А Б В Г Д Е Е Ж З И К Л М Н О П Ԥ Р С Т Ф Х Ц Ч Ш Э Я

А

• Азия.

  Андэ Гречески Писании кадя ԥэнэнпэ пэ римско область, андэ сави ужалас и западно часть андэ адесутни Турция, ай кадяжэ и пашутнэ островоря, када о Самосо и о Патмосо. Ӷлавно форо андэ кадэя область сас о Эфесо (Дл 20:16; Тн 1:4).

• Алава лэ Дэвлэстар.

  Када и алава, савэ жан лэ Дэвлэстар, кала во росԥэнэн и новость, пэрэдэл пэско гиндо или ԥэнэн, со уӷодно лэсти. Када можэт тэ авэл, кала о Дэл камэл варисости тэ сытярэл, тэ ԥэнэн, со лэсти чалёл, или тэ виандярэл о приӷоворо, ай кадяжэ тэ ԥэнэн, со авэла англэ (Мф 13:14; 2Пт 1:20, 21).

• Альфа и Омега.

  Пэрво и послиднё буква андо греческо алфавито. Андэ книӷа Свынто тайна лэн тривар ԥэнэн по Дэл сар звания. Када пэрэдэл о гиндо пала «пэрво и послиднё» и «кастар вся залэлпэ и пэр кастэ вся кончийпэ» (Тн 1:8; 21:6; 22:13).

• Аминь.

  Сыкавэл «тэ авэл кадя; чаче». Када жыля лэ еврейсконэ алавэстар ама́н, саво пэрэдэл о гиндо «тэ зритярэс о алав; тэ авэс надёжно». Алав «аминь» ԥэнэнас, кала сас соӷласни ла солахаса, ла молитваса или лэ алавэса, саво дэнас англа миро. Андэ Свынто тайна кадэва алав ԥэнэнпэ сар лэ Иисусостири лэ Христостири звания (Вт 27:26; 1Лт 16:36; Рм 1:25; Тн 3:14).

• Амрай.

  Ла ԥэнэнас, кай тэ авэл бида варикастэ или варисостэ. И амрая, пала савэ пистромэ андэ Библия, най еқэндар кодэлэса, кала страминпэ или акушэнпэ. Кадяжэ най вся и время и амрая ԥэнэнас андэ бари холи. Часто, кала дэнас амрая, кадя англа всаворэ сыкавэнас, кай варикасти сас виандярдо о приӷоворо или варикаса терэлапэ варисави бида. Если и амрая ԥэнэнас о Дэл или варико анда лэстирэ слуӷоря, када точно трэбуй сас тэ авэл (Бт 12:3; Чс 22:12; Мк 11:21; Дл 23:12; Рм 12:14; Гл 3:10).

• Анӷелоря.

  О еврейско алав мала́хо и греческо алав а́нгеласо ворта сыкавэн кодэлэс, ко пэрэдэл варикастирэ алава. Кадэла алава пэрэандярдён сар «анӷело», кала и дума жал пала кодэла, ко жувэл по небо (Бт 16:7; 32:3; Иак 2:25; Тн 22:8). Кай и анӷелоря исин баро зор. О Дэл лэн создал пэбутэстэ май данглал, чем лэ манушэн. Андэ Библия пала лэндэ кадяжэ ԥэнэнпэ, кай лэн «бут тысячи свынти», кай вонэ «лэ чачунэ Дэвлэстирэ шавэ» и «черӷая англа тэсара» (Вт 33:2; Иов 1:6; 38:7; Ид 14). Вонэ на сас создани кадя, кай лэндэ тэ арақадён кацавэ жэ, сар вонэ. Лэ анӷелонэн фартэ бут, лэн милионоря (Дан 7:10). Андэ Библия ԥэнэнпэ, кай кажнонэ анӷелостэ исин алав и пэско характеро. Но вонэ на домэкэн, кай лэн тэ полэн сар дэвлэн, и бут андар лэндэ дажэ на ԥэнэн пэско алав (Бт 32:29; Лк 1:26; Тн 22:8, 9). И анӷелоря залэн разно ҭан по небо, и кажно терэл пэстири дила. Вонэ терэн дила англа лэ Иеговаско троно, пэрэдэн лэстирэ алава, поможын лэ Иеговастирэ манушэнди пэ ԥув, зритярэн кода, со присындой о Дэл, и поможын андэ дила, кай тэ ашундёл и лащи новость (2Цр 19:35; Пс 34:7; Мф 4:11; Лк 1:30, 31; Тн 5:11; 14:6). Май англэ вонэ лэна тэ подритярэн лэ Иисусос андэ война Армагеддоно (Тн 19:14, 15).

• Апостало.

  Ӷлавно гиндо, саво пэрэдэл кадэва алав, — «кодэва, кас бишалдэ». Кадя ԥэнэнпэ и по Иисусо Христос, и пэ кодэла, кас бишалдэ, кай тэ поможын аврэнди. Май часто всаворэстар, кадя ԥэнэн пэ лэ Иисусостирэ 12 ученикоря, савэн во витидя и стодя, кай вонэ тэ дэн дума лэстирэ алавэстар (Мк 3:14; Дл 14:14).

•  Арамейско шыб.

  Када ек анда семицки шыба, сави шолпэ пэ пурани еврейско шыб. Спэрва пэ кадэя шыб дэнас дума и арамеёря, ай ӷэт май интя када ашэля ӷлавно шыб, пэ сави дэнас дума андэ Ассирия и андо Вавилоно. Кадяжэ кадэя шыб сас ӷлавно андэ Персия (Езд 4:7). Пэ арамейско шыб сас пистромэ дэсавэ котора андэ книӷи Ездра, Иеремия и Даниило (Езд 4:8—6:18; 7:12—26; Иер 10:11; Дан 2:4б—7:28; Мк 14:36; Дл 9:36).

