Матфеё 26:1—75
-
И священикоря доԥэндён тэ умарэн лэ Иисусос (1—5)
-
Ек манушни шол о вулей по шэро лэ Иисусости (6—13)
-
О Иисусо послиднё разо справий и Патради, и лэс придэн (14—25)
-
Хан пэ лэ Ӷосподостири вечеря (26—30)
-
О Иисусо ԥэнэн, кай о Пётро отԥэндёла лэстар (31—35)
-
О Иисусо мангэлпэ андо Гефсиманско садо (36—46)
-
Лэ Иисусос залэн и халавдэ (47—56)
-
Андярэн по Ӷлавно иудейско сындо (57—68)
-
О Пётро отԥэндёл лэ Иисусостар (69—75)
26 Кала о Иисусо додя дума, во ԥэндя лэ учениконэнди:
2 «Тумэ ӷанэн, кай через дуй дес авэла и Патради и лэ манушэстирэ Шавэс отдэна андэ вас лэ вороӷонэнди, кай лэс тэ казнин по столбо».
3 Андэ кодэя время и барэдэр священикоря и лэ народонэндирэ барэдэра стидэ́пэ андэ града кай о ӷлавно священико Каиа́фа.
4 Вонэ сԥэнделэ хытрияса тэ схутилэн лэ Иисусос и тэ умарэн лэс.
5 Вонэ ԥэнэнас: «Но кати най по празнико, кай о народо тэ на зваздэлпэ».
6 Кала о Иисусо сас андэ Вифа́ния, андо цэр кай о Си́моно, саво варикала сас прокажоно,
7 вечером пэ мисяйля каринг лэстэ поджыля ек манушни. Латэ андэ вас сас ӷипсово бутылочка, андэ сави сас кучутно ароматно вулей, и вой ля лэс тэ шол* лэсти по шэро.
8 Кала и ученикоря додиқлэ када, вонэ линэ холяса тэ ԥэнэн: «Состэ кадя тэ тратин и ловэ?
9 Важ кода кай о вулей можно сас тэ битинэн важ барэ ловэ и тэ роздэн лэн лэ чорорэнди».
10 О Иисусо шутя сама, кай вонэ холяйлэ, и ԥэндя: «Состэ тумэ ӷулен кай кадэя манушни? Вой стердя важ мандэ лащи дила.
11 Важ кода кай и чорорэ вся и время авэна тумэнца, ай мэ — най.
12 Кала вой вишутя о вулей пэр мандэ, вой подӷотовила, кай ман тэ притидэн.
13 Чаче ԥэнав тумэнди: па вся и люма котэ, кай лэна тэ росԥэнэн и лащи новость, на бистрэна пала кадэя манушни и росԥэнэна, со вой стердя».
14 Тоди ек анда 12 ученикоря, савэс ақарэнас Иу́да Искарио́то, жыля каринг и барэдэр священикоря
15 и пушля: «Со тумэ манди дэна, если мэ здава лэс тумэнди?» Вонэ ԥэндэ, кай дэна лэсти 30 рупунэ манеты.
16 Кодэла времятар во ля тэ родэл лашо маменто, кай тэ здэл лэ Иисусос.
17 По пэрво дес андэ лэ Преснонэ марнэско празнико и ученикоря поджылэ каринг о Иисусо и пушлэ: «Кай амэнди тэ стас важ тутэ ла Патрадятири мисяйля?»
18 Во ԥэндя: «Жан андо форо каринг кацаво-то мануш и ԥэнэн лэсти: „О Учителё ԥэнэн: ‚Мэрно часо пашэля. Мэ лэ учениконэнца справисарава и Патради андэ тиро цэр‘“».
19 И ученикоря стердэ кадя, сар приԥэндя лэнди о Иисусо, и стердэ каринг и Патради вся, со трэбуй.
20 Кала поджыля о вечеро, во бэшля* пала столо лэ 12 учениконэнца.
21 И кала вонэ ханас, во ԥэндя: «Чаче ԥэнав тумэнди: ек андар тумэндэ здэла ман».
22 Лэнди ашэля фартэ найдраго по ди, и кажно ля тэ пушэл: «Учителё, када жэ най мэ?»
23 Пэ када во ԥэндя: «Ман здэла кодэва, ко хал манца анда ек чаро*.
24 Да, лэ манушэско Шаво ужалтар, сар пала лэстэ пистромэ, но бида кодэлэсти, ко лэс здэл! Фэдэр кодэва мануш тэ на арақаделоп».
25 О Иу́да, саво тидэласпэ тэ здэл лэс, тожэ пушля: «Учителё*, када жэ най мэ?» О Иисусо ԥэндя лэсти: «Ту екжэно када ԥэндян».
26 Кала вонэ ханас, о Иисусо ля о марно, мангляпэ*, ԥагля лэс, дя лэ учениконэнди и ԥэндя: «Алэн и хан. Кадэва марно сыкавэл мэрни тила».
