‘Kangal wov wom, mulong nidi ney. Kangal wazal, mulong nidi Nzamb wey. Nikukukasikesh ni kukukwash kand.’—ISAY 41:10.

MUMINY 7 Yehova Udi Usu Wetu

YIDIA MU MUTU WA MULONG WINOU *

YOSHIKO nambaz mwin Kristu ushinshamena amuleja rusangu riyimp nakash. Dokiter wend wamuleja anch kwashal kal angond akemp chakwel afa. Mutapu ik wakulay? Yoshiko wavurika verse wend wa Bibil wading ukatinay nakash wa Isay 41:10. (Tang.) Wamwakula dokiter wend nich kwitudish anch kwovilap wom, mulong Yehova wading umukwatin ku chikas chend. * Mazu makasikeshina tutanina mu verse winou mamukwasha nambaz netu kumuchingejin kamu Yehova. Verse winou ukutwish kutukwash niyetu chakwel tulika kuzazat piturishina ni yakamish kushalijan. Chakwel twijika mutapu tukutwisha kusal mwamu, el tushinshikinany chakusambish mulong wak Nzamb wamupepila Isay chakwel afunda mazu minam.

1-2. (a) Mutapu ik mazu mafundinau mu Isay 41:10 mamukwasha nakash nambaz Yoshiko? (b) Anany akutwisha kutaninamu mu mazu mamupepilau Isay kudi Yehova?

2 Chakusambish, Yehova wamupepila Isay kufund mazu minam mulong wa in Yuda afanyinau kukwat mu winkwal mu Babilon. Pakwez, Yehova kasalap anch mazu minam amafunda mulong wa kutaninamu kwau ching kudi in Yuda ading mu winkwal pakwez mading kand ma usey kudi antu end awonsu adinga pa chisu chinacha djat ni nlel unou. (Isay 40:8; Rom 15:4) Nlel unou tushich mu ‘machuku makash ma mar nakash,’ chawiy tuswirikedina nakash mazu makasikeshina madia mu mukand wa Isay.​—2 Tim. 3:1.

3. (a) Kushilamu ik kudia mu Isay 41:10, udia mufund wa muvu wa 2019? (b) Mulong wak tukweta kuswir kwa kushilamu kwinoku?

3 Mu mutu wa mulong winou tukushinshikin yom yisatu yilondinay Yehova yikukasikesha ritiy retu yidia mu Isay 41:10:  (1) Yehova ukwikal netu, (2) Yehova udi Nzamb wetu, ni (3) ukutukwash. Tukwet kuswir kwa kushilamu * kwinoku mulong mudi Yoshiko, niyetu tukat kurish ni yakamish mu mwom. Tukat kurish kand ni yakamish mulong wa yom yiyimp yisadikina mu mangand minam. Amwing pakach petu akat kurish ni kuzengol kudiokila kudi antakel a usu a mangand minam. El tushinshikinany kushilamu kwinoku kusatu.

‘NIDI NEY’

4. (a) Kushilamu ik kwa kusambish tukushinshikina? (Tal kand mazu ma kwinshin.) (b) Yom ik yalonday Yehova yimekeshina mutapu wiyovilay piur petu? (c) Mutapu ik wiyovila piur pa yom yalonday Yehova?

4 Chakusambish, Yehova utukasikeshin nich mazu manam malondina anch: ‘Kangal wov wom, mulong nidi ney.’ * Yehova umekeshin anch udi pamwing netu pakatay kutubangin ni kutumekeshin rukat nakash. Shinshikin mutapu ukatay kutubangin ni kutumekeshin rukat nakash. Yehova ulondin anch: “Ukwetany usey ujim nakash kudi am. En udiany akarukat nam nilimishina.” (Isay 43:4) Kwikil chitang ap chimwing chidia mwiur ap pansh chikutwisha kumukangesh Yehova kuyikat atushalapol end; rukat rend rishinshamena mulong wetwetu rikwetap mipak. (Isay 54:10) Urund wetu ni ndiy ni rukat rend yawiy yom yitukasikeshina. Ukutuking mudi mwamukingay murund nend Abram (Aburaham). Yehova wamuleja anch: “Kangal wov wom, am yam rikibu rey.”—Dis. 15:1.