• Ареопаго.

  Вучо плаёро андэ Афины, саво сас каринг о северо-западо лэ форостар Акро́полё. Кадя ԥэнэнас и по круӷо (сындо), саво стидэласпэ пэ кадэва плаёро. Еқвар и эпикурейцоря и стоикоря андэ́ лэ апосталос лэ Павлос по Ареопаго, кай во тэ росԥэнэн, андэр со патял (Дл 17:19, сн.).

• Армагеддоно.

  О еврейско алав Хар Мегиддо́но, савэстар жыля кадэя названия, сыкавэл «плай Мегиддо». Кадэва алав ԥэнэн, кала и дума жал пала «война, сави авэла андо баро дес лэ Барэ Дэвлэско». Тоди «всаворя ԥувьятирэ царёря» стидэнапэ, кай тэ жан войнаса против о Иегова (Тн 16:14, 16; 19:11—21). Дик БАРИ БИДА.

• Арханӷело.

  Кадэва алав сыкавэл «ӷлавно анӷело». Кала англа варисаво алав тердён буквы «арх», вонэ сыкавэн алав «ӷлавно». Кадяжэ андэ Библия алав «арханӷело» ԥэнэнпэ кати каринг еқэстэ. Вся када сыкавэл, кай исин кати ек арханӷело. Сар ԥэнэнпэ андэ Библия, лэс ақарэн Михаило (Дан 12:1; Иуд 9; Тн 12:7).

• Ахайя.

  Андэ Гречески Писании кадя ԥэнэнпэ пэ римско область, сави сас по юӷо андэ Греция. Ӷлавно форо андэ кадэя область сас о Коринфо. Андэ Ахайя ужалас вся о Пелопоннесо и дэсави ла ԥувьятири часть андэ Греция (Дл 18:12).

Б

• Бари бида.

  О греческо алав, саво пэрэандярдо сар «бида», пэрэдэл о гиндо пала ԥари время, сави исин андэ лэ манушэстири жызня, и пала ԥаримос, савэстар найдраго по ди. Кала о Иисусо ԥэндя, кай по Иерусалимо дэла и бида, пэрво, пэр со во камля тэ шол сама, сас и «бари бида», сави дэла пэ всаворэ мануша. Када терэлапэ тоди, кала во авэла, и дицола, «сави дэ бари бах лэстар марэл» (Мф 24:21, 29—31). Па лэ Павлостирэ алава дицол, кай кадэла бидаса о Иегова лэла тэ рий «кодэлэнди, ко на ӷанэн лэ Дэвлэс, и кодэлэнди, ко на приашундёл каринг и лащи новость» пала Иисусо Христос. Андэ книӷа Свынто тайна ԥэнэнпэ, кай о Иисусо лэла тэ хулаий лэ небеснонэ халавдэнца, савэ жана против о зверё и против ла ԥувьятирэ царёря лэндирэ халавдэнца (2Фс 1:6—8; Тн 19:11—21). Кадэя бида пэрэжувэна фартэ бут мануша (Тн 7:9, 14). Дик АРМАГЕДДОНО.

• Бари патив каринг о Дэл.

  Кадэя патив дицол каринг о Дэл Иегова, кала даран лэстар, полэн лэс и терэн лэстири дила, ай кадяжэ би алавэско прижанэн, кай лэстэ исин право тэ хулаий (1Тм 4:8; 2Тм 3:12).

• Баро ковло ди.

  Греческо алав ха́рисо сыкавэл, кай варико дэл анда ди и здиқэл пэ авэр. Кала и дума жал пала лэ Дэвлэско баро ковло ди, када ԥэнэнпэ пала кода, кай о Дэл делийпэ всаворэ́ одеса и нисо пала када на аштярэл, ай кадяжэ сыкавэл, кай во любий и драго обжалпэ лэ манушэнца. Кай кадя о Дэл тэ обжалпэ амэнца, амэ када не сможэм тэ затерас, кочай во када терэл кати важ кода, кай лэстэ баро и ковло ди. Кадэва греческо алав кадяжэ пэрэандярдёл сар «здиқэл» и «делийпэ всаворэ одеса» (2Кр 6:1; Эф 1:7).

• Барэдэр пэ область.

  Или «Проконсуло». Када ӷлавно барэдэр пэ область, савяса хулаияс о римско баро правительство. Лэстэ сас право тэ диқэл пала сындоря и пала халавдия. Андэ область на сас нико май баро лэстар, но пэр лэстэ всаек сас хулай о баро правительство (Дл 13:7; 18:12).

• Барэдэр священико.

  Андэ Еврейски Писании кадя пистромэ пала «ӷлавно священико». Андэ Гречески Писании «барэдэр священикоря», май ӥто всаворэстар, ԥэнэн пэ кодэла, ко сас ӷлавно андэ дила, сави терэнас и священикоря,  и кардэ, можэт, ужан и ӷлавни священикоря, савэ ужэ на терэн кадэя дила. Инке кадя ԥэнэн пэ барэдэра андэ 24 священически круӷоря (2Лт 26:20; Езд 7:5; Мф 2:4; Мк 8:31).

• Басэйно важ о вино.

  Обычно када сас дуй вишындэ ямы, машкар савэ сас найбари канавка. Кала о виноӷрадо тасавэнас андэ упруни яма, о вино спитялас андэ тэлуни. Кадэва алав ԥэнэнпэ кадяжэ най ворта, кала и дума жал пала лэ Дэвлэско сындо (Тн 19:15).

• Бесовестно пэс андярэн.

