Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 10 , 2017

Uyakin Uletin, ‘Kadiap Chisambu, Pakwez Mpak ya Musamun’

Uyakin Uletin, ‘Kadiap Chisambu, Pakwez Mpak ya Musamun’

“Kangal watongany anch, am neza ni kulet chisambu; mu mangand. Bwat, am kinezap ni kulet chisambu, pakwez mpak ya musamun.”—MATEU 10:34.

MIMINY: 43, 24

1, 2. (a) Chisambu ik tukutwisha kwikal nich katat? (b) Mulong wak chiswapelap kudi etu kwikal ni chisambu chiwanyidina katat? (Tal chipich cha kwisambishin.)

ETU AWONSU tukatining kwikal ni chisambu mu mwom wetu, ni tukatining kwiyep yakamish. Chawiy tujikitishin nakash mulong Yehova utwinkishin “chisambu cha Nzamb.” Chisambu chinech chikata kuninetish chikat kutuchidij ku yovil ni yitongijok yiyimp. (Filip 4:6, 7) Mulong twipanin kal ayinetu kudi Yehova, tudi kand mu ‘chisambu ni Nzamb.’ Chinech chirumburikin anch tudi mu urund uwamp ni ndiy.—Rom 5:1.

2 Pakwez, chisu cha Nzamb cha kulet kamu chisambu chiwanyidina pa divu kand kal chiwanyin. Tushich machuku ma nsudiel, chawiy kudi milong yivud yituletidina yakamish. Atunyingumukin kudi antu ayimp. (2 Timote 3:1-4) Turishin kand nend Satan ni mafundish ma makasu maletinay. (2 Korint 10:4, 5) Pakwez chom chikutwisha kand kutuletin yakamish nakash ridi rupompat ra anamakwetu akad kumusadin Yehova.  Amwing pakach pau akutwish kutuswingish ap kutwel anch twauril dijuku. Akutwish kutulej anch akutwopat mu dijuku anch twadandamen kumusadin Yehova. Chawiy, mutapu ik ufanyidina kuman rupompat ridiokila kudi anamakwey? Ni mutapu ik tukutwisha kulam chisambu anch yom yiney yashiken?

MUTAPU IK TUFANYIDINA KUMAN RUPOMPAT RIDIOKILA MU DIJUKU DIETU?

3, 4. (a) Mafundish ma Yesu mading nich usu ik? (b) Chisu ik chikutwisha kutukasiken kumulondul Yesu?

3 Yesu wading wij anch kadiap muntu mwawonsu ukwitiyija mafundish mend. Wading wij kand anch in kwilejend akuswiriken kutakaman mulong antu amwing akuyipompat. Rupompat riner rikutwish kuyipish chisambu cha mu majuku mau. Yesu walonda anch: “Kangal watongany anch, am neza ni kulet chisambu mu mangand. Bwat, am kinezap ni kulet chisambu, pakwez mpak ya musamun. Am neza ni kuyisarumun an amakundj chakwel ayipompat atatukwau, ni an amband ayipompat amakwau, ni amband a an amakundj ayipompat amakwau a anfumwau. Akankuny . . . a muntu akez kwikal ching antu a mu dijiku diend.”—Mateu 10:34-36.

4 Yesu wakimba kulond ik palonday anch “Kangal watongany anch, am neza ni kulet chisambu”? Wakimba chakwel antu ijika anch kukwikal yibudikin kampand anch ikal in kwilejend. Chakin kamu, chitongijok cha Yesu chading cha kuyifundish antu uyakin piur pa Nzamb, chadingap cha kwauril majuku. (Yohan 18:37) Pakwez in kwilejend aswirikena kwijik anch chadingap chiswapela kumulondul ndiy chisu chawonsu, pakampwil anch arund nau a piswimp ap anamakwau alik kwitiy uyakin.

