Марко 14:1—72
-
И священикоря доԥэндён тэ умарэн лэ Иисусос (1, 2)
-
И манушни шол по шэро лэ Иисусости о ароматно вулей (3—9)
-
О Иуда придэл лэ Иисусос (10, 11)
-
Послиднё Патради (12—21)
-
Хан пэ лэ Ӷосподостири вечеря (22—26)
-
О Иисусо ԥэнэн, кай о Пётро отԥэндёла лэстар (27—31)
-
О Иисусо мангэлпэ андэ Гефсимания (32—42)
-
Лэ Иисусос залэн и халавдэ (43—52)
-
По Ӷлавно иудейско сындо (53—65)
-
О Пётро отԥэндёл лэ Иисусостар (66—72)
14 Кала сас инке дуй дес жы каринг и Патради и жы каринг лэ Преснонэ марнэско празнико, и барэдэр священикоря и законикоря гиндонас, сар хытрияса тэ хутилэн лэ Иисусос и тэ умарэн лэс.
2 Но вонэ ԥэнэнас: «Кати най по празнико, кай о миро тэ на зваздэлпэ».
3 Кала о Иисусо сас андэ Вифа́ния и бэшля тэ хал андо цэр кай о Си́моно, саво варикала сас прокажоно, интя авеля ек манушни. Латэ андэ вас сас ӷипсово бутылочка, андэ сави сас ароматно вулей (када фартэ кучутно и вужо вулей, пэ саво ԥэнэн нардо). Вой отԥагля о кырлоро пэ бутылочка и ля тэ шол о вулей лэсти по шэро.
4 Но дэсавэ линэ тэ холявэн. Вонэ ԥэнэнас ек еқэсти: «Состэ тэ пэрэвэдий кацаво вулей?
5 Лэс жэ можно сас тэ битинэн важ и 300 дина́рии* и тэ роздэн и ловэ лэ чорорэнди!» Лэнди фартэ на чалеля, со вой стердя*.
6 Но о Иисусо ԥэндя: «На́ ӷулен латэ. Состэ тумэ латэ лэнпэ? Вой стердя важ мандэ лащи дила.
7 Важ кода кай и чорорэ вся и время авэна паша тумэндэ, и тумэ сможэте тэ стерэн важ лэндэ лащи дила, кала закамэна, ай мэ най вся и время авава тумэнца.
8 Вой стердя важ мандэ, со моӷла: вишутя о вулей пэр мандэ и кадэлэса подӷотовила, кай ман тэ притидэн.
9 Чаче ԥэнав тумэнди: па вся и люма котэ, кай ашундёла и лащи новость, на бистрэна пала кадэя манушни и росԥэнэна, со вой стердя».
10 Ай о Иу́да Искарио́то, ек анда 12 апосталоря, жыля каринг и барэдэр священикоря, кай тэ здэл лэ Иисусос.
11 Кала вонэ виашундэ лэ Иудас, вонэ залошайлэ и ԥэндэ, кай дэна лэсти ловэ*. И во ля тэ родэл лашо маменто, кай тэ здэл лэ Иисусос.
12 По пэрво дес андэ лэ Преснонэ марнэско празнико, кала обычно анэнас ла Патрадятири жэртва, и ученикоря пушлэ лэ Иисусостар: «Кай амэнди тэ стас важ тутэ ла Патрадятири мисяйля?»
13 Тоди во бишалдя дуе учениконэн и ԥэндя лэнди: «Жан андо форо. Котэ тумэ додиқэна манушэс, саво андярэл о кувшыно лэ паеса. Жан пала лэстэ
14 и котэ, кай во зажала, ԥэнэн лэ цэрэстирэ хуласти: „О Учителё пушэл: ‚Кай о цэроро важ и ӷостёря, андэ саво мэ тэ справисарав и Патради пэстирэ учениконэнца?‘“.
15 Во сыкавэла тумэнди баро цэр упрэ, кай авэла вся, со трэбуй. Котэ и стерэн вся важ амэндэ».
16 И ученикоря жылэ андо форо, и вся сас кадя, сар во лэнди ԥэндя. И вонэ стердэ каринг и Патради вся, со трэбуй.
17 Вечером о Иисусо авеля интя лэ 12 апосталонэнца.
18 Кала вонэ бэшлэ тэ хан, о Иисусо ԥэндя: «Чаче ԥэнав тумэнди: ек андар тумэндэ, анда кодэла, ко хал манца, придэла ман».
19 Лэнди по ди ашэля найдраго, и кажно ля тэ пушэл: «Када жэ най мэ?»
20 Во ԥэндя лэнди: «Када ек анда 12, кодэва, ко болэл пэско марно андэ ек чаро манца.
21 Важ кода кай лэ манушэско Шаво ужалтар, сар пала лэстэ пистромэ, но бида кодэлэсти, ко лэс придэл! Фэдэр кодэва мануш тэ на авелоп пэ люма».
