Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 10 , 2017

‘Tukatany . . . mu Yisal ni Uyakin’

‘Tukatany . . . mu Yisal ni Uyakin’

‘Tufanyidin kukat, kadiap mu mazu ap mu kulond pakwez mu yisal ni uyakin.1 YOHAN 3:18.

MIMINY: 3, 50

1. Wisu mutapu ujim nakash wa kumekesh rukat, ni mutapu ik ukutwisha kuurumburil? (Tal chipich cha kwisambishin.)

YEHOVA ndiy Musul wa rukat. (1 Yohan 4:7) Mutapu ujim wa rukat wimedin pa mbil yitentamina. Mu Bibil, mutapu winou wa rukat aurumburil mu dizu dia Grek anch a·gaʹpe. Rukat riner mudi yovil ya kumukat muntu kanang, pakwez mudi yom yikwau kand yivud kusutamu kwau kwikal ni yovil. Rukat rikat kumeken kusutin kusal yom pakad choy mulong wa uwamp wa antu akwau. Ridi rukat rikata kutubachik kuyisadin akwetu yom yiwamp. Rukat ra mutapu winou ritwinkishin musangar ni ritukwashin kwijik usey wa mwom.

2, 3. Mutapu ik wamekeshay Yehova rukat rakad choy mulong wa antu?

2 Yehova wamekesha rukat mulong wa antu kurutu kwa kumutang Adam ni Ev. Wasala divu mulong pikala chom chawonsu tukutwisha kuswiriken mulong wa kwikalaku. Chikwau kand, ndiy wasala anch yikala ndond yetu ya kushakam tukutwisha kusanger mwom. Yehova kasalap yom yiney mulong wendendiy amwinend. Wasala mulong wetwetu. Papwishay  kutenchik ndond yetu ya kushakam, ndiy wayitanga antu ni wayinkisha ruchingej ra kushakam chikupu mu paradis pa divu.

3 Kupwa, Yehova wamekesha rukat rend rakad choy mulong wa antu mu mutapu upandikena kujimb nakash. Ap anch Adam ni Ev abwambwila, Yehova wading nich kashinsh anch anau amwing akuvalau akutwish kumukat chawiy chatenchikay mulambu wa difut dia Mwanend mulong wa kuyipandish antu. (Disambishil 3:15; 1 Yohan 4:10) Kudiosh kamu pa chisu chashilayimu Yehova kupan difut, chading mudi wapanin kal mulambu winou. Kupwa kwa mivu 4000, Yehova wamupana chad Mwanend kapokal mulong wa antu. (Yohan 3:16) Tujikitishin nakash mulong wa rukat ra Yehova!

Mekesh rukat ap anch chiswapelap kusal mwamu

4. Mutapu ik twija anch antu akad kuwanyin akutwish kumekesh rukat rakad choy?

4 Ov, tukutwish kumekesh rukat rakad choy ap anch tudi antu akad kuwanyin? Mwaning, tukutwish. Yehova watutanga mu chifu chend, chawiy tukwet ukaliweny wa kumwimburij ndiy. Chiswapelingap chisu chawonsu kudi etu kumekesh rukat rakad choy, pakwez tukutwish kwetu. Abel wamekesha rukat mulong wa Nzamb papanay pakad choy yom yend yiwamp yadingay nich. (Disambishil 4:3, 4) Nowa wamekesha rukat rend rakad choy padandamenay kulejan uruu wa Nzamb mu mivu yivud ap anch antu kamuteshap. (2 Pita 2:5) Aburaham niyend wamekesha anch rukat rend mudiay Nzamb rading rikash kusutamu chom chin chawonsu pipanay mulong wa kumulambul mwanend mukatish Isak. (Jakobu 2:21) Mudi amakundj inay ashinshamena, komb niyetu tufanyidin kumekesh rukat ap anch chiswapelap kusal mwamu.

RUKAT RAKIN CHOM IK?

5. Mu mitapu ik tukutwisha kumekesh rukat rakin?

5 Bibil utulejin anch tufanyidin kumekesh rukat rakin ‘kadiap mu mazu ap mu kulond pakwez mu yisal ni uyakin.’ (1 Yohan 3:18) Ov, chinech chimekeshin anch tukutwishap kumekesh rukat kusutin yom tulondina? Bwat. (1 Tesalonik 4:18) Chirumburikin anch tufanyidinap kwetu kwimen pa kulond anch “nikukatin.” Tufanyidin kumekesh anch twovil kurumburik kwa yom tulondina. Chilakej, anch akadivar ap anambaz netu kakwetap yakudia yiwanyidina ap masun, aswirikedin kuyikwash pa ndond pa kuyilej kwau mazu mawamp. (Jakobu 2:15, 16) Chilik chimwing, mulong tumukatin Yehova ni amutej netu, tufanyidinap kwetu ching kulembil chakwel tumana antu avud a kulejan nau, pakwez tufanyidin niyetu kwipan nakash mu mudimu wa kulejan.—Mateu 9:38.