5. Yom ik yayishikena in kwilej a Yesu?

5 Yesu walonda anch rupompat ridiokila mu dijuku chading chom chimwing pakach pa yom yafanyinau in kwilejend kujijamen. (Mateu 10:38) Mulong wa kumusangeresh, in kwilej a Yesu afanyina kujijaman ap anch majuku mau mayiswingish ap kuyilik. Pakwez atambula yom yivud kusutamu yom yashadishau.—Tang Marko 10:29, 30.

6. Yom ik tufanyidina kuvurik anch anamakwetu atupompat?

6 Ap anch anamakwetu atupompat mulong tumwifukwidil Yehova, tukudandamen kwetu kuyikat. Pakwez tufanyidin kuvurik anch rukat retu mulong wa Nzamb ni Kristu rifanyidin kwikal rikash nakash kusutamu rukat tukweta mulong wa muntu win mwawonsu. (Mateu 10:37) Tufanyidin kand kubabal mulong Satan ukutwish kusadin rukat tukweta mulong wa anamakwetu chakwel atubachika tulik kumushinshamen Yehova. El tushinshikinany yom yimwing yikash ni tumanany mutapu tukutwisha kujijaman.

MBAY WA URUW WAKAD KWIKAL KAMAN

7. Mutapu ik ufanyidina kuman mulong wey anch mbay ney wa uruw kamusadidinap Yehova?

7 Bibil utubabeshin anch muntu mwawonsu ukwatana “[u]kez kuman mar,” ap kwikal ni milong. (1 Korint 7:28) Anch watijadin ni muntu wakad kumusadin Yehova, chom chinech chikutwish kulet minan ni yakamish nakash mu uruw wey. Pakwez, chidi cha usey anch umana mulong wey mudi mutapu uumenay Yehova. Ulondin anch tukutwishap kwaurik ap kujip uruw ni mbay netu wa uruw mulong kamusadidinap Yehova. (1 Korint  7:12-16) Anch nfumwey kamusadidiningap Yehova ni kasangarediningap difukwil diakin, ufanyidin kudandamen kumulimish mudi mutu wa dijuku diey. Anch mukajey kamusadidiningap Yehova, ufanyidin kudandamen kumukat ni kumubangin nakash.—Efes 5:22, 23, 28, 29.

8. Yipul ik ukutwisha kwiyipul anch mbay ney wa uruw wakutekin mimbu ku difukwil diey?

8 Yom ik ufanyidina kusal anch mbay ney wa uruw wakutekin mimbu ku difukwil diey? Ikundj wa nambaz umwing wamuleja nambaz winou anch ufanyidin kusadin machuku mamwing mu rubing mulong wa kusal mudimu wa kulejan. Anch yom mudi yiney yakushiken, iyipula anch: ‘Ov mbay nam wa uruw winkangeshin kamu kumwifukwil Yehova? Anch bwat, nikutwish kamu kusal yom yinlejinay mbay nam wa uruw?’ Anch udi muntu wisikena, ukwikal ni milong yikemp mu uruw wey.—Filip 4:5.

9. Mutapu ik ukutwishau in Kristu kuyifundish anau kumulimish nvaj wakad kwikal Kaman?

9 Chikutwish kwikal chikasikena nakash kuyifumb aney anch mbay ney wa uruw kamusadidiningap Yehova. Chilakej, ufanyidin kuyifundish aney chijil cha Bibil chilondina anch: “Mulimisha tatukwey ni makwey.” (Efes 6:1-3) Pakwez yom ik ukusala anch mbay ney wa uruw kalimishinap mbil ja Bibil? Ukutwish kuyitekin aney chilakej chiwamp mu kumulimish mbay ney wa uruw. Tongin piur pa mikadil yend yiwamp, ni muleja mbay ney wa uruw anch umujikitishin mulong wa yom yend yawonsu yiwamp yisadinay. Kangal walond yom yiyimp piur pa mbay ney wa uruw kurutu kwa aney. Pakwez yirumburila anch muntu ni muntu ufanyidin kutond kumusadin Yehova ap bwat. Anch wayifumb aney kumulimish nvaj wakad kwikal Kaman, chilakej chau chiwamp chikumubachik mbay ney wa uruw kwilej kumwijik Yehova.

