Иоанно 18:1—40
-
О Иуда здэл лэ Иисусос (1—9)
-
О Пётро отшынэн о кан лэ ӷлавнонэ священикостирэ рабости (10, 11)
-
Лэ Иисусос анэн каринг о Анна (12—14)
-
О Пётро пэрво разо отԥэндёл лэ Иисусостар (15—18)
-
О Иисусо кай о Анна (19—24)
-
О Пётро до дуйто и до трито отԥэндёл лэ Иисусостар (25—27)
-
О Иисусо кай о Пилато (28—40)
-
«Мэрно Царство най кацаво, сар кадэла люматирэ царстворя» (36)
-
18 Кала о Иисусо када ԥэндя, во жыля пэстирэ учениконэнца андо садо, саво сас пала ла лэнако овраӷо Кедро́но*.
2 Лэско здимари о Иу́да тожэ ӷанэнас кадэва ҭан, важ кода кай о Иисусо часто стидэласпэ котэ пэстирэ учениконэнца.
3 О Иу́да андя интя лэ римсконэ халавдэн, ай кадяжэ лэ охраниконэн, савэн бишалдэ и барэдэр священикоря и фарисеёря. Вонэ линэ пэса лампы, барэ шуря и рувля.
4 О Иисусо ӷанэнас вся, со лэса авэла, кочай во вижыля май англэ и пушля лэндар: «Кас тумэ родэн?»
5 Вонэ ԥэндэ: «Лэ Иисусос анда Назаре́то». Во ԥэндя лэнди: «Када мэ». Лэнца тердёлас и о здимари о Иу́да.
6 Кала о Иисусо ԥэндя лэнди: «Када мэ», вонэ динэ палпалэ и пэлинэ пэ ԥув.
7 Во инке еқвар пушля лэндар: «Кас тумэ родэн?». Вонэ ԥэндэ: «Лэ Иисусос анда Назаре́то».
8 О Иисусо ԥэндя: «Мэ жэ ԥэндэм тумэнди, кай када мэ. Если тумэнди трэбуй мэ, одмэкэн аврэн».
9 Во ԥэндя када, кай тэ ашэл кадя, сар во ԥэндя май данглал: «Анда кодэла, кас ту манди дян, мэ ни еқэс на хасардэм».
10 Тоди о Си́моно Пётро хутилдя пэстири шури, дядап лэ ӷлавнонэ священикостирэ рабос и отшындя лэсти о право кан. (Лэ рабос ақарэнас Ма́лхо.)
11 Но о Иисусо ԥэндя лэ Петрости: «Стов и шури андо чохло. Хэба мэ на трэбуй тэ пав анда чаша, сави дя манди о Дад?»
12 Тоди и римски халавдэ, лэнго барэдэр и иудейски охраникоря хутилдэ лэ Иисусос и сԥанглэ лэс.
13 Спэрва вонэ андэ́ лэс кай о А́нна, кай лэ Каиафаско тестё. О Каиа́фа андэ кодэва бэрш сас ӷлавно священико.
14 Када сас кодэва Каиа́фа, саво ԥэндя лэ иудеёнэнди, кай важ лэндэ авэла фэдэр, если ек мануш мэрэла важ о народо.
15 Пала Иисусо жалас о Си́моно Пётро и инке ек ученико. Кадэва ученико ӷанэнас лэ ӷлавнонэ священикос и вместе лэ Иисусоса зажыля андэ лэ ӷлавнонэ священикостири града,
16 ай о Пётро ашэляпэ аврял, паша вороты. Потом о ученико, саво ӷанэнас лэ ӷлавнонэ священикос, вижыля, подя дума ла служанкаса, сави тердёлас паша вороты, и проандярдя лэ Петрос андэ града.
17 И служанка пушля лэ Петростар: «Ай ту най кадэлэ манушэско ученико?» Во ԥэндя: «Най».
18 Сас шудро, кочай и раборя и охраникоря стодэ яг и татёнас паша латэ. О Пётро тожэ тердёлас лэнца и татёлас.
19 О барэдэр священико роспушэлас лэ Иисусостар пала лэстирэ ученикоря и пала кода, сости во сытярэл.
