Марко 15:1—47
15 Рано тэсара и барэдэр священикоря лэ барэдэрэнца и лэ закониконэнца — вся о Ӷлавно иудейско сындо* — подинэ дума ек еқэса, сԥанглэ лэ Иисусос, одындярдэ лэс и отдинэ лэ Пилатости.
2 О Пила́то пушля лэстар: «Ту иудейско царё?» Во ԥэндя: «Ту екжэно када ԥэнэс».
3 Но и барэдэр священикоря бут андэр со дошалярэнас лэ Иисусос.
4 Тоди о Пила́то упалэ лэстар пушля: «Тути найсо тэ ԥэнэс? Дик, скати дош пэр тутэ шон».
5 Но о Иисусо будэр нисо на ԥэндя, и када сас удивительно важ о Пила́то.
6 Пэ Патради о Пила́то обычно одмэкэлас анда баруно еқэ манушэс, пала саво мангэлас о народо.
7 Андэ кодэя время андо бар бэшэлас мануш, савэс ақарэнас Вара́вва. Во сас котэ аврэ манушэнца, савэ звазглэ лэ мирос и умардэ манушэн.
8 Стидяпэ толпа и ля тэ мангэл лэ Пилатос тэ стерэл кода, со во обычно терэлас важ о народо.
9 О Пила́то пушля лэндар: «Камэн, одмэкава важ тумэндэ лэ иудейсконэ царёс?»
10 Ай во ӷанэнас, кай и барэдэр священикоря завидуинас лэ Иисусости и важ када андярдэ лэс по сындо.
11 Но и барэдэр священикоря подмардэ лэ манушэн, кай вонэ тэ мангэн тэ освободий най лэс, ай лэ Вараввас.
12 О Пила́то пушля: «Ай со мэ тэ терав кодэлэса, пэр кастэ тумэ ԥэнэн иудейско царё?»
13 Вонэ зацыписайлэ: «Казнисар* лэс!»
14 О Пила́то пушля: «Васо? Саво найлашымос во стердя?» Но вонэ зацыписайлэ инке май фартэ: «Казнисар лэс!»
15 Тоди о Пила́то, кай тэ уӷодий лэ мирости, одмэкля лэ Вараввас, ай лэ Иисусос приԥэндя тэ марэн чукняса и потом тэ казнин по столбо.
16 И халавдэ ундярдэ лэ Иисусос андэ града, сави андэ лэ правителёско дворецо, и стидэ́ котэ вся о отрядо.
17 Вонэ шутэ по Иисусо фиалетово жылетка, анқудэ анда калючки винко, стодэ пэр лэстэ
18 и линэ тэ цыпин: «Тэ авэл зор лэ иудейсконэ царёсти!»
19 Вонэ марэнас лэс па шэрэстэ ла рувляса, шунгардэнас пэр лэстэ и тэлёнас лэсти пэ чанга.
20 Кала вонэ парашэлэ тэ издеваюца, вонэ злинэ пар лэстэ и фиалетово жылетка, шутэ пэр лэстэ лэстири ӥда и ундярдэ тэ примарэн по столбо.
21 Вонэ застависардэ еқэ манушэс, лэ Симонос анда Кире́на (лэ Александростирэ и лэ Руфостирэ дадэс), саво жалас анда гав, тэ андярэл о столбо, пэ саво трэбуй сас тэ казнин лэ Иисусос.
22 И акэ лэс андэ́ по ҭан, пэ саво ԥэнэн Голго́фа, со означает «черепо».
23 Котэ лэсти динэ вино, андэ саво сас зӷамимэ и мира*, но во на ля лэс тэ пэл.
24 И халавдэ примардэ лэ Иисусос по столбо и росцэлдэ лэстири ӥда*, кай тэ розделин ла машкар пэстэ.
25 Кала лэс примардэ по столбо, сас тэсара варикай девять часов*.
26 Пэ досточка, кай пистрон и дош, сас пистромэ: «Иудейско царё».
27 Паша лэстэ пэ столборя сас амбладэ дуй чордэӷаря: ек справа лэстар, ай авэр слева.