Yifundisha aney piur pa Bibil anch chiswapel (Tal paragraf wa 10)

10. Mutapu ik ukutwishau anvaj in Kristu kuyifundish anau kumukat Yehova?

10 Ambay a uruw amwing akad kwikal Atuman akutwish kukat anch anau asala misambu ya apagan ya machuku matumbila  ap ileja mafundish ma makasu ma marelijon. Angatan amwing akat kuyikangesh akajau in Kristu kuyifundish anau piur pa Bibil. Pakwez ap anch yom yiney yashiken, mband ukusal yom yawonsu yikutwishay mulong wa kuyifundish anend uyakin. (Midimu 16:1; 2 Timote 3:14, 15) Chilakej, ikundj wakad kwikal Kaman kakutwishap kukat anch mukajend ileja Bibil nau an ap aya nau ku yikumangan. Palimishinay mupak wa nfumwend, ukutwish kudandamen kwambamb nau anend mulong wa yitiyij yend anch chiswapel. Mu mutapu winou, an akutwish kwilej piur pa Yehova ni mbil jend piur pa yom yiwamp ni yiyimp. (Midimu 4:19, 20) Kupwa, an akukwat mupak anch akumusadil Yehova ap bwat. * (Tal mazu ma kwinshin.)—Kuvurik Yijil 30:19, 20.

ANAMAKWEY ALIKINA DIFUKWIL DIAKIN

11. Yom ik yikutwisha kulet milong nau anamakwetu akad kumusadin Yehova?

11 Anch twasambish kwilej Bibil nau Atuman a Yehova, pamwing ap tuyilejiningap antu a mu dijuku dietu. Pakwez pakudina ritiy retu, tukuman anch tufanyidin kuyilej anch tukatin kumusadin Yehova. (Marko 8:38) Kushinshaman kwey kudi Nzamb kukutwish kulet milong pakach pey ni dijuku diey. El twisambinany yom yimwing ukutwisha kusal mulong wa kulam chisambu ni kudandamen kumushinshamen Yehova.

Anch twijik mutapu wiyovilau anamakwetu a mu dijuku, chikutuswapel kuyifundish uyakin

12. Mulong wak anamakwetu akutwish kuturishikish, pakwez mutapu ik tukutwisha kumekesh anch tubangidin yovil yau?

12 Sal usu wa kwijik mutapu wiyovilau anamakwey akad kwikal Atuman. Tukwet musangar nakash mulong twij uyakin wa Bibil. Pakwez, anamakwetu akutwish kwiyov anch tuyirumbukidin ni anch twikal kal mu chisak cha relijon mwindj. Akutwish kutong anch tuyikatinap ap pakemp mulong tusadinap nau pamwing misambu ya machuku matumbila. Akutwish kand ap kwov wom anch chom chiyimp chikutushiken anch twafa. Tufanyidin kusal usu wa kwijik mutapu wiyovilau ni kutesh nawamp yom yilondinau mulong wa kwijik mulong wak iyakamishin piur petwetu. (Jinswir 20:5) Kambuy Paul wasala usu wa kuyitesh ‘antu a mitapu yawonsu’ chakwel atwisha kuyifundish rusangu ruwamp. Anch twasal usu wa kuyitesh antu a mu dijuku dietu, chinech chikutukwash chad kwijik mutapu wa kuyifundish uyakin.—1 Korint 9:19-23.