  О греческо алав асе́лгейа сыкавэл, кала о мануш ворта жал против лэ Дэвлэско законо и терэл када наӷло и найпативалэс, и кадэлэса сыкавэл, кай на стол патив и дажэ приасалпэ лэ законостар и кодэлэндар, кастэ исин право тэ хулаин. Кала о мануш андярэл пэс бесовестно, када фартэ серьёзно (Гл 5:19; 2Пт 2:7).

• Билажавардимос.

  Важ о Дэл уӷодно, кала сэксуальни отношэнии исин машкар хулай и хулаи андо брако, саво зареӷистрировано. Ай о греческо алав порне́йа, саво пэрэандярдо сар «билажавардимос», сыкавэл кодэла сэксуальни отношэнии, савэ неуӷодни лэ Дэвлэсти. Андэ када ужал, кала о мануш придэл пэстирэ хулас или ла хулая, кала андярэл шоварицко жызня, кала кодэва, ко най андо брако, совэл кодэлэса, ко лэсти най хулай или хулаи, кала и мурша совэн ек еқэса, кала и жувля совэн ек еқэса, и кала када терэн лэ жывотнонэнца. Андэ книӷа Свынто тайна о алав порне́йа ԥэнэнпэ, кала и дума жал пала хохавни вера, пэ сави ԥэндо Ашунгло Вавилоно. Вой шоварка, важ кода кай ԥирадёл кадэла люматирэ правителёнэнца, кай тэ авэл латэ бут мищимос и тэ авэл право тэ хулаий (Мф 5:32; Дл 15:29; Гл 5:19; Тн 14:8; 17:2; 18:3). Дик ШОВАРКА.

• Болдёс; болэс.

  О греческо алав сыкавэл «болэс; аравэс». О Иисусо ԥэндя, кай лэстирэ ученикоря обязательно трэбуй тэ болдён. Андэ Библия ԥэнэнпэ, кай о мануш можэт тэ болдёл кадя, сар болэлас о Иоанно, тэ болдёл лэ свынтонэ зорэса и ла ягаса и инке па аврятэ (Мф 3:11, 16; 28:19; Ин 3:23; 1Пт 3:21).

• Бэнг.

  Када лэ Сатанаско алав андэ Гречески Писании, саво сыкавэл «хохавно». По Сатана сас ԥэндо Бэнг, важ кода кай во ашэля пэрво и ӷлавно хохавнимари, саво хохаимаса дошалярэл лэ Иеговас, пэрэбандярэл кода, со во ԥэнэн и лажаварэл лэско свынто алав (Мф 4:1; Ин 8:44; Тн 12:9).

В

• Ваало.

  Када ханаанско дэл, лэс прижанэнас сар лэ небостирэ хулас, саво дэл о брышын и урожаё. Ваалоря кадяжэ ԥэнэнас пэ разни катутнэ дэвла. Пэ еврейско шыб кадэва алав сыкавэл «хулай; ӷосподино» (1Цр 18:21; Рм 11:4).

• Веельзевуло.

  Кадя ԥэндо по Сатана, саво лэ найвужэнго царё, или правителё. Можэт, кадя па аврятэ пистройпэ лэ Ваал-Зевувоско алав, када дэл, савэс полэнас и филистимляноря андо Экроно (2Цр 1:3; Мф 12:24).

• Вечеря лэ Ӷосподостири.

  Особо вечеро, пэ саво вспоминают лэ Иисусостири лэ Христостири смэрть. Андэ кадэва вечеро хан о пресно марно и пэн о лоло вино, савэ сыкавэн лэстири тила и о рат. Сар ԥэнэнпэ андэ Библия, всаворэ христианоря трэбуй тэ справин «лэ Ӷосподостири вечеря». Важ кода кай андэ кадэва вечеро вспоминают, кай о Христос отдя пэстири жызня, пэр латэ инке ԥэнэн Вечеря, кай тэ сэрэн пала лэ Иисусостири смэрть (1Кр 11:20, 23—26).

• Витка ла жызнятири.

  Када витка, сави барёлас андо Эдэмско садо. Андэ Библия на ԥэнэнпэ, кай и фрукты пар латэ сас варисавэ особени. Кадэя витка сыкавэлас, кай о Дэл точно дэл и вечно жызня кодэлэнди, кас домэкэла тэ хан пар латэ и фрукты (Бт 2:9; 3:22; Тн 2:7; 22:19).

• Востро рувли.

  Када лунго рувли, пэ сави востро саструно краё. Кацавя рувляса ӷонин лэ скотос. Кала о буйно гурув дэлас пэ кадэя рувли, во пусавэлас пэс. Катар и жыля о алав «дэс пэ востро рувли». Кадяжэ ла вострона рувляса  сыстонпэ лэ годявэрнэ манушэстирэ алава, савэ поможын тэ приашундён каринг о лашо совето (Дл 26:14; Сд 3:31).

• Вуӷлово бар.

  Када бар, саво стонас андэ лэ цэрэско вуӷло по стыко машкар дуй стины. Во сас фартэ важно, кай тэ стидэл лэ цэрэстирэ стины и кай вонэ тэ авэн май састэ. О ӷлавно вуӷлово бар стонас андо фундаменто. Важ и важни здании и лэ форостирэ стины витидэнас фартэ састо бар. Кадэва алав ԥэнэнпэ най ворта, кала и дума жал пала кода, сар стерди и ԥув (Иов 38:6). Кадяжэ пала Иисусо ԥэнэнпэ сар пала вуӷлово бар, пэ саво ритярдёл и христианско собрания, ай и собрания сыстойпэ лэ цэрэса (Эф 2:20). Инке по Иисусо ԥэнэн «упруно вуӷлово бар», саво драго дицол. Сар кадэва бар, о Иисусо находийпэ понад и христианско собрания, сави сар «лэ Дэвлэско храмо» (Мф 21:42; Дл 4:11; 1Кр 3:16, 17).

• Вужымос; вужо.

