Матфеё 27:1—66
27 Тэсара всаворэ барэдэр священикоря и лэ народонэндирэ барэдэра линэ тэ дэн дума, сар тэ умарэн лэ Иисусос.
2 Вонэ сԥанглэ и ундярдэ лэс и отдинэ лэ правителёсти лэ Пилатости.
3 Кала о Иу́да, саво здя лэ Иисусос, уӷангля, кай лэ Иисусости виандярдэ смэртно приӷоворо, во поля, кай фартэ шылисайля, и рисардя 30 рупунэ манеты лэ барэдэрэ священиконэнди и лэ барэдэрэнди.
4 Во ԥэндя лэнди: «Мэ стердэм бэзэх, кай здэм лэ найдошалэ манушэс». Вонэ ԥэндэ лэсти: «Ай амэнди со кадэлэстар? Када най амари дила».
5 Тоди во шувидя и рупунэ манеты андо храмо и ужыля котар, ай потом жыля и амбладеля.
6 И барэдэр священикоря стидэ́ кадэла манеты и ԥэндэ: «Лэн нащи тэ шас андо свынто сэртари, важ кода кай када — ратвалэ ловэ».
7 Кала вонэ подинэ дума, вонэ тиндэ пэ кадэла ловэ мал кай о мастеро пэ ӷлина, кай тэ притидэн котэ чужонэ манушэн.
8 Кочай пэ кодэя мал линэ тэ ԥэнэн Ратвали мал, и кадя пэр латэ ԥэнэн идоси.
9 Кадя ашэля, сар сас ԥэндо через о пророко о Иереми́я: «Вонэ линэ 30 рупунэ манеты — кацави цэмин и израильтяноря стодэ важ кадэва мануш —
10 и отдинэ лэн важ и мал, сави прижалас лэ мастерости пэ ӷлина, сар приԥэндя манди о Иегова*».
11 Лэ Иисусос андярдэ каринг о Пила́то, и во пушля лэстар: «Ту иудейско царё?» О Иисусо ԥэндя лэсти: «Ту екжэно када ԥэнэс».
12 Но кала лэс линэ тэ дошалярэн и барэдэр священикоря и барэдэра, во нисо лэнди на ԥэнэнас.
13 Тоди о Пила́то пушля лэстар: «Ашунэс, скати дош пэр тутэ ԥэнэн?»
14 Но о Иисусо на ԥэндя ни ек алав, и о правителё кадэлэсти фартэ удивисайля.
15 Обычно пэ Патради о правителё одмэкэлас анда баруно кодэлэс, пала кастэ мангэлас о народо.
16 И андэ кодэя время андо бар бэшэлас ашунгло барунари, савэс ақарэнас Вара́вва.
17 Важ када о Пила́то пушля лэ миростар, саво стидяпэ: «Кас мэ тэ одмэкав важ тумэндэ: лэ Вараввас или лэ Иисусос, пэ саво ԥэнэн Христос?»
18 Во ӷанэнас, кай вонэ завидуинас лэ Иисусости, и важ када отдинэ лэс андэ лэстирэ вас.
19 Тай инке, кала о Пила́то бэшэлас по сындо*, лэсти пэрэдинэ лэстиря хулаятар: «Нисо на́ тер кадэлэ праведнонэ манушэсти, важ кода кай адес андэ сунэстэ мэ фартэ мучисайлэм через лэстэ».
20 Но и барэдэр священикоря и барэдэра застависардэ лэ мирос тэ мангэл, кай о правителё тэ одмэкэл лэ Вараввас, ай лэ Иисусос тэ умарэл.
21 О правителё упалэ пушля: «Кас анда кадэла дуй тумэ камэн, кай мэ тэ одмэкав важ тумэндэ?» Вонэ ԥэндэ: «Лэ Вараввас».
22 О Пила́то пушля: «Ай со мэ тэ терав лэ Иисусоса, пэ саво ԥэнэн Христос?» Всаворэ зацыписайлэ: «Казнисар лэс!*»
23 Во пушля: «Васо? Со вэрыто во стердя?» Но вонэ линэ тэ цыпин инке май фартэ: «Казнисар лэс по столбо!»
24 Кала о Пила́то поля, кай лэстэ нисо на вижал и кай о миро лэл инке май фартэ тэ цыпий, во ля о паи, вихаладя и вас англа народо и ԥэндя: «Мэ найдошало андэ кадэлэ манушэстири смэрть*. Кадэя дош авэла пэр тумэндэ».
25 И вся о народо ԥэндя: «Мэк кадэя дош* авэл пар мэндэ и пэ амарэ бэяцэ».
26 Тоди о Пила́то одмэкля лэ Вараввас, ай лэ Иисусос приԥэндя тэ марэн чукняса и потом тэ казнин по столбо.
27 И халавдэ ундярдэ лэ Иисусос андэ лэ правителёско дворецо и стидэ́ круӷом лэстэ вся о отрядо.
28 Вонэ злинэ па Иисусо лэстири ӥда, шутэ пэр лэстэ и лоли лунго жылетка,
29 анқудэ анда калючки о винко и стодэ лэсти по шэро, ай андо право вас динэ рувли. Вонэ тердёнас англа лэстэ пэ чанга, асанаспэ лэстар и ԥэнэнас: «Тэ авэл зорало о иудейско царё!»
30 Вонэ шунгардэнас пэр лэстэ и марэнас ла рувляса па шэрэстэ.
31 Кала вонэ парашэлэ тэ издеваюца андар лэстэ, вонэ злинэ пар лэстэ и лунго жылетка, стодэ пэр лэстэ лэстири ӥда и ундярдэ тэ примарэн каринг о столбо.
