Mu Isarel wa pasak, ov, chading chitin muntu kwikal mwan ikundj wa kusambish mulong wa kwikal ngakend a Mesia?

Pakur twatongang anch chidi mwamu mulong wa yom yifundinau mu Hebereu 12:16. Verse winou ulondin anch Esau wading muntu “wakad kalimish ku yom yitumbila” ni walandisha kudi Jakobu ‘uswan wend wa mwan wa kusambish ku yakudia.’ Chawiy twatonga anch patambulay Jakobu ‘uswan wa mwan wa kusambish,’ watambula kand chisend cha kwikal pakach pa angakend a Mesia.—Mateu 1:2, 16; Luka 3:23, 34.

Pakwez, kwilej nich mushiku jinsangu jikwau ja mu Bibil kumekeshin anch chadingap chitina kudi muntu ikundj kwikal mwan wa kusambish mulong wa kwikal ngakend a Mesia. El tushinshikinany jinsangu jinej jimwing:

Mwan ikundj wa kusambish wa Jakobu ni Leya wading Ruben. Mwan ikundj wa kusambish wa Jakobu ni Rachel wading Josef. Pasalay Ruben masandj, washadisha uswan wend wa mwan wa kusambish ni uswan winou amwinkau chad Josef. (Disambishil 29:31-35; 30:22-25; 35:22-26; 49:22-26; 1 Jinsangu 5:1, 2) Pakwez Mesia kavadikinap mu dijuku dia Ruben ap dia Josef. Wavadikina mu dijuku dia Yuda, mwan ikundj wa kanying wenday Jakobu ni Leya.—Disambishil 49:10.

Luka 3:32 ujimbwil angak akwau atan a Mesia, ni chimeken anch mwawonsu wa pakach pa antu inay wading mwan wa kusambish. Chilakej, Bowaz wading tatukwend a Obed, ni Obed wading tatukwend a Yese.—Rut 4:17, 20-22; 1 Jinsangu 2:10-12.

David mwan ikundj wa Yese kadingap mwan wa kusambish. Wading kamu wa nsudiel pakach pa an amakundj chinan. Pakwez Mesia wavadikina mu dijuku dia David. (1 Samwel 16:10, 11; 17:12; Mateu 1:5, 6) Chilik chimwing kand, ngakend mukwau wa Mesia  wading Salomon, ap anch kadingap mwan wa kusambish wa David.—2 Samuel 3:2-5.

Chinech chirumburikinap anch kwikal mwan ikundj wa kusambish chadingap cha usey. Mwan ikundj wa kusambish watambulang yisend kusutamu an akwau amakundj. Yisu yivud, wikalang ntakel wa kaad wa dijuku ni watambulang yom tupamp twaad ya uswan.—Disambishil 43:33; Kuvurik Yijil 21:17; Joshua 17:1.

Pakwez uswan wa mwan wa kusambish afanyina kuupan kudi mwan ikundj mukwau. Pamutumay Aburaham mwanend Isamayel kuya kwi ndond yikwau, uswan wend wa mwan wa kusambish aupana kudi Isak. (Disambishil 21:14-21; 22:2) Ni mudi twasambelang kal kwisambin, uswan wa mwan wa kusambish wa Ruben aupana kudi Josef.

Chad yom ik yafilay kulejan kambuy Paul mu Hebereu 12:16? Tutangin verse winou anch: “Babalany, chakwel muntu umwing kangal wikal mwin usund ap kwikal muntu wakad kalimish ku yom yitumbila mudi Esau. Ndiy walandisha uswan wend wa mwan [wa kusambish] ku yakudia ya kapamp kamwing.”

Mu verse winou, Paul kadingap kisambidina piur pa angakend a Mesia. Pakwez wading uyibabeshin in Kristu. Wayileja anch: “Endany salal mudi antu endidila mu jinjil jitentamina” chakwel “kangal muntu wapumbuk kudiokal ku ranaken ra Nzamb.” Cha ushon, chom chinech chafanyina kushiken anch asala masandj. (Hebereu 12:12-16) Ni mutapu mudi winou, afanyina kwikal mudi Esau, muntu “wakad kalimish ku yom yitumbila” pakwez wakata kusangaresh maku mend.

Kukwatijan ni chaku cha pa chisu chinacha, Esau wafanyina kwikal nich chisend cha kupan milambu kudi Yehova. (Disambishil 8:20, 21; 12:7, 8; Job 1:4, 5) Pakwez Esau washinshikina nakash pa maku mend ni washadisha yisend yend ni uswan wa mwan wa kusambish ku chibakud cha makund. Esau wafanyina kwiyep mar masambelay Yehova kulejan anch makushiken ku majuku makeza kwez ma Aburaham. (Disambishil 15:13) Wamekesha kand anch kakwatap yom yitumbila nich usey patay amband apagan aad, chom chaletisha ushon nakash kudi anvajend. (Disambishil 26:34, 35) Tal mutapu wading ushalijadinay ni Jakobu, wasala usu wa kwat mband mwin kumwifukwil Nzamb wakin!—Disambishil 28:6, 7; 29:10-12, 18.

Yom ik yitufundishina jinsangu jinej ja Bibil piur pa angakend a Mesia? Amwing pakach pau ading an a kusambish ni akwau bwat. In Yuda ading ij nawamp chom chinech ni ading achitiyijin. Mutapu ik twija mwamu? Mulong itiyija anch Kristu ukwikal wa mu dijuku dia David, mwan ikundj wa nsudiel wa Yese.—Mateu 22:42.