22 Кала вонэ ханас, о Иисусо ля о марно, мангляпэ*, ԥагля лэс, дя лэ учениконэнди и ԥэндя: «Алэн. Кадэва марно сыкавэл мэрни тила».
23 Потом во ля и чаша, поблаӷодарисардя лэ Дэвлэс и дя лэнди, и вонэ всаворэ пэнас андар латэ.
24 Во ԥэндя лэнди: «Кадэва вино сыкавэл мэрно „рат важ о доӷоворо“, саво питяла важ бут мануша.
25 Чаче ԥэнав тумэнди: мэ ужэ на пава о вино, пока на авэла о дес, кала мэ пава о тэрно вино андэ лэ Дэвлэско Царство».
26 Посли када вонэ дилабае диля*, андэ савэ хвалин лэ Дэвлэс, и жылэ по Масли́чно плай.
27 О Иисусо ԥэндя лэнди: «Тумэ всаворэ ман ашавэна*, важ кода кай пистромэ: „Умарава лэ пастухос, тоди и бакрорэ порознашэнапэ“.
28 Но кала мэ жундювава, тоди жава андэ Галиле́я и аштярава тумэн котэ».
29 Но о Пётро ԥэндя: «Дажэ если всаворэ тут ашавэна, мэ на ашавава!»
30 Пэ када о Иисусо ԥэндя: «Чаче ԥэнав тути: адес, андэ кадэя жэ рят, англа кода сар дувар процыпия о башно, ту тривар отԥэндёса мандар».
31 О Пётро тердёлас пэ пэско: «Дажэ если манди прижалапэ туса тэ мэрав, мэ никала тутар на отԥэндювава!» И авэр линэ тэ ԥэнэн кода жэ.
32 Потом вонэ авелэ каринг о ҭан, пэ саво ԥэнэн Гефсима́ния. О Иисусо ԥэндя лэ учениконэнди: «Побэшэн катэ, пока мэ лава тэ мангавпэ».
33 Во ля пэса лэ Петрос, лэ Иаковос и лэ Иоаннос. Лэ Иисусости ашэля ԥарэс по ди, и во фартэ запережывал.
34 Во ԥэндя лэнди: «Манди фартэ ԥарэс, кадя ԥарэс, кай аж тердёл оди. Ашэнпэ катэ и на́ совэн».
35 Во оджыля чуть май дур, пэля пэ чанга, тэлеля жы каринг и ԥув и ля тэ мангэлпэ, кай, если можно, вся када тэ обжал лэс ригаса.
36 Во ԥэнэнас: «А́ва*, Дадэ, важ тутэ вся возможно. Улэ мандар кадэя чаша. Но авря ригатар, мэк авэл най кадя, сар мэ камав, ай сар камэс ту».
37 Кала о Иисусо рисайля каринг и ученикоря, во додиқля, кай вонэ совэн. Тоди во ԥэндя лэ Петрости: «Си́моно, ту совэс? Хэба ту не моӷ тэ на совэс хоть ек часо?
38 Отшон и линдра и на́ парашэн тэ мангэнпэ, кай тэ на подэнпэ лэ бэзэхэсти. Оди цырдэлпэ*, ай и тила би зорэстири».
39 Посли када во упалэ оджыля и ля тэ мангэлпэ пала кода жэ.
40 Кала во рисайля, во додиқля, кай вонэ упалэ совэн, важ кода кай лэн ля и линдра. И вонэ на ӷанэнас, со лэсти тэ ԥэнэн.
41 Кала во до трито авеля, во ԥэндя лэнди: «И андэ кацави время тумэ совэн и отцыён! Хутила! Поджыля и время, кала лэ манушэстирэ Шавэс отдэна лэ бэзэхэстирэ манушэнди андэ вас.
42 Ущен, авэн. Мэрно здимари ужэ пашэ».
43 Во инке на додя дума, сар авеля о Иуда, ек анда 12. Лэса сас толпа миро барэ шурянца и рувлянца. Лэн бишалдэ и барэдэр священикоря, и законикоря и барэдэра.
44 О здимари доԥэнделя лэнца пала знако: «Хутилэн кодэлэс, кас мэ чумидава, андярэн лэс и драго следин пала лэстэ».
45 Во сразу поджыля каринг о Иисусо, ԥэндя: «Учителё*!» — и чумидя лэс.
46 Тоди лэ Иисусос хутилдэ.
47 Но ек анда кодэла, ко котэ тердёлас, хутилдя и бари шури, дядап лэ ӷлавнонэ священикостирэ рабос и отшындя лэсти о кан.
48 О Иисусо жэ ԥэндя кодэлэнди, ко авеля пала лэстэ: «Хэба мэ чордэӷари, кай тумэ авелэ пала мандэ барэ шурянца и рувлянца?
49 Кажно дес мэ сымас тумэнца андо храмо и сытяравас, и тумэ мандэ на ӷуленас. Но вся када терэлпэ, кай тэ ашэл кадя, сар пистромэ андэ Писания».
50 Тоди всаворэ ученикоря ашадэ лэс и унашлэ.
