Yom ya kutadish yikat kupwit nkeu ja in kutal ni kuyikwash kutesh ni kuvurik yom yilejinau. Mulej wetu Mujim Nakash, Yehova, wasadina yom ya kutadish, mulong wa kufundish malejan ma usey. (Dis 15:5; Jer 18:1-6) Mwawiy mwasalay kand Mulej Mujim, Yesu. (Mt 18:2-6; 22:19-21) Chom chimwing cha kutadish chimekena kwikal cha usey nakash mu mivu yiney chidi video. Ov, ukat kusadin nawamp mavideo chisu uyifundishina in kwilej ey a Bibil?

Arijekin mavideo dikum mulong wa kutukwash kufundish malejan madia mu broshir Rusangu Ruwamp Ridiokila Kudi Nzamb! Yisu yivud, mutu wa mulong wa video mwawonsu ukwatijadin ni chipul chitamwishinau nakash chidia mu broshir. Broshir udia pa kapend ukwet yijingidij yituvurishina chisu ik tufanyidina kutadish video mwawonsu. Chikwau kand, mavideo makwau makwashin malejan madia mu mikand ya kwilej madia mu Mushet wetu wa Yom ya Kufundish Nich.

Ov, ukat kwisambin yom ya Bibil yikutwisha kumukasiken mwin kwilej wey kutesh? Ap mwin kwilej wey urishin ni mulong kampand? Kimb mavideo madia pa jw.org® ni pa JW Télédiffusion mulong wa kuman video ukutwisha kumukwash. Pamwing ap ukutwishany en awonsu kutal video winou pamwing ni kumwisambin.

Ngond ni ngond kukat kubudik mavideo masu. Chisu umatadina, tong piur pa mutapu ukutwisha kumasadin mulong wa kuyifundish nich antu akwau.