Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 3 , 2017

Ov, Ukusadin Muchim Wey ku Yom Yafundau?

Ov, Ukusadin Muchim Wey ku Yom Yafundau?

“Yom yiney. . . ayifunda mulong wa kutubabesh nich etu. Mulong etu tudi piswimp ni disudiel dia mangand.”—1 KORINT 10:11.

MIMINY: 49, 29

1, 2. Mulong wak tukushinshikina yilakej ya ant anying a mu Yuda?

ANCH waman muntu wasiribuk ni wawa mwi njil, ufanyidin niyey kubabal anch wendin mwi njil yiniya. Mutapu umwing kand, mu kushinshikin kurumbok kwasalau antu akwau, tukutwish kwipuk kusal kurumbok mudi kwinoku. Chilakej, tukutwish kwilejin ku kurumbok kwa antu afundinau mu Bibil.

2 Ant anying in Yuda atwambambinang mu mutu wa mulong wapwang ou, amusadina Yehova ni muchim wawonsu. Pakwez arumbokang. Yom yau yasalau ayifunda mu Bibil chakwel tutongijokin pa yom yiney, ni kwilej malejan ma usey. Yom ik tukutwisha kwilejin ku yom yayishikena, ni mutapu ik tukutwisha kwipuk kurumbok mudi kwasalau?—Tang Rom 15:4.

KUCHINGEJIN MANANGU MA ANTU KUTWADINING KU KUSHESHIK

3-5. (a) Ap anch Asa wateka muchim wend wawonsu kudi Yehova, kurumbuk ik kwasalay? (b) Mulong wak Asa wayichingejina antu parishay ni Basha?

3 El tulondany bil chakusambish piur pa Asa. Wamuchingejina Yehova pezau antu miliyon umwing a in Etiopi  kuyirishikish in Yuda. Pakwez, Asa kumuchingejinap Yehova parishay ni Basha, mwant wa Isarel. Asa wakimba kumukangesh Basha kutung Rama, wadinga musumb wa usey mwi ngand ya Isarel piswimp ni mupak waurila want wa Yuda. (2 Jinsangu 16:1-3) Asa wakwata mupak anch chidi chiwamp kumukatul mwant wa Asiria milamu chakwel eza amukwasha. Pezau in Asiria kurishikish misumb ya Isarel, Basha “walikisha midimu ya kutung Rama ni kwimik mijikit.” (2 Jinsangu 16:5) Chakusambish, Asa watonga anch wakwata mupak uwamp.

4 Pakwez mutapu ik wiyovay Yehova? Yehova kasangarap mulong Asa kamuchingejinap ndiy, chawiy wamutuma muprofet Hanani mulong wa kumupup. (Tang 2 Jinsangu 16:7-9.) Hanani wamuleja Asa anch: “Katat kudiokal ilel ukwikal nich njit.” Asa wayikela musumb wa Rama, pakwez mu machuku ma kuyikel kwend ndiy nau antwend arisha njit jivud.

5 Mu mutu wa mulong wasutang, twilejang anch Yehova wamusangera Asa. Ap anch Asa wading wakad kuwanyin, Nzamb wamana anch Asa wading wipana kal kudi ndiy ni muchim wend wawonsu. (1 Ant 15:14) Ap mwamu, pakwatay Asa mupak uyimp, mar mamushikena. Mulong wak wichingejina amwinend nau antu akwau pa ndond pa kumuchingejin Yehova? Pamwing ap Asa watonga anch ukutwish kusadin amasalay a njit akweta ukaliweny mulong wa kuwin njit, ap watesha yiyul yiyimp ya antu akwau.

Mu milong yawonsu, tufanyidin kumuchingejin Yehova, kangal kwimen pa manangu metu

6. Yom ik tukutwisha kwilejin ku kurumbuk kwa Asa? Let chilakej.

6 Yom ik tukutwisha kwilejin ku kurumbuk kwa Asa? Mu milong yawonsu, tufanyidin kumuchingejin Yehova, kangal kwimen pa manangu metu. Tufanyidin kumwit ukwash, chikalap nchik milong yijim ap yikemp. Chidi chiwamp kutongin pa chom chinech: Ov, yisu yimwing tukat kwichingejin ayinetu mu kupwish milong mu mutapu tutongina anch udi uwamp? Anch tukat kushinshikinang chakusambish yilondinay Bibil ni kusal usu wa kusadin jinsangu jinej mulong wa kupwish nich milong yetu? Chilakej, tong bil anch dijuku diey dikukangeshin kuya ku yikumangan ni ku yitentam. Ov, ukwit ukwash kudi Yehova chakwel wijika cha kusal mulong wa kupwish mulong winou? Ap pamwing ap wading uburedin mudimu mu machuku mavud, katat waman kal muntu ukimbina kukwinkish mudimu. Ov, ukumulej anch ukweting yikumangan yiufanyidina kukumangan rubing ni rubing ni kulik kwov wom wa kushadish mudimu winou? Mulong wikalap wa mutapu ik, tufanyidin kuvurik chiyul cha nfund a kuseng walonda anch: ‘Ipana amwiney kudi Yehova; muchingejina, chadi ndiy ukukukwash.’—Kuseng 37:5.

