Pakwez Paul wamukangesha. Kupwa Paul ni Silas amufundisha kalam wa rukan ni dijuku diend uyakin piur pa Yesu. Itiyija yom yawosu yayilejau piur pa Yesu ni amana anch chading cha usey kumuziyin. Chawiy ayibatisha pakad kulab. Yom ik tukutwisha kwilejin ku yom yayishikena?

9 Chimeken anch kalam wa rukan winou wading isalay mukur wa mu Rom. Kadingap kija Dizu dia Nzamb. Chawiy mulong wa kwikal mwin Kristu, wafanyina kwilej uyakin wa pa dishin wa mu Bibil, kwijik yom yiyitinay Yehova atushalapol end ni kukat kuziyin mafundish ma Yesu. Yom yilejay mu chisu chikemp chinech yamukwasha kukat kutambul dibatish. Chakin kamu, wading ufanyidin kudandamen kwilej yom yikwau yivud kupwa kwa kumubatish. Chawiy anch mwaney wakulej anch ukimbin kutambul dibatish mulong umukatin Yehova ni ukatin kumuziyin, yom ik ukutwisha kusal? Ukumulik ambamba nau amakurump a chikumangen chakwel akwata mupak anch uwanyidin kutambul dibatish. * (Tal mazu ma kwinshin.) Mudi in Kristu awonsu abatishinau kal, ufanyidin kudandamen kwilej piur pa Yehova machuku mend mawonsu, ap kamu chikupu.—Rom 11:33, 34.

 KWILEJ IK KUDIA KUWAMP MULONG WA MWANAM?

10, 11. (a) Anvaj amwing atongining nchik? (b) Yom ik kamu yikutwisha kumuking mwan?

10 Anvaj amwing atongining anch chiding chiwamp kudi anau kurutu kwa kutambul dibatish ilejaku bil mashikol ni amanaku mudimu uwamp wa kusal. Anvaj mudi inay akutwish kamu kwikal ni yitongijok yiwamp, pakwez afanyidin kwiyipul anch: ‘Kwilej kwinoku kukumukwash kamu mwanam kwikal ni mashakamin mawamp? Yom yiney yikwatijadin kamu ni yom twilejina mu Bibil? Mutapu ik ukatinay Yehova anch tusadina mwom wetu?’—Tang Mulej 12:1.

11 Chidi chiwamp kuvurik anch mangand minam ni yom yidiamu yikwatijadinap ni yom yikatinay ni yitonginay Yehova. (Jakobu 4:7, 8; 1 Yohan 2:15-17; 5:19) Urund wa piswimp ni Yehova didi diking diwamp kudi mwan mulong wa Satan, mangand minam ni mulong wa yitongijok yiyimp ya mangand. Anch anvaj atek shikol ni mudimu uwamp pa ndond ya kusambish mu mwom, anau akwitiyij kamu anch yom yidia mu mangand yidi ya usey nakash kusutamu urund wau wa piswimp ni Yehova. Chinech chidi cha ubaj. Mudi nvaj mwin rukat, ov, ukatin anch mangand minam mamufundisha mwaney yom yitongina mangand minam anch yikumuletin musangar? Mutapu umwing wa kwikal ni mashakamin mawamp ni musangar wakin kudi kumutek Yehova pa ndond ya kusambish mu mwom wetu.—Tang Kuseng 1:2, 3.

CHIKWIKAL NCHIK ANCH MWANAM WASAL CHITIL?

12. Mulong wak anvaj amwing akat kuman anch chidi chiwamp kudi anau kuchingel mulong wa kutambul dibatish?

12 Maku umwing warumburila mulong wak kakatap anch mwanend changadim atambula dibatish. Ulondin anch: “Novil usany wa kulond anch diyingishin dijim diading piur pa ditenchik dia kwopatan mu chikumangen.” Mudi nambaz winou, anvaj avud amening anch chidi chiwamp kudi anau kuchingel kutambul dibatish kushik ni chisu  chikuwanyishau mivu kanang ni kwipuk kukwat mipak ya usup. (Disambishil 8:21; Jinswir 22:15) Anvaj inay atongin anch ang mwanau katambwilap dibatish, kakutwishap kumwopat. Pakwez uyimp ik udiaku mu kutong mwamu?—Jakobu 1:22.

13. Anch muntu katambwilap dibatish, chinech chirumburikin anch kakutwishap kupan kuchind kudi Yehova? Rumburil.

13 Chakin kamu, anvaj kakatiningap anch anau atambula dibatish kurutu kwa awiy kupan mwom yau kudi Yehova. Pakwez chikwikal chiyimp kutong anch mwan kakutwishap kupan kuchind kudi Yehova anch katambwilap dibatish. Mwan ukat kupan kuchind kudi Yehova chisu chikatay kwijik yom yilondinay Yehova piur pa uwamp ni uyimp. (Tang Jakobu 4:17.) Anvaj in manangu kakatap kuyikangesh anau kutambul dibatish. Ap anch mwan uchid kal mukemp, akat kumufundish kukat yom yilondinay Yehova anch yidi yiwamp ni kukis yom yilondinay anch yidi yiyimp, mudi musadinau niyau anvaj. (Luka 6:40) Rukat ra mwaney mulong wa Yehova rikumuchidij kusal yitil yijim, mulong ukukat kusal yom yilondinay Yehova anch yidi yiwamp.—Isay 35:8.