Nich ukwash wa Yehova, tukutwish kupandakan yoziu yin yawonsu yidia mudi difut dilemp dia wit ap kasu (Tal paragraf wa 5-6) *

5-6. (a) Mutapu ik twija anch Yehova ukatining kutukwash pitukata kurish nich yakamish? (b) Dilejan ik tukutwisha kwilejin ku chilakej cha Yoshiko?

5 Twij anch Yehova ukat kutubangin kusutin kutukwash chakwel turisha nich yakamish mulong uyikanin antu end anch: “Anch wasutilany pa difut dilemp [dia wit], nikwikal ni yenen. Anch wamananyap nchik mar, ukupandany kwen. Anch wasutilanyap nchik mu kasu, kiukutemanyap. Yakamish yikash kiyikez kakusheshanyap.” (Isay 43:2) Mazu minam marumburikin ik?

6 Yehova kashidinamwap anch ukudiosh ching yikokujol yisadina anch mwom wikala  ukash, pakwez ukudiosh “difut dilemp [dia wit]” dituletidina milong ap yakamish ni “kasu” ka milong yikutwisha kusal anch tukanganya kumusadin Yehova. Utukanin anch ukwikal pamwing netu, ukutukwash chakwel ‘tusuta’ pa difut dia wit ap pa kasu, charumburik anch tupandakana yikokujol yiney. Yom ik yikusalay Yehova? Ukutukwash chakwel tulika kwov wom ni tudandamena kwikal ashinshamena kudi ndiy djat ni ku rufu. (Isay 41:13) Mazu minam mawanyina kamu padiay Yoshiko twisambinang kwinsambishil. Mwanend changadim ulondin anch: “Twashimoka nakash mutapu walikay Maku kuzazat. Twamana kamu patok anch Yehova wamwinkisha chisambu cha mu manangu. Djat ni pa dichuku diafay, Maku wisambang ni amingang ni ayej akwau piur pa Yehova ni piur pa kushilamu kwend.” Yom ik twilejidina ku chilakej cha Yoshiko? Anch twachingejin mu kushilamu kwa Nzamb kulondina anch “nikwikal ni yenen,” tukutwish niyetu kwikal akash ni atakamena chakwel tupandakana yakamish.

‘NIDI NZAMB WEY’

7-8. (a) Kushilamu ik kukwau tukwisambina, ni kushilamu kwinoku kurumburikin ik? (b) Mulong wak Yehova wayileja in Yuda adinga mu winkwal anch: ‘Kangal wazal’? (c) Mutapu ik wafanyina mazu madia mu Isay 46:3, 4 kutudish michim ya antu a Nzamb?

7 El tushinshikina kushilamu kwa kaad kwafunday Isay kulondina anch: ‘Kangal wazal, mulong nidi Nzamb wey.’ Dizu kuzal dirumburikin ik? Mu dizu dia kusambish diafundau Bibil, dizu ‘kuzal’ didia mu verse winou dimekeshin chitongijok cha “kudandamen kutal kwinyim mulong wovil wom wa chom kanang” ap “wa muntu kanang ukutwisha kukusal nayimp.”

