Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 10 , 2017

Chisal Chimwing cha Uwamp wa win Kristu

Chisal Chimwing cha Uwamp wa win Kristu

MU MUSUMB ukemp mu Gujarat, mwi ngand ya Inde, tatukwend a John amubatisha ni wikala Kaman wa Yehova kwinsudien kwa muvu wa 1950. Pakwez John, anamakwend amakundj nau amband atan, ni makwau ading in Katolik wa Rom ni ading akatin relijon nakash. Mulong wa diyingishin dined, kovijanap ni tatukwau mulong wa ritiy rend.

Dichuku dimwing, tatukwend a John wamutuma John kutwal mukand kudi mukadivar wa mu chikumangen. Pakwez pamanch pinipa, John witapa nayimp ku muny pa kufungul kwi ntuku mujim wa yikung. Mulong wakata kumuziyin tatukwend, John wakasa chibel ku muny wend wading udjila mash ni waya kutwal mukand.

Chisu chashikay kwayay, wapana mukand kudi mukajend a mukadivar winou. Mband winou wading Kaman wa Yehova. Wamana chitat ku muny wa John ni wipana mulong wa kumukwash. Wanona yom yend ya mudimu ya kwokan nich, wamowisha pa chitat ni wamukasa bandaj ku muny. Kupwa wamwinkisha John dikopu dia chay. Chisu chasalay John kwinikwa, mband winou wambamba nend mu mutapu uwamp piur pa Yehova.

Mulong wa uwamp wend, yovil ya John piur pa Atuman yasambisha kuswimp. Chawiy John wamwipula yipul yaad piur pa yitiyij ya Atuman a Yehova yishalijadina ni ya Egliz Katolik. Wamwipula anch Yesu udi Nzamb ni anch in Kristu afanyidin kumulembil Mariy. Nambaz winou wading wij dizu dia Gujarati ni watwisha kumwakul John mu dizu diend. Wamwakula kusutin Bibil ni wamwinkisha broshir ulondina anch: “Rusangu Riner Ruwamp ra Want,” mu Inglish.

Kupwa, John watanga broshir ni wamana kamu anch yom yadingay yitanginay wading uyakin. Waya kudi mwimpel ni wamwipula kand yipul yiney yaad. Mwimpel wajimana nakash ni wamudjibwila Bibil ni wamuswejena anch: “Ey wikal kal Satan! Nleja ndond yilondinay Bibil anch Yesu kadiap Nzamb. Nleja ndond yilejenay anch ufanyidinap kumwifukwil Mariy. Nleja kamu!” John waziya nakash mulong wa mutapu wamwakulau kudi mwimpel winou. Wamuleja mwimpel anch kakuyap kand ap pakemp mu egliz Katolik. Ni kakuyangangap kand mu egliz winou!

John wasambisha kwilej nau Atuman, witiya uyakin ni wasambisha kumusadin Yehova. Mu kusut kwa chisu, antu akwau a mu dijuku diend niyau itiya uyakin. Pasutin kal mivu 60, chidond chidia ku muny wa John chidandamedin kumuvurish chisal chimwing cha uwamp wa win Kristu chamubachika kumusadin Yehova mu mwom wend.—2 Korint 6:4, 6.