 YOM IK YIKUTUSHIKENA ANCH TWATOND ARUND AYIMP?

7, 8. Kurumbok ik kwasalay Yosafat, ni yibudikin yading ik? (Tal chipich cha kwinsambishin.)

7 El tushinshikinany katat chilakej cha Yosafat mwan wa Asa. Wading ni mikadil yiwamp chawiy chamusangerau kudi Yehova. Ni pamuchingejinay Yehova, wasala yom yivud yiwamp. Pakwez wakwata kand mipak yimwing yiyimp. Chilakej, warijeka anch mwanend amwata mwan mband wa Mwant muyimp Akab. Kupwa Yosafat wabombakana ni Akab mulong wa kuyirishikish in Asiria, ap anch muprofet Mike wamubabesha anch kangal waya. Mwi njit, in Asiria amurishikisha Yosafat ni akimba kumujip. (2 Jinsangu 18:1-32) Pachirikay ku Yerusalem, muprofet Jehu wamwipula anch: “Ov, komb ufanyidin kwey kumukwash muntu muyimp? Ov, komb ey uyikatil kwey akat kumukisa [Yehova]?”—Tang 2 Jinsangu 19:1-3.

8 Ov, Yosafat wilejina ku yom yamushikena ni kubabesh kwamubabeshau kudi muprofet? Cha ushon, kasalap mwamu. Ap anch wadandamena kumukat Yehova ni wakata kumusangaresh, Yosafat wata kand urund nau antu akad kumwifukwil Yehova. Muntu winou wading Mwant Akazia mwan ikundj wa Akab. Yosafat ni Akazia asala maat pamwing. Pakwez maat mabaroka kurutu amasadina.—2 Jinsangu 20:35-37.

9. Yom ik yikutwisha kutushiken anch twatond arund ayimp?

9 Yom ik tukwilejina ku yom yamushikena Yosafat? Yosafat wasala yom yidia yiwamp ni “kumusurab [Yehova] nich muchim  wend wawonsu.” (2 Jinsangu 22:9) Pakwez watonda kusutish chisu pamwing nau antu ading amukisina Yehova, ni chinech chamuletina milong yikash mu mwom wend. Chawiy akimba kumujip. Vurik jinswir ja mu Bibil jilondina anch: “Muntu ukata kwend ni in manangu niyend ukez kwikal mwin manangu, pakwez ukata kwend nau ayisup ukez kaman mar.” (Jinswir 13:20) Tukatining kuyilej antu akwau piur pa Yehova. Pakwez chikwikal cha ubaj kwikal ni urund wa piswimp nau antu akad kumusadin Yehova.

Ov, witiyijin anch Nzamb ukat kutongin maswir mey ma rukat ni ma urund?

10. (a) Anch tukimbin kwatan ap kwachik, yom ik tukutwisha kwilejin kudi Yosafat? (b) Yom ik tufanyidina kuvurik?

10 Chilakej, anch wakimb kwatan ap kwachik, yom ik ukutwisha kwilejin kudi Yosafat? Pamwing ap ukutwish kwikal ni yitongijok ya kwatijan ni mutu wakad kumukat Yehova. Pamwing ap tukutwish kutong anch tukumanap muntu wa kwatijan nend pakach pa atushalapol a Nzamb. Ap antu amwing a mu dijuku dietu akutwish kutulej anch tufanyidin kwatan ap kwachik patuchida ansand. Chidi chakin anch Yehova watutanga ni maku ma kukat ni ma kutukat. Chawiy, anch tumenap muntu uwanyidina wa kwatijan nend, yom ik tukusala? Chom chimwing chikutwisha kutukwash kudi kutongijokin pa yom yamushikena Yosafat. Witang chisu chawonsu ukwash kudi Yehova. (2 Jinsangu 18:4-6) Pakwez, pikalay murund wa Akab muntu wakad kumukat Yehova, Yosafat wavuramena kubabesh kwa Yehova. Yosafat wafanyina kuvurik anch “[Yehova] wendishil mes mend pansh pawonsu, chakwel ayimanyin apanyina michim yau yawonsu kudi ndiy.” (2 Jinsangu 16:9) Niyetu tukutwish kuvurik anch Yehova ukatin kutukwash. Wijing mashakamin metu ni utukatin. Ov, witiyijin anch Nzamb ukat kutongin maswir mey ma rukat ni ma urund? Ikal ni kashinsh anch ukusal mwamu pa chisu chiwanyidina!