  Андэ Библия кадэва алав ԥэнэнпэ най кати кай о мануш тэ авэл просто вужо, но и кала варисо вужарэн, например ла дошатар, ла мэлатар, и кала освободин всаворэстар, со мэлярэл или римой лэ манушэско ди и годи и дурярэл лэ Дэвлэстар. Андэ лэ Моисеёско законо ԥэнэнаспэ пала особо порядко, саво трэбуй сас тэ стерэн, кай варико или варисо тэ ашэл вужо (Лв 10:10; Пс 51:7; Мф 8:2; 1Кр 6:11).

• Вужэ храмоско празнико.

  Кадэва празнико стонас кажно бэрш, кай тэ сэрэн о дес, кала о храмо ашэля вужо, посли кода сар лэс мэлярдя о Антиохо Штарто Эпифано. Кадэва празнико залэсаспэ 25 кислево и жалас восемь деса (Ин 10:22).

• Вурдон.

  Кай о вурдон андэ библейско время сас дуй роты и андэр лэстэ дэнас андрэ лэ грастэн. Инке о вурдон трэбуй сас важ и война (Исх 14:23; Сд 4:13; Дл 8:28; Тн 9:9).

Г

• Геенна.

  Пэ греческо шыб кадя ԥэнэнас пэ ла малятири ԥув Хинномо, сави сас по юӷо и по юӷо-западо лэ дэлмутнэ Иерусалимостар. Сас ԥэндо, кай када авэла ҭан, каринг лэна тэ шон и трупоря (Иер 7:31, 32; 19:6). Нисо на доԥэнэн, кай андэ геенна сԥабарэнас лэ жундэ манушэн и лэ жывотнонэн или кай вонэ котэ мучинаспэ. Вижал, када не можэт тэ авэл ҭан, кай и мануша вечно мучинпэ андэ яг. О Иисусо и лэстирэ ученикоря ԥэнэнас о алав «геенна», кай тэ сыкавэн о гиндо пала кода, со полностью и пэ вся и время авэла стрисардо, или сыкавэл «дуйто смэрть» (Тн 20:14; Мф 5:22; 10:28).

• Гермесо.

  Греческо дэл, лэ Зевсоско шаво. И мануша анда Листра гиндосардэ, кай о Павло када о Гермесо, важ кода кай полэнас кадэлэ дэвлэс сар кодэлэс, кас бишалэн авэр дэвла важ и разно дила и ко ӷанэн шукарнэс тэ дэл дума (Дл 14:12).

• Града.

  Заӷородимэ територия круӷом свынто катуна, ай ӷэт май интя вой сас опстоди стинэнца круӷом о храмо. Андэ града, кай сас и свынто катуна, и андэ лэ храмостири цынёни града тердёлас о жэртвенико, кай сԥабарэнас и жэртвы. Андэ Библия ԥэнэнпэ кадяжэ пала лэ цэрэндирэ грады и пала грады андэ дворецоря (Исх 8:13; 27:9; 1Цр 7:12; Мф 26:3; Мк 15:16; Тн 11:2).

• Грекоря; греческо шыб.

  О алав «грекоря» моӷли тэ ԥэнэн най кати пэ кодэла, ко грекоря па рат, но и пэ всаворэ авэр народоря, кроме евреёря, ай кадяжэ пэ кодэла, ко дэлас дума пэ греческо шыб и пэрэлэлас лэ греконэндирэ традицыи (Ил 3:6; Ин 12:20).

Ӷ

• Ӷамо.

  Када каш, саво шолпэ по карамысло, кай тэ ԥиравэн пэ ԥиқэ о ԥаримос; кадяжэ када каштуно хамуто или рама, сави шонас пэ кор дуе жывотнонэнди, обычно лэ гурувэнди, кай тэ стон лэн тала варисави-то канструкцыя или тала вурдон. Важ кода кай андэ дэлмутни время, кай тэ пэрэандярэн о ԥаро ӷрузо, о ӷамо часто стонас пэ раборя, кадэва алав сыкавэлас, кай варико варикаско рабо или трэбуй тэ кандэл, ай кадяжэ кай пэ варикастэ тасавэн и мучин. Тэ сшос или тэ ԥагэс о ӷамо — када тэ освободиспэ анда рабство (Лв 26:13; Мф 11:29, 30).

•  Ӷаравлицко гоно.

  Када гоно анда лэ жывотнонэндири мурцы (бузняни, бакрани или анда авэр), кай тэ ритярэн о паи, о вино, о ҭуд и авэр. О вино вся и время шонас андэ нэвэ ӷаравлицки гонэ, важ кода кай, кала лэл тэ цэлэл о вино, во вимэкэл уӷлекисло ӷазо, саво роздуияс кадэла гонэ. И нэвэ гонэ сас ковлэ, и важ када вонэ росцырдэнаспэ, ай и пуранэ гонэ сас жостки и росшындёнас (ИсН 9:4; Мф 9:17).

• Ӷипсо.

  Или «алебастро». Када бар, саво виӷанавэнас паша форо Алабастроно (Египто). На трэбуй тэ гиндос, кай када кодэва ӷипсо, саво щас исин, парно, сар яро. Анда ӷипсо терэнас найбарэ бутылочки важ и духоря. Лэндэ сас обычно вусько кэрлоро, саво састэс заԥандавэнас, кай котар нисо тэ на випитял и тэ на вижал о запахо (Мк 14:3).

• Ӷлавно священико.

  Па лэ Моисеёско законо када само баро священико, саво сас лэ народоско прецтавителё англа Дэл и савэс кандэнас авэр священикоря. Кати о ӷлавно священико еқвар андо бэрш, кала жалас Примирительно дес, моӷ тэ зажал андэ Само свынто комната андэ свынто катуна или андо храмо. «Ӷлавно священико» кадяжэ ԥэнэн по Иисусо Христос (Лв 16:2, 17; 21:10; Мф 26:3; Евр 4:14).

