Лука 22:1—71
-
И священикоря доԥэндён тэ умарэн лэ Иисусос (1—6)
-
Тидэнпэ каринг и послиднё Патради (7—13)
-
Хан пэ лэ Ӷосподостири вечеря (14—20)
-
«Манца пала ек столо бэшэл о здимари» (21—23)
-
И ученикоря споринпэ машкар пэстэ, ко андар лэндэ ӷлавно (24—27)
-
О Иисусо терэл о доӷоворо пала Царство (28—30)
-
О Иисусо ԥэнэн, кай о Пётро отԥэндёла лэстар (31—34)
-
Трэбуй тэ авэн ӷотови; дуй барэ шуря (35—38)
-
О Иисусо мангэлпэ по Маслично плай (39—46)
-
И халавдэ авэн пала Иисусо (47—53)
-
О Пётро отԥэндёл лэ Иисусостар (54—62)
-
Лэ Иисусостар приасанпэ (63—65)
-
О Иисусо андо Ӷлавно иудейско сындо (66—71)
22 Поджалас лэ Преснонэ марнэско празнико, пэ саво ԥэнэн Патради.
2 И барэдэр священикоря и законикоря камэнас тэ умарэн лэ Иисусос и гиндонас, сар фэдэр када тэ стерэн, важ кода кай вонэ даранас лэ народостар.
3 Тоди о Сатана зажыля андо ди кай о Иу́да Искарио́то, еқэсти анда 12 апосталоря,
4 и о Иу́да жыля каринг и барэдэр священикоря и каринг и барэдэра анда храмо, кай тэ подэл дума лэнца, сар тэ видэл лэнди лэ Иисусос.
5 Вонэ сас лошалэ када тэ ашунэн и динэ алав, кай потинэна* лэсти пала када.
6 Во соӷласисайля и ля тэ родэл лашо маменто тэ видэл лэс лэнди, кала паша лэстэ на авэла о народо.
7 Авеля лэ Преснонэ марнэско празнико*, кала анэнас ла Патрадятири жэртва.
8 О Иисусо ԥэндя лэ Петрости и лэ Иоанности: «Жан и стон важ амэндэ ла Патрадятири мисяйля».
9 Вонэ пушлэ: «Кай амэнди тэ стас и мисяйля?»
10 Во ԥэндя: «Кала тумэ зажана андо форо, тумэ диқэнапэ манушэса, саво ԥиравэл кувшыно лэ паеса. Жан пала лэстэ жы каринг о цэр, андэ саво во зажала,
11 и котэ ԥэнэн лэ цэрэстирэ хуласти: „О Учителё пушэл: ‚Кай о цэр* важ и ӷостёря, андэ саво мэ тэ справисарав и Патради пэстирэ учениконэнца?‘“.
12 Во сыкавэла тумэнди упрэ баро цэр*, кай авэла вся, со трэбуй. Котэ и гитон тэ хан».
13 Вонэ жылэ, и вся сас кадя, сар во лэнди ԥэндя. И вонэ стердэ вся, со трэбуй, каринг и Патради.
14 Кала авеля о вечеро, во бэшля* пала столо вместе лэ апосталонэнца
15 и ԥэндя лэнди: «Мэ фартэ камавас тэ хав кадэва ла Патрадяко хамос тумэнца жы каринг и ԥари время, сави мандэ авэла.
16 Важ кода кай, ԥэнав тумэнди, мэ ужэ на лава тэ хав кадэва хамос, пока андэ лэ Дэвлэско Царство на ашэла вся, со во сыкавэл».
17 Во ля и чаша, поблаӷодарисардя лэ Дэвлэс и ԥэндя: «Лэн кадэя чаша и пэрэдэн ек еқэсти.
18 Ԥэнав тумэнди, мэ ужэ на лава тэ пав о вино, пока на залэла тэ правий лэ Дэвлэско Царство».
19 Тоди во ля о марно, поблаӷодарисардя лэ Дэвлэс, ԥагля лэс, дя лэнди и ԥэндя: «Кадэва марно сыкавэл мэрни тила, сави мэ отдава важ тумэндэ. Терэн када, кай тэ сэрэн пала мандэ*».
20 Кадяжэ, посли кода сар вонэ халэ, во дя лэнди о вино* и ԥэндя: «Кадэва вино сыкавэл нэво доӷоворо пэ мэрно рат, саво питяла важ тумэндэ.
21 Но манца пала ек столо бэшэл о здимари.
22 Лэ манушэско Шаво жал кодэлэ дромэса, пала саво сас ԥэндо май данглал. И всаек бида кодэлэсти, ко лэс придэл!»