20 О Иисусо ԥэндя лэсти: «Мэ росԥэнавас англа всаворэ, вся и время сытяравас андэ синагоги и андо храмо, кай стидэнпэ всаворэ иудеёря, и нисо на ԥэнавас чоралэс.
21 Васо жэ ту пушэс мандар? Пуш кодэлэндар, ко ашундя мэрни дума. Вонэ ӷанэн, пала со мэ давас дума».
22 Тоди ек охранико, саво тердёлас котэ, дядап палма лэ Иисусос и ԥэндя: «Сар ту дэс дума лэ ӷлавнонэ священикоса?»
23 О Иисусо ԥэндя лэсти: «Если мэ ԥэндэм варисо неправильно, ԥэн, со мэ дэм дума най кадя, ай если ԥэндэм правильно, тоди васо ту ман марэс?»
24 Посли када о А́нна бишалдя лэ Иисусос, саво сас сԥангло, каринг о ӷлавно священико о Каиа́фа.
25 Кала о Си́моно Пётро тердёлас паша яг и татёлас, лэстар пушлэ: «Ай ту най лэско ученико?» Во ԥэндя: «Най».
26 Ек лэ ӷлавнонэ священикоско рабо, саво родияспэ кодэлэсти, касти о Пётро отшындя о кан, ԥэндя: «Хэба най тут мэ диқлэм лэса андо садо?»
27 Но о Пётро упалэ ля тэ отԥэндёл. И андэ кодэва маменто зацыписайля о башно.
28 Лэ Каиафастар лэ Иисусос андярдэ андэ лэ правителёско дворецо. Сас тэсара, чуть свет. Но кодэла, ко лэс андя, на зажылэ андо дворецо, кай тэ на парашэн тэ авэн вужэ, важ кода кай тоди вонэ на бэшлоп пала мисяйля пэ Патради.
29 Кочай о Пила́то екжэно вижыля каринг лэндэ и пушля: «Андэр со тумэ дошалярэн кадэлэ манушэс?»
30 Вонэ ԥэндэ: «Тэ на авелоп во дошало, амэ на андоп лэс каринг тутэ».
31 Но о Пила́то ԥэндя лэсти: «Залэн лэс и стидэн пэр лэстэ сындо па тумаро законо». И иудеёря ԥэндэ лэсти: «Па амаро законо амэ не можэм никас тэ умарас».
32 Вся ашэля кадя, сар ԥэндя о Иисусо, кала дя тэ полэн, сар во мэрэла.
33 О Пила́то рисайля андо дворецо, ақардя лэ Иисусос и пушля лэстар: «Ту иудейско царё?»
34 О Иисусо ԥэндя лэсти: «Ту пушэс важ кода, кай чаче камэс када тэ ӷанэс, или важ кода, кай ашундян пала мандэ аврэндар?»
35 О Пила́то ԥэндя лэнди: «Мэ со, евреё? Када тиро народо и барэдэр священикоря андэ́ тут каринг мандэ. Со кацаво ту стердян?»
36 О Иисусо ԥэндя: «Мэрно Царство най кацаво, сар кадэла люматирэ царстворя*. Тэ авелоп мандэ кацаво Царство, мэрнэ мануша борисайлоп, кай ман тэ на видэн лэ иудеёнэнди. Но най, мэрно Царство най кацаво, сар кадэла люматирэ царстворя».
37 О Пила́то пушля лэстар: «Но вижал ту царё?» О Иисусо ԥэндя лэсти: «Ту екжэно ԥэнэс, кай мэ царё. Мэ арақаделэм и авелэм андэ люма, кай тэ потвердисарав о алав пала чачимос. Кажно, ко прилэл о чачимос, приашундёл каринг мэрнэ алава».
38 О Пила́то ԥэндя лэсти: «Со када чачимос?»
Посли кадэла алава во упалэ вижыля каринг и иудеёря и ԥэндя лэнди: «Мэ на гиндосарав, кай во андэ варисостэ дошало.
39 Тай инке тумэндэ кадя терэлпэ, кай пэ Патради мэ тэ одмэкав еқэ манушэс. Камэн, одмэкава важ тумэндэ лэ иудейсконэ царёс?»
40 Вонэ зацыписайлэ: «Одмэк най лэс, ай лэ Вараввас!» Ай о Вара́вва сас чордэӷари.