• Ӷосподо; Хулай.

  О еврейско алав адо́н и о греческо алав ки́риос часто сыкавэн о гиндо, кай варикасти варисо прижал, исин власть и лэстэ исин право тэ хулаий пэ варикастэ или пэ варисостэ. Кадэла алава ԥэнэн по Дэл Иегова (Иез 3:11), по Иисусо Христос (Мф 7:21), пэ анӷелоря (Дан 12:8) и пэ мануша, савэнди динэ власть, ай кадяжэ пэ хула́я андо ери (Бт 42:30; Эф 6:5). Например, и Сарра взвияспэ каринг о Авраамо «мэрно хулай» (пэ еврейско шыб кадэва алав пашэ лэ алавэсти адо́н) (Бт 18:12). Кала о апостало Пётро дэлас дума пала примеро, саво сыкадя и Сарра, во ԥэнэнас о греческо алав ки́риос (1Пт 3:6). Кадяжэ андэ Библия ԥэнэнпэ, кай исин «бут „дэвла́“ и бут „хула́я“» (1Кр 8:5). О Иегова дя лэ Иисусости особо дила, кай во тэ поможый тэ ашэл вся кадя, сар загиндосардя о Дэл. Важ када по Иисусо ԥэнэнпэ, кай «о Дэл стодя [лэс] тэ авэл Ӷосподо и Христос» (Дл 2:36; 1Кр 8:6). Андэ кадэва переводо, кала и дума жал пала Дэл Иегова или пала Иисусо Христос, ԥэнэнпэ о алав «Ӷосподо». Кадя заведено тэ пистрон кай бут библейски переводчикоря. Андэ дэсавэ ҭана андэ Библия по Иисусо кадяжэ ԥэнэн о алав «Хулай» (Мф 12:8; Тн 17:14).

Д

• Дес англа субота.

  Андэ кадэва дес тидэнаспэ каринг и субота. Во заканчивался, сар зажалас о қам андо дес, пэ саво адес ԥэнэн пятница, — андэ кодэя жэ время залэласпэ и субота. Кай и евреёря о дес залэласпэ и заканчивался вечером (Мк 15:42; Лк 23:54).

• Дес важ о сындо.

  Када «дес», или время, сави витидя о Дэл, кай тэ спушэл дэсавэ манушэндар, лэ народонэндар или всаворэ́ миростар. Важ кодэла, касти виандярдо смэртно приӷоворо, о дес важ о сындо можэт тэ сыкавэл, кай о Дэл спушэла лэндар, ай важ авэр када можэт тэ сыкавэл, кай вонэ спасынапэ и лэна тэ жувэн вечно. О Иисусо Христос и лэстирэ апосталоря дэнас дума пала «Дес важ о сындо», саво авэла англэ. Кадэва сындо авэла най кати пэ жундэ, но и пэ кодэла, ко дэлмут муля (Мф 12:36).

• Десятиградия.

  Када гречески фороря, савэ сас стидэ́ вместе. Спэрва лэн сас дэш. Кадэя названия жыля лэ греческонэ алавэстар де́ка (озн. «дэш») и по́лисо (озн. «форо»). Инке Десятиградия ԥэнэнас пэ область по востоко ла Галилейскона морятар и ла лэнатар Иордано, паша савэ тердёнас май бут анда кадэла фороря. Вонэ сас ӷлавни фороря важ и торӷовля и важ и греко-восточно культура. Через кадэла фороря прожалас о Иисусо, но амэ на ӷанас, зажылясас во хоть андэ ек андар лэндэ чи най (Мф 4:25; Мк 5:20).

• Десято часть.

  Када 10 процэнторя, савэ отдэнас или потинэнас сар налоӷо, со май ӷлавно, важ лэ Дэвлэстири дила (Вт 26:12; Мл 3:10; Мф 23:23; Евр 7:5). Па лэ Моисеёско законо и израильтяноря  кажно бэрш отдэнас лэ левитонэнди и десято часть анда урожаё и анда ското, саво арақаделя, кай тэ подритярэн лэндири дила важ о Дэл. Ай и левиторя отдэнас анда кадэя часть пэстири десято часть, кай тэ подритярэн лэ священиконэн, савэ жылэ лэ Аароностар. Инке сас и авэр десяти части. И христианоря на трэбуй тэ отдэн и десято часть.

• Дили.

  Или «Псалом». Када дили, андэ сави хвалин лэ Дэвлэс. Каринг и алава анда кацавэ диля пистронас и музыка, и лэн дилабэнас, например, кала о народо жалас андэ қандири андо Иерусалимо, кай тэ тэлёл лэ Иеговасти (Лк 20:42; Дл 13:33; Иак 5:13).

• Динариё.

  Када римско рупуни манета. Лако весо сас варикай 3,85 ӷ, и пэр латэ сас вимардо о ӷлавно римско правителё. Важ о дес лэ бутярнэсти обычно потинэнас ек динариё, и имено кадэла манетаса и евреёря потинэнас о налоӷо па мануш, саво стидэнас и римляноря (Мф 22:17; Лк 20:24).

• Доӷоворо.