27 Потом во ля и чаша, поблаӷодарисардя лэ Дэвлэс, пэрэдя ла лэнди и ԥэндя: «Пэн андар латэ всаворэ,
28 важ кода кай кадэва вино сыкавэл мэрно „рат важ о доӷоворо“, саво питяла важ бут мануша, кай тэ простинпэ и бэзэха.
29 Но ԥэнав тумэнди: мэ ужэ на лава тэ пав о вино, пока на авэла о дес, кала мэ лава тэ пав тумэнца о тэрно вино андэ мэрнэ Дадэско Царство».
30 Посли када вонэ дилабае и диля* и жылэ по Масли́чно плай.
31 Тоди о Иисусо ԥэндя лэнди: «Андэ кадэя рят тумэ всаворэ ман ашавэна*, важ кода кай пистромэ: „Умарава лэ пастухос, и рознашэнапэ и бакрорэ“.
32 Но кала мэ жундювава, мэ жава андэ Галиле́я и лава тэ аштярав тумэн котэ».
33 О Пётро пэрэмардя лэс и ԥэндя: «Дажэ если всаворэ тут ашавэна, мэ никала на ашавава!»
34 О Иисусо ԥэндя лэсти: «Чаче ԥэнав тути: андэ кадэя рят, англа кода сар процыпия о башно, ту тривар отԥэндёса мандар».
35 О Пётро ԥэндя лэсти: «Дажэ если манди прижалапэ туса тэ мэрав, мэ никала тутар на отԥэндювава!» И авэр ученикоря ԥэнэнас кода жэ.
36 Потом о Иисусо авеля лэ учениконэнца андо садо, пэ саво ԥэнэн Гефсима́нско. Котэ во ԥэндя лэнди: «Побэшэн катэ, ай мэ жава мангавапэ».
37 О Иисусо ля пэса лэ Петрос и лэ Зеведеёстирэ дуе шавэн. Лэсти ашэля найдраго по ди, и во фартэ запережывал.
38 Во ԥэндя лэнди: «Манди фартэ ԥарэс, кадя ԥарэс, кай аж тердёл оди. Ашэнпэ катэ манца и на́ совэн».
39 О Иисусо оджыля чуть май дур, пэля пэ чанга, притэлеля каринг и ԥув и ля тэ мангэлпэ: «Дадэ, если возможно, улэ мандар кадэя чаша. Но авря ригатар, мэк авэл най сар мэ камав, ай сар камэс ту».
40 Кала о Иисусо рисайля каринг и ученикоря, во додиқля, кай вонэ совэн. Тоди во ԥэндя лэ Петрости: «Хэба тумэ не моӷли тэ авэн манца и тэ на совэн хоть ек часо?
41 Отшон и линдра и на́ парашэн тэ мангэнпэ, кай тэ на подэнпэ лэ бэзэхэсти. Оди цырдэлпэ*, ай и тила би зорэстири».
42 И упалэ, до дуйто, во оджыля и ля тэ мангэлпэ: «Дадэ, если невозможно тэ улэс кадэя чаша и кай мэ тэ на пав андар латэ, мэк авэл кадя, сар тути уӷодно».
43 Кала рисайля, во додиқля, кай вонэ упалэ совэн, важ кода кай лэн ля и линдра.
44 Во ашадя лэн, упалэ оджыля и до трито ля тэ мангэлпэ пала кода жэ.
45 Посли када во рисайля каринг и ученикоря и ԥэндя лэнди: «И андэ кацави время тумэ совэн и отцыён! Поджыля о часо, кала лэ манушэстирэ Шавэс отдэна андэ вас лэ бэзэхэстирэ манушэнди.
46 Ущен, авэн. Мэрно здимари ужэ пашэ».
47 Во инке на додя дума, сар авеля о Иу́да, ек анда 12 апосталоря. Лэса сас толпа миро барэ шурянца и рувлянца, савэн бишалдэ и барэдэр священикоря и лэ народонэндирэ барэдэра.
48 О здимари доԥэнделя лэнца пала знако: «Хутилэн кодэлэс, кас мэ чумидава».
49 Во пашэля ворта каринг о Иисусо и ԥэндя: «Доров, Учителё*!» — и чумидя лэс.
50 О Иисусо пушля: «Состэ ту кардэ авелян?» Тоди каринг о Иисусо поджылэ и мануша и хутилдэ лэс.
51 Но ек анда кодэла, ко сас лэ Иисусоса, вихутилдя и бари шури, дядап лэ ӷлавнонэ священикостирэ рабос и отшындя лэсти о кан.
52 О Иисусо ԥэндя лэсти: «Вилэ и шури, важ кода кай всаворэ, ко лэла и шури, ла шурятар и мэрэна.
53 Или ту гиндос, кай мэ не моӷу тэ мангав мэрнэ Дадэс ворта щас тэ бишалэл тэ поможын манди май бут чем 12 отрядоря анда анӷелоря?
54 Сар тоди ашэла кадя, сар пистромэ андэ Писания, андэ сави ԥэнэнпэ, кай вся када трэбуй тэ авэл?»
