Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 10 , 2017

Yishimushimu ya Zakariy—Mutapu Yikweta Usu Padi ey

Yishimushimu ya Zakariy—Mutapu Yikweta Usu Padi ey

Chirikany kudi am, niyam nikuchirik kudi en.”—ZAKARIY 1:3.

MIMINY: 6, 20

1-3. (a) Chisu chasambishay Zakariy mudimu wa uprofet, antu a Yehova ading mu mwikadil ik? (b) Mulong wak Yehova wayileja antu end kuchirik kudi ndiy?

MUVUNGUR utwikina, mband udia mu musans ni amband aad akweta jimpur ja usu mudi ja nkumb atwikin. Yiney yawiy yishimushimu yimwing yishimokishena yamanay Zakariy. (Zakariy 5:1, 7-9) Mulong wak Yehova wapana yishimushimu yiney yishimokishena kudi muprofet wend? In Isarel ading mu mwikadil wa mutapu ik mu chisu chinicha? Ni mutapu ik tukutaninamu mu yishimushimu yiney nlel?

2 Wading muvu wa 537 kurutu kwa Kristu, ni antu a Yehova ikala ni musangar nakash. Ading ayikwata kal mu usuk wa Babilon mu mivu 70, katat ayilikishaku kal! Ading akwet musangar wa kuchirik mu Yerusalem mulong wa kutungiril tempel ni kumwifukwil Yehova kwinikwa. Kupwa kwa muvu umwing in Isarel ateka mufulandal wa tempel. Antu asangara nakash  ni asambisha kutoy nakash “mulong dipumb dined diovakana kulemp.” (Esidera 3:10-13) Pakwez rupompat mulong wa kukangesh mudimu wa kutung rakasikana nakash. In Isarel aziya, chawiy imika mudimu wa kutung tempel. Chawiy ipana mu midimu ya kutung yikumbu yau ni ya kudim yir yau. Kupwa kwa mivu 16, tempel wa Yehova ading kand kal apwisha kumutung. Antu a Nzamb aswirikena kuyivurish chakwel achirik kudi Yehova ni alika kutong piur pa ayinau. Yehova wakata anch amwifukwila nich mushiku nich kutakaman.

Yehova witiyining difukwil dietu ching anch twamwinkish yom yetu ya usey

3 Chawiy mu muvu wa 520, Yehova wamutuma muprofet wend Zakariy chakwel ayikwasha antu kuvurik mulong wak Yehova wayikola kuyidiosh mu Babilon. Chidi cha musangar kwijik anch dijin Zakariy dirumburikin anch “Yehova wavurika.” Ap anch in Isarel avuramena yom yayisadilau kudi Yehova, pakwez ndiy wadandamena kwend kuyivurik. (Tang Zakariy 1:3, 4.) Yehova washilamu kuyikwash mu kuchirish difukwil diend diakin. Pakwez wayibabesha kand anch ukwitiyij difukwil diau ching anch amwinkish yom yau yiwamp. El katat tushinshikinany chishimushimu cha musamban ni cha sambwad cha Zakariy. Tukwilej mutapu wayikwashau in Isarel kudi Yehova ni mutapu ukutwisha yishimushimu yiney yaad kutukwash etu nlel.

DIRUMBURISH DIA NZAMB MULONG WA ANTU AKATA KWIY

4. Yom ik yamanay Zakariy mu chishimushimu chend cha musamban? Mulong wak muvungur wading wa kufund mitambu yawonsu yaad? (Tal chipich cha kwinsambishin 1.)

4 Shapitre wa 5 wa Zakariy usambishin ni chishimushimu chakad kusadikangap. (Tang Zakariy 5:1, 2.) Zakariy wamana muvungur ukat kutwik mwiur. Muvungur winou pa kulep wading ni ametre chidivu ni pa kujimb ametre anying ni chikunku (4,5). Afungula muvungur ni ading afundinamu uruu. (Zakariy 5:3) Wading kamu uruu wa dirumburish. Mu chisu cha pakur, antu ading ni chaku cha kufund mutambu umwing wa muvungur. Pakwez, uruu winou wading wa usey nakash chawiy muvungur ading aufundin mitambu yawonsu yaad.

