Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 3 , 2017

 RUSANGU RA MWOM

Nataninamu mu Kwend Pamwing nau Antu a Manangu

Nataninamu mu Kwend Pamwing nau Antu a Manangu

NIVURIKIN dichuku dimwing pamanch kwading mashik nakash pasut kal mivu yivud mu Brookings, Dakota du Sud, mu États-Unis d’Amérique. Nijika anch chisu cha mashik chikimbin kwez. Nading mu chikumbu mwa kulamin yakudia ya annam mudia mashik pamwing ni kachisak kakemp ka antu, ni etu awonsu twading tuzadin mashik. Twading twiminy piswimp ni ntuku wizwila mem, ni mem mading matalel! El nikulejan yom yikemp piur pa mwom wam chakwel wijikany mulong wak twading mwinimwa.

DIJUKU DIAM

Mantu Alfred ni tatukwam

Navadika machuku ma ngond 7 mwi ngond wa Kasatu, 1936. Anvajam ading nau an anying, ni am nading wansudien. Twading tushich mu ka ferm kakemp ka kwingangel kwa Dakota du Sud. Mudimu wa ferm wading ukwet usey mu dijuku dietu, pakwez, wadingap ukweta usey nakash. Anvajam ayibatisha mudi Atuman a Yehova mu muvu wa 1934. Ipana kudi Yehova, chawiy, kusal rusot rend chading chom cha usey nakash kudi awiy. Tatukwam, Clarence, wasala mudi kashalapol wa chisak (utazukinau katat anch ntakel wa chisak cha amakurump) ni kupwa mantwam Alfred wasadina niyend pa ndond yiney mu ka chikumangen ketu kakemp ka mu Conde, ku Dakota du Sud.

Dijuku dietu diayangang chisu chawonsu ku yikumangan ni diayangang ku chikumbu ni chikumbu mulong wa kuyilej antu akwau piur pa ruchingej riwamp ridia mu Bibil mulong wa machuku ma kurutu. Chilakej cha anvajam ni kufumb kwatufumbau kwatukwasha kumukat Yehova. Mpanyam, Dorothy, niyam twikala in kulejan a Want patwawanyisha mivu musamban. Mu muvu wa 1943, nasambisha kusut ku Shikol ya Mudimu wa Uteokras piyasambisha.

Mudimu wa uchibol mu muvu wa 1952

Yitentam yading yikwet usey nakash mu mwom wetu. Nivurikin chitentam cha mu muvu wa 1949  mu Sioux Falls, ku Dakota du Sud. Mukadivar Grant Suiter wasala diskur dilondina anch “Ov, Chisu Chilabin Mudi Muutongina!” Diskur diend diakasikeshina anch in Kristu awonsu ipanina kal afanyidin kusadin mwom yau mulong wa kulejan rusangu ruwamp ra Want wa Nzamb. Kupwa kwa yiney, nipana kudi Yehova. Natambula dibatish ku chitentam cha munyingumuku chalondulaku, mu Brookings, machuku ma ngond 12, ngond wa 11, mu muvu wa 1949. Chawiy nadinga nishicha mu chikumbu cha kulamin yakudia ya annam mudia mashik nakash nalondang kwinsambishin. Etu awonsu anying twading tuchingedin chakwel atubatishina mwi ntuku mujim wasalau wa chikung.

Nakwata mupak anch nifanyidin kwikal chibol. Dichuku dia ngond 1, ngond wa 1, muvu wa 1952, nasambisha mudimu wa uchibol panadinga ni mivu 15. Bibil ulondin anch: “Muntu ukata kwend ni in manangu niyend ukez kwikal mwin manangu,” ni mu dijuku dietu mwading antu avud akweta manangu akasikesha mupak wam wa kwikal chibol. (Jinswir 13:20) Yisu yivud twayangang mu kulejan pamwing ni mantwam Julius, wading ni mivu 60. Ap anch mantwam wading mukurump nakash kwinsutamu am nasangerang kusal nend pamwing mudimu wa kulejan. Nilejina yom yivud kudiay ndiy ni ku yom yamanay mu mwom wend. Dorothy niyend wikala chibol.

ATULAM A MUNYINGUMUKU ANKWASHA

Panading nsand, anvajam atazukang atulam a munyingumuku ni akajau mulong wa kushakam netu. Ambay amwing, Jesse ni Lynn Cantwell ankwasha nakash. Ankwasha ni ankasikesha. Pasadinangau mu yikumangen ya piswimp, antazukang yisu yimwing mulong wa kuya nau mu mudimu wa kulejan. Nasangerang kusutish nau chisu pamwing! Nakatang kwipan nakash mu mudimu wa Yehova mudi mwasalangau awiy ni kusal mudimu wa uchibol.