32 Кала вонэ вижанас анда форо, вонэ додиқлэ еқэ манушэс анда Кире́на, савэс ақарэнас Си́моно, и застависардэ лэс тэ андярэл о столбо, пэ саво трэбуй сас тэ казнин лэ Иисусос.
33 Кала вонэ авелэ по ҭан, пэ саво ԥэнэн Голго́фа, со означает «черепо»,
34 вонэ динэ лэ Иисусости о вино, саво сас зӷамимэ варисоса киркэса, но во, кала зумадя, отԥэнделя лэс тэ пэл.
35 Вонэ примардэ лэс каринг о столбо, ай потом росцэлдэ* и розделисардэ машкар пэстэ лэстири ӥда
36 и бэшлэ лэс тэ сторожын.
37 Понад лэско шэро амбладэ досточка, пэ сави сас пистромэ лэстири дош: «О Иисусо, иудейско царё».
38 Паша Иисусо пэ столборя сас амбладэ дуй чордэӷаря: ек справа лэстар, ай авэр слева.
39 И мануша, савэ прожанас мимо, найпативалэс дэнас дума пала Иисусо. Вонэ кунинас лэ шэрэса
40 и ԥэнэнас: «Эй ту, кай камлян тэ розмарэс о храмо и важ трин дес тэ ваздэс лэс, спасысар корко пэс! Если ту лэ Дэвлэско Шаво, зӷуль па столбо!»
41 И барэдэр священикоря лэ закониконэнца и лэ барэдэрэнца тожэ асанаспэ лэ Иисусостар и ԥэнэнас:
42 «Аврэн спасыяс, ай корко пэс тэ спасый не можэт! Во жэ израильско царё, ни акэ мэк акана зӷулел па столбо, и амэ андэр лэстэ патяса.
43 Во надеияспэ по Дэл, тоди мэк о Дэл спасый лэс акана, если во лэсти куч, важ кода кай во ԥэнэнас: „Мэ лэ Дэвлэско Шаво“».
44 Точно кадя жэ пала лэстэ найпативалэс дэнас дума и чордэӷаря, савэ сас амбладэ паша лэстэ пэ столборя.
45 Варикай в 12 часов дня* па вся кодэва краё* ашэля тэмно, и кадя сас до трёх часов дня*.
46 Варикай в три часа дня о Иисусо фартэ зацыписайля: «Эли́, Эли́, лама́ савахфани́?» — со означает «Дэвла, Дэвла*, васо ту ман ашадян?».
47 Кала дэсавэ анда кодэла, ко котэ тердёлас, ашундэ када, вонэ линэ тэ ԥэнэн: «Во ақарэл лэ Ильяс».
48 Ек андар лэндэ сразу жэ прастая, ля и ӷубка, тиндярдя ла андо шукло вино, стодя пэ рувли и дя лэсти тэ пэл.
49 Но авэр ԥэндэ: «Оджа лэстар! Диқаса, авэла о Илья лэс тэ спасый».
50 О Иисусо упалэ фартэ зацыписайля и муля*.
51 Тоди и шырма андо свынто ҭан росшынделя пэдондэ, упрал жы тэлэ. И ԥув затиносайля, и поԥарэлэ и плая.
52 И моӷилки ԥэрнаделэ, и лэ свынтонэн, савэ мулинэ, повишутя.
53 И када диқлэ бут мануша. (Посли кода, сар жунделя о Иисусо, и мануша, савэ сас паша моӷилки, авелэ андо свынто форо.)
54 Кала о баро халавдо и кодэла, ко лэса сторожыяс лэ Иисусос, диқлэ, сар тиносайля и ԥув и сар вся тердяпэ, вонэ фартэ пэрэдарайлэ и ԥэндэ: «Во чаче сас лэ Дэвлэско Шаво».
55 Пэ вся када дурал диқэнас бут манушня, савэ ԥирэнас лэ Иисусоса жы анда Галиле́я и поможынас лэсти.
56 Машкар лэндэ сас и Мария Магдали́на, ай кадяжэ и Мария, лэ Иаковостири и лэ Иосифостири дэй, и лэ Зеведеёстирэ шавэндири дэй.
57 Май пашэ каринг о вечеро авеля ек барвало мануш анда Аримафе́я. Лэс ақарэнас Иосифо, во кадяжэ сас лэ Иисусоско ученико.
58 Во жыля каринг о Пила́то и мангля лэ Иисусостири тила. Тоди о Пила́то ԥэндя, кай ла тэ отдэн лэсти.
59 О Иосифо ля лэ Иисусостири тила, замотысардя андо вужо котор анда сано лёно
60 и стодя андэ нэви моӷилка, сави во стердя андо плай. Во поткотисардя каринг о входо андэ моӷилка баро бар и ужылятар.
61 Ай и Мария Магдали́на и авэр Мария ашэлэпэ тэ бэшэн паша моӷилка.
62 Пэ авэр дес, саво сас суботнё, и барэдэр священикоря и фарисеёря стидэ́пэ кай о Пила́то
63 и ԥэндэ лэсти: «Амэнди дя андо шэро, кай кодэва хохавно, кала инке сас жундо, ԥэнэнас: „Через трин дес мэ жундювава“.
64 Важ када приԥэн тэ следин пала моӷилка жы каринг о трито дес, кай лэстирэ ученикоря тэ на авэн, тэ на вичорэн и тила и тэ на ԥэнэн лэ мирости: „Во жунделя!“ Тоди кадэва хохаимос авэла май хужэ кодэлэстар, со во ԥэнэнас май данглал».
65 О Пила́то ԥэндя лэнди: «Акэ тумэнди халавдэ. Жан и следин, сар ӷанэн».
66 Вонэ жылэ, стодэ печать по бар англа моӷилка и стодэ лэ халавдэн.
