Chakul cha Bibil

“Kulond mu jindim” kumekeshin ukaliweny wa yilay wadingau nich in Kristu amwing a mu mivu chitot ya kusambish wayikwasha kulond mu mazu makadiau kwijik. (Midimu 10:46) Mwin kulond amuteshang nawamp kudi antu ija mazu minam. (Midimu 2:4-8) Kulond mu jindim yading pakach pa yipan ya spiritu utumbila yapanay Nzamb kudi in Kristu amwing mu mivu chitot ya kusambish.​—Hebereu 2:4; 1 Korint 12:4, 30.

 Kwisu ni chisu ik chasambishau antu kulond mu jindim?

Chilay chinech chasadika kapamp ka kusambish pamanch mu Yerusalem, pa chisu cha musambu wa in Yuda wa Pentekot wa muvu wa 33 C.C. Kwading in kwilej a Yesu piswimp 120 ading akumangena pamwing chisu ‘chizulau awonsu nich spiritu utumbila, chad asambisha kulond mu jindim ja michid yikwau.’ (Midimu 1:15; 2:1-4) Chisak chijim cha antu “adiokala mu mangand mawonsu” chakumangana ni “muntu ni muntu wayitesha akat kulond mu rudim ra kwol kwau.”​—Midimu 2:5, 6.

 Chisu chading chitongijok cha kulond mu jindim?

  1. Mulong wa kumekesh anch in Kristu ading ni ukwash wa Nzamb. Pasak, Nzamb wasadina yilay mulong wa kumekesh anch wading uyikwashin atushalapol end ashinshamena, mudi Moses. (Kubudik 4:1-9, 29-31; Kuchind Michid 17:10) Kulond mu jindim kwading ni chitongijok chawiy chimwing: kumekesh anch Nzamb ukwashin chikumangen chisu cha win Kristu chavadika. Kambuy Paul wafunda anch: “Kulond mu jindim jakad kwijikan chidi chijingidij kudi antu akad ritiy, pakwez kichidiap chijingidij kudi antu akweta ritiy.”​—1 Korint 14:22.

  2. Mulong wa kuyikwash in Kristu kupan uman. Antu ayitesha in kwilej a Yesu pa dichuku dia Pentekot alonda anch: “Etu awonsu tuyiteshil akat kulejan mu jindim jetu midimu yijim yasalay Nzamb.” (Midimu 2:11) Chitongijok cha chilay chinech chading cha kuyikwash in Kristu ‘kupan uman’ ni ‘kwikadish in kwilej antu a michid yawonsu,’ mudi mutapu wayilejau kudi Yesu. (Midimu 10:42; Mateu 28:19) Piswimp antu 3 000 amana chilay chinech ni kutesh uman ikala in kwilej dichuku dinadia.​—Midimu 2:41.

 Ov, kulond mu jindim kwafanyina kudandamen chikupu?

Bwat. Yipan ya spiritu utumbila, mudi ukaliweny wa kulond mu jindim, yading kwau ya chisu chikemp. Bibil wasambela kulejan anch: “Chiyukish cha kurumburil nich mazu ma Nzamb chikez kupwa, chiyukish cha kulond nich jindim jakad kwijikan, ni chiyukish cha ronganyin yikez kupwa.”​—1 Korint 13:8.

 Chisu ik chapwa chipan cha kulond mu jindim?

Yipan ya spiritu utumbila ayipanang kudi in Kristu akwau kusutil atwimbuy, pakuyazuk makas pa ambay nau in Kristu. (Midimu 8:18; 10:44-46) Chimeken anch antu atambulang yipan ya spiritu kusutil atwimbuy kapanap niyau yipan yiney kudi antu akwau. (Midimu 8:5-7, 14-17) Chilakej, anch muntu watambul mukand wa kwendish nich motak kudi mbur a matad, chimekeshinap anch muntu winou niyend ukwet mbil ya kuupan kudi muntu mukwau. Chimeken anch kulond mu jindim kwapwa pafau atwimbuy ni kupwa kwa rufu ra antu atambula chipan chinech kudi atwimbuy ayinau.

 Chidi nchik piur pa kulond mu jindim nlel?

Chipan cha kulond mu jindim chapwa pamwing ap kwinsudiel kwa mivu chitot ya kusambish C.C. Nlel, kwikil muntu ukutwisha kulond anch ulondin mu jindim ku usu wa Nzamb.

 Mutapu ik tukutwisha kuyijingunin in Kristu akin?

Yesu walonda anch in kwilejend akutwish kuyijingunin kusutil rukat rakin. (Yohan 13:34, 35) Chilik chimwing, kambuy Paul wafundisha anch rukat rafanyina kwikal mwikadil wa pakampwil wa in Kristu akin. (1 Korint 13:1, 8) Walejana anch spiritu wa Nzamb ukusongish mudiau in Kristu mikadil kanang yitazukinau anch ‘dibuj dia spiritu,’ ni mwikadil wa kusambish pakach pa mikadil yiney ridi rukat.​—Galatia 5:22, 23.