  Када о доӷоворо, саво стердо лэдонэ ригэндар, — лэс терэл о Дэл лэ манушэнца или и мануша машкар пэстэ. Кадэлэса вонэ дэн алав, кай трэбуй варисо тэ терэн или варисо тэ на терэн. Дэкала о алав трэбуй сас тэ зритярэл кати варико ек (када доӷоворо еқа ригатар). Андэ авэр маменто о алав трэбуй сас тэ зритярэн лэдуй (када доӷоворо дуе ригэндар). Кроме доӷовороря, савэ сас стердэ машкар о Дэл и мануша, андэ Библия пистромэ пала доӷовороря, савэ терэнас машкар пэстэ и мануша, ӷрупы манушэн и народоря. Само важни доӷовороря сас кодэла, савэ о Дэл стердя лэ Авраамоса, лэ Давидоса и лэ израильсконэ народоса (лэ законоско доӷоворо) и лэ Дэвлэстирэ Израилёса (нэво доӷоворо) (Бт 9:11; 15:18; 21:27; Исх 24:7; 2Лт 21:7; Лк 22:29; Дл 3:25; 2Кр 3:6; Евр 8:6).

• Драбатяримари.

  Или «астролоӷо». Када мануш, саво драго розуӷанэн о қам, о шон и черӷая, кай тэ ԥэнэн, со авэла англэ (Мф 2:1).

• Драбатяримос.

  Када патяимос андэ кода, кай и мулэ моӷут тэ дэн дума лэ жундэнца, обычно через о мануш, савэстэ лэнца исин бари связь. Греческо алав фармаки́а, саво пэрэандярдёл сар «драбатяримос», ворта сыкавэл «прилэс и наркотикоря». Кадэва алав сԥангло лэ драбатяримаса, важ кода кай андэ дэлмутни время кодэла, ко драбатярэлас, ханас и драба, или прилэнас и наркотикоря, кала виақарэнас лэ найвужэн, кай тэ лэн лэндар о зор (Гл 5:20; Тн 21:8).

• Драхма.

  Андэ Гречески Писании кадя ԥэнэн пэ рупуни греческо манета, савятэ сас о весо 3,4 ӷ. (Мф 17:24).

• Дром.

  Андэ Библия кадэва алав часто сыкавэл, сави жызня уӷодно лэ Иеговасти, ай сави най. Пэ лэ Иисусостирэ лэ Христостирэ ученикоря ԥэнэнас, кай вонэ прижан каринг о «Дром». Када сыкавэлас, кай вонэ жанас лэ Христостирэ дромэса и терэнас, сар во, и андэ лэндири жызня само ӷлавно сас тэ патян андэр лэстэ (Дл 19:9).

• Душа.

  Кадя обычно пэрэандярдёл о еврейско алав не́феш и о греческо алав психе́. Андэ Библия кадэла алава тердён, кала и дума жал: 1) пала мануша, 2) пала жывотни и 3) пала лэ манушэндири или лэ жывотнонэндири жызня (Бт 1:20; 2:7; Чс 31:28; Дл 27:37; кадяжэ сн.).

Е

• Евнухо.

  Ворта када мурш, савэсти стердэ кастрацыя. Часто кацавэ мурша сас слуӷоря кай и царица и диқэнас пала ӷаремо. Евнухоря инке ԥэнэнас пэ барэ мануша анда лэ царёстири града, савэ на сас кастрировани. Кадэва алав инке найворта ԥэнэн, кала и дума жал пала мануша, савэ ритярэн пэс андэ вас, кай вся пэстири жызня тэ отдэн важ лэ Дэвлэстири дила. Можно тэ ԥэнэс, вонэ ашэлэ сар «евнухоря... важ о небесно Царство» (Мф 19:12, сн.; Эсф 2:15; Дл 8:27).

• Евреёря; еврейско шыб.

  Пэрво разо евреё сас ԥэндо по Аврамо (Авраамо), кай тэ сыкавэн, кай во на шолпэ пэ амореёря, савэ жувэнас паша лэстэ. Потом евреёря линэ тэ ԥэнэн пэ лэ Авраамостирэ бэяцэ, савэ жылэ лэстирэ внукостар лэ Иаковостар, ай пэ шыб, пэ сави  вонэ дэнас дума, ԥэнэнас «лэ евреёнэндири шыб». Андэ лэ Иисусостири время андэ еврейско шыб сас бут арамейски алава. Пэ кадэя шыб дэлас дума о Иисусо и лэстирэ ученикоря (Бт 14:13; Исх 5:3; Дл 26:14).

• Евфрато.

  Само лунго и со май важно лэн андэ юӷо-западно Азия; ек анда дуй ӷлавни лэна андэ Месопотамия. Пала латэ пэрво разо пистромэ андэ Бытие 2:14. Вой ек анда штар лэна, савэ питянас анда Эдэмско садо. Часто пэр латэ просто ԥэнэнпэ «лэн» (Бт 31:21). О Евфрато сас Израильско северно ӷраница (Бт 15:18; Тн 9:14; 16:12).

Ж

• Жребиё.

  Када барора или найбарэ которора каш, савэнца пользуинаспэ, кай тэ прилэн решэнии. Лэн стонас андэ ӥда или андэ варисави посуда и пэрэтинонас. Па жребиё, саво випэрэлас или сас витидо, полэнас, со трэбуй тэ терэн. Часто када терэнас молитваса (Мф 27:35; Дл 1:26).

• Жундёс.

  Када кала варико рийпэ каринг и жызня. О греческо алав ана́стасисо, саво пэрэандярдёл сар «жундярэс», ворта сыкавэл «ваздэспэ; ущес». Андэ Библия ԥэнэнпэ пала девять разоря, сар жундёнас и мануша, и кардэ ужал, кала о Дэл Иегова жундярдя лэ Иисусос. Хоть лэ манушэн жундярэнас о Илья, о Елисеё, о Иисусо, о Пётро и о Павло, можно точно тэ ԥэнас, кай кадэла чудеса вонэ терэнас лэ Дэвлэстирэ зорэса. Па лэ Дэвлэско баро гиндо обязательно трэбуй тэ жундён «кодэла, ко терэлас правильно и ко терэлас неправильно» (Дл 24:15). Андэ Библия кадяжэ ԥэнэнпэ, кай авэна кодэла, ко жундёла каринг и жызня по небо. Пэрви, ко рияпэ каринг и жызня, авэна лэ Иисусостирэ ԥрала, савэ сас витидэ́ лэ свынтонэ зорэса (Ин 5:28, 29; 11:25; Фп 3:11; Тн 20:5, 6).

