Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 10 , 2017

Ov, Wij?

Ov, Wij?

Mulong wak Yesu wayifisha nich antu ading kuchip?

CHIJIL cha Moses chitiyija anch antu achipa mu kulond yom mudi anch, “Nzamb kamu,” ap anch “nashilamu kal mu dijin dia Yehova.” Pakwez, mu chirung cha Yesu, chaku cha kuchip chavulijana nakash, chawiy in Yuda achipang mulong wa chom chin chawonsu chikulondau. Asalang mwamu mulong wa kumekesh anch yom yilondinau yidi yakin, pakwez Yesu wayifisha nich mulong wa chaku chinech chakad usey tupamp twaad. Ndiy wafundisha anch: ‘Komb dizu dien Inge dirumburika kamu Inge, Bwat wen, Bwat.’—Mateu 5:33-37; 23:16-22.

kukwatijan ni Dictionnaire théologique du Nouveau Testament, Talmud (buku wa yijil ya in Yuda) utukwashin kuman mutapu wavulijana chaku cha kuchip kudi in Yuda, ap kulap mulong wa kumekesh anch mazu mau madi makin. Chawiy Talmud urumburil kachom pa kachom piur pa machip mafanyinau kulam ni mafanyinau kujip.

kadiap ching kusu Yesu wafishana nich mulong wa chaku chinech chiyimp. Chilakej, mwin kufund nsangu mwin Yuda, Flavius Josèphe wafunda piur pa kachisak ka relijon ka in Yuda kipukang kuchip. Antu a mu kachisak kinak itiyijang anch kuchip kudi kuyimp nakash kusutamu kudimban. Amana anch ang muntu ukimbin kuchip mulong akwau amwitiyija, kwawiy kulond anch muntu winou ufanyidin kwikal mukamakasu. Mukand wa in Yuda wa Manangu ma Sirac, ap utazukinau anch Mulej, (23:11) ulondin niyau anch: “Muntu ukata kuchipang uburedin chijil mu muchim wend.” Yesu wayifisha nich antu akata kuchipang piur pa milong yakad usey. Anch tukat kulond uyakin chisu chawonsu, tukwikalap nich kuswir kwa kuchip mulong wa kumekesh anch yom tulondina yidi kamu yakin.