ANTU AKWAU AKUTWISH KUKWASH

14. Mutapu ik ukutwishau amakurump kukwash yom yisadinau anvaj?

14 Amakurump akutwish kukwash yom yisadinau anvaj mu kwikal ni chitongijok chiwamp chisu chisambidinau piur pa yom ya kusal mu mudimu wa Yehova. Nambaz umwing uvurikin anch Mukadivar Russell wambamba nend padingay ni mivu musamban. Walonda anch: “Wambamba ni yamam mwa aminit 15 piur pa mipak yam ya mu spiritu.” Yibudikin ik yikalaku? Kupwa, nambaz winou wikala chibol ni wasala mudimu wa uchibol mu mivu 70 ni kusut! Chakin, kamu mazu mawamp ni kukasikeshan yikutwish kwikal ni yibudikin yiwamp mu mwom wa muntu. (Jinswir 25:11) Amakurump akutwish kuyitazuk anvaj ni anau kukwash mudimu kanang ku Chot cha Want. Akutwish kuyilej an kusal yom kukwatijan ni mivu ni ukaliweny wau.

15. Mutapu ik ukutwishau antu akwau mu chikumangen kuyikwash ansand?

 15 Mutapu ik ukutwishau antu akwau mu chikumangen kukwash? Mu kumekesh kamu anch ayibangidin ansand. Chilakej, ukutwish kukimb yom yimekeshina anch ansand amusejidin Yehova piswimp. Ov, mwan wakulang nawamp ku yikumangan ap ukwet chikunku ku yikumangan ya mukach mwa rubing? Wapanin uman ku shikol ap wasadin chom chiwamp chisu chamupakinau kusal chom chiyimp? Anch chidi mwam, sal usu wa kumulej anch wasadin nawamp! Tukutwish kusal usu wa kwitekin mupak wa kwambamb nau ansand kurutu ni kupwa kwa yikumangan. Anch twasal mwamu, an akwiyov niyau anch adi ‘mu chikumangen chijim.’—Kuseng 35:18.

MUKWASHA MWANEY KUYA KURUTU MULONG WA KUTAMBUL DIBATISH

16, 17. (a) Mulong wak chidi cha usey kudi aney kutambul dibatish? (b) Musangar ik ukutwishau anvaj kwikal nich? (Tal chipich cha kwinsambishin.)

16 Pakach pa yisend yijim yikwetau anvaj padi kuyifundish anau kumukat Yehova. (Kuseng 127:3; Efes 6:4) Mu muchid wa Isarel, an ading ipanin kal kwau kudi Yehova kudiosh ku kuvadik kwau. Pakwez chidiap mwamu ni an avadikina nlel. Anch anvaj amukatin Yehova ni uyakin, chinech chirumburikinap anch anau niyau akusal mwamu. Kudiosh kamu dichuku dikuvadikay mwan, anvaj afanyidin kwikal ni mupak wa kumukwash kwikal mwin kwilej, kwipan amwinend kudi Nzamb ni kutambul dibatish. Chom ik chikutwisha kwikal cha usey nakash? Kwipan, dibatish ni mudimu ushinshamena kudi Yehova yikusal anch chimuswapela mwan kupand pa chisu cha mar makash.—Mateu 24:13.

Anvaj afanyidin kwikal ni chitongijok cha kuyikwash anau kwikal in kwilej (Tal paragraf wa 16, 17)

17 Chisu chakimbay Blossom Brandt kutambul dibatish, anvajend akimba kwikal nich kashinsh anch uwanyidin. Chisu chikalau nich kashinsh anch uwanyidin kutambul dibatish, akwasha mupak wend. Blossom urumburil yom yasalay tatukwend uchuku kurutu kwendendiy kutambul dibatish: “Watuleja etu awonsu kwas manungun ni wasala malembil. Wamuleja Yehova anch wading ni musangar nakash piur pa mupak wakwatay mwanend wa kupan mwom wend kudi Ndiy.” Kupwa kwa mivu 60 ni kusut, Blossom walonda anch: “Ukutwish kwikal nich kashinsh anch, mu machuku mawonsu ma kurutu, navuramenap uchuku winiwa!” En anvaj, ukutwish kwikalany niyen ni musangar chisu ukumananya anen akat kwipan ni kwikal atushalapol abatishinau kal a Yehova.

^ par. 9 Anvaj akutwish kwisamb ni anau jinsangu ja ukwash jidia mu Les jeunes s’interrogent — Réponses pratiques, Volim 2, paj 304-310. Tal kand “Yakul Ku Yipul Yen” mu Mudimu Wetu wa Want, Ngond wa 4, 2011, paj 2.