Kangal wata urund ni muntu wakad kumwifukwil Yehova (Tal paragraf wa 10)

KANGAL WALIK MUCHIM WEY WIBAZA

11, 12. (a) Yom ik yasalay Ezekias yamekesha chadinga mu muchim wend? (b) Mulong wak Yehova wamulikishina Ezekias?

11 Malejan ik tukwilejina kudi Ezekias? Yehova wamukwasha Ezekias kuman yadinga chakin mu muchim wend. (Tang 2 Jinsangu 32:31.) Payelay Ezekias nakash, Nzamb wamuleja anch ukuyerik ni wamwinkisha chijingidij mulong ikal ni kashinsh. Yehova wasala urel chakwel ushemunika kwinyim yintampu dikum. Kupwa yamekana anch anaat a mu Babilon akimba kwijik yom yivud piur pa chijingidij chinech, chawiy chayituminau antu kumutal Ezekias mulong wa kumwipul yom yiney. (2 Ant 20:8-13; 2 Jinsangu 32:24) Yehova kamulejap Ezekias mutapu wafanyinay kuyisadin. Bibil ulondin anch Yehova ‘wamulika amwinend’ mulong wa kuman yom yikusalay.  Ezekias wayileja antu a mu Babilon mapit mawonsu madingay nich. Yawiy yiney yamekesha yading mu muchim wa Ezekias. Mu mutapu ik?

12 Cha ushon, Ezekias wikala mwin kwibaz. Mudi chibudikin, Ezekias “kajikitishap mulong wa yom yiwamp yakay.” Bibil kalejenap mulong wak waswimpa yitongijok yend. Pamwing ap mulong wayiwina in Asiria ap mulong Yehova wamwoka. Pamwing ap mulong wikala mpich ni wijikana nakash. Ap anch Ezekias wamusadina Yehova ni muchim wend wawonsu, chisu chimwing wikala mwin kwibaz ni Yehova kasangarap. Pakwez, “Ezekias wishikumwisha swa kamu,” ni Nzamb wamulikishina.—2 Jinsangu 32:25-27; Kuseng 138:6.

Mutapu tusadining anch antu akwau atubaz ukutwish kumekesh chidia mu muchim wetu

13, 14. (a) Yishiken ik yikutwisha kumekesh yidia mu muchim wetu? (b) Mutapu ik tufanyidina kusal anch antu akwau atubaz?

13 Yom ik tukutwisha kwilejin kudi Ezekias ni kurumbuk kwasalay? Vurik anch Ezekias wibaza kupwa kwa kumukwash kudi Yehova chakwel ayiwin in Asiria kwi njit ni kupwa kwa kumok mayej mend. Chawiy anch yom yiwamp yatushiken ap anch atubaz kudi antu akwau, chom ik tufanyidina kusal? Mutapu tusadining ukutwish kumekesh chidia mu muchim wetu. Chilakej, mukadivar ukutwish kusal usu wa kurijek diskur ni wadisal kurutu kwa antu avud. Antu avud akumubaz mulong wa yom yalondangay. Mutapu ik ukusalay mulong wa kubaz kwinoku?

14 Ufanyidin kuvurik chisu chawonsu yom yalonday Yesu anch: “Anch wasalany yom yawonsu yinakulejanya, londany kwen anch: ‘Tudi kwetu atushalapol amwamu, twasalang ching kusu mudimu wetu.’” (Luka 17:10) Vurik anch chisu chikalay Ezekias mwin kwibaz, kasangerap yom yamukwashau kudi Yehova. Chawiy, anch antu akwau atubaz mulong wa diskur twasalang, yom ik yikutukwasha chakwel tushala ikepishina? Tukutwish kutongijokin pa yom yatusadinay kal Yehova. Ni tukutwish kwambambin piur pend ni mutapu utukwashiningay. Kupwa kwa yawonsu, ndiy watwinka Bibil ni spiritu utumbila chakwel tutwish kusal diskur.

EL YEHOVA AKUTAKEL PIUKWATINA MIPAK

15, 16. Yom ik yasalay Yosias yamushikija ku rufu?