8 Mulong wak Yehova wayileja in Yuda afanyina kwikal mu winkwal mu Babilon chakwel kangal ‘azala’? Mulong wading wij anch antu a mwi ngand yiniya afanyina kwov wom. Yom ik yafanyina kuletish wom winou? Piswimp ni kwinsudiel kwa chirung cha mivu 70 yadingau in Yuda mu winkwal, in Babilon afanyina kuyirishikish kudi amasalay akweta usu a in Mediy ni Peris. Yehova wafanyina kusadin amasalay inay mulong wa kuyikol antu end mu winkwal mu Babilon. (Isay 41:2-4) Chisu chijikau in Babilon nau antu a michid yikwau adingaku pa chirung chinicha anch akankuny nau ading asejin piswimp, asala usu wa kulam kutakaman kwau kusutin kulond kudi umwing ni mukwau anch: ‘Ikal mukash.’ Asonga kand akish, mulong ading achingejin anch akish inay ela kuyiking. (Isay 41:5-7) Pa chisu chawiy chimwing kand, Yehova watudisha michim ya in Yuda adinga mu winkwal payilejay anch: ‘Ey, Isarel, [udiap mudi amutej ney] udi kashalapol wam . . . Kangal wazal, mulong nidi Nzamb wey.’ (Isay 41:8-10) Vurik anch Yehova walonda anch: ‘Nidi Nzamb wey.’ Kusutil ku mazu minam, Yehova wayikasikesha in kumwifukwil end ashinshamena anch kayivuramedinap​—wading udandamedin kwikal Nzamb wau ni awiy ading adandamedin kwikal antu end. Wayileja anch: “Nikukulamany . . . ni kukukamuninany.” Chakin kamu, mazu ma dikasikesh minam mayikasikesha kamu in Yuda adinga mu winkwal.​—Tang Isay 46:3, 4.

9-10. Mulong wak tufanyidinap kwov wom? Let chilakej.

9 Nlel unou, antu adia mu mangand arishin ni yakamish mulong wa yom yiyimp nakash yisadikina mu mangand. Chakin kamu, niyetu turishin ni yom yiney. Pakwez chifanyidinap kwov wom ap pakemp. Yehova ulondin anch: ‘Nidi Nzamb wey.’ Mulong wak mazu minam matukwashin kulik kuzazat ap kwov wom?

10 Shinshikin pa chilakej ech: Jim ni Ben ayil mu weny ni motak, pakwez padiau mwi njil, ashik ndond yidia mabuku nakash ni motak wasambish kunyikek nakash. Chad atesh  mwin kwendish motak ukat kulond anch: “Lamany kamu ni usu. Twashikal kal ndond yiyimp yikweta mabuku nakash.” Jim wasambish kwov wom nakash. Pakwez mwin kwendish motak walond anch: “Kangal wazalany. Yama mwin kwendish motak nikulejinanya mwamu.” Pa chisu chinicha, Jim wanyikeshaku mutu wend ni walond anch: “Kinak kashinsh ka mutapu ik?” Kupwa wamuman Ben kwovilap wom ap pakemp. Jim umwipwil Ben anch: “Mulong wak wovilap wom?” Ben wasipaku ni wamulej anch: “Am nimwij nawamp mwin kwendish motak winou. Udi tatukwam!” Kupwa Ben wamulej kand Jim anch: “El nikulej yom kanang piur pa tatukwam. Nikwet kashinsh ang anch wamwijik nawamp ni wijik ukaliweny ukwetay, niyey ukutwishap kwov wom.”

11. Yom ik tukutwisha kwilejin ku chilakej cha Jim ni Ben?

11 Yom ik tukutwisha kwilejin ku chilakej chinech? Mudi Ben, twovilap wom, mulong tumwij nawamp Tatukwetu wa mwiur, Yehova. Twij anch ukutukwash chakwel tujijamana chikalap nchik milong yikash yikutwisha kutushiken mu machuku minam ma nsudien. (Isay 35:4) Tumuchingejidin Yehova, chawiy tukutwishap kwov wom pituyimena antu akwau adia mu mangand akat kwov wom. (Isay 30:15) Tukutwish kand kumwimburij Ben chisu tuyilejina antu akwau mayingishin masadina anch tumuchingejin Nzamb. Kupwa niyawiy akutwish kwikal nich kashinsh anch chikalap nchik milong yikutwishau kurish nich, Yehova ukuyikwash.

‘NIKUKUKASIKESH NI KUKUKWASH’

12. (a) Kushilamu ik kwa kasatu tukushinshikina? (b) Dizu ‘chikas’ cha Yehova dituvurishin ik?

