Chakul cha Bibil

Bibil kisambidinap kamu piur pa kumumangunin muntu ukweta mayej makash mamekeshina anch kakupandap kwend. * Pakwez, yom yilondinay piur pa mwom ni rufu yitwinkishin chitongijok chisikena. Chiyipin kumujip muntu, pakwez kwikil mbil piur pa kukat kulepish mwom wa muntu pa chisu chikimbinay kufa.

Bibil ulondin anch Nzamb Sakatang wetu ndiy udia ‘musul wa mwom.’ (Kuseng 36:9; Midimu 17:28) Ku mes ma Nzamb, mwom udi wa usey nakash. Chawiy chisadina anch Nzamb afisha nich chisal cha kujip muntu ap cha muntu kwijip amwinend. (Kubudik 20:13; 1 Yohan 3:15) Chikwau kand, Bibil umekeshin anch chifanyidin kukwat mipak yiwamp mulong wa kuchidij mwom yetu ni ya antu akwau. (Kuchind Michid 22:8) Chakin kamu, Nzamb ukatin anch tukwata nich usey chipan cha mwom.

Chikwikal nchik anch muyej ukimbin kamu kufa?

Kukwatijan ni Bibil, kumujip muntu, ap anch rufu rend ridi piswimp ni kwikal mutapu wa kuriyep chidi chiyimp. Chilakej cha Mwant Saul chikasikeshin chitongijok chinech. Chisu chamwasau nakash nseu kwi njit, wamuleja kashalapol wend kumukwash kufa. (1 Samwel 31:3, 4) Kashalapol wend walika. Pakwez, ikundj umwing weza kudimban anch ndiy wamumangunina Saul mudi mwading musotilay. David wamufisha nich ikundj winou anch wamwang kal mash. Kuman kwa David kwading kukwatijadin ni chitongijok cha Nzamb pa mulong winou.​—2 Samwel 1:6-16.

Ov, chifanyidin kamu kusal usu wawonsu mulong wa kulepish mwom?

Anch muntu umeken kamu anch ukimbin kufa, Bibil kitinap kusal usu wawonsu mulong wa kulepish mwom. Pakwez, Bibil ukwet chitongijok chisikena. Rufu udi mukankuny netu mujim nakash, yibudikin ya mwikadil wetu wa chitil. (Rom 5:12; 1 Korint 15:26) Tufanyidinap kusot rufu, pakwez tufanyidinap kand kurov wom, mulong Nzamb ushidilamu kuyivumbul antu afila. (Yohan 6:39, 40) Muntu ulimishina mwom ukat kukimb kwiyokish mu mitapu yiwamp. Pakwez, kusal mwamu kurumburikinap kutond mitapu ya kwiyokish yisadina anch tulepisha mwom ukimbina kwau kufa.

Ov, kwijip chidi chitil chakad kulikishinangau?

Bwat, Bibil kalondinap anch kwijip chidi chitil chakad kulikishinangau. Pakwez kwijip chidi chitil chijim, * Nzamb wij nawamp yom yikutwisha kumubachik muntu kwikal ni yitongijok ya kwijip, mudi mayej ma mu manangu, kuziy kukash ap mayej ma mu dijuku. (Kuseng 103:13, 14) Ku ukwash wa Bibil, Nzamb ukat kupan rongoj kudi antu amena mar mudi minam. Chikwau kand, Bibil ulondin anch kukez kwikal ‘divumbuk dia antu atentamina ni dia akad kutentam.’ (Midimu 24:15) Chinech chimekeshin anch kudi ruchingej ra divumbuk mulong wa antu arumbuka nakash, mudi kwijip.

^ par. 3 Kumumangunin muntu ukweta mayej makash mamekeshina anch kakupandap kwend kurumburikin “kumujip muntu uyedina nakash mulong wa kumwiyepish kufa rufu risansena nakash.” (Merriam-Webster Learner’s Dictionary) Anch dokiter wamukwash muyej kufa, chisal chinech achitazukin anch kwijip nich ukwash wa chimwingang (suicide médicale assisté).

^ par. 10 Yilakej yikemp yidia mu Bibil piur pa antu ijipa yimekeshin anch kasalap kukwatijan ni rusot ra Nzamb.​—2 Samwel 17:23; 1 Ant 16:18; Mateu 27:3-5.