15 Kupwa, yom ik tukutwisha kwilejin kudiay Yosias? Ap anch Yosias wading mwant muwamp, warumbuka ni kurumbuk kwinoku kwamushikija ku rufu. (Tang 2 Jinsangu 35:20-22.) Yom ik yashikena? Yosias wasambisha kurish njit nend Neko, mwant wa mu Idjibit, ap anch kadingap ni mayingishin ma kusal mwamu. Pakwez, Neko amwinend wamuleja Yosias anch kakatinap kurish nend njit. Bibil ulondin anch mazu ma Neko ‘madiokala kudi Nzamb.’ Pakwez Yosias waya kwi njit ni amujipa. Chawiy, mulong wak wamurishikisha Neko? Bibil kalejenap.

 16 Yosias wafanyina kukimb ijika anch yom yalonday Neko yadiokala chakin kudi Yehova. Mutapu ik wakimbay kusal mwamu? Wafanyina kumwipul Jeremiy muprofet wa Yehova. (2 Jinsangu 35:23, 25) Chikwau kand, Yosias wading ufanyidin kushinshikin milong yiney. Neko waya ku Karkemish kadiap mulong wa kurishikish Yerusalem, pakwez, mulong wa kurishikish muchid ukwau. Ni Neko kamusaalap Yehova ap antu end. Yosias katongijokinap nakash piur pa yom yiney kurutu kwa kukwat mupak wend. Yom ik twileja kal? Anch tukwet mulong ni tukimbin kukwat mupak, tufanyidin kushinshikin yom yikatinay Yehova anch tusal.

17. Anch tukwet milong, mutapu ik tukutwisha kwipuk kurumbuk mudi kwasalay Yosias?

17 Anch tukimbin kukwat mupak, tufanyidin chakusambish kutong piur pa mbil ja Bibil jikutwisha kutukwash ni mutapu wa kujisadin. Yisu yikwau, tukutwish kukimbijol yom yivud mu mikand yetu ap kumwit mukurump wa chikumangen chiyul. Mukurump winou ukutwish kukukwash kutongijokin pa mbil yikwau ya mu Bibil. Tongin piur pa yom yiney: Nambaz umwing amwatin kudi muntu wakad kwikal Kaman. Nambaz winou witenchikin mulong wa kuya mu mudimu wa kulejan pa dichuku kampand. (Midimu 4:20) Pakwez, dichuku dined nfumwend wamukangesh kuya mu mudimu wa kulejan. Wamulej anch pasut kal machuku mavud pakad kusutish chisu pamwing ni anch ukimbin kuya nend kwi ndond kanang. Chawiy nambaz winou utongidin pa mifund ya Bibil yikutwisha kumukwash kukwat mupak wa manangu. Wij anch chifanyidin kumuziyin Nzamb ni anch Yesu watuleja kwikadish antu in kwilej. (Mateu 28:19, 20; Midimu 5:29) Pakwez uvurikin kand anch mband ufanyidin kumuziyin nfumwend ni anch atushalapol a Nzamb afanyidin kwikal ni chitongijok chiwamp. (Efes 5:22-24; Filip 4:5) Ov, nfumwend wapakishang kumukangesh kuya mu kulejan, anch wakimbang kwend asutish nend chisu pamwing dichuku dined? Chitudia atushalapol a Yehova, tukatining kukwat mipak yiwamp ni yimusangareshina.

IPANA NI MUCHIM WAWONSU NI SANGAR

18. Yom ik tukutwisha kwilejin ku kutongijokin pa yilakej ya ant inay anying a mu Yuda?

18 Yisu yimwing, niyetu tukutwish kurumbuk mu kusal yom mudi yasalau ant inay anying a mu Yuda. Tukutwish (1) kuchingejin yitongijok yetu, (2) kutond arund ayimp, (3) kwikal ni mwikadil wa kwibaz, ap (4) kukwat mupak pakad kushinshikin chakusambish chidia rusot ra Nzamb. Ap mwamu kwikil diyingishin dikusala twiyova anch tukutwishap kumusangaresh Yehova. Umening yom yiwamp yidia mukach mwetu mudi mwamanay yom yiwamp yadinga mukach mwa ant inay anying. Yehova umening kand mutapu tumukatining nakash ni mutapu tukatining kumusadin kamu. Chawiy watwinkisha yilakej chakwel yitukwash kwipuk kurumbok kwinoku kukash. El tutongijokinany pa nsangu jinej ja mu Bibil ni kumujikitish Yehova mulong watwinka yom yiney!