In Kristu afanyidin kwipuk mitapu yin yawonsu ya wij

(Tal paragraf wa 5-7)

5, 6. Mutapu ik ukatay kwiyov Yehova piur pa wij wa mitapu yawonsu?

5 Tang Zakariy 5:3, 4. Antu awonsu akwet yisend kudi Nzamb mulong wa yisal yau. Chinech chidi kamu chakin pakampwil kudi antu a Yehova, mulong ayitazukin pa dijin diend. Amukatin ni ij anch wij ukat kulet usany pa dijin diend. (Jinswir 30:8, 9) Antu amwing akutwish kutong anch chiyipinap kwau kwiy anch akwet mayingishin mawamp ma kusal mwamu. Pakwez chikalap nchik mayingishin mawonsu, muntu ukata kwiy umekeshin anch rusot rend ra ris rikwet usey nakash kudi ndiy kusutamu Yehova, dijin diend ni yijil yend.

6 Ov, umenap anch Zakariy 5:3, 4 ulondin anch mashing mafanyina “kuya kwandam mu yikumbu ya aij” ni anch mafanyina “kashakam mu yikumbu yau, chad yikumbu yikez kashal yibumbur kusu?” Chawiy,  Yehova ukutwish kujingunin patok ni kurumburish in kusal uyimp awonsu adia pakach pa antu end. Ap anch muntu ukata kwiy ukutwish kujindjik yom yisadinay kudi ampurij, amakurump end a mudimu, amakurump a chikumangen ap anvajend, kakutwishap kumujindjikin Yehova. Nzamb ukwikal nich kashinsh anch mutapu win wawonsu wa wij akuujingunin. (Hebereu 4:13) Tusanger nakash kwikal pakach pa antu asadina yawonsu yikutwishau mulong wa kwikal in kashinsh “mu yom yawonsu”!—Hebereu 13:18, TMK.

7. Mutapu ik tukutwisha kwipuk mashing ma muvungur utwikina?

7 Wij wa mitapu yin yawonsu ukat kumwovish Yehova ujim. Chidi chiwamp nakash kudi etu kwijik ni kuziyin mbil ja Yehova piur pa uwamp ni uyimp ni kushakam mu mutapu wa kulik kusaadikish dijin diend. Anch twasal mwamu, tukwipuk kurumburish kwa Yehova mulong wa antu akad kumuziyin.

LAM DIZU DIEY “DICHUKU NI DICHUKU”

8-10. (a) Kushilamu chom ik? (b) Kushilamu ik kwajipay Mwant Sedekias?

8 Kupwa, muvungur utwikina wapana uruu wa kubabesh kudi antu akata kusal “kushilamu kwa makasu” mu dijin dia Nzamb. (Zakariy 5:4) Kushilamu kudi kuchip anch chom kanang chidi chakin, ap kudi kukan kwakin mulong wa kusal ap mulong wa kulik kusal chom kanang.

9 Kushilamu mu dijin dia Yehova udi mulong ujim nakash. Twij mwamu kusutin yom yamushikena Sedekias, mwant wa nsudien wayikela mu Yerusalem. Sedekias washilamu mu dijin dia Yehova anch ukumuziyin mwant wa Babilon. Pakwez Sedekias  kalamap kushilamu kwend. Mulong wa chom chinech, Yehova walonda anch Sedekias wafanyina “kafil mu Babilon, mulong ndiy wajipa kal machip ni manswik masukay nend mwant wa in Babilon, ndiy kamu wamushichika pa ditand.”—Ezekiel 17:16.

10 Mwant Sedekias washilamu mu dijin dia Nzamb, ni Yehova wachingejina anch adandamen kulam kushilamu kwinoku (2 Jinsangu 36:13). Pakwez Sedekias wajipa kushilamu kwend ni wita anch Idjibit amukwash mulong ajipa manswik ni Babilon. Pakwez Idjibit katwishap kumukwash.—Ezekiel 17:11-15, 17, 18.

