“Chad . . . akez kaman kand kwaurik kwa yom yikeza kamekan, kudi antu atentamina ni kudi antu ayimp.”—MALAKIY 3:18.

MIMINY: 127, 101

1, 2. Mulong wak mwom wa atushalapol a Nzamb ukasiken nlel? (Tal chipich cha kwisambishin.)

ADOKITER ni amingang avud akat kusal mudimu mukach mwa antu akweta mayej ma kusamburok. Akat kuyibangin ayej au mulong akatining kamu kuyikwash. Pakwez aswirikedin niyau kwiking chakwel kangal mayej minam masadinau usu wa kwok mayisamburikina. Chitudia atushalapol a Yehova, tufaniken nau adokiter inay. Avud pakach petu ashich ni asadin mudimu pamwing nau antu akweta yisal yiyimp yishalijadina kamu nakash ni mikadil ya Nzamb. Chinech chikutwish chatukasiken kamu.

2 Mu machuku minam ma nsudien ma ditenchik dined dia yom, antu akad kumukat Nzamb aduwiling mbil ja kuwap ni ja kuyip. Kambuy Paul warumburila mulong wa mikadil yiyimp chisu chamufundinay Timote mukand. Paul walonda anch mikadil yiney yiyimp yikumekan nakash patwaseja kal piswimp ni disudien dia mangand minam. (Tang 2 Timote 3:1-5, 13.) Ap anch tukutwish kuman anch mikadil yiney yidi yiyimp, tukutwish kudandamen kwikal ni yibachikin yiyimp ya  antu atunyingumukina piur pa mutapu wau wa kutong, wa kulond ni yisal yau. (Jinswir 13:20) Mu mutu wa mulong winou, tukuman mutapu ushalijadina mikadil yiney ni mikadil ya antu a Nzamb. Tukuman kand yom tukutwisha kusal chakwel twichidija ayinetu mulong wa kulik kwikal asamburidinau mikadil yiyimp chisu tuyikwashina antu mulong amwijik Yehova.

3. Antu a mutapu ik alejenau mu 2 Timote 3:2-5?

3 Paul wafunda anch machuku ma nsudien “makez kwikal ma mar nakash.” Kupwa wajimbula mikadil yiyimp 19 yikumekana nakash mu chirung chetu. Mikadil yiney yifaniken ni mikadil yajimbulay Paul mu Rom 1:29-31, pakwez list wa yom yijimbwilau mu mukand wend wamufundinay Timote usadidinamu mazu makad kwikal ndond yikwau mu Mifund ya Grek ya win Kristu. Paul wasambisha ni mazu malondina anch “antu akez kwikal.” Pinap dizu “antu” dirumburikin “antu avud,” ikala amakundj ap amband akutwisha kwikal ni mikadil yiyimp. Pakwez kadiap antu awonsu akweta mikadil yiyimp yarumburilay Paul. In Kristu akwet mikadil yishalijadina nakash.—Tang Malakiy 3:18.

MUTAPU TWIMENING AYINETU

4. Yom ik utongina piur pa chirumburikina kwikal in kutungulijan matungu?

4 Kupwa kwa Paul kulond anch antu avud akwikal in kwikat ayinau ni kukat nfalang, walonda kand anch antu akwikal in kwibaz, kwishimek ni in kutungulijan matungu. Antu akweta mikadil yiney akat kutong yisu yivud anch adi awamp nakash kuyisutamu antu akwau mulong wa kuwap kwau, yom yikutwishau kusal, yom yikwetau ap maz yikwetau mu mwom. Antu mudi inay akat kukimb yom yifanyidina ing ayibazang. Mwin manangu umwing wafunda piur pa antu mudi inay anch: “Mu michim yau muding kachintamb kakemp kakatau kwasin manungun mulong wa kwifukwil amwinend.” Antu amwing alonda anch kwibaz kuyipin nakash, mulong ap antu ibazining kakatiningap payimeningau antu akwau ibaz lel.

5. Mutapu ik ap atushalapol ashinshamena a Yehova mwibazau?

5 Yehova ukisin kwibaz, kurumburilau mu Bibil anch “mwin kutal kwa kwibaz.” (Jinswir 6:16, 17) Pakwez kwibaz kukat kumutwal muntu kulemp ni Nzamb. (Kuseng 10:4) Kwibaz udi mwikadil wa Djabul. (1 Timote 3:6) Uyakin wa ushon umekeshin anch ap antu ashinshamena a Yehova ayisamburila kwibaz. Chilakej, Mwant Ozias wa mu Yudeya wading ushinshamena mu mivu yivud. Pakwez Bibil ulondin anch: “Chikalay kal nich usu uvud, muchim wend wibaza kwa kujiy. Wasala chitil kudi [Yehova] Nzamb wend.” Ozias waya mu tempel ni wosha diseng dia malash, chom chading chakad kumufanyin kusal. Kupwa, Mwant ushinshamena Ezekias niyend wikala mwin kwibaz, ap anch wibaza mu chisu chikemp.—2 Jinsangu 26:16; 32:25, 26.

