Лука 4:1—44
-
О Бэнг подмарэл лэ Иисусос тэ стерэл бэзэх (1—13)
-
О Иисусо лэл тэ росԥэнэн и лащи новость андэ Галилея (14, 15)
-
Лэ Иисусос на камэн тэ ашунэн андо Назарето (16—30)
-
Андэ синагога андо Капернаумо (31—37)
-
О Иисусо исцэлий лэ Симоностиря тёща́ и аврэ манушэн (38—41)
-
О миро виарақэл лэ Иисусос, кала во сас екжэно (42—44)
4 Кай о Иисусо сас о свынто зор, и во ужыля лэ Иорданостар, и лэ Дэвлэско зор андярэлас лэс па пустыня
2 40 деса. Вся кодэя время о Иисусо нисо на халас и посли када фартэ пробоқайля. Тоди о Бэнг ля тэ подмарэл лэс каринг о бэзэх.
3 Во ԥэндя лэ Иисусости: «Если ту лэ Дэвлэско шаво, ԥэн кадэлэ барэсти тэ ашэл марно».
4 Но о Иисусо ԥэндя лэсти: «Пистромэ: „Важ и жызня лэ манушэсти трэбуй най кати о марно“».
5 Тоди о Бэнг ля лэс по плай и важ еқвар сыкадя лэсти всаворэ царстворя пэ ԥув,
6 ай посли када ԥэндя: «Мэ дава тути право тэ хулаис пэ всаворэ кадэла ашунглэ царстворя, важ кода кай манди сас отдино кадэва право, и мэ дав лэс касти камав.
7 Ни акэ, если ту тэлёса манди, вся када авэла тиро».
8 Пэ када о Иисусо ԥэндя: «Пистромэ: „Полэн тумарэ Дэвлэс лэ Иеговас* и терэн кати лэстири свынто дила*“».
9 Потом о Бэнг андя лэ Иисусос андо Иерусалимо, стодя лэс по само вучо ҭан андо храмо и ԥэндя лэсти: «Если ту лэ Дэвлэско шаво, схук катар тэлэ,
10 важ кода кай пистромэ: „Во ԥэнэна пэстирэ анӷелонэнди тэ фэрин тут“
11 и „вонэ андярэна тут пэ вас, кай ту тэ на дэспэдап*“».
12 О Иисусо ԥэндя: «Сас ԥэндо: „На́ заставин тумарэ Дэвлэс лэ Иеговас тэ сыкавэл пэско зор*“».
13 Тоди о Бэнг парашэля тэ подмарэл лэ Иисусос каринг о бэзэх и ужыля лэстар, пока на авэла авэр лашо маменто.
14 Посли када о Иисусо, савэстэ сас о свынто зор, рисайля андэ Галиле́я. И дума пала лэстири лащи дила розжыляпэ па всаворэ кодэла краёря.
15 Котэ во сытярэлас андэ синагоги*, и всаворэ мануша драго дэнас дума пала лэстэ.
16 О Иисусо авеля андо Назаре́то — андо форо, кай вибареля. В суботу во, сар обычно, зажыля андэ синагога. Кала во ущеля, кай тэ адиной,
17 лэсти динэ о свитко, саво пистросардя о пророко о Иса́йя. Во ԥэрнадя лэс и виарақля, кай сас пистромэ:
18 «Пэр мандэ — лэ Иеговаско свынто зор. Во витидя ман* тэ росԥэнав лэ чорорэнди и лащи новость. Во бишалдя ман тэ пэрэдав кодэлэнди, ко андо плено, кай лэн освободина, тэ ԥэнав лэ корэнди, кай вонэ лэна тэ диқэн, тэ одмэкав кодэлэн, пэр кастэ тасавэн,
19 тэ росԥэнав, кай авеля лэ Иеговаско блаӷословлёно бэрш».
20 Посли када во ԥандадя о свитко, отдя лэс лэ помошникости андэ синагога и бэшля. Всаворэ андэ синагога диқэнас пэр лэстэ.
21 Тоди во ԥэндя: «Адес ашэля кадя, сар сас ԥэндо андэ Писания, со тумэ щас ашундэ».
22 Всаворэ линэ драго тэ дэн дума пала лэстэ и тэ удивинпэ кодэлэсти, савэ лашэ алава во ԥэнэнас. Вонэ пушэнас: «Хэба во най лэ Иосифоско шаво?».