12 Shinshikin kushilamu kwa kasatu kwafunday Isay: ‘Nikukukasikesh ni kukukwash kand.’ Isay wading walejen kal mutapu wafanyinay Yehova kuyikasikesh antu end palonday anch: ‘Yehova ukwez ni usu, ni chikas chend chikuyikel mulong wendendiy.’ (Isay 40:10) Yisu yivud, Bibil usadidining dizu ‘chikas’ mulong wa kumekesh usu. Chawiy mazu malondina  anch ‘chikas cha Yehova chikuyikel’ matuvurishin anch Yehova udi Mwant ukweta usu. Wasadina usu wend wakad mipak mulong wa kuyikwash ni kuyiking atushalapol end a pasak, ni udandamedin kand kuyikasikesh ni kuyichidij antu amuchingejidina ndiy nlel.​—Kuv. 1:30, 31; Isay 43:10.

Ut wawonsu ukuchilau ukezap kupandakan chikas cha usu cha diking cha Yehova (Tal paragraf wa 12-16) *

13. (a) Chisu ik chikatay Yehova kuwanyish kushilamu kwend kwa kutukasikesh? (b) Kushilamu ik kutwinkishina usu ni kutukasikeshina?

13 Chisu chikatau akankuny netu kutuzengol, Yehova ukat kuwanyish kushilamu kwend kulondina anch: ‘Nikukukasikesh.’ Nlel unou mu jingand jimwing, akankuny netu akat kusal usu nakash wa kukangesh mudimu wetu wa kulejan ap kukangesh midimu ya dirijek dietu. Ap mwamu, tukatap kuzal ap kwov wom mulong wa kurishikish kwinoku. Yehova washidinamu kal anch ukutwinkish usu ni ukutukasikesh. Utushidinamu anch: ‘Ut wawonsu ukuchilau mulong wa kukurishish ukez kupandikanap bwat’ (Isay 54:17) Mazu minam matuvurishin yom yisatu ya usey nakash.

14. Mulong wak tukatap kushimok anch akankuny a Nzamb aturishikish?

14 Chakusambish, mulong tudi in kwilej a Kristu, tufanyidin kwijik anch akutukis. (Mat. 10:22) Yesu watakela kulond anch in kwilejend akez kayizengol nakash mu machuku ma nsudiel. (Mat. 24:9; Yoh. 15:20) Cha kaad, uprofet wa Isay utubabeshin kand anch akankuny netu akusal yom yivud kulik kwau ching kutukis; akusadin mat kushalijan mulong wa kuturishikish. Akankuny netu akusal usu wau wawonsu mulong wa kupalangesh makasu mau mamekana mudi uyakin, akulond yom ya makasu piur petu ap akutuzengol nakash. (Mat. 5:11) Yehova kakuyikangeshap akankuny netu kusadin mat minam mulong wa kuturishikish. (Efes 6:12; Kuj. 12:17) Pakwez tufanyidinap kwov wom ap pakemp. Mulong wak?

15-16. (a) Chom ik cha kasatu tufanyidina kulam mu manangu, ni mutapu ik ukasikeshina mukand wa Isay 25:4, 5 chitongijok chinech? (b) Isay 41:11, 12 urumburil mutapu ik yom yikuyishikena antu akata kuturishikish?

15 Shinshikin chom cha kasatu tufanyidina  kulam mu manangu. Yehova walonda anch ‘ut wawonsu’ ukuchilau mulong wa kuturishikish ‘ukez kupandikanap bwat.’ Mudi mukata rubumbu kutuking ku rinkind mukash wa ruval, chawiy Yehova ni ndiy ukutuking ku “masok ma akankuny netu.” (Tang Isay 25:4, 5.) Akankuny netu kakutwishap ap pakemp kutusal nayimp machuku mawonsu.​—Isay 65:17.

16 Yehova ukat kukasikesh kand ruchingej retu mudiay ndiy kusutil kutulej nawamp yom yikeza kuyishiken antu ‘akata kuturishikish.’ (Tang Isay 41:11, 12.) Chikalap nchik usu usadinau akankuny netu mulong wa kuturishikish ap uvud wa njit jiturishikishinau, uyakin udi anch: Akankuny awonsu a Nzamb “akez kafa.”