6. Yom ik yafanyina kusal anch David ikala mwin kwibaz? Pakwez mulong wak washala wikepishina?

6 Antu amwing akat kwibaz mulong akweting yifu yiwamp, ijiken nakash, ij kubul mizik nakash, akweting usu ap mulong akat kuyibaz kudi antu akwau. David wading ni yom yiney yawonsu, pakwez washala wikepishina mu mwom wend wawonsu. Chilakej, kupwa kwa David kumujip Goliat, Mwant Saul wamuleja David anch ufanyidin kumwat mwanend. Pakwez David wamwakula anch: “Ov, niyam nachadi nany, ni mwom wam chom ik,  ni dijuku dia tatukwam mu Isarel didi ik, chad ing nez nikala tatuwenend wa mwant?” (1 Samwel 18:18) Yom ik yamukwasha David kushal wikepishina? Wijika anch mikadil yawonsu, ukaliweny, ni yisend yend yadingay nich chading mulong Nzamb wading wikepishin ni wamuteshang. (Kuseng 113:5-8) David wading wij anch chom chin chawonsu chiwamp chadingay nich chadiokalang kudi Yehova.—Ilikej ni 1 Korint 4:7.

Antu akutwish amusejin Nzamb kusutin kwikepish kwa atushalapol end

7. Yom ik yikutukwasha kumekesh anch twikepishin?

7 Mudi David, antu a Yehova nlel asadin usu wa kwikal antu ikepishina. Chikat kutushik ku michim yetu pa kwijik anch Yehova amwinend, Udia wa Piur Nakash, udi wikepishina. (Kuseng 18:35) Tufanyidin kusadin mazu am: “Djalany riy, ni kudimuk, ni kwishikumwish, ni kuwap, ni kushimpish kwa muchim.” (Kolosay 3:12) Twij kand anch rukat ‘kirikwibazangap, ap kwishimek.’ (1 Korint 13:4) Anch antu akwau aman anch tudi ikepishina, niyau akutwish kukat kumwijik Yehova. Mudi ikundj wakad kwikal mwin kwitiyij ukutwish wasej kudi Yehova pakumanay mwikadil uwamp wa mukajend mwin Kristu, antu akutwish kusej kudi Nzamb kusutin kwikepish kwa atushalapol end.—1 Pita 3:1.

MUTAPU TUYISADIDINA ANTU AKWAU

8. (a) Mutapu ik antu amwing nlel mumenau kubwambwil kudi anvaj? (b) Bibil uyilejin an kusal chom ik?

8 Paul warumburila mutapu ukutwishau antu kusalijadin umwing ni mukwau mu machuku ma nsudien. Wafunda anch an akwikal in kuyibwambwil anvajau. Nlel, mabuku mavud, mafilim ni ma program ma televizion mamekeshin anch madi mawamp ni chidi chiwamp kudi an kuyibwambwil anvajau. Pakwez uyakin udi anch kubwambwil kukat kuyipishang dijuku, didia dishin dia uumwing wa mu chisak. Antu ading ij uyakin winou mu mivu yivud. Chilakej, mwi ngand ya Grèce wa pakur, muntu anch wayibul anvajend wafanyina kushadish mbil ja kushakam pamwing nau akwau mu chisak. Mu chijil cha in Rom, muntu wamubulang tatukwend afanyina kumusal mudi mwamusalangau mwin kujipan. Mifund ya Hebereu ni ya Grek yawonsu yaad yayileja an kuyilimish anvajau.—Kubudik 20:12; Efes 6:1-3.

9. Yom ik yikuyikwasha an kuyiziyin anvajau?

9 Yom ik yikutwisha kuyikwash an kuyiziyin anvajau ap anch antu ashichau nau kaziyidinap? Anch an atongin pa yom yawonsu yiwamp yayisadinau kudi anvajau, akumekesh kujikitish ni akukimb kuyiziyin. Asand awonsu aswirikedin kwijik anch Nzamb, udia Tatuku wetwetu awonsu, uyichingejidin anch ayiziyina anvajau. Anch an alond yom yiwamp piur pa anvajau, akuyikwash arund nau kuyilimish anvajau nakash. Chawiy, anch nvaj kakwetap rukat ra chivadik mulong wa anau, chikwikal chikasikena kudi anau kuyiziyin. Pakwez anch nsand wiyov anch anvajend amukatin chakin, chikutwish kumukwash kuyiziyin ap anch chikasiken kusal mwamu. Mukadivar umwing nsand utazukinau anch Austin walonda anch: “Niyovang yisu yivud anch yom yendangap nawamp, anvaj am anginkishang yiyul ya manangu ni anlejang mayingishin ma yiyul  yiney piur pa mipak yakwatangau ni asalang anch tudandamenang kwambamb. Yiney yankwasha kwikal uziyidina. Namanang anch ambangidin, ni chinech chasala anch nikata kuyisangaresh.”