6, 7. (a) “Rukat rakad rubabek” chom ik? (b) Yisu yilakej yimwing ya rukat ra makasu?

6 Kambuy Yohan walonda anch tufanyidin kukat ‘mu yisal ni uyakin.’ Chawiy rukat retu rifanyidin kwikal “rakad rubabek.” (Rom 12:9; 2 Korint 6:6) Yisu yimwing muntu ukutwish kutong anch umekeshin rukat. Pakwez, ov, rukat rend ridi kamu rakin ni ridiokila ku muchim? Yom ik yimubachikina kukat? Kwikil chom chipandikena kuyip mudi kumekesh rukat ra rubabek. Rukat ra makasu ridi ra chamwamu.

 7 El tushinshikinany yilakej yimwing ya rukat ra makasu. Chisu chambambay Satan ni Ev mu chir cha Eden, yom yalonday yamekana mudi anch ukatin yom yiwamp mulong wendendiy. Pakwez yisal yend yamekesha yom yindj. (Disambishil 3:4, 5) Padingay David mwant, wading ni murund nend watazukangau anch Ahitofel. Pakwez Ahitofel wamutuna David mulong wa kutaninamu kwend amwinend. Yisal yend yamekesha anch kadingap murund wakin. (2 Samwel 15:31) Nlel unou, in kupumbok ni antu akwau aletina kwaurok mu chikumangen asadidin “mazu mau mawamp ma rulemb.” (Rom 16:17, 18) Akutwish kulond anch ayibangidin antu akwau, pakwez mu uyakin adi antu akweta choy.

8. Chipul ik tufanyidina kwiyipul ayinetu?

8 Rukat ra makasu rikat kuletish usany mulong akat kurisadin mulong wa kuyirumbukin antu akwau. Tukutwish kuyidimb antu, pakwez tukutwishap kumudimb Yehova. Yesu walonda anch antu in rubabek akuyipup ‘mu mutapu uyimp nakash.’ (Mateu 24:51) Mulong tudi atushalapol a Yehova, tufanyidinap kwikal in rubabek. Chawiy tufanyidin kwiyipul anch: ‘Ov, rukat ram ridi rakin, ap nikwet choy ni niburedin kashinsh?’ El tushinshikinany mitapu chidivu tukutwisha kumekesh anch rukat retu ridi “rakad rubabek.”

MUTAPU TUKUTWISHA KUKAT ‘MU YISAL NI UYAKIN’

9. Rukat rakin rikutubachik kusal yom ik?

9 Ikal ni musangar wa kusal yom yiwamp ap anch kwikil muntu umena yom usadina. Tufanyidin kuyisadin antu akwau yom yiwamp ni ya rukat pakad muntu ap umwing kwijik. (Tang Mateu 6:1-4.) Ananias ni Safira ading ni chitongijok chiyimp. Chisu chapanau mulambu, akata anch antu akwau ijika piur pa mulong winou. Adimbana piur pa uvud wa nfalang japanau ni ayipupa mulong wa rubabek rau. (Midimu 5:1-10) Pakwez anch tuyikatin akadivar netu, tukusanger kusal yom yiwamp mulong wa awiy pakad kukimb anch antu akwau ijik yom twayisadinang. Tukutwish kwilejin yom yivud kudi akadivar akwashina Chisak Chitakedila kurijek yakudia ya mu spiritu. Kakatap kukimb katumb kau ayinau, ni kakatap kukimb anch antu akwau ijika yom yisadinau.

Ikal ni musangar wa kusal yom yiwamp ap anch kwikil muntu umena yom usadina

10. Mutapu ik tukutwisha kuyilimish antu akwau?

10 Yilimisha antu akwau. (Tang Rom 12:10.) Yesu wayilimisha atwimbuy end chisu chayowishay mem ku mend. (Yohan 13:3-5, 12-15) Tufanyidin kusal usu nakash wa kwikal ikepishina mudi Yesu ni kuyisadin antu akwau. Atwimbuy kateshap kamu nawamp yom yasalay Yesu kushik ni patambwilau spiritu utumbila. (Yohan 13:7) Tumekeshin anch tuyilimishin akwetu pa kulik kutong anch tudi awamp kuyisutamu awiy mulong twileja nakash, tudi ampich, ap mulong tukwet yisend ya pakampwil. (Rom 12:3) Tukatap kwov mukau anch ayibaz akwetu, pakwez tukat kusangar  nau pamwing ap anch twiyov anch niyetu afanyidin kutubaz mudi awiy.