23 Тоди вонэ линэ тэ гиндон, касти андар лэндэ моӷло кацаво тэ дэл андо шэро.
24 И апосталоря линэ фартэ тэ споринпэ, ко андар лэндэ само ӷлавно.
25 Но о Иисусо ԥэндя лэнди: «И барэ мануша* хулаин лэ народонэнца, и кодэла, кастэ исин право тэ правин, ашундён па лащи дила.
26 Ай тумэ на трэбуй кацавэ тэ авэн. Но ко машкар тумэндэ барэдэр, мэк во ашэл сар цыкнэдэр, и ко руководий, мэк во ашэл сар слуӷо*.
27 Ко май ӷлавно: ко хал или ко стол и подэл? Хэба най кодэва, ко хал? Ай мэ машкар тумэндэ сар слуӷо.
28 Тумэ ашэнаспэ манца, кала мандэ сас ԥари время,
29 и мэ терав тумэнца о доӷоворо пала Царство, — сар мэрно Дад стердя манца о доӷоворо, —
30 кай тумэ тэ хан и тэ пэн манца пала ек столо андэ мэрно Царство и тэ бэшэн пэ троноря и тэ сындон 12 израильски коленоря.
31 Си́моно, Си́моно, о Сатана тасавэлас, кай лэсти тэ дэн тэ просеий тумэн, сар пшэница.
32 Но мэ фартэ мангаваспэ пала тутэ, кай ту тэ на парашэс тэ патяс*. И кала ту рисапэ, дэ зор пэстирэ ԥралэнди».
33 О Пётро ԥэндя: «Учителё*, мэ ӷотово туса и тэ бэшав андо баруно, и тэ мэрав».
34 Но о Иисусо ԥэндя: «Ԥэнав тути, Пётро: инке на процыпия адес о башно, сар ту тривар ԥэнэса, кай на ӷанэс ман».
35 Посли када во пушля лэндар: «На хутилэлас тумэнди варисо, кала мэ бишалавас тумэн, ай тумэндэ на сас пэса ни тышыла, ни сумка, ни сандали?» Вонэ ԥэндэ: «Най, вся хутилэлас».
36 Во ԥэндя лэнди: «Но акана кодэва, кастэ исин тышыла, мэк лэл ла, ай кадяжэ мэк лэл и сумка. И кодэва, кастэ нинай бари шури, мэк битинэл пэстири лунго жылетка и тинэл бари шури.
37 Ԥэнав тумэнди: манца трэбуй тэ ашэл кадя, сар пистромэ: „Во сас дошалярдо сар бэзэхэско мануш*“. Акана вся ашэл кадя, сар сас пистромэ пала мандэ».
38 Тоди вонэ ԥэндэ: «Учителё*, катэ исин дуй барэ шуря». Во ԥэндя лэнди: «Када хутила».
39 Кала вонэ вижылэ котар, о Иисусо, сар обычно, жыля каринг о Масли́чно плай, и лэстирэ ученикоря жылэ лэса.
40 Кала вонэ авелэ интя, во ԥэндя лэнди: «Мангэнпэ, кай тэ на подэнпэ лэ бэзэхэсти».
41 Ай екжэно оджыля лэндар чуть май дур*, терделя пэ чанга и ля тэ мангэлпэ:
42 «Дадэ, если тути уӷодно, улэ мандар кадэя чаша. Но авря ригатар, мэк вся авэл най сар манди уӷодно, ай сар уӷодно тути».
43 Тоди лэсти па небо сыкаделя о анӷело и придя лэсти зор.
44 Но лэстэ по ди сас кадя ԥарэс, кай во ля тэ мангэлпэ инке май фартэ, и лэско пото сас сар капли рат, савэ пэрэнас пэ ԥув.
45 Кала во парашэля тэ мангэлпэ, во жыля каринг и ученикоря и додиқля, кай вонэ засутэ, важ кода кай сас вицыенэ ла бидатар*.
46 Во ԥэндя лэнди: «Васо тумэ совэн? Ущен и мангэнпэ, кай тэ на подэнпэ лэ бэзэхэсти».
47 Во инке на додя дума, сар авеля бут миро. Май англал лэндар жалас о Иу́да, ек анда 12 апосталоря. Во поджыля каринг о Иисусо, кай тэ чумидэл лэс.
48 О Иисусо пушля: «Иу́да, ту чумидэс лэ манушэстирэ Шавэс, кай тэ придэс лэс?»
49 Кала кодэла, ко тердёлас паша Иисусо, полинэ, со авэла, вонэ ԥэндэ: «Учителё*, можэт, амэнди тэ хутилас и шуря?»