Kalam wetu mukwau wa munyingumuku wading Bud Miller. Pezay ndiy ni mukajend, Joan, kutal chikumangen chetu, nading ni mivu 18. Pa chisu chinicha nafanyina kuya kumekan kurutu kwa komite wading kukwatang mupak wa kwijik nany ufanyidina kwandam mu usalay. Akata anch am nisala mudimu unading nimena anch ukwatijadinap ni mbil ya Yesu ya kulik kwandam mu milong ya politik. Pakwez nading nikatin kulejan rusangu ruwamp ra Want. (Yohan 15:19) Chawiy nayileja anch angijika mudi mwin kulejan.

 Nasangara nakash panlejay Mukadivar Miller anch tukuya pamwing niyamam ku chikumangan pamwing ni komite winou. Kadingap muntu ukweta usany, ni antu kamwovangap wom. Wading wij kand Mifund nawamp. Kwikal nend pamwing kwankwasha nitakamana nakash! Kupwa, piswimp ni kwinsudien kwa muvu wa 1954, mudi chibudikin cha chikumangan chinech, komite winou witiya kwit kwam mulong wa kwikal mwin kusal mudimu wa kulejan. Nikala chadi ni want ipam wa kusal yivud mulong wa Yehova.

Panidia muntu musu ku Betel, niminy ku motak

Machuku makemp kupwa kwa yiney, antazuka mulong wa kusadin ku Betel, kwi ndond kwatazukangau anch Watchtower Farm, mu Staten Island, New York. Nasadina kwinikwa piswimp mivu yisatu. Namana yom yivud yiwamp mulong natanijana ni akadivar nau anambaz akweta manangu ni twasala nau mudimu pamwing.

MUDIMU WA BETEL

Ku radio WBBR pamwing ni mukadivar Franz

Ku ferm wa ku Staten Island kwading kand radio utazukinau anch WBBR. Amusadinang kudi Atuman a Yehova kusambish mu muvu wa 1924 kushik mu muvu wa 1957. Kwading kwau antu 15 ap 20 a ku Betel awiy asadinang ku ferm. Avud pakach petu ading ansand ni ading ni ronganyin rikemp. Pakwez mukadivar umwing wapamina kal uzizidilau many, Eldon Woodworth, wasalang pamwing netu. Wading mudi tatukwetu ni watufundisha yom yivud nakash. Yisu yimwing pitwading ni milong umwing ni mukwau, Mukadivar Woodworth walondang anch, “chidi cha kashinsh anch yom yatusadinay Nsalejetu yading yiwamp tufanyidina kusadin.”

Harry Peterson wading ni mushiku mu mudimu wa kulejan

Mukadivar Frederick W. Franz wading netu pamwing ni watukwasha. Wading ni manangu ni wading wij Bibil nawamp. Ni watusangerang etu awonsu. Mwin kutwisukin wading Harry Peterson. Chading chituswapedin kutazuk dijin diend dia kwisamb pa ndond pa kumutazuk pa dijin diend dia chivadik, Papargyropoulos. Ni ndiy wading uzizidilau many ni wading ukatin mudimu wa kulejan. Mukadivar Peterson wasalang nawamp mudimu wend wa ku Betel pakwez, kapipejangap mudimu wa kulejan. Wapanang yitot ya magazet ngond win mwawonsu. Wading wij kand Bibil nawamp ni wakulang ku yipul yetu yivud.

 NILEJINA KUDI ANAMBAZ AKWETA MANANGU

Ku ferm, twarijekang mabuj ni yakudia ya mayij ni twayitekang mu mishet. Nasala pamwing ni Etta Huth, nambaz umwing wading ukweta manangu. Wafunda yom yilejena mutapu wa kwisuk mabuj ni yakudia ya mayij. Anambaz a mu ul ezang mulong wa kusal nau mudimu pamwing, ni Etta wakwashang mulong wa katenchik mudimu wau. Ap anch Etta wading wij mutapu wa kulongij yom ya kudia mu mishet, wayilimishang chisu chawonsu akadivar ading ni kutakel ku ferm. Watushila etu awonsu chilakej chiwamp.

Angela ni yam pamwing ni Etta Huth

Angela Romano wading umwing wa pakach pa anambaz ayangadim ezang kutukwash. Etta wamukwasha pijikay uyakin. Angie ni yamam twatijana mu ngond wa Kanying mu muvu wa 1958, ni twasangera kumusadin Yehova pamwing mu mivu 58. Mu kusut kwa mivu, kushinshaman kwa Angie mulong wa Yehova kwakasikesha uruw wetu. Angie ukwet manangu ni nimuchingejidining kamu chikalap nchik milong tukweta.

CHISEND CHA UMISHONER NI MUDIMU WA KWENDANGAN

Palandishau akadivar radio wa WBBR wading mu Staten Island mu muvu wa 1957, nasadina ku Betel wa Brooklyn mu chisu chikemp. Kupwa kwa kwatijan ni Angie nadiokala ku Betel. Mu mivu yisatu, twasala mudi ayibol mu Staten Island. Mu kusut kwa chisu, nasadina ku radio wetu musu watazukangau anch WPOW.

