Марко 6:1—56
6 О Иисусо ужыля котар и авеля пэ пэстирэ краёря. Лэса ԥирэнас лэстирэ ученикоря.
2 Кала поджыля и субота, во ля тэ сытярэл андэ синагога, и бут анда кодэла, ко лэс ашунэлас, удивинаспэ и ԥэнэнас: «Катар во вся када ӷанэн? Ко дя лэсти кацаво годявэрнимос и зор тэ терэл кацавэ чудеса?»
3 Хэба во най мастеро по каш*? Хэба лэстири дэй най и Мария, ай лэстирэ ԥрала най о Иа́ково, о Иосифо, о Иу́да и о Си́моно? И хэба лэстирэ ԥэя на жувэн катэ, машкар амэндэ?» И вонэ на патяе андэр лэстэ.
4 О Иисусо ԥэндя лэнди: «Лэ пророкоса вся и время обжанпэ пативаса — кати най пэ лэстирэ краёря, най машкар о родо и най лэстэ андо цэр».
5 И во на стердя котэ нисавэ чудеса, кати стодя и вас пэ дэсавэ насвалэ и исцэлисардя лэн.
6 Во фартэ удивисайля кодэлэстар, кай вонэ на патянас. Потом во жыля андэ пашутнэ гавора и сытярэлас котэ лэ манушэн.
7 О Иисусо ақардя каринг пэстэ лэ 12 учениконэн и ля тэ бишалэл лэн по дуй, во дя лэнди право тэ хулаин пэ найвужэ.
8 Во приԥэндя лэнди тэ лэн пэса андо дром кати и рувли и тэ на лэн ни марно, ни сумка, ни тышыла*.
9 Во ԥэндя лэнди тэ лэн и сандали, но тэ на лэн пэса и запасно ӥда.
10 Потом во ԥэндя: «Каринг* тумэ тэ на зажан, ашэнпэ котэ, пока на ужана па кодэла краёря.
11 Ай если варикай и мануша тумэн на прилэна и на лэна тумэн тэ ашунэн, тоди, кала лэна тэ ужан, оптинон о прахо па пэстирэ пэрнэ. Кадя тумэ сыкавэна, кай динэ лэнди тэ ӷанэн пала када».
12 И апосталоря жылэ и линэ тэ росԥэнэн важ о Дэл, кай и мануша тэ каинпэ.
13 Вонэ видарадэ бутэ найвужэн, ай кадяжэ мақлэ вулееса бутэ насвалэн и исцэлисардэ лэн.
14 Пала када уӷангля о царё И́родо*, важ кода кай лэ Иисусоско алав фартэ ашундёлас. Сас кодэла, ко ԥэнэнас: «Када жунделя о Иоа́нно Крестителё — акэ васо во можэт тэ терэл кацавэ чудеса».
15 Авэр ԥэнэнас: «Када о Илья». Ай инке дэсавэ ԥэнэнас: «Када пророко, кацаво жэ, сар и пророкоря андэ дэлмутни время».
16 Кала о И́родо када ашундя, во ԥэндя: «Када жунделя о Иоа́нно, савэсти мэ отшындэм о шэро».
17 Жы каринг када о И́родо приԥэндя тэ хутилэн лэ Иоаннос. Во шутя пэр лэстэ цэпоря и стодя андо баруно через и Иродиа́да, через лэстирэ ԥралэстири лэ Филиппостири хулаи, пэ сави во жэнисайля.
18 Ай о Иоа́нно най еқвар ԥэнэнас лэсти: «Па законо тирэ ԥралэстири хулаи не можэт тэ авэл тути хулаи».
19 И Иродиа́да ритярэлас холи по Иоа́нно и камэлас лэс тэ умарэл, но латэ на вижалас,
20 важ кода кай о И́родо даралас лэ Иоанностар: во ӷанэнас, кай о Иоа́нно — праведно и свынто мануш, и фэрияс лэс. Лэ Иродости чалёлас тэ ашунэл лэ Иоаннос, хоть через лэстирэ алава лэ Иродос шолас андэ дар и во на ӷанэнас, со тэ терэл.
21 И акэ важ и Иродиа́да попэрделя лашо маменто. Кала кай о И́родо сас день раждения, во стодя вечером мисяйля важ и барвалэ мануша, важ и барэ халавдэ и важ и ашунглэ мануша анда Галиле́я.
22 Ла Иродиадатири щей авеля и вижыля тэ цэлэл лэ Иродости и лэ ӷостёнэнди. Лэнди када фартэ чалеля, и о царё ԥэндя ла щяти: «Манг со камэс, и мэ дава тути када».
23 Во солахадя лати: «Мэ дава тути вся, со мангэса, дажэ отдава епаш мэрно царство».
24 Вой вижыля и пушля кай пэстири дэй: «Со мэ тэ мангав?» Латири дэй ԥэндя: «Лэ Иоанноско лэ Крестителёско шэро».
25 И щей прастая каринг о царё и мангля: «Мэ камав, кай ту ворта щас тэ дэс манди по тэляри лэ Иоанноско лэ Крестителёско шэро».
26 Лэ царёсти ашэля по ди фартэ неприятно, но во не моӷ лати тэ отԥэнэн, важ кода кай солахадя англа ӷостёря.