11, 12. (a) Kushilamu ik kwa usey nakash tukutwisha kusal? (b) Mutapu ik kwipan kwetu kufanyidina kwikal ni usu mu mwom wetu wa dichuku ni dichuku?

11 Kusutin ku yom yamushikena Sedekias, twilejin anch Yehova ukat kuteshang kushilamu tukata kusal. Mulong wa kumusangaresh, tufanyidin kulam kushilamu kwetu. (Kuseng 76:11) Kushilamu kwa usey nakash tukutwisha kusal kudi kwipan kwetu kudi Yehova. Chisu tukata kwipan kudi ndiy, tukat kushilamu anch tukumusadin ndiy, chikalap nchik yom yikushikena mu mwom wetu.

12 Mutapu ik tukutwisha kudandamen kulam kushilamu kwetu kudi Yehova? “Dichuku ni dichuku” tukat kurish nich yoziu yikemp ni yijim. Tumekeshining mutapu tukasikeshining urund wetu ni Yehova kusutin mutapu turishining nich yoziu yiney. (Kuseng 61:8) Chilakej, chom ik ukusala anch muntu kanang ku mudimu ap ku shikol wasambish kwizez ni yeyey? Ov, ukulik choziu chinech ni kumekesh anch ukatin kumuziyin Yehova? (Jinswir 23:26) Ap chikwikal nchik anch mu dijuku diey yeya kwey umwifukwidina Yehova? Ov, ukat kumwit Yehova chakwel akukwasha udandamena kwendil mwi njil ya win Kristu? Chikalap nchik yom yikushikedina, ukat kumujikitish Yehova dichuku diawonsu mulong wa rukat ni ukwash wend? Ov, ukat kwitekin chisu cha kutang Bibil dichuku diawonsu? Mu mutapu winou, twashilamu kusal yom yiney patwipana kudi Yehova. Anch twamuziyin ni twamwinkish yom yetu ya usey, tumekeshin anch tumukatin Yehova ni tudi aend. Difukwil dietu udi mutapu wetu wa mashakamin. Ni mulong tumushinshamedin Yehova, ushidinamu kutwinkish machuku ma kurutu mawamp.—Kuvurik Yijil 10:12, 13.

Kusutin chilakej chend, Yehova utufundishin anch tufanyidin kulam kushilamu kwetu

13. Yom ik tukutwisha kwilejin ku chishimushimu cha musamban cha Zakariy?

13 Chishimushimu cha musamban cha Zakariy chitukwashin kwijik anch ang tumukatin Yehova, tukwiyap ap kujip kushilamu kwetu. Twilejin kand anch, ap anch in Isarel arumbuka nakash, Yehova wadandamena kulam kushilamu kwend ni kayilikap antu end. Wading wij anch ading mu yisu yiyimp mulong wa akankuny awonsu ading ayinyingumukina. Kusutin chilakej chend, Yehova utufundishin anch tufanyidin kudandamen kulam kushilamu kwetu. Ni tukutwish kwikal nich kashinsh anch ukutukwash kusal mwamu. Mutapu umwing utukwashinay  Yehova udi wa kutwinkish ruchingej mulong wa machuku ma kurutu. Piswimp ap, ukudiosh uyimp wawonsu pa divu. Tukutwish kwilej piur pa ruchingej riner mu chishimushimu chikwau cha Zakariy.

YEHOVA UKUDIOSH UYIMP

14, 15. (a) Yom ik yamanay Zakariy mu chishimushimu chend cha sambwad? (Tal chipich cha kwinsambishin 2.) (b) Mband ik wading mu musans? Mulong wak mwangel wabwika ku musans?