Angie ni yam twadandamena kwikal ni mwom uswapela chawiy, twading twishadidin mulong wa kuya ni kusadin kwi ndond kwawonsu kwatuswirikenangau. Mudi chibudikin, mu muvu wa 1961 twitiya kutazuk kwatutazukau mulong wa kwikal ayibol a pakampwil mu Falls City, Nebraska. Pakwez kupwa kwa kuya kwinikwa, atutazuka mulong wa kuya ku Lansing du Sud, mu New York, mu muvu umwing mulong wa kukumangan ku Shikol ya Mudimu wa Kulejan. Twasangera kufumb twatambula, ni twatonga anch kupwa kwa shikol tufanyidin kuchirik ku Nebraska. Chawiy twakashimuka chisu cha twinkishau chisend chisu. Twaya kusal mudi a mishoner mu Cambodge! Mwi ngand yiney yiwamp yidia pakach pa kwindum ni kwingangel kwa Asia, twamana, twatesha, ni twapaka yom yading yisu kudi etu. Kwinikwa twakata kuyilej antu rusangu ruwamp piur pa Want.

Nidi pamwing ni Angela mu muvu wa 1975, akat kutwipul yipul ku televizion

Pakwez paswimpa mwikadil wa chipolitik mu Cambodge, twakwata mupak wa kuya mu Vietnam du Sud. Kupwa kwa mivu yaad, nayela nakash ni cha ushon twachirika mu États-Unis. Nading nikwet kuswir kwa chisu chakwel niyova nawamp. Paniyova nawamp, twasambisha kand mudimu wa uchibol.

Mwi ngond wa Kasatu muvu wa 1965 twasambisha kusadin mu yikumangen mudi in mudimu wa kwendangan. Mu mivu 33, Angie ni yam twasangera mudimu wa munyingumuku ni wa distrik ni twakwashang ku yitentam. Nasangera mudimu winou mulong yisu ya yitentam yading yiwamp kudi am. Mu mivu yimwing twaya kutal yikumangen yidia mu New York City ni yidia piswimp, ni yitentam yivud yasadikinang mu Yankee Stadium.

TWACHIRIKA KU BETEL NI KU SHIKOL YA UTEOKRAS

Angie ni yam twikala ni yisend yisu yivud ni yikasikena mu mivu yivud. Mu muvu wa 1995, anleja kufundish ku Shikol ya Diyiy dia Mudimu. Kupwa kwa mivu yisatu, antutazuka ku Betel. Kupwa  kwa mivu 40, nasangara nakash kuchirik ku Betel, kwinikwa nasambisha kand mudimu wa chisu chawonsu wa pakampwil. Kusut kwa chisu, nasadina ku Departema wa Mudimu ni nadinga kand mulej ku mashikol mavud nakash. Mu 2007, Chisak Chitakedila chasala Departema wa Mashikol ma Uteokras mulong wa kulam antu awonsu afundishangau ku Betel, ni mu mivu yivud nading ntakel.

Mu mivu yasutina ey, kwikadin kuswimp kuvud mulong wa mashikol ma Betel. Shikol mulong wa Amakurump a Chikumangen yasambisha mu muvu wa 2008. Ni mivu yaad yalondulaku amakurump a chikumangen 12000 ni kusut, ayifundisha ku Betel wa Patterson ni wa ku Brooklyn. Shikol yiney yidandamedin kusadik ku jindond jikwau jivud. Mu muvu wa 2010 dijin dia Shikol ya Diyiy dia Mudimu diaswimpa kwikal Shikol ya Bibil ya Akadivar Ajich, ni kwikala kand shikol yisu yitazukinau anch Shikol ya Bibil ya Ambay in Kristu Atena.

Mwi ngond wa 9, 2014, mashikol minam maad amabomba mulong wa kwikal shikol yimwing yitazukinau anch Shikol ya in Kulejan a Want. In kwilej akutwish kwikal ambay a uruw, akadivar ajich, ap anambaz ajich. Antu avud mu mangand mawonsu asanger pateshinau anch shikol yiney yikwikal kand mu jingand jau. Chidi cha musangar kuman anch antu avud akwikal ni mutapu wa kwilej mashikol minam. Ni nijikitishin nakash mulong wa kuman antu avud aswimpina mu mwom wau chakwel ayifumba.

Anch natong piur pa mwom wam kurutu nitambula dibatish mu ka chikumbu ka kulamin yakudia ya annam kakweta mashik kading ku ferm kushik ni katat, nikat kumujikitish Yehova mulong wa antu akweta manangu anatana. Ankwasha chakwel nishiken kumwijik ni kumusadin nawamp. Amwing ading ansand kwinsut am ni akwau ading amapal. Ni antu avud ading ni yaku yishalijadina ni ya kwol kwetu. Pakwez kusutin yisal yau ni mikadil yau namana anch ading amukatin Yehova nakash. Nijikitishin nakash mulong wa kwikal nau arund avud akweta manangu pakach pa antu a Yehova kunikutwisha kwilejin.

Nisangaredin kutanijan nau in kwilej adiokila mu mangand mawonsu