27 Кочай во сразу бишалдя пэстирэ охраникос и приԥэндя лэсти тэ анэн лэ Иоанноско шэро. Кодэва мануш жыля андо бар, отшындя лэ Иоанности о шэро,
28 андя лэс по тэляри и дя ла щяти, ай вой отдя пэстиря дати.
29 Кала лэ Иоанностирэ ученикоря ашундэ пала када, вонэ авелэ, залинэ лэстири тила и притидэ*.
30 И апосталоря рисайлэ каринг о Иисусо и росԥэндэ лэсти пала вся, со вонэ терэнас и сости сытярэнас.
31 Во ԥэндя лэнди: «Жам андо спокойно ҭан, кай тумэ набут тэ отцыён». Важ кода кай авэлас и ужалас кадя бут миро, кай лэ Иисусости и лэ апосталонэнди найкала сас дажэ тэ бэшэн тэ хан.
32 Тоди вонэ лаглэ пэ лодка андо спокойно ҭан, кай тэ авэн екжэнэ.
33 Но о миро додиқля, кай вонэ уладэн, и бут ко пала када уӷангля. И мануша анда всаворэ фороря прастае интя и авелэ май пэрви лэндар.
34 Кала о Иисусо вижыля анда лодка, во додиқля бутэ манушэн. Лэсти ашэля лэн жалко, важ кода кай вонэ сас сар бакрорэ би лэ пастухоско, и во бутэсти ля лэн тэ сытярэл.
35 Май пашэ каринг о вечеро и ученикоря пашэлэ каринг о Иисусо и ԥэндэ: «Амэ дур лэ гавэндар, и ужэ позно.
36 Одмэк лэ манушэн тэ жан андэ пашутнэ гава и тэ тинэн пэсти тэ хан».
37 Во ԥэндя: «Тумэ дэн лэнди тэ хан». Вонэ пушлэ: «Ту камэс, кай амэ тэ жас, тэ тинас марно пэ 200 дина́рии* и тэ дас лэ манушэнди?»
38 Во ԥэндя лэнди: «Жан диқэн, скати тумэндэ исин марно». Вонэ диқлэ и ԥэндэ лэсти: «Панч марнэ, и инке дуй маще».
39 Тоди во мангля лэ манушэн тэ бэшэн пэ чар.
40 Вонэ бэшлэ кучкэнца по 100 и по 50 мануш.
41 О Иисусо ля панч марнэ и дуй маще, диқля по небо и мангляпэ*. Посли када во росԥагля о марно и ля тэ дэл лэ учениконэнди, кай вонэ тэ роздэн лэ манушэнди. Кадяжэ во пэ всаворэ розделисардя дуй маще.
42 Всаворэ халэ и чалелэ.
43 Кала стидэ́ вся о марно, саво ашэляпэ, вижылэ 12 ԥэрди корзины, ай кадяжэ стидэ́ и о мащё, саво ашэляпэ.
44 Кодэлэн, ко халя о марно, сас 5 000 мурш.
45 Сразу посли када о Иисусо ԥэндя лэ учениконэнди тэ бэшэн андэ лодка и тэ плывин пэ авэр береӷо андэ риг каринг и Вифсаи́да, ай екжэно ашэляпэ тэ проандярэл лэ мирос.
46 Во проандярдя лэ манушэн и посли када жыля по плай тэ мангэлпэ.
47 Кала поджыля о вечеро, и ученикоря пэ лодка сас ужэ пэ машкар моря, ай о Иисусо сас по береӷо екжэно.
48 Англа тэсара* во додиқля, кай пэ ученикоря ԥурдэлас и балвал и через када лэнди найвушэро тэ плывин, и жыля каринг лэндэ па моря, но, сар здэласпэ, камля тэ прожал мимо.
49 Кала вонэ додиқлэ, кай во жал па паи, вонэ погиндосардэ: «Амэнди када зрийпэ!» — и зацыписайлэ,
50 важ кода кай, кала додиқлэ лэс, пэрэдарайлэ. Но во сразу ԥэндя лэнди: «На́ даран! Када мэ».
51 Во бэшля андэ лэндири лодка, и тоди и балвал сразу уляпэ. Вонэ фартэ удивисайлэ,
52 важ кода кай на ӷанэнас, сар тэ полэн кода, со сас лэ марнэса. Лэнго ди инке на сас ӷотово тэ полэл када.
53 Кала вонэ пэрэплывисардэ пэ авэр риг, вонэ авелэ андо Геннисаре́то и терделэ* котэ.
54 Но кала вонэ вижылэ анда лодка, о миро сразу ӷатярдя лэ Иисусос.
55 Кадэла мануша опрастае всаворэ гава пэ кодэла краёря и линэ тэ анэн каринг лэстэ пэ носилки лэ насвалэн.
56 Андэ всаворэ фороря и гава, кай во сас, и мануша анэнас каринг о базаро лэ насвалэн, савэ мангэнас, кай во тэ домэкэл лэнди тэ лэнпэ хоть каринг и брыжа пэ лэстири ӥда. И всаворэ, ко лэласпэ каринг латэ, вилечинаспэ.