11. Mulong wak kujikitish kwetu kufanyidin kwikal kwakin?

11 Pan kujikitish kwakin. Kimb mitapu ya kuyijikitish antu akwau. Etu awonsu twij anch kujikitish chidi chom chiwamp chikata “kukasikesh” umwing ni mukwau. (Efes 4:29) Pakwez tufanyidin kwikal nich kashinsh anch yom tulondina yidi yakin ni tuyilondinap mulong wa kuyibabek antu akwau. Tufanyidinap kulond yom yitwakad kwov kurumburik ap kulik kupan chiyul chiwanyidina. (Jinswir 29:5) Tukwikal in rubabek anch twayijikitish antu akwau ni kupwa etu twaya kuns twasambish kuyilond nayimp. Kambuy Paul wading ni rukat rakin. Chisu chayifundinay in Kristu a ku Korint, wayijikitisha mulong wa yom yiwamp yasalau. (1 Korint 11:2) Pakwez chisu chadingau nich kuswir kwa yiyul, wayirumburila patok ni mu mutapu uwamp.—1 Korint 11:20-22.

Tumekeshin rukat ni muchim wa kwak angendj anch twayinkish akadivar nau anambaz netu ukwash uswirikedinau

(Tal paragraf wa 12)

12. Mutapu ik tukutwisha kumekesh rukat rakin chisu tuyakina angendj?

12 Ikal mwin kwak angendj. Yehova utulejin kwikal in kupan kudi akadivar nau anambaz netu. (Tang 1 Yohan 3:17.) Pakwez tufanyidin kwikal ni yibachikin yiwamp ya kwikal in kwak angendj. Tufanyidin kwiyipul ayinetu anch: ‘Ov, nikat kutazukang ku chikumbu cham ching kwau arund nam a piswimp ap antu nimena anch akwet usey mu chikumangen? Ov, nikat kutazukang kwam ching antu nitongina anch akutwish niyau kwinchirishin chom kanang? Ap nidi mwin kupan kudi akadivar nau anambaz anakad kwijik nawamp ap kudi akad kutwish kwinchirishin chom kanang?’ (Luka 14:12-14) Tongin yom ey: Chikwikal nchik anch mukadivar ukwet kuswir kwa ukwash mulong wa mupak uyimp wakwatay? Ap chikwikal nchik anch muntu twatazukang ku chikumbu chetu katujikitishinap? Yehova utulejin anch: “Akijanany amwing ni akwau wakad kwinan.” (1 Pita 4:9) Tukwikal ni musangar anch twapan ni yibachikin yiwamp.—Midimu 20:35.

13. (a) Chisu ik tufanyidina kwikal in kushimpish muchim nakash? (b) Yom ik tukutwisha kusal mulong wa kuyikwash antu aziyina?

13 Yikwasha antu aziyina. Chijil cha Bibil cha ‘kuyikwash aziyila ni kushimpish michim kudi antu awonsu’ chikutwish kupak anch rukat retu ridi rakin. (1 Tesalonik 5:14) Akadivar avud ading aziyina akasikana mu ritiy. Pakwez akwau adandamedin kwikal ni kuswir kwa kushimpish michim kwetu ni kuyikwash kwa rukat. Mutapu ik tukutwisha kuyikwash? Tukutwish kusadin Bibil mulong wa kuyikasikesh, kulejan nau pamwing ap kuyitesh chisu chilondinau. Chikwau  kand, tufanyidinap kutong anch akadivar ap anambaz adi ‘akash’ ap ‘aziyin.’ Pakwez, tufanyidin kwijik anch etu awonsu tukweting usu ni tukat kuziy. Ap kambuy Paul niyend witiyina anch wading uziyin. (2 Korint 12:9, 10) Etu awonsu tukwet kuswir kwa ukwash ni kukasikeshijan umwing ni mukwau.