• Жэртва.

  Када подарко, саво анэнас лэ Дэвлэсти, кай тэ сыкавэн пэстири блаӷодарность, тэ сыкавэн, кай каинпэ, или тэ рин и лащи дружба лэ Дэвлэса. Жы анда лэ Авелёстири время и мануша анэнас разни жэртвы (кадяжэ и лэ жывотнонэн), кала камэнас када тэ стерэн. Ай кала сас дино лэ Моисеёско законо, и жэртвы трэбуй сас тэ анэн обязательно. Посли кода сар о Иисусо отдя пэстири жызня сар совершэно жэртва, будэр на трэбуй тэ анэн лэ жывотнонэн андэ жэртва. Но и христианоря идоси анэн лэ Дэвлэсти авэр жэртвы па лэстири время (Бт 4:4; Евр 13:15, 16; 1Ин 4:10).

• Жэртва важ о бэзэх.

  Када жэртва, сави анэнас важ о бэзэх, если во сас стердо дэзначай, если варико подяпэ лэ бэзэхэстиря тилати. Андэ жэртва важ о бэзэх анэнас разнонэ жывотнонэн — лэ гурувэстар жы каринг о ӷолубо. Када зависило кодэлэстар, саво ҭан залэл о мануш и саво лэстэ достатко, кай лэско бэзэх тэ авэл простисардо (Лк 4:27, 29; Евр 10:8).

• Жэртвенико.

  Када поцтавка, сави вазгли анда ԥув, анда бара или анда каш, и сави сас опшути састреса. Пэр латэ анэнас и жэртвы и сԥабарэнас и араматно смесь лэ чачунэ Дэвлэсти или лэ хохавнэ дэвлэнди. Андэ пэрво комната андэ свынто катуна, ай ӷэт май интя андо храмо тердёлас найбаро сомнакуно жэртвенико, кай тэ сԥабарэн и араматно смесь. Во сас стердо анда каш и опшуто сомнакаса. По баро харкумуно жэртвенико сԥабарэнас всаворэ жэртвы, и во тердёлас андэ ла катунатири града или андэ лэ храмостири града (Исх 39:38, 39; 1Цр 6:20; Мф 5:23, 24; Лк 1:11; Дл 17:23).

З

• Законикоря.

  Спэрва када сас кодэла, ко терэлас копии па Свынти Писании. Андэ лэ Иисусостири время кадя ԥэнэнас пэ мурша, савэ драго ӷанэнас лэ Моисеёско законо и сытярэнас аврэн. Лэ закониконэнди на чалёлас о Иисусо (Езд 7:6; Мк 12:38, 39; 14:1).

• Законо.

  Кадэва алав часто ԥэнэн пэ вся лэ Моисеёско законо или пэ пэрви панч книӷи андэ Библия. Инке кадя ԥэнэн пэ отдельни законоря, савэ исин андэ лэ Моисеёско законо (Чс 15:16; Вт 4:8; Мф 7:12; Гл 3:24).

• Зевсо.

  Када само баро дэл важ и грекоря. И мануша анда Листра гиндонас,  кай о Варнава — када о Зевсо. Найдур кадэлэ форостар виарақлэ пуранэ надписи, кай ԥэнэнаспэ пала «Зевсо, лэ қамэско дэл» и пала «лэ Зевсостирэ драбатяримаря». По нак кай о кораблё, пэ саво лагля о Павло по острово Мальта, сас украшэния «лэ Зевсостирэ Шавэ» — када сас нарисовани дуй ԥрала пэ ек муй, о Касторо и о Поллуксо (Дл 14:12; 28:11).

• Знако.

  Када вещь, дила, кала варисо терэлпэ или кала сыкадёл варисо необычно, и када сыкавэл, со трэбуй тэ авэл акана или англэ (Мф 24:30).

• Зэрноско бар.

  Дуй плоски круӷли бара, савэ стонас ек пэ ек; лэнца мэлинас о зэрно. Андо машкар по тэлуно бар застонас рувли, пэ сави болдэласпэ о упруно бар. Андэ библейско время пэ кацавэ мэльницы обычно терэнас и жувля. Если варисавэ ерестэ тэ на авелоп кацави мэльница, тоди лэ ерестэ на авелоп марно по кажно дес. Важ када андэ лэ Моисеёско законо сас пистромэ, кай нащи тэ лэн сар завдатко вся и мэльница или лако упруно бар. И барэ бара болдэнас и жывотни (Вт 24:6; Мк 9:42).

• Зэрноско участко.

  Када ҭан, кай о зэрно вимарэнас анда колосо и вужарэнас ла шэлухатар. Када сас ровно и круӷло площадка, сави терэнас по вучо ҭан, кай драго ԥурдэлас и балвал. Обычно о зэрно вимарэнас лэ каштэса, ай кала сас стидо бут зэрно, лэнас спецально инструменто — доски или роты. И жывотни лэн цырдэнас пала пэстэ па колосоря, савэ сас росшутэ па кадэва участко (Лв 26:5; Иса 41:15; Мф 3:12).

И

• Иаково.

  Лэ Исаакоско и ла Ревеккако шаво, савэсти ӷэт май интя о Дэл дя алав Израилё. Лэ Иаковостар жыля о израильско народо: лэстирэ 12 шавэндар жылэ 12 еря андо Израилё. Кадяжэ алав Иаково часто ԥэнэн сар лэ Израилёско дуйто алав, и во означает израильско народо, или израильтяноря (Бт 32:28; Дл 4:10; Рм 9:6; Гл 6:16).

