Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 3 , 2017

Yilimisha Antu Afanyidina Kulimish

Yilimisha Antu Afanyidina Kulimish

“Kudi ndiy ushicha pa ditand, ni kudi Mwan a Mukoku, chifanyidin kwikala [chiyukish], ni [kalimish], ni uyaj, ni dikand chikupu ni chikupu!”—KUJINGUNIK 5:13.

MIMINY: 10, 16

1. Mulong wak antu amwing awanyidin kalimish, ni yom ik tukwileja mu mutu wa mulong winou?

MUTAPU ik tuyilimishininga antu akwau? Tusadining mwamu kusutin mu kuyidimukin pakampwil ni mu kuyiziyin. Yisu yivud, tuyilimishining antu asadininga yom yiwanyidina ap antu akweta yisend ya usey ap akweta mwaz. Mu mutu wa mulong winou, tukwilej anany tufanyidina kulimish ni mulong wak.

2, 3. (a) Mulong wak Yehova ndiy uwanyidina kamu pakampwil kulimish? (Tal chipich cha kwinsambishin.) (b) Nany udia Mwan a Mukoku ulejenau mu Kujingunik 5:13, ni mulong wak tufanyidin kumulimish nakash?

2 Kujingunik 5:13 ulondin anch “ndiy ushicha pa ditand” ni “Mwan a Mukoku” awanyidin kalimish. “Ushicha pa ditand” ndiy Yehova. Mu Kujingunik shapitre wa 4, yitang ya mwiur yitwinkishin diyingishin dimwing dia kwijik mulong wak Yehova, ‘ndiy udingaku chikupu ni chikupu,’ ndiy kamu uwanyidina kulimish nakash. Alondin anch: ‘A! Yehova, Nzamb wetu! Ey yey uwanyidina kutambul uyaj, ni katumb, ni dikand. Mulong yey watanga yom yawonsu, ni yom yawonsu yidiaku yishich mulong wa rusot rey.’—Kujingunik 4:9-11.

 3 “Mwan a Mukoku” ulejenau mu Kujingunik 5:13 ndiy Yesu Kristu. Mutapu ik twija mwamu? Mulong padingay panap pansh, Yesu amutazukang anch “Mwan a Mukoku wa Nzamb ukata kudiosh yitil ya antu.” (Yohan 1:29) Mwant ik kand mukwau wipana mulong wa kufa mudi difut mulong wa antu end? Dined didi diyingishin diwamp dia kumulimish nakash. Yesu uwanyidin kalimish ka pakampwil mulong udi “Mwant wa ant, Nsalej wa ansalej.” (1 Timote 6:14-16, TMK.) Pamwing ap ukat kwiyov mudi mwiyova yitang ya mwiur yawanga anch: “Mwan a Mukoku wajipau, ndiy uwanyidina kutambul ukash, ni dipit, ni manangu, ni usu, ni [kalimish], ni uyaj, ni kushiman!”—Kujingunik 5:12.

4. Mulong wak chidi cha manangu kudi etu kumulimish Yehova ni Kristu?

4 Yohan 5:22, 23 ulondin anch Yehova wamuteka Kristu mudi nzuj wa antu awonsu. Dined diawiy diyingishin dijim dilejena mulong wak tufanyidina kumulimish Yesu. Ni anch twasal mwamu, tumulimishin kand Yehova. Anch twatond kumulimish nakash Yesu ni Tatukwend, tukutwish kwikal ni mwom wa chikupu.—Tang Kuseng 2:11, 12.

5. Mulong wak antu awonsu awanyidin kuyilimish mu mutapu uwanyidina?

5 Antu ayitanga “mu chifu cha Nzamb.” (Disambishil 1:27) Chinech chirumburikin anch antu avud akwet ukaliweny wa kumekesh mikadil mudi ya Nzamb. Chilakej, antu akutwish kumekesh rukat, kuwap, ni ranaken. Antu ayitanga kand nich kom, kayikwashining kwijik yom yiwamp ni yiyimp, kwikal in kashinsh ap kulik kwikal in kashinsh, kusal yom yiwanyidina ap kulik kusal yom yiwanyidina. (Rom 2:14, 15) Antu avud akatining yom yishitwila ni yom yiwamp ni akatining kushakam mu chisambu ni antu akwau. Chinech chidiap cha kushimok, mulong Yehova udi wakad kanvundangesh ni udi Nzamb wa chisambu. Chakin, antu awonsu ayitanga mu mutapu wa kumwimburij Yehova mu mutapu umwing ap ukwau. Mulong wa diyingishin dined, tufanyidin kuyiziyin ni kuyilimish.—Kuseng 8:5.

MEKESH KALIMISH MU MUTAPU UWAMP

6, 7. Mutapu ik ushalijadinau Atuman a Yehova nau antu avud chisu chimekeshinau kalimish kudi antu akwau?