28 * ——
29 И мануша, савэ прожанас мимо, найпативалэс дэнас дума пала лэстэ. Вонэ кунинас лэ шэрэса и ԥэнэнас: «Эй, када жэ ту камлян тэ розмарэс о храмо и важ трин дес тэ ваздэс лэс.
30 Акана спасысар пэс — зӷуль па столбо!»
31 И барэдэр священикоря лэ закониконэнца тожэ асанаспэ лэ Иисусостар и ԥэнэнас: «Аврэн спасыяс, ай корко пэс тэ спасый не можэт!
32 Мэк о Христос, лэ Израилёско царё, зӷулел акана па столбо, кай амэ тэ диқас када и тэ патяс». И дажэ и чордэӷаря, савэ сас амбладэ паша лэстэ, найпативалэс дэнас дума пала лэстэ.
33 Десэ варикай в 12 часов* па вся кодэва краё* ашэля фартэ тэмно, и кадя сас до трёх часов дня*.
34 Варикай в три часа о Иисусо фартэ зацыписайля: «Эли́, Эли́, лама́ савахфани́?» — со означает «Дэвла, Дэвла*, васо ту ман ашадян?».
35 Кала дэсавэ, ко котэ тердёлас, ашундэ када, вонэ линэ тэ ԥэнэн: «Диқэн, во ақарэл лэ Ильяс».
36 Ай ек мануш прастая, тиндярдя и ӷубка андо шукло вино, стодя ла пэ рувли и дя лэсти тэ пэл. Кадэва мануш ԥэнэнас: «На́ ӷулен лэстэ! Диқаса, авэла о Илья тэ злэл лэс па столбо».
37 О Иисусо фартэ зацыписайля и муля.
38 Тоди и шырма андо храмо росшынделя пэдондэ, упрал жы тэлэ.
39 О баро халавдо*, саво тердёлас найдур лэ Иисусостар, кала додиқля, сар во муля, ԥэндя: «Кадэва мануш чаче сас лэ Дэвлэско Шаво».
40 Пэ вся када дурал диқэнас и манушня. Машкар лэндэ сас и Мария Магдали́на, ай кадяжэ и Мария, лэ Иаковостири лэ Цынёнестири и лэ Иосифостири дэй, и инке тердёлас котэ и Саломи́я.
41 Вонэ ԥирэнас лэ Иисусоса и поможынас лэсти, кала во сас андэ Галиле́я. Кадяжэ машкар лэндэ сас бут авэр манушня, савэ авелэ лэса андо Иерусалимо.
42 Поджалас о вечеро. И важ кода кай када сас дес, кала вся подӷотавливали каринг и субота,
43 о Иосифо анда Аримафе́я (во сас пативало сындомари анда Ӷлавно иудейско сындо* и тожэ аштярэлас, кала лэла тэ правий лэ Дэвлэско Царство), биросардя пэстири дар, жыля каринг о Пила́то и мангля тэ залэл лэ Иисусостири тила.
44 О Пила́то удивисайля, кай о Иисусо ужэ муля, и ақардя лэ барэ халавдэс, кай тэ пушэл, чаче када кадя чи най.
45 Кала о халавдо потвердисардя када, о Пила́то отдя и тила лэ Иосифости.
46 И о Иосифо тиндя котор материя анда сано лёно, зля и тила, замотысардя ла андэ кадэва котор и стодя андэ моӷилка, сави сас вишынди андо плай. Каринг о входо во поткотисардя баро бар.
47 Ай и Мария Магдали́на и Мария, лэ Иосифостири дэй, ашэлэпэ тэ диқэн по ҭан, кай сас притидо о Иисусо.
Сноски
^ Ворта «Синедрионо».
^ Ворта «По столбо».
^ Через и мира о шэро дэсави время на терэл здраво.
^ Ворта «три часа (сар вижыля о қам)».
^ Ворта «в шэстом часу (сар вижыля о қам)».
^ Ворта «па вся и ԥув».
^ Ворта «жы каринг девято часо (сар вижыля о қам)».
^ Или «Мэрно Дэл, Мэрно Дэл».
^ Ворта «цэнтурионо». Када сас барэдэр по отрядо андэ римско халавдия, андэ саво обычно сас 100 халавдэ.
^ Или «лэ Барэдэрэнго круӷо». Ворта «Синедрионо».
