Матфеё 9:1—38
-
О Иисусо исцэлий лэ манушэс, саво сас парализовано (1—8)
-
О Иисусо ақарэл лэ Матфеёс тэ ԥирэл пала лэстэ (9—13)
-
И дума пала посто (14—17)
-
Лэ Иаиростири щей; и манушни лэлпэ каринг лэ Иисусостири ӥда (18—26)
-
О Иисусо исцэлий лэ корэн и лэ мутонэс (27—34)
-
«Пэ мал баро урожаё, ай лэ манушэн тэ стидэн лэс на хутилэл» (35—38)
9 О Иисусо бэшля андэ лодка, пэрэплывисардя пэ авэр береӷо и авеля андэ пэско форо.
2 Котэ о миро андя каринг лэстэ пэ носилки лэ манушэс, саво сас парализовано. О Иисусо додиқля, кай вонэ патян, и ԥэндя лэсти: «На́ дар, мэрно шаво! Тиро бэзэх простисардо».
3 Ай дэсавэ законикоря погиндосардэ: «Када найпативали дума по Дэл».
4 Ай о Иисусо ӷанэнас, пала со вонэ гиндон, и важ када ԥэндя: «Васо тумэндэ кацавэ вэрыти гиндоря?
5 Со май вушэро тэ ԥэнэс: „Тиро бэзэх простисардо“ или „Ущи и ԥир“?
6 Но, кай тумэ тэ ӷанэн, кай лэ манушэстирэ Шавэстэ исин право пэ ԥув тэ простий о бэзэх...» Тоди во ԥэндя лэ манушэсти, саво сас парализовано: «Ущи, лэ и носилки и жа цэрэ».
7 Кодэва мануш ущеля и жыля цэрэ.
8 Всаворэн, ко када диқля, шутя андэ дар, и вонэ линэ драго тэ дэн дума пала Дэл, саво дя лэ манушэнди кацаво право тэ исцэлин аврэн.
9 Кала о Иисусо жыля май дур, во додиқля манушэс, савэс ақарэн Матфе́ё, во терэлас андэ налоӷово, и о Иисусо ԥэндя лэсти: «Ԥир пала мандэ». Кодэва мануш ущеля и жыля пала лэстэ.
10 Ӷэт май интя, кала о Иисусо и лэстирэ ученикоря бэшлэ тэ хан андо цэр кай о Матфе́ё, интя авелэ бут мануша анда налоӷово и бэзэхэстирэ мануша, и всаворэ вонэ тожэ бэшлэ тэ хан лэнца.
11 Но кала и фарисеёря додиқлэ када, вонэ ԥэндэ лэстирэ учениконэнди: «Васо тумаро учителё хал и пэл лэ манушэнца анда налоӷово и лэ бэзэхэстирэ манушэнца?»
12 Кала о Иисусо ашундя лэндирэ алава, во ԥэндя: «О врачо трэбуй най лэ зоралэнди, ай лэ насвалэнди.
13 Кочай жан и погиндон, сар тэ полэн када: „Мэ камав, кай тумэ тэ авэн одялэ, ай най тэ анэн и жэртвы“. Важ кода кай мэ авелэм тэ поможысарав тэ каинпэ най и праведни*, ай и бэзэхэстирэ мануша».
14 Посли када каринг лэстэ авелэ лэ Иоанностирэ ученикоря и пушлэ: «Васо амэ лэ фарисеёнэнца ритярас о посто, ай тирэ ученикоря — най?»
15 О Иисусо ԥэндя лэнди: «Хэба лэ тэрнэстирэ друӷоря ритярэн о травуро, пока о тэрно лэнца? Но авэла время, кала лэндар залэна лэ тэрнэс. Тоди вонэ и лэна тэ ритярэн о посто.
16 Нико на присувэл каринг и пурани ӥда и латка анда нэви материя, а то, кала и латка бэшэла, вой росшынэла и ӥда, и о шындо ҭан ашэла инке май баро.