6 Twij anch tufanyidin kuyilimish antu akwau, pakwez chikutwish kukasikan kwijik kalimish ka mutapu ik kafanyidina kuyimekeshin ni tupamp twinch tufanyidina kusal mwamu. Chinech chidi mulong antu avud akad kuwanyin akwet chibachikin chikash cha mwikadil wa mangand ma Satan. Antu avud ayimening amakundj ap amband mudi anzamb au. Pa ndond pa kuyilimish mudi mulondinay Yehova, antu inay ayilimishining akwau mu mutapu uyimp, akat kuyiman mudi anzamb au. Akat kwimburij mutapu wa kudjal, mikadil, ni yisalijok ya antakel a chipolitik ni antakel a chirelijon, in masengan, in kubul mizik nau antu akwau akweta katumb ap ijikena nakash.

7 In Kristu akin ijing anch chiding chiyimp kuyilimish antu akwau mu mutapu uyimp. Pakach pa antu awonsu ikalaku, ching kwend Yesu ndiy watushila chilakej chiwanyidina cha kwimburij. (1 Pita 2:21) Tufanyidin kuvurik anch “antu awonsu asala [chitil], adi kwau kulemp nend Nzamb mwin kuyipandish.” (Rom 3:23) Tufanyidinap kumwifukwil muntu ap umwing. Anch twayilimish antu mu mutapu uyimp, Yehova kakusangarap.

8, 9. (a) Atuman a Yehova ayimening antakel a mangand mutapu ik? (b) Chisu ik tukutwisha kulik kuyiziyin antakel a mangand?

 8 Kudi antu amwing tufanyidina kulimish ap kuziyin mulong wa mwaz wau ukwetau. Chilakej, tong piur pa antakel a mangand ni yom yisadiningau mulong weyey. Akwashining chakwel tulama jindond jetu tushiching nawamp ni akat kubangin maswir ma antu au. Tukat kutaninamu nakash mulong wa mudimu wau. Kambuy Paul walonda anch tufanyidin kuyiman antakel inay a mangand mudi ‘in kutakel.’ Walonda kand anch tufanyidin kuziyin ku yijil yau palonday anch: “Yifutany yom yawonsu yifanyidina kuyifut. Yilambulany yitad ya mitapu ni mitapu,” ni ‘yilimishany antu afanyidina kulimish.’—Rom 13:1, 7.

9 Pitudia Atuman a Yehova, tusadining yom yawonsu tukutwisha kusal mulong wa kumekesh anch tuyilimishining antakel a mangand. Chakin kamu, ngand ni ngand yikweting yishankur yau, chawiy yom yikutwitau antakel a ngand kampand yikutwish yashalijan ni yikutwitau kudi antakel a ngand kanang. Chikwau kand, tukutwish kovijan nau antakel a mangand pasadinau midimu yau. Chawiy, anch atulej kusal chom kanang chikutwisha kusal anch tumubwambwila Yehova, tufanyidinap kuchisal. Mu mutapu winou, tukumuziyin ni tukumulimish nakash Yehova pa ndond pa kuyiziyin antu.—Tang 1 Pita 2:13-17.

10. Mutapu ik watushilau atushalapol a Yehova a pakur chilakej chiwamp?

10 Tukutwish kwilejin kudi atushalapol a Yehova a pakur, alimisha winyikel nau anyikel au. Josef ni Mariy adi chilakej chiwamp. Pakimbau in Rom kwijik uvud wa antu ading ashicha mwi ngand, Josef ni Mariy aya ku Betlehem chakwel ifundikisha ap anch Mariy wading piswimp ni kuval. (Luka 2:1-5) Kambuy Paul udi chilakej chikwau chiwamp cha muntu walimisha anyikel. Pamufundau anch wasalang yom yiyimp, wasamba milong ni kalimish kurutu kwa Mwant Herod Agripa ni kurutu kwa Festus, nyikel wa Rom mwi ngand ya Yudeya.—Midimu 25:1-12; 26:1-3.

11, 12. (a) Mulong wak tukatap kuyilimish antakel a marelijon mu mutapu wa pakampwil? (b) Yom ik yasadika pamekeshay Kaman wa mwi ngand ya Autriche kalimish kudi muntu wa politik?

11 Chidi nchik piur pa antakel a chirelijon? Ov tufanyidin kuyilimish mu mutapu wa pakampwil? Tuyilimishining mudi tuyilimishininga kand antu awonsu. Pakwez chikwikal chiyimp anch twayilimish mu mutapu wa pakampwil, ap anch achingejin anch tusala mwamu. Mulong wak? Mulong relijon wa makasu kafundishiningap uyakin piur pa Nzamb ni piur pa Dizu diend, Bibil. Yesu wayilonda patok alej amakasu a chirelijon ni wayitazuka anch in rubabek ni antakel ayimp. (Mateu 23:23, 24) Ku mutambu ukwau, chidiap chiyimp kumekesh kalimish ka pakampwil ni kuyiziyin antakel a mangand. Pitusadining mwamu, akat kutukwash yisu yimwing.