14 Kupwa kwa Zakariy kuman muvungur utwikina, mwangel wamuleja anch: “Tal.” Kupwa Zakariy wamana “musans.” (Tang Zakariy 5:5-8.) Musans winou wading ni mufunyik wa utad wa kajuu. Chisu chaburilau ku musans, Zakariy wamana “mukach mwa musans mwading mushich mband.” Mwangel wamurumburila Zakariy anch mband winou wading mu musans wading “chijingidij cha yitil.” Tongin piur pa wom wovay Zakariy pamumanay mband winou ukat kusal usu wa kubudik mu musans! Pakwez, mwangel wamushinyina mband winou kapamp kamwing mu musans ni wabwikaku nich mufunyik ujim. Yom yiney yirumburikin ik?

15 Chishimushimu chinech chitwinkishin kashinsh anch Yehova kakutwishap kulik anch uyimp wa mitapu yin yawonsu wikala pakach pa antu end. Anch Yehova waman chom chiyimp, ukat kusal swa swa mulong wa kuchidiosh. (1 Korint 5:13) Mwangel wamekesha mwamu chisu chabwikay kapamp kamwing nich mufunyik ujim ku musans.

Yehova washilamu anch ukulam difukwil diend dishitwila (Tal paragraf wa 16-18)

16. (a) Yom ik yashikena ku musans? (Tal chipich cha kwinsambishin 3.) (b) Kwisu kwatwalau musans kudi amband akweta mapur?

16 Kupwa Zakariy wamana amband aad  akweta mapur ma usu mudi ma nkumbu. (Tang Zakariy 5:9-11.) Amband ading ashalijadin kamu nakash ni mband muyimp wading mu musans. Nich mapur ma usu, azambula musans mwading “chijingidij cha yitil” ni auya nich. Kwisu kwautwalau? Atwala musans winou mwi “ngand ya Shinar,” yading mu Babilon. Mulong wak autwala musans winou kwinikwa?

17, 18. (a) Mulong wak Babilon wading ‘ndong yiwanyidina’ mulong wa “chijingidij cha yitil”? (b) Ukwatin mupak wa kusal yom ik?

17 In Isarel ashakama machuku ma Zakariy afanyina kwijik mulong wak Babilon yawiy yading ndond yiwanyidina mulong wa “chijingidij cha yitil.” Ading ij anch wading musumb wizwila nich yom yiyimp ni difukwil dia makasu. Zakariy nau in Yuda akwau ading ashicha mwinimwa afanyina kusal usu dichuku ni dichuku mulong wa kujijamen yisalijok ya apagan. Chawiy chishimushimu chinech chamekesha anch Yehova ukudandamen kushitwish difukwil diend.

18 Chishimushimu chayivurisha kand in Yuda anch niyau akwet chisend cha kulam difukwil dishitwila. Uyimp kakuwitiyijap ap ukez kikalap pakach pa antu a Nzamb. Nlel unou, Yehova utuletin mu dirijek diend dishitwila, mututanina rukat ni diking diend. Muntu ni muntu pakach petu ukwet chisend cha kukwash chakwel dishala dishitwila. Uyimp ukwikalap ap pakemp pakach pa antu a Yehova.

ANTU ISHITWILA AMUTUMBISHIN YEHOVA

19. Yishimushimu yishimwokishena ya Zakariy yirumburikin ik kudi etu nlel unou?

19 Chishimushimu cha musamban ni cha sambwad cha Zakariy yiyibabeshin nakash antu akata kusalang yom yiyimp. Yehova kakwitiyap anch uyimp udandamena. Mulong tudi atushalapol end, tufanyidin kukis uyimp. Yishimushimu yiney yitwinkishin kand kashinsh anch ang twasal usu wa kumusangaresh Tatukwetu wa rukat, kakutushingap pakwez ukutuking ni kutuyukish. Ap chikutwish kwikal chikash kushal ishitwila mu mangand minam mayimp, pakwez nich ukwash wa Yehova, tukutwish! Chad mutapu ik tukutwisha kwikal nich kashinsh anch difukwil diakin dikudandamen kwikalaku? Ni mutapu tusejina piswimp ni mar makash, mutapu ik twija anch Yehova ukuking dirijek diend? Tukwambambin yipul yiney mu mutu wa mulong ulondwilaku ou.