17 Кадяжэ о тэрно вино на шон андэ пуранэ ӷаравлицки гонэ, а то и гонэ ԥарона, и тоди и о вино випитяла, и гонэ римонапэ. Но о тэрно вино шон андэ нэвэ ӷаравлицки гонэ, и тоди ашэлапэ цыло и о вино, и гонэ».
18 Пока во инке када ԥэнэнас лэнди, каринг лэстэ пашэля ек барэдэр, тэлеля лэсти и ԥэндя: «Мэрни щей, файма, ужэ муля, но ав и стов пэр латэ о вас, и вой жундёла».
19 Тоди о Иисусо ущеля и вместе лэ учениконэнца жыля пала лэстэ.
20 И андэ кодэя время ек манушни, савятэ 12 бэрш сас кровотечения*, поджыля каринг лэстэ палал и ляпэ каринг и брыжа пэ лэстири ӥда,
21 важ кода кай ԥэнэнас корко пэсти: «Если кати лавапэ каринг лэстири ӥда, тоди вилечисавава».
22 О Иисусо обрисайля, додиқля ла и ԥэндя: «На́ дар, мэрни щей! Ту патяян, и када тут исцэлисардя». И манушни сразу ашэля зорали.
23 О Иисусо авеля андо цэр кай о барэдэр и додиқля лэ манушэн, савэ дилабэнас пэ флейта, ай кадяжэ бутэ мирос, саво фартэ ӷолосыяс.
24 Во ԥэндя лэнди: «Вижан катар, важ кода кай и бэята на муля, ай совэл». Тоди лэстар линэ тэ приасанпэ.
25 Кала лэ манушэн виандярдэ, во зажыля, ля вастэстар ла бэята, и вой ущеля.
26 И дума пала када розжыляпэ па вся кодэва краё.
27 О Иисусо жыля май дур, ай пала лэстэ жылэ дуй корэ мануша. Вонэ цыпинас: «Здик пар мэндэ, лэ Давидоско шаво!»
28 Кала о Иисусо зажыля андо цэр, и корэ пашэлэ каринг лэстэ, и во пушля лэндар: «Патян тумэ, кай мэ моӷу када тэ стерав?» Вонэ ԥэндэ лэсти: «Да, Учителё».
29 Тоди во ляпэ каринг лэндирэ яқа и ԥэндя: «Тэ авэл тумэнди лашымос лэ Дэвлэстар, важ кода кай патяе».
30 И вонэ линэ тэ диқэн. О Иисусо строӷо ԥэндя лэнди: «Диқэн, кай нико тэ на уӷанэн пала када».
31 Но вонэ жылэ и линэ тэ росԥэнэн пала лэстэ па всаворэ кодэла краёря.
32 Кала вонэ ужанастар, каринг лэстэ андэ́ мутонэ манушэс, андэ саво сас о найвужо.
33 Посли кода сар о Иисусо видарадя лэ найвужэс, о муто задя дума. О народо удивисайля и ля тэ ԥэнэн: «Андо Израилё никала на ашунделя нисо кацаво».
34 Ай и фарисеёря линэ тэ ԥэнэн: «Во видаравэл лэ найвужэн через лэ найвужэнго правителё*».
35 О Иисусо жыля па всаворэ фороря и гава. Во сытярэлас андэ синагоги, росԥэнэнас и лащи новость пала Царство и исцэлияс лэ мирос разнонэ насвалимастар.
36 Кала во диқэлас бутэ манушэн, лэстэ росшындёлас оди, важ кода кай вонэ сас помардэ и росшутэ, сар бакрорэ би лэ пастухоско.
37 Во ԥэндя лэ учениконэнди: «Пэ мал баро урожаё, ай лэ манушэн тэ стидэн лэс на хутилэл.
38 Важ када мангэн ла малятирэ Хулас тэ бишалэл май бутэ манушэн тэ стидэн о урожаё».