14. Yom ik tufanyidina kusal mulong wa kulam chisambu nau akadivar netu?

14 Ikal mwin chisambu. Kusal chisambu nau akadivar netu kudi kwa usey nakash. Ap anch twiyov anch katuteshangap nawamp ap aturumbukinang, tufanyidin kusal yom yawonsu tukutwisha mulong wa kusal chisambu. (Tang Rom 12:17, 18.) Anch twamwovishang muntu kanang ujim, tufanyidin kumwit dilikishin. Pakwez tufanyidin kwikal in kashinsh. Chilakej, pa ndond pa kulond anch: “Nlikishinaku anch wiyovang mwamu,” chikwikal chiwamp kwitiyin kurumbuk kwetu ni kulond anch: “Nlikishinaku mulong nakwovishang kuyip kusutin yom nalondang.” Chisambu chidi kand cha usey nakash mu uruw. Chiding chiyimp nakash kudi ikundj ni mband kusal mudi akatijadin kurutu kwa antu, pakwez awiy mu ujindj akat kulik kulondishijan, akat kulondijan yom yiyimp umwing ni mukwau, ap kwikal in chisum.

15. Mutapu ik tukutwisha kumekesh anch dilikishin dietu didi diakin?

15 Likishin kwa kwikatin. Anch muntu waturumbukin, tukumulikishin ni kuvuramen yom yiney. Tufanyidin kusal mwamu ap anch kajinguninap kwend anch waturumbukinang. Tulikishidin kwa kwikatin mu ‘kukwashijan muntu ni mukwau mu rukat, kwikasikesh kwikal mu umwing wa spiritu ukata kutwinkish chisambu chitukasina etu awonsu pamwing.’ (Efes 4:2, 3) Mulong wa kulikishin kwa kwikatin, tufanyidin kulik kutongin pa yom yatusalangay muntu. Rukat “kirukumulaminangap muntu kuyip.” (1 Korint 13:4, 5) Pakwez anch twalam  rukuny, tukutwish kuyipish urund wetu ni mukadivar ap ni nambaz netu ni tukuyipish kand urund wetu ni Yehova. (Mateu 6:14, 15) Tumekeshin anch dilikishin dietu didi diakin anch twalembil mulong wa muntu waturumbukinang.—Luka 6:27, 28.

16. Mutapu ik tufanyidina kuman yisend ya pakampwil yitwinkinau mu mudimu wa Yehova?

16 Kangal kwitongin amwiney. Anch twatambul yisend ya pakampwil mu mudimu wa Yehova, tukumekesh anch rukat retu ridi rakin anch ‘twakimb, kadiap uwamp wetu ayinetu, pakwez uwamp wa antu akwau.’ (1 Korint 10:24) Chilakej, ku yitentam yetu, in kukumangan amwing ezining kurutu kwa akwau akutwish kutond jindond jiwamp ja kushakam mulong wa awiy ni majuku mau. Pakwez, avud pakach pau akat kushakam pa jindond jiyilejiningau. Mu kusal mwamu akat kumekesh anch kakwetap rukat ra choy. Mutapu ik ukutwisha kwimburij yilakej yau yiwamp?

17. Anch mwin Kristu wasal chitil chijim, rukat rakin rikumubachik kusal ik?

17 Lejan patok ni lik kusal yitil mu ujindj. In Kristu amwing asala yitil yijim apakisha kuyijindjik. Pamwing ap akama ni kakatap anch ayovisha antu akwau kuyip. (Jinswir 28:13) Pakwez kujindjik chitil kudiap kumekesh rukat mulong chinech chikumusal nayimp mwin kusal chitil ni antu akwau. Mutapu ik? Yehova ukutwish kulik kuyukish chikumangen kusutin spiritu wend utumbila ni chikumangen chikuburen chad chisambu. (Efes 4:30) Chawiy anch mwin Kristu wasal chitil chijim, rukat rakin rikumubachik kuyilej amakurump a chikumangen ni kumwinkish ukwash uswirikedinay.—Jakobu 5:14, 15.

18. Rukat rakin rikwet usey ik?

18 Rukat udi mwikadil ujim pa mikadil yawonsu. (1 Korint 13:13) Rikat kuyikwash antu kuyijik in kwilej akin a Yesu, kwijik anany amwimburijina Yehova, udia Musul wa rukat. (Efes 5:1, 2) Paul walonda anch ang kakwetap rukat, wafanyina kwikal wa chamwamu. (1 Korint 13:2) Chawiy muntu ni muntu adandamena kumekesh rukat, chidiap kwau ching kusu mu ‘mazu’ pakwez kand ‘mu yisal ni uyakin.’