12 Dr. Heinrich Gleissner, wading ntakel wa chipolitik mwi ngand ya Autriche. Chisu chasadika Njit ja Kaad ja Mangand Mawonsu, amukwata kudi in Nazis. Pamutekau mu kompony wa mar mulong wa kumufumb, watanijana ni Leopold Engleitner, Kaman wa Yehova wa mushiku wadiokala mwi ngand ya Autriche. Mukadivar Engleitner warumburila nich kalimish yitiyij yend kurutu kwa Dr. Gleissner ni wamutesha kamu nawamp. Papwa njit, Gleissner wasadina chisend chend mulong wa kuyikwash Atuman a Yehova a mwi ngand ya Autriche tupamp  tuvud. Ukutwish kand kwijik yilakej yikwau ya yom yiwamp yasadika mulong in Kristu amekesha kalimish kudi antakel a mangand.

YILIMISHA ANTU AKWAU

13. Anany tufanyidina pakampwil kulimish ni kuziyin ni mulong wak?

13 Tufanyidin kuyilimish akadivar nau anambaz netu. Chinech chidi kamu chakin pakampwil kudi akadivar atutakedila, mudi amakurump a chikumangen, atulam a munyingumuku, akadivar adia mu Komite wa Mutiy, ni akadivar asadidining mu Chisak Chitakedila. (Tang 1 Timote 5:17.) Akadivar inay awonsu akat kubangin ku maswir ma antu a Nzamb, chawiy Bibil uyitazukin atushalapol inay mudi ‘yipan.’ (Efes 4:8) Chawiy chirumburikin anch tufanyidin kuyilimish nakash ni kuyiziyin mu mutapu uwamp chikalap nchik ngand yau, kwilej kwau, mashakamin mau, ap nfalang jau. In Kristu a pakur atushila chilakej chiwamp. Ayilimishang mu mutapu uwamp antu atakelang, nlel niyetu tufanyidin kusal mwamu. Chisu tudia nau antu inay, chifanyidinap kuyikwat mudi angel, chirumburikin anch kuyiman mudi antu adia piur nakash. Pakwez tufanyidin kuyilimish mu mutapu uwamp ni kuyiziyin mulong wa mudimu wau ukash ni kwikepish kwau.—Tang 2 Korint 1:24; Kujingunik 19:10.

14, 15. Mutapu ik ushalijadinau amakurump in Kristu nau antakel avud a chirelijon?

14 Amakurump mudi inay adi mudi atufung ikepishina. Kakukatangap anch ayilimisha mu mutapu uyimp. Chawiy ashalijadin nakash nau antakel avud a chirelijon a nlel mudi kand mwadingau antakel avud a chirelijon a mu chirung cha Yesu. Yesu walonda piur pau anch: “Awiy akatil kushakam pa [jindond jiwamp ja] katumb mu yikumbu ya kulembil.  Akatil antu kuyilangwish nich kalimish mu yiku.”—Mateu 23:6, 7.

Anch amakurump a chikumangen ikepish ni kuziyin ku mazu ma Yesu, akadivar ni anambaz nau akuyikat, kuyilimish, ni kuyiziyin

15 Amakurump in Kristu akat kuziyin mazu ma Yesu malondina anch: “Pakwez kichifanyidinap kukutazukany en anch: ‘Mulej,’ mulong en awonsu udiany akadivar mu ritiy, umwing ni mukwau. En ukwetany Mulej ching kusu umwing. Kichifanyidinap en kumutazuk muntu wa pa mangand anch: ‘Tatuku,’ mulong ukwetany Tatukwen ching kusu umwing udia mwiur. Ap kichifanyidinap kukutazukany en anch: ‘Mwin kutakel,’ mulong ukwetany Mwin kutakel ching kusu umwing, ndiy kamu Kristu. Muntu upandakena kujimb pakach pen ufanyidin kwikal kashalapol wen. Muntu mwawonsu ukeza kwijimbish amwinend, akez kumushikumwish, pakwez muntu mwawonsu ukeza kwishikumwish amwinend, akez kumujimbish.” (Mateu 23:8-12) Anch amakurump a chikumangen a pa mangand mawonsu ikepish ni kuziyin ku mazu ma Yesu, akadivar ni anambaz nau akuyikat, kuyilimish, ni kuyiziyin.