10, 11. (a) Mikadil ik yiyimp yimekeshina anch antu aburedin rukat umwing ni mukwau? (b) Mutapu ik umekeshinau in Kristu akin rukat nakash kudi antu akwau?

10 Paul warumburila kand mikadil yikwau yimekeshina anch antu kakwetap rukat umwing ni mukwau. Kupwa kwa kulond anch an akwikal “in kuyibwambwil anvajau,” walonda kand anch akez kwikal akad kujikitishang. Chinech choviken, mulong antu akad kujikitishang kakukwatangap nich usey yom yiwamp yikatau kuyisadin kudi antu akwau. Paul walonda kand anch antu akwikal akad kushinshaman. Akwikal in michim yichinchikina, charumburik anch kakukatap kusal chisambu nau antu akwau. Akwikal in kumusaal Nzamb masaal ni in kutungulijan matungu, akulond yom yiyimp piur pa antu ap kand piur pa Nzamb. Ni akwikal in mboj, antu akata kulondang makasu mayimp mulong wa kuyipish mwikadil wa antu akwau. *—Tal mazu ma kwinshin.

11 Atushalapol a Yehova ashalijadin nakash nau antu avud mu mangand mulong amekeshin rukat rakin mulong wa antu akwau. Chinech chiding chakin chisu chawonsu. Chawiy, Yesu walonda anch chijil chimwing chidia cha kusambish mu Chijil cha Moses chikweta usey nakash kusutamu chijil cha kuyikat antu akwau chading chijil cha kumukat Nzamb. (Mateu 22:38, 39) Yesu walonda kand anch in Kristu akin akuyijikin ku rukat rikumekeshau umwing ni mukwau. (Tang Yohan 13:34, 35.) In Kristu akin afanyidin kuyikat ap akankuny nau.—Mateu 5:43, 44.

12. Mutapu ik Yesu wamekeshay rukat mulong wa antu akwau?

12 Yesu wamekesha anch wading kamu uyikatin antu. Wasala mwamu payangangay mu misumb kushalijan mulong wa kuyilej antu rusangu ruwamp ra Want wa Nzamb. Woka amputames, ayibid, in musong wa mak ni atujikamatu. Wavumbula kand antu ading afila kal kwikal kand aom. (Luka 7:22) Yesu wapana kand mwom wend mulong wa kupandish antu, ap anch antu avud amukisa. Yesu wimburija kamu rukat ra Tatukwend. Pa mangand mawonsu, Atuman a Yehova amwimburijin Yesu ni amekeshin rukat kudi antu akwau.

13. Mutapu ik rukat tumekeshina kudi antu akwau riyikwashin kukat kumwijik Yehova?

13 Anch twamekesh anch tuyikatin antu, chinech chikutwish kusal anch akata kumwijik Tatukwetu udia mwiur. Chilakej, ikundj umwing wa mwi ngand ya Thaïlande waya ku chitentam cha rejon ni washimoka pamanay mutapu akadivar nau anambaz wamekeshau rukat umwing ni mukwau. Kupwa pachirikay ku chikumbu, wita kwilej Bibil ni Atuman a Yehova tupamp twaad pa rubing. Kupwa wayileja anamakwend awonsu yom yilejay. Kupwa kwa angond musamban, ikundj winou watanga kapamp kend ka kusambish Bibil mu Chot cha Want. Ov, tumekeshin rukat kudi antu akwau? Iyipula anch: ‘Nisadin yawonsu nikutwisha mulong wa kuyikwash antu a mu dijuku diam, mu chikumangen cham, ni mu mudimu wam wa kulejan? Ov, nisadin usu wa kuyiman antu akwau mudi muyimenay Yehova?’

 ATWINGOL NI AN A AMIKOKU

14, 15. Mikadil ik yiyimp yimekeshinau antu avud? Mutapu ik mwaswimpinau antu amwing wuntu wau?

14 Mu machuku ma nsudien, antu amekeshin kand mikadil yiyimp yitufanyidina kwiyep. Chilakej, antu avud adi in kukis yom yiwamp. Akisin yom yidia yiwamp ni kuyilik. Antu mudi inay adi akad kwikand ayinau, in chisum. Amwing adi akad kubangaku antu akwau. Asadin yom pakad kutong ni katonginingap anch yibudikin yiyimp ya yisal yau yikutwish kwikal ni usu padi antu akwau.