13. Mutapu ik tufanyidina kwambamb nau anamakwetu akad kwikal Atuman?

13 Lond kwa kwitudish. Bibil ulondin anch: “Chifanyidin mazu men mikala ma kalimish yisu yawonsu.” (Kolosay 4:6) Chinech chiswapelap. Tukutwish kumwit Yehova spiritu wend utumbila chakwel atukwasha kwikal antu awamp ni itudishina kudi anamakwetu. Tufanyidinap kutadikijan nau  piur pa yitiyij yau ya makasu. Anch twiyov nayimp piur pa yom kanang yikulondau ap yikusalau, tukutwish kuyimburij atwimbuy. Paul walonda anch: “Pakat kutusaalau masaal, etu tukat kuyiyukish. Pakat kutuzengolau, etu tukat kushimpish michim. Pakat kutulondau nayimp, etu tukat kwakul nich mazu mawamp.”—1 Korint 4:12, 13.

14. Yiyukish ik yidiokiling ku kwikal ni mwikadil uwamp?

14 Lam mwikadil uwamp. Mulong wak chidi cha usey? Ap anch kulond kwa matul kukutwish kutukwash kulam chisambu nau anamakwetu, mwikadil wetu uwamp ukutwish kwikal wa usey nakash. (Tang 1 Pita 3:1, 2, 16.) Lik anamakwey amana kusutin chilakej chey anch Atuman a Yehova akweting musangar mu uruw, ayilamining anau nawamp, ashakamining kukwatijan ni mbil ja Bibil ni akweting mashakamin ma musangar. Ap anch anamakwetu kitiyinap uyakin, tukutwish kwikal ni musangar pa kwijik anch mwikadil wetu uwamp umusangareshin Yehova.

15. Mutapu ik tukutwisha kwitenchik kurutu chakwel twipuka kupwitijan nau anamakwetu?

15 Itenchika kurutu. Tong piur pa yom yikutwisha kuletish kupwitijan nau anamakwey. Kupwa kwat mupak piur pa yom ukusala. (Jinswir 12:16, 23) Mwawiy mwasalay nambaz umwing udia mu Australie. Tatuwenend walikang nakash uyakin ni yisu yimwing wading kujiman. Chawiy, kurutu kwa kumutazuk tatuwenend ku telefon, ndiy ni nfumwend amwitang Yehova chakwel ayikwasha kwipuk kumwakul ni ujim. Atonginang piur pa yom yisangareshina yikutwishau kwambambin. Ni mulong wa kwipuk mambamb malemp makutwisha kuyishikij ku kupwitamijan piur pa relijon, itekinang chisu kanang cha kwambamb.

Kushinshaman kwey kudi Yehova kufanyidin kwikal kukash nakash kusutamu rukat ukweta mulong wa dijuku diey

16. Mutapu ik ukutwisha kupandakan yovil ya kwifish nich mulong wa kulik kuyisangaresh anamakwey?

16 Chakin kamu, ukutwishap kwipuk kupwitamijan kwawonsu nau anamakwey akad kwikal Atuman. Chawiy, anch kudi kupwitamijan, ukutwish kwikal ni yovil ya kwifish nich mulong uyikatin anamakwey ni ukatin kuyisangaresh. Pakwez vurik anch kushinshaman kwey kudi Yehova kufanyidin kwikal kukash nakash kusutamu rukat ukweta mulong wa dijuku diey. Anch anamakwey ajingunin chom chinech, akutwish kwijik anch kumusadin Yehova kudi kwa usey. Ukutwishap kumushindin muntu ap umwing kwitiy uyakin. Pakwez, ukutwish kusal anch antu akwau amana anch kulondul njil ja Yehova kukukwashin ey. Chakin kamu, Yehova uyinkishin anamakwey mutapu wawiy umwing ni utwinkishinay etu, wa kutond kumusadin ndiy.—Isay 48:17, 18.

ANCH MUNTU WA MU DIJUKU DIEY WAMULIK YEHOVA

17, 18. Yom ik yikutwisha kukukwash anch muntu wa mu dijuku diey wamulik Yehova?