50 И ек андар лэндэ дядап ла шуряса лэ ӷлавнонэ священикостирэ рабос и отшындя лэсти о право кан.
51 Но о Иисусо ԥэндя: «Хутила!» — и ляпэ каринг лэ рабоско кан и исцэлисардя лэс.
52 Тоди во ԥэндя лэ барэдэрэ священиконэнди, лэ барэдэрэнди анда храмо и лэ народостирэ барэдэрэнди, савэ авелэ лэс тэ залэн: «Хэба мэ чордэӷари, кай тумэ авелэ пэр мандэ барэ шурянца и рувлянца?
53 Мэ кажно дес сымас андо храмо, и тумэ на ӷуленас мандэ. Но авеля тумари время и акана хулаий и тэмнота».
54 Лэ Иисусос хутилдэ́ и андярдэ кай о ӷлавно священико андо цэр, ай о Пётро жыля пала лэндэ и ритярдёлас лэндар чуть май дур.
55 Кала и мануша стодэ яг андэ града и бэшлэ паша латэ, о Пётро тожэ бэшля лэнца.
56 Ай ек служанка, кала додиқля лэс через о свето ла ягатар, внимательно подиқля пэр лэстэ и ԥэндя: «Кадэва мануш тожэ сас лэса».
57 Но во ля кадэлэстар тэ отԥэндёл: «Манушни, мэ на ӷанав лэс».
58 Ӷэт май интя лэс додиқля авэр мануш и ԥэндя: «Ту тожэ ек андар лэндэ». Но о Пётро на соӷласисайля и ԥэндя: «Най».
59 Прожыля лак часо, и инке ек мануш ворта ԥэндя: «Кадэва мануш точно сас лэса, важ кода кай во анда Галиле́я!»
60 Но о Пётро ԥэндя лэсти: «Мэ на ӷанав, пала со ту дэс дума». И сразу жэ, пока во инке ԥэнэнас када, зацыписайля о башно.
61 О Иисусо* обрисайля и диқля по Пётро. И лэ Петрости авелэ по гиндо лэ Иисусостирэ алава: «Адес, англа кода сар зацыпия о башно, ту тривар отԥэндёса мандар».
62 Во вижыля и розровьяпэ.
63 Кодэла, ко сторожыяс лэ Иисусос, линэ тэ приасанпэ лэстар и тэ марэн лэс.
64 Вонэ затидэ́ лэсти о муй и линэ тэ пушэн лэстар: «Если ту лэ Дэвлэстар*, ԥэн, ко тут дядап?»
65 И вонэ ԥэнэнас пала лэстэ бут найпативалэ алава, и кадя андярэнас найпативали дума по Дэл.
66 Тэсара стидэ́пэ лэ народостирэ барэдэра: и барэдэр священикоря и законикоря. Лэ Иисусос андэ́ каринг лэндэ андо зало, кай стидэласпэ о Ӷлавно иудейско сындо*, и вонэ ԥэндэ:
67 «Если ту Христос, ԥэн амэнди пала када». Но во ԥэндя лэнди: «Дажэ если мэ тумэнди ԥэнава, тумэ на патяна.
68 И если мэ пушава тумэндар, тумэ ашэна мулком.
69 Но акана лэ манушэско Шаво лэла тэ бэшэл справа лэ зоралэ Дэвлэстар».
70 Тоди вонэ пушлэ: «Ни акэ, вижал, ту — лэ Дэвлэско Шаво?» Во ԥэндя лэнди: «Тумэ екжэнэ ԥэнэн, кай када мэ».
71 Вонэ ԥэндэ: «Состэ амэнди инке тэ доԥэнас лэстири дош? Амэ екжэнэ ашундям, сар во када ԥэндя».
Сноски
^ Ворта «дэна руп».
^ Ворта «дес».
^ Или «комната».
^ Или «бари комната».
^ Или «припэля».
^ Или «тэ сэрэн мэрни время».
^ Ворта «чаша».
^ Или «царёря; правителя».
^ Или «сар кодэва, ко терэл дила важ авэр».
^ Или «тири вера тэ на ашэл май слабо».
^ Или «Ӷосподо».
^ Или «преступнико».
^ Или «Ӷосподо».
^ Или «пэ растаяния, пэ сави можно тэ шувидэс о бар».
^ Или «кодэлэстар, кай фартэ загрыжосайлэ».
^ Или «Ӷосподо».
^ Или «Ӷосподо».
^ Или «пророко».
^ Ворта «Синедрионо».