15 Antu avud adinga mudi annam a yidiany aswimpin kal wuntu wau. Kuswimp mudi kwinoku kushimokishena ading akulejen kal mu uprofet wa Bibil. (Tang Isay 11:6, 7.) Tutangin mu mukand winou piur pa annam a yidiany, mudi atwingol nau antambu, akushakama pamwing mu chisambu ni annam a pol, mudi an a amikoku ni an a angomb. Mulong wak akutwish kwikal mu chisambu? Uprofet udandamedin kulejan anch: “Ngand yikez kizul nich ronganyin ra [Yehova].” (Isay 11:9) Annam kakutwishap kwilej piur pa Yehova, chawiy mu mutapu wa chifanikesh, uprofet winou ulondin piur pa kuswimp kukusalau antu piur pa wuntu wau.

Mbil ja Bibil jikutwish kuswimp mwom! (Tal paragraf wa 16)

16. Mutapu ik Bibil mwayikwashay antu kuswimp wuntu wau?

Chidiap chiswapela kusal kuswimp kwinoku, pakwez spiritu wa Nzamb ukutwish kuyikwash antu akatina kamu kumusangaresh

16 Akadivar nau anambaz avud ading ni chisum mudi annam ayidiany pa kusambish pakwez katat adi in chisambu. Ukutwish kutang jinsangu jimwing piur pa antu inay mu mutu wa mulong ulondina anch “Bibil Ukarumwin Mwom ya Antu,” pa kapend  ka jw.org. Antu akata kumwijik ni kumusadin Yehova kadiap mudi antu afanakena mudi in kwitiyij, pakwez akat kulik ukash wend. Antu mudi inay atongining anch amwifukwidil Nzamb, pakwez ashiching mu mutapu umekeshina anch kamwifukwidinap. Pakwez pakach pa antu a Yehova padi antu avud ading akweta chisum pakwez katat ‘amudjadin kal muntu musu watangau mudi mudia rusot ra Nzamb mu kutentam kwakin ni mu kutumb.’ (Efes 4:23, 24) Anch antu ilej piur pa Nzamb, akat kwijik anch aswiridin kulondul mbil jend. Mbil jinej jikat kuyikwash kuswimp yitiyij yau, mutapu wau wa kutong ni mutapu wau ukusalau. Chidiap chiswapela kusal kuswimp kwinoku, pakwez spiritu wa Nzamb ukutwish kuyikwash antu akatina kumusangaresh.

“EY YICHINA ANTU INAY KULEMP”

17. Mutapu ik tukutwisha kulik kwikal abachikinau kudi antu akweta yisal yiyimp?

17 Chiding kamu chiswapela kuman kushalijan kudia pakach pa antu amusadidina Nzamb ni akad kumusadin. Tufanyindin kubabal anch mikadil ya antu akad kumusadin Nzamb kangal yikal ni yibachikin padi etu. Tufanyidin kulondul wintakel wa Yehova wa kuyichin antu a mutapu winou arumburilau mu 2 Timote 3:2-5. Chakin, tukutwishap kamu kuyiyep antu in awonsu akweta mikadil yiyimp. Tukutwish kusal nau mudimu pamwing, kuya nau ku shikol pamwing ap kushakam nau pamwing. Pakwez tufanyidinap kutong ap kusal mudi musadinau. Yom ik yikutukwasha? Tukutwish kukasikesh urund wetu ni Yehova mu kwilejang Bibil ni kutond arund awamp amukatina Yehova.

18. Mutapu ik yom tukutwisha kulond ni kusal yikuyikwash antu akwau kukat kumwijik Yehova?

18 Tukatin kand kuyikwash antu akwau kumwijik Yehova. Kimb mitapu ya kupan uman, ni mwita Yehova akukwasha kulond yom yiwamp pa chisu chiwamp. Tukusal kand mulong antu ijika anch tudi Atuman a Yehova. Chawiy, mwikadil wetu uwamp ukulet ntumb padiay Nzamb ni chidiap kudi ayinetu. Yehova watufundisha anch tufanyidin “kulik mwom uyimp ni maku mayimp ma yom ya mangand, chakwel twikal nich mwom wa kwilam ayinetu, utentamina, wa [kwipan kudi] Nzamb mu chirung chinech.” (Titus 2:11-14) Anch twamwimburij Yehova ni twasal yikatinay anch tusal, antu akwau akuman yom yiney. Amwing akutwish kulond anch: ‘Tusotil kubombakan ni yenen, mulong tuteshil anch, Nzamb udi ni yenen’—Zakariy 8:23.

^ par. 10 Dizu dia Grek dilondina anch “in mboj” ap “in kafukej” dirumburikin anch di·aʹbo·los. Mu Bibil, dizu dined adisadidin mudi mwaz wa Satan, mwin kafukej muyimp nakash wa Nzamb.