17 Anch muntu wa mu dijuku amwopat ap wiyauril amwinend ni chikumangen,  chikutwish kwikal chom chikash nakash. Chikutwish kwikal chisansena nakash ni ukwiyov mudi muntu wakutap kal mpak. Mutapu ik ukutwisha kujijamen kusansan kwinoku?

18 Dandamen kushinshikin pa kumusadin Yehova. Anch wovil kusansan mudi kwinoku, ufanyidin kukasikesh ritiy rey. Tang Bibil chisu chawonsu, irijeka ni yang ku yikumangan, dandamen kulejan, ni mulembila Yehova akwinkisha usu wa kujijaman. (Jud 20, 21) Chikwikal nchik anch usadin yom yiney yawonsu chad kusansan kudandamedin? Kangal waziy! Dandamen kushinshikin pa kumusadin Yehova. Mu kusut kwa chisu, yom yiney yikukukwash kusop yitongijok ni yovil yey. Yawiy yom yamushikena mwin kufund wa Kuseng 73. Kwading chisu chimwing chamukasikena mu mwom wend kusop yovil ni yitongijok yend. Pakwez, kumwifukwil Yehova kwamukwasha kuman kand yom mu mutapu uwamp. (Kuseng 73:16, 17) Chikutwish kand kwikal mwamu kudi ey.

19. Mutapu ik ukutwisha kumekesh kalimish mu mutapu uyipupinay Yehova antu end?

19 Limish kupup kwa Yehova. Nzamb wij anch kupup kwend kudi kwa ukwash kudi muntu mwawonsu, pamwing ni muntu wopatinau mu chikumangen. Ap anch chikat kulet kusansan nakash anch muntu tukatina amupup, chikutwish kumukwash kumuchirikin Yehova mu machuku ma kurutu. (Tang Hebereu 12:11.) Mwamu, tufanyidin kulimish mbil ya Yehova yilondina anch “kangal kubombakan” nau antu opatinau kal. (1 Korint 5:11-13, TMK) Chinech chiswapelingap. Pakwez tufanyidin kwipuk kwambamb nau ku telefon, ku mesaj, kufundijadin mikand, ap kwambamb nau ku internet.

Tufanyidin kudandamen kwikal ni ruchingej anch anamakwetu akatish akumuchirikin Yehova

20. Yom ik tufanyidina kudandamen kuchingejin?

20 Kangal washadish ruchingej! Rukat “rikat kuchingej kwau yom yawonsu,” chawiy, tufanyidin kudandamen kwikal ni ruchingej anch anamakwetu akatish akumuchirikin Yehova. (1 Korint 13:7, TMK) Anch ukwet uman umekeshina anch mwanamakwey ukat kuswimp mwikadil wend, ukutwish kumulembil chakwel atambula usu udiokila mu Bibil ni itiya kutazuk kwa Yehova kulondina anch: “Chirikany kudi am.”—Isay 44:22.

21. Yom ik ufanyidina kusal anch dijuku diey diakulik mulong umulondwil Yesu?

21 Yesu walonda anch tufanyidin kumukat ndiy nakash kusutamu muntu win mwawonsu. Ni Yesu wading nich kashinsh anch in kwilejend akwikal nich kutakaman mulong wa kushal ashinshamena kudi ndiy ap anch majuku mau mayilik. Chawiy anch dijuku diey diakulik mulong umulondwil Yesu, muchingejina Yehova. Mwita akukwasha chakwel utwisha kujijaman. (Isay 41:10, 13) Ikal ni musangar pa kwijik anch Yehova ni Yesu akusangaredin ni akukufut mulong wa kushinshaman kwey.

^ par. 10 Mulong wa jinsangu jivud jilejena mutapu wa kuyifumb an anch nvaj umwing ndiy umusadidina Yehova, tal “yipul ya in Kutang”mu Chinong cha Kalam cha 15 Ngond wa 8, 2002, mu Français.