51 Но ек тэрно мануш жыля пала лэстэ. Пэр лэстэ сас кати ӥда анда сано лёно, сави сас пэ нанги тила. Лэс камлэ тэ хутилэн,
52 но во ашадя и ӥда и унашля нанго*.
53 Лэ Иисусос андярдэ каринг о ӷлавно священико, савэстэ стидэ́пэ всаворэ барэдэр священикоря, барэдэра и законикоря.
54 Ай о Пётро жалас чуть май дур лэстар жы каринг лэ ӷлавнонэ священикоско цэр. Во зажыля андэ града, бэшля лэ слуӷонэнца и ля тэ татёл паша бари яг.
55 И барэдэр священикоря и всаворэ сындомаря анда Ӷлавно иудейско сындо* родэнас кодэлэн, ко моӷ тэ ԥэнэн варисо против о Иисусо, кай тэ виандярэн лэсти смэртно приӷоворо, но нисо не моӷли тэ виарақэн против лэстэ.
56 Бут мануша авэнас и хохавэнас пэр лэстэ, но кода, со вонэ ԥэнэнас, на зжаласпэ.
57 Кадяжэ дэсавэ ущенас и, кай тэ хохавэн пэр лэстэ, ԥэнэнас:
58 «Амэ ашундям, сар во ԥэнэнас: „Мэ розмарава кадэва храмо, саво построисардэ и мануша, и важ трин дес ваздава авэр, и стерава када най лэ манушэндирэ вастэнца“».
59 Но и андэ када лэндирэ алава на зжанаспэ.
60 Посли када ущеля о ӷлавно священико и пушля лэ Иисусостар: «Тути найсо тэ ԥэнэс? Ашунэс, андэр со тут дошалярэн?»
61 Но о Иисусо ашэлас мулком и нисо на ԥэнэнас пэ када. О ӷлавно священико упалэ лэстар пушля: «Ту Христос, лэ Дэвлэско Шаво?»
62 О Иисусо ԥэндя: «Када мэ, и тумэ диқэна лэ манушэстирэ Шавэс, саво бэшэл па право вас лэ Зоралэстар* и жал па небесни тучи».
63 Тоди о ӷлавно священико росшындя пэр пэстэ и ӥда и ԥэндя: «Состэ амэнди авэр свидетеля?
64 Тумэ ашундэ, кай во найпативалэс ԥэндя по Дэл. Со тумэ ԥэнэна пэ када?*» И всаворэ прижанглэ лэ Иисусос дошалэса и виандярдэ лэсти смэртно приӷоворо.
65 Тоди дэсавэ линэ тэ шунгардэн пэр лэстэ, вонэ затидэнас лэсти о муй, марэнас лэс лэ кулаконэнца и ԥэнэнас: «Если ту лэ Дэвлэстар*, ԥэн, ко тут дядап!» Посли када и халавдэ линэ тэ марэн лэс пар мостэ, ай потом ундярдэ.
66 Андэ кодэя время о Пётро сас тэлэ андэ града. Кордэ авеля ек лэ ӷлавнонэ священикостири служанка.
67 Кала вой додиқля лэ Петрос, саво татёлас паша яг, вой внимательно подиқля пэр лэстэ и ԥэндя: «Ту тожэ санас кадэлэ Иисусоса анда Назаре́то».
68 Но во ля тэ отԥэндёл кадэлэстар: «Мэ лэс на ӷанав и нащи полав, пала со ту дэс дума» — и вижыля каринг и вороты.
69 И служанка, кала додиқля лэс котэ, упалэ ля тэ ԥэнэн кодэлэнди, ко сас паша латэ: «Во анда лэнго круӷо».
70 О Пётро упалэ ля тэ отԥэндёл кадэлэстар. Через дэсави время и мануша, савэ котэ тердёнас, упалэ линэ тэ ԥэнэн лэсти: «Ту точно ек андар лэндэ, ту жэ анда Галиле́я».
71 Но во упалэ ля тэ отԥэндёл*: «Мэрамэ, мэ на ӷанав лэ манушэс, пала саво тумэ ԥэнэн!»
72 И сразу посли лэстирэ алава о башно зацыписайля до дуйто, и лэ Петрости авелэ по гиндо лэ Иисусостирэ алава: «Англа кода сар дувар процыпия о башно, ту тривар отԥэндёса мандар». Во на виритярдя и заровья.
Сноски
^ Или «вонэ дэнас дума ласа холяса; цыпинас пэр латэ».
^ Ворта «руп».
^ Ворта «блаӷословисардя».
^ Или «псалмы».
^ Или «дэнапэдап через мандэ».
^ Еврейско или арамейско алав, саво означает «дад».
^ Или «ԥабол тэ терэл дила».
^ Ворта «равви́».
^ Или «почти би ла ӥдако».
^ Ворта «вся о Синедрионо».
^ Ворта «лэ зорэстар».
^ Или «Сави решэния тумэ прилэна?».
^ Или «пророко».
^ Ворта «тэ дэл амрая корко пэс».