MUTAPU WA KUKASIKESH RUCHINGEJ RETU MUDIAY YEHOVA

Tukat kukasikesh ruchingej retu mudiay Yehova kusutil kutang chisu chawonsu jinsangu jidia mu Bibil piur pend (Tal paragraf wa 17-18) *

17-18. (a) Kutang Bibil kutukwashin mutapu ik kumuchingejin kamu Nzamb? Let chilakej. (b) Kutongijokin pa mufund wa muvu wa 2019 kukutukwash mutapu ik?

17 Tukat kukasikesh ruchingej retu mudiay Yehova kusutil ku kumwijik nawamp. Mutapu umwing tukutwisha kumwijik kamu nawamp Nzamb udi wa kutang Bibil ni kutongijokin pa yom tutangina. Bibil ukwet jinsangu jakin jilejena mutapu Yehova wayikingay antu end a pasak. Jinsangu jinej jitwinkishin kashinsh anch Yehova ukat kutubangin ni katat.

18 Shinshikin chilakej chisangareshina chasadinay Isay chimekeshina mutapu ukatay Yehova kutuking. Ndiy wamufanikesha Yehova mudi kafung, pakwez atushalapol a Nzamb mudi amikoku. Isay walonda piur pa Yehova anch: “Ukez kasend an a amikoku mwi nkond yend.” (Isay 40:11) Pitumeninga anch Yehova utusendin mwi nkond yend, tukat kwiyov anch tudi mu diking ni tukatap kuzazat. Mulong wa kutukwash tulika kwov wom ap kuzazat chikalap nchik milong turishina nich, kashalapol ushinshamena ni kubabal watondin mukand wa Isay 41:10 mudi mufund wa muvu wa 2019 ulondina anch: ‘Kangal wazal, mulong nidi Nzamb wey.’ Tongijokin nakash pa mazu minam makasikeshina. Makukukasikesh chisu ukurisha ni yakamish yikutwisha kukushiken.

MUMINY 38 Ukez Kukukasikeshany

^ par. 5 Mufund wa muvu watondinau wa 2019 utwinkishin mayingishin masatu masadina anch tulika kuzazat chikalap nchik yom yiyimp yikutwisha kushiken mu mangand tudia ap yikutwisha kutushiken mu mwom. Mu mutu wa mulong winou tukushinshikin mayingishin manam masatu makutukwasha tulika kuzal ni tumuchingejina nakash Yehova. Tongijokin nakash pa mufund wa muvu. Ulama mu manangu anch chitwishikin. Ukukukasikesh chisu ukurisha ni milong ap yakamish mu machuku ma kurutu.

^ par. 1 Tal Chinong cha Kalam cha Ngond wa 7, 2016, paj wa 18, mu français.

^ par. 3 KURUMBURIL KWA MAZU KANANG: Kushilamu madi mazu makin mamekeshina anch chom kanang chikusadik kamu. Kushilamu kutushidilayimu Yehova kutukwashin tulika kuzazat mulong wa yakamish yikutwisha kutushiken mu mwom.

^ par. 4 Dizu ‘Kangal wov wom’ adifundin tupamp tusatu mu Isay 41:10, 13 ni 14. Mu maverse minam tutaninamu kand mazu malondina anch ‘mulong nidi ney’ ‘mulong nidi Nzamb wey’ ‘nikukukwash.’ Mulong wak Yehova wamupepila Isay chakwel afunda mazu minam? Mulong wa kutwinkish kashinsh ang—anch twamuchingejin Yehova tukutwishap kwov wom.

^ par. 52 KURUMBURIL KWA YIPICH: Antu a mu dijuku arishin ni yakamish ku mudimu, mayej, mu mudimu wa kulejan, ni ku shikol.

^ par. 54 KURUMBURIL KWA YIPICH: Pakumangenau Atuman a Yehova mu ujindj, ampurish ayibudikin kal, pakwez akadivar nau anambaz kwovilap wom ap pakemp.

^ par. 56 KURUMBURIL KWA YIPICH: Kusal Difukwil dia mu Dijuku chisu chawonsu kukat kutwinkish usu wa kujijaman.