Anch amakurump asal mudimu nich kwikepish, akuyikat, kuyilimish, ni kuyiziyin kudi akadivar nau (Tal paragraf wa 13-15)

16. Mulong wak tufanyidin kudandamen kusal usu nakash wa kumekesh kalimish?

16 Pakutwish kusut chisu pakwel anch twileja mutapu wa kuyilimish antu akwau mu mutapu uwamp. Chading kand mwamu kudi in Kristu a pakur. (Midimu 10:22-26; 3 Yohan 9, 10) Pakwez chifanyidin kusal usu nakash. Anch twayilimish antu akwau mu mutapu ukatinay Yehova, tukutaninamu nakash.

KUTANINAMU KUDIOKILING KU KUMEKESH KALIMISH

17. Kutaninamu ik kudiokiling mu kuyilimish mu mutapu uwamp antu akwet ulabu?

17 Anch twayilimish ni twayiziyin antu akweta ulabu mu teritwar wetu, akutwish pamwing ap kutuking chakwel tulejan pakad kwov wom. Akutwish kwikal ni chitongijok chiwamp mulong wa mudimu wetu wa kulejan. Yiney yawiy yasadika kwasutin kal mivu yivud mwi ngand ya Allemagne payay chibol umwing utazukinau anch Birgit ku shikol yilejinangay mwanend changadim dichuku dia kuyinkish ma biletin. Alej amuleja Birgit anch chidi cha musangar kwikal nau an a Atuman mu shikol mu mivu yivud. Amana anch an a Atuman asadin shikol kwikal ndond yiwamp. Birgit wayileja anch: “Anetu akat kuyifundish mulong wa kulondul mbil ja Nzamb piur pa mwikadil uwamp, ni ayifundishining kand kumekesh kalimish kudi alej ni kuyiziyin.” Mulej umwing walonda ang, anch an awonsu adi mudi an a Atuman ing kufundish kukuswapal. Ading ni chitongijok chiwamp piur pa an a Atuman, chawiy mu kusut kwa mbing jivud, alej amwing akumangana ku chitentam.

18, 19. Yom ik tufanyidina kuvurik chisu tuyilimishina amakurump a chikumangen?

18 Mbil tutanina mu Dizu dia Nzamb jikutwish kutukwash kwijik mutapu wa kuyilimish amakurump a chikumangen. (Tang Hebereu 13:7, 17.) Tufanyidin kuyijikitish mulong wa mudimu wau ukash usadiningau. Anch twaziyin ku wintakel utwinkishinau,  chinech chikuyikwash amakurump kusal mudimu ni musangar. Bibil ulondin anch tufanyidin kand kwimburij ritiy rau. Pakwez chirumburikinap anch tufanyidin kamu kwimburij mutapu wa pa ‘dishin’ wa kudjal, kulond, ni wa kufundish wa mukurump kampand. Anch tusadining mwamu, chikutwish kumekan mudi tuyilondwil antu pa ndond pa kumulondul Kristu. Tufanyidinap kuvuramen anch amakurump a chikumangen adi niyau antu akad kuwanyin mudi etu.

19 Anch twayilimish ni kuyiziyin amakurump ni kulik kuyiman mudi antu ijikena nakash, chinech chikuyikwash. Mutapu ik? Chikuyiswapel kushal ikepishina ni kulik kutong anch adi awamp kusutamu antu akwau ap kutong anch yom yisadiningau yiding chisu chawonsu yiwamp.

20. Mutapu ik tukutaninamu anch twayilimish antu akwau?

20 Kuyilimish antu akwau mu mutapu uwamp kukutukwash kulik kwikal in kwitutul ni kukutukwash kand kwikal ikepishina anch antu akwau atulimish pakampwil. Kukutwish kand kutuking mulong wa kutukwash kwiyep kwipwakal anch muntu tulimishina wasal chom chikutuziyisha. Kutaninamu kukwau kudi kwa kushal mu umwing mu dirijek dia Yehova. Dirijek dikumwinkishangap muntu ap umwing, ikala mwin kwitiyij ap wakad kwitiyij kalimish kapandakena.

21. Kutaninamu ik kwa usey nakash kudiokila ku kumekesh kalimish kudi antu akwau?

21 Kutaninamu kwa usey nakash kudiokila ku kumekesh kalimish kudi antu akwau kudi anch mu kusal mwamu tumusangareshin Nzamb. Tukusal yawonsu yikimbinay anch tusal ni kushal ashinshamena kudi ndiy. Chawiy, Yehova ukutwish kumwakul Satan, walonda anch kwikil muntu ukutwisha kushal ushinshamena. (Jinswir 27:11) Antu avud mu mangand kijingap kwau mutapu wa kuyilimish antu akwau mu mutapu uwanyidina. Chawiy, kujikitish mudi ik mulong twij mutapu wa kumekesh kalimish mu mutapu ukatinay Yehova!