23 Пэ када во ԥэндя: «Тумэ гиндона, кай каринг мандэ поджал и поӷоворка: „Врачо, исцэлисар корко пэс“ — и ԥэнэна: „Амэ ашундям, со ту стердян андо Капернау́мо. Стер кода жэ и катэ, пэ пэстирэ краёря“».
24 Потом во ԥэндя: «Чаче ԥэнав тумэнди: нинай кацаво, кай лэ пророкос тэ цэнин пэ лэстирэ краёря.
25 Чаче ԥэнав тумэнди: андэ лэ Ильястирэ деса, кала трин епашэса бэрш на сас брышын и па вся и ԥув сас баро боқалимос, андо Израилё сас бут ԥивля,
26 но о Дэл на бишалдя лэ Ильяс ни каринг ек андар лэндэ. О Дэл бишалдя лэс кати каринг и ԥивли андо сидонско форо Саре́пта.
27 Кадяжэ, кала жувэлас о пророко о Елисе́ё, андо Израилё сас бут прокажони мануша, но ни ек андар лэндэ на сас исцэлисардо — исцэлисайля кати о сирийцо Неема́но».
28 Кала всаворэ, ко сас андэ синагога, ашундэ када, лэн ля фартэ бари холи.
29 Вонэ взбисайлэ, виандярдэ лэ Иисусос анда форо, андэ́ лэс каринг о бряго по плай, пэ саво сас вазгло лэнго форо, кай тэ сшон лэс тэлэ.
30 Но во прожыля через и толпа и ужыля котар.
31 Потом о Иисусо авеля андо Капернау́мо, андо Галилейско форо. Котэ кажно субота во сытярэлас лэ манушэн,
32 и вонэ удивинаспэ кодэлэсти, сар во сытярэлас, важ кода кай во дэлас дума сар баро мануш*.
33 Андэ синагога сас мануш, андэ саво сас о найвужо, и во ӷромко зацыписайля:
34 «Со ту камэс амэндар, Иисусо анда Назаре́то? Ту авелян амэн тэ умарэс? Мэ ӷанав, ко ту. Ту — Свынто, кодэва, кас бишалдя о Дэл».
35 Но о Иисусо строӷо приԥэндя лэсти: «Аш мулком и вижа андар лэстэ!» Тоди о найвужо англа всаворэ шутя кадэлэ манушэс пэ ԥув и вижыля андар лэстэ, и во на стердя лэсти нисо вэрыто.
36 Всаворэ фартэ удивисайлэ и линэ тэ дэн дума машкар пэстэ: «Ашунэн, сар во дэл дума! Андэ лэстирэ алава кацаво зор, кай во приԥэнэн лэ найвужэнди и вонэ вижан анда мануша!»
37 И дума пала лэстэ розжыляпэ па вся кодэва краё.
38 Анда синагога о Иисусо жыля андо цэр кай о Си́моно. Кай лэ Симоностири тёща вазгляпэ бари температура, и лэ Иисусос манглэ тэ поможый лати.
39 О Иисусо поджыля каринг латэ и исцэлисардя ла. Латэ спэля и температура, вой сразу жэ ущеля и ля тэ гитой тэ хан важ и ӷостёря.
40 Сар тэ бэшэл о қам, каринг о Иисусо андэ́ лэ манушэн, савэндэ сас разно насвалимос. Во стодя и вас пэ кажно андар лэндэ и исцэлисардя всаворэ́ насвалэн.
41 Кадяжэ во видарадя лэ найвужэн анда бут мануша. Вонэ цыпинас, кала вижанас: «Ту — лэ Дэвлэско Шаво!» Но о Иисусо на домэкэлас лэнди тэ ԥэнэн пала лэстэ, важ кода кай вонэ ӷанэнас, кай во Христос.
42 Рано тэсара о Иисусо ужыля котар и жыля андо спокойно ҭан, кай нико на сас. Но и мануша линэ лэс тэ родэн и, кала виарақлэ, закамлэ лэс тэ уритярэн.
43 Тоди во ԥэндя лэнди: «Мэ трэбуй тэ росԥэнав и лащи новость пала лэ Дэвлэско Царство и андэ авэр фороря, важ кода кай о Дэл ман бишалдя важ кадэя дила».
44 И во жыля андэ Иуде́я тэ росԥэнэн андэ синагоги.
