Матфеё 15:1—39
15 Посли када каринг о Иисусо авелэ анда Иерусалимо и фарисеёря и законикоря и пушлэ:
2 «Васо тирэ ученикоря ԥагэн лэ ԥурэнго законо*? Например, вонэ на халавэн и вас, сар тэ бэшэн тэ хан*».
3 Пэ када о Иисусо ԥэндя лэнди: «Ай васо тумэ через пэстирэ традицыи ԥагэн лэ Дэвлэско законо?
4 Например, о Дэл ԥэндя: „Стов патив по дад и пэ дэй“ и „Кодэлэс, ко дэл амрая* лэ дадэс или ла да, трэбуй тэ умарэн“.
5 Ай тумэ сытярэн: „Ко ԥэнэна лэ дадэсти или ла дати: ‚Вся, соса мэ поможысардоп тути, мэ пообещал тэ отдав лэ Дэвлэсти‘,
6 тоди во ужэ на трэбуй тэ стол патив* пэ родителя“. Кадя через пэстирэ традицыи тумэ отшутэ о алав лэ Дэвлэстар.
7 Двухлични мануша, драго ԥэндя пала тумэндэ о пророко о Иса́йя:
8 „Кадэла мануша стон патив пэр мандэ алавэнца, но лэнго ди дуреля мандар.
9 Евья вонэ полэн ман, важ кода кай вонэ сытярэн тэ жувэн па лэ манушэнго законо“».
10 Посли кадэя дума во подақардя лэ манушэн и ԥэндя: «Ашунэн ман и полэн:
11 лэ манушэс мэлярэл най кода, со попэрэл андо муй, ай кода, со вижал анда муй».
12 Посли када и ученикоря поджылэ каринг о Иисусо и пушлэ: «Ту ӷанэс, кай тирэ алава холярдэ лэ фарисеёнэн?»
13 Пэ када во ԥэндя: «И растения, сави мэрно небесно Дад на садисардя, авэла вишынди ку корнё.
14 Авэла лэнца. Вонэ — корэ, савэ инке ӷулен тэ сыкавэн о дром аврэнди. Ай если о коро андярэл лэ корэс, тунчи лэдуй пэрэна андэ яма».
15 Тоди о Пётро мангля: «Поможысар амэнди тэ полас, со ту камлян тэ ԥэнэс».
16 О Иисусо ԥэндя: «Хэба и тумэ идоси на полэн?
17 Хэба тумэ на ӷанэн: вся, со попэрэл андо муй, прожал через о жэлудко и потом жал андэ яма?
18 Но кода, со вижал анда муй, жал лэ одестар. Акэ када и мэлярэл лэ манушэс.
19 Кадя, оди цырдэл каринг лэ бэзэхэско гиндо, саво андярэл каринг кода, кай тэ умарэн, тэ придэн лэ хулас или ла хулая*, тэ терэн билажавардимос*, тэ чорэн, тэ хохавэн пэ авэр, тэ дэн дума найпативалэс.
20 Вся када и мэлярэл лэ манушэс, ай най кода, кай во хал найхаладэ вастэнца».
21 Котар о Иисусо ужыля андэ гавора паша Ти́ро и Сидо́но.
22 Каринг лэстэ авеля ек финики́янка, сави котэ жувэлас, и ля тэ мангэл лэс: «Здик пэр мандэ, Ӷосподо, лэ Давидоско Шаво. Андэ мэрни щей и найвужэ, и вой фартэ мучийпэ».
23 Но во нисо лати на ԥэнэнас. Тоди и ученикоря пашэлэ каринг лэстэ и манглэ: «Ԥэн лати, кай вой тэ ужал, а то вой ԥирэл пала амэндэ и на парашэл тэ цыпий».
24 Пэ када о Иисусо ԥэндя: «О Дэл бишалдя ман най каринг всаворэ, ай кати каринг и хасардэ бакрорэ андо Израилё».
25 И манушни поджыля каринг лэстэ, пэля пэ чанга и мангля: «Ӷосподо, поможысар манди!»
26 Во ԥэндя: «Неправильно тэ одлэс о марно лэ бэятонэндар и тэ шос лэ риконорэнди».
27 Вой ԥэндя лэсти: «Да, Ӷосподо, но дажэ и риконорэ хан и прошука, савэ пэрэн па лэ хуланго столо».
28 Пэ када о Иисусо ԥэндя лати: «Манушни, сар дэ фартэ ту патяс! Мэк авэл кадя, сар ту камэс». И латири щей сразу исцэлисайля.
29 О Иисусо ужыля котар каринг и Галилейско моря, вазгляпэ по плай и прибэшля котэ.
30 Каринг лэстэ авеля бут миро. Вонэ андэ́ лэ ланганэн, лэ калекэн, лэ корэн, лэ мутонэн и бутэ аврэ насвалэн. Лэн стонас паша лэстирэ пэрнэ, и во исцэлияс лэн.
31 О миро удивияспэ, кала диқэлас, кай и мути дэн дума, и калеки ашэн зоралэ, и ланганэ ԥирэн, ай и корэ диқэн, и ԥэнэнас лашо алав пэ лэ Израилёско Дэл.
32 О Иисусо подақардя лэ учениконэн и ԥэндя: «Манди жалко кадэлэ манушэн, важ кода кай вонэ манца катэ ужэ трин дес и лэнди найсо тэ хан. На камав тэ одмэкав лэн боқалэн, важ кода кай андо дром вонэ моӷут тэ вимардён анда зор».
33 Но и ученикоря ԥэндэ лэсти: «Амэ дур лэ гавэндар, и кай амэ тэ лас скати марно, кай тэ проправарас кадя дэ бутэ манушэн?»
34 О Иисусо пушля: «Скати тумэндэ марно?» Вонэ ԥэндэ лэсти: «Семь, и инке исин набут мащё».
35 Во мангля лэ мирос тэ припэрэн пэ ԥув,
36 ля о марно и о мащё, ԥэндя наис лэ Дэвлэсти, росԥагля о марно и ля тэ роздэл лэс лэ учениконэнди, ай и ученикоря — лэ манушэнди.
37 Всаворэ халэ и чалелэ. Кала стидэ́ о марно, саво ашэляпэ, получисайлэ семь ԥэрди барэ корзины.
38 Всаворэн, ко халя, сас варикай 4 000 мурш, не щитая лэ жувлян и лэ бэятонэн.
39 Кала во одмэкля лэ народос, во бэшля андэ лодка и лагля андо ҭан, пэ саво ԥэнэн Магада́но.