55 Посли када о Иисусо ԥэндя кодэлэнди, ко авеля лэс тэ залэн: «Хэба мэ чордэӷари, кай тумэ авелэ тэ залэн ман барэ шурянца и рувлянца? Кажно дес мэ бэшавас андо храмо и сытяравас котэ, и тумэ на поджанас каринг мандэ.
56 Но вся када тердяпэ, кай тэ ашэл кадя, сар ԥэндэ и пророкоря*». Тоди всаворэ ученикоря ашадэ лэс и унашлэтар.
57 Ай кодэла, ко хутилдя лэ Иисусос, андярдэ лэс каринг о ӷлавно священико Каиа́фа, лэстэ андэ града стидэ́пэ и законикоря и барэдэра.
58 Ай о Пётро жалас палал, чуть май дур лэстар, жы каринг о цэр, кай жувэлас о ӷлавно священико. Кала во зажыля андэ града, во бэшля лэ слуӷонэнца, кай тэ диқэл, сар вся авэла.
59 И барэдэр священикоря и всаворэ иудейски сындомаря* родэнас кодэлэн, ко хохадоп по Иисусо, кай тэ виандярэн лэсти смэртно приӷоворо.
60 Но лэндэ нисар на вижалас варисо тэ виарақэн против лэстэ, хоть авэнас бут хохавнэ свидетеля. Потом авелэ дуй мануш
61 и ԥэндэ: «Кадэва мануш ԥэнэнас: „Мэ моӷу тэ розмарав лэ Дэвлэско храмо и важ трин дес тэ ваздав лэс“».
62 Тоди ущеля о ӷлавно священико и пушля лэстар: «Тути найсо тэ ԥэнэс? Ашунэс, андэр со тут дошалярэн?»
63 Но о Иисусо ашэлас мулком. О ӷлавно священико ԥэндя лэсти: «Ԥэн амэнди англа жундо Дэл, ту о Христос, лэ Дэвлэско Шаво?»
64 О Иисусо ԥэндя лэсти: «Ту екжэно када ԥэндян. Ԥэнав тумэнди: акана тумэ лэна тэ диқэн лэ манушэстирэ Шавэс, саво бэшэл справа лэ Зоралэстар* и жал па небесни тучи».
65 Тоди о ӷлавно священико росшындя пэр пэстэ и ӥда и ԥэндя: «Када найпативали дума по Дэл! Состэ амэнди авэр свидетеля? Тумэ екжэнэ кати ашундэ, кай во найпативалэс ԥэндя по Дэл!
66 Со тумэ ԥэнэна пэ када?» Лэсти ԥэндэ: «Во затердя смэртно приӷоворо».
67 Посли када дэсавэ линэ тэ шунгардэн лэсти по муй и тэ марэн лэс кулаконэнца, ай авэр — тэ марэн лэс пар мостэ*
68 и тэ ԥэнэн: «А ни, Христос! Если ту пророко, ԥэн амэнди, ко тут дядап?»
69 Андэ кодэя время о Пётро бэшэлас аврял, андэ града. Каринг лэстэ поджыля ек служанка и ԥэндя: «Ту тожэ санас лэ Иисусоса анда Галиле́я!»
70 Но во ля тэ отԥэндёл кадэлэстар англа всаворэ: «Мэ на ӷанав, пала со ту ԥэнэс».
71 Кала во вижыля каринг и вороты, лэс додиқля авэр служанка и ԥэндя кодэлэнди, ко котэ тердёлас: «Кадэва мануш сас лэ Иисусоса анда Назаре́то».
72 Во упалэ ля тэ отԥэндёл кадэлэстар и тэ ԥэнэн: «О Дэл диқэл, мэ на ӷанав кадэлэ манушэс!»
73 Через дэсави время и мануша, савэ котэ тердёнас, поджылэ каринг о Пётро и ԥэндэ: «Ту точно ек андар лэндэ, тиро ӷоворо видэл тут».
74 О Пётро упалэ ля тэ отԥэндёл кадэлэстар: «Англа Дэл ԥэнав, мэ на ӷанав кадэлэ манушэс!» И андэ кадэва жэ маменто зацыписайля о башно.
75 Тоди лэ Петрости авелэ по гиндо лэ Иисусостирэ алава: «Англа кода сар процыпия о башно, ту тривар отԥэндёса мандар». Во вижыля и фартэ заровья.
Сноски
^ Или «тэ мақэл».
^ Ворта «припэля».
^ Ворта «болэл о марно андэ ек чаша манца».
^ Ворта «равви́».
^ Ворта «блаӷословисардя».
^ Ворта «псалмы».
^ Или «дэнапэдап через мандэ».
^ Или «ӷотово».
^ Ворта «равви́».
^ Ворта «вся о Синедрионо». Када сас ӷлавно иудейско сындо.
^ Ворта «лэ зорэстар».
^ Ворта «тэ дэндап лэс палма».