• Иегова.

  Кадя пэ романи шыб обычно ԥэнэнпэ лэ Дэвлэско алав. Андо Нэвя люмако переводо андэ Гречески Писании лэ Иеговаско алав исин 237 разоря. Дик и Тема 04.

• Избрано.

  Жал лэ еврейсконэ алавэстар, саво ворта сыкавэл «помақло». Пэ греческо шыб када авэла «Христос» (Дан 9:25; Ин 1:41).

• Израилё.

  Алав, саво о Дэл дя лэ Иаковости. Потом кадя линэ тэ ԥэнэн пэ всаворэ лэ Иаковостирэ бэяцэ. Пэ бэяцэ, савэ жылэ лэстирэ 12 шавэндар, часто ԥэнэнас «лэ Израилёстирэ шавэ», «израильско народо» и «израильтяноря». Инке «Израилё» ԥэнэнас по северно царство, саво отделисайля лэ южнонэ царствостар. Ӷэт май интя кадэва алав линэ тэ ԥэнэн пэ избрани христианоря — пэ «лэ Дэвлэско Израилё» (Гл 6:16; Бт 32:28; Дл 4:10; Рм 9:6).

• Иллирико.

  Када римско область по северо-западо андэ Греция. О Павло ԥэндя: «Мэ росԥэнав и лащи новость... жы каринг о Илли́рико». Но амэ на ӷанас, росԥэнэнас во и лащи новость андэ кадэя область чи кати дожыля каринг латэ (Рм 15:19).

• Иродо.

  Када царско колено, савэсти о Римо дя право тэ правий андэ Иуде́я. О И́родо Пэрво Ашунгло ашунделя кодэлэса, кай строисардя о храмо андо Иерусалимо и приԥэндя тэ умарэн лэ бэятонэн андо Вифлеемо, кай тэ на ашэлпэ о Иисусо (Мф 2:16; Лк 1:5). Кала муля о И́родо Пэрво Ашунгло, дэсо анда лэско царство дорэсляпэ лэстирэ шавэнди лэ Иродости лэ Архелаёсти и лэ Иродости лэ Антипасти (Мф 2:22). О Иродо Антипа сас тетрархо, пэ саво о миро ԥэнэнас «царё». Во правияс, кала пэ ԥув терэлас и дила о Иисусо и жы каринг кодэя время, пала сави пистромэ андэ 12 ӷлава Дила (Мк 6:14—17; Лк 3:1, 19, 20; 13:31, 32; 23:6—15; Дл 4:27; 13:1, сноска). Посли лэстэ правителё ашэля о Иродо Агриппа Пэрво, саво сас внуко лэ Иродости лэ Пэрвонэсти лэ Ашунглэсти. Но во правияс найдолӷо: лэ Дэвлэско анӷело бишалдя пэр лэстэ насвалимос и во муля (Дл 12:1—6, 18—23). Лэско шаво о Иродо Агриппа Дуйто правияс жы кай  кодэя время, кала и евреёря звазглэпэ против о Римо (Дл 23:35; 25:13, 22—27; 26:1, 2, 19—32).

• Иродостирэ мануша.

  Када сас ӷрупа нацыоналисторя, савэ подритярэнас андэ палитика лэ Иродонэн, кала вонэ правинас тала Римско правительство. Дэсавэ садукеёря, файма, сас анда кадэя ӷрупа. Лэ Иродостирэ мануша доԥэнделэ лэ фарисеёнэнца тэ жан против о Иисусо (Мк 3:6).

• Иссопо.

  Када чар цынёне листонэнца, савяса сар веничкоса брызӷиинас о рат или о паи, кай тэ стерэн варисо вужо. Можэт, када сас душыца (Origanum maru; Origanum syriacum). О иссопо, пала саво ԥэнэнпэ андэ книӷа Иоанно 19:29, моӷ тэ авэл пучко душыца, саво сас приԥангло каринг о стеблё пэ растения, пэ сави ԥэнэн дурра и сави анда видо сорго обычно (Sorghum vulgare). О стеблё кай кадэя растения фартэ лунго, и важ када сас вушэро, кай тэ лэн и ӷубка, тэ тиндярэн ла андо шукло вино и тэ подындярэн каринг лэ Иисусоско муй (Евр 9:19).

• Иуда.

  Штарто лэ Иаковоско шаво, саво арақаделя лэстиря хулаятар ла Лиятар. Кала о Иаково мэрэлас, во ԥэндя, кай анда лэ Иудаско ери авэла ашунгло правителё, саво никала на мэрэла. Лэ Иудастар жыля о Иисусо. Иуда кадяжэ ԥэнэнас пэ лэ Израилёско колено, андэ саво сас лэ Иудастирэ бэяцэ (Бт 29:35; 49:10; Евр 7:14).

• Иудеёря.

  Када кодэла, ко сас анда лэ Иудаско колено, ай потом кадя ԥэнэнас пэ кодэла, ко жувэлас андо Иудейско царство (2Цр 16:6). Посли вавилонско плено алав «иудеёря» линэ тэ ԥэнэн пэ израильтяноря, савэ сас анда разни коленоря и савэ рисайлэ пэ пэстирэ краёря (Езд 4:12). Ӷэт май интя пэ израильтяноря линэ тэ ԥэнэн иудеёря, кай сразу тэ полэн, кай вонэ най анда авэр народоря (Эсф 2:5, сн.). Кала о апостало Павло ԥэнэнас алав «иудеё», во камэлас тэ сыкавэл авэр гиндо, кала пистрояс, кай андо христианско собрания о Дэл на шол сама пэ нацыя (Рм 2:28, 29, сн.; Гл 3:28).

К

• Кадилы.

  Када посуда, сави сас стерди анда сомнак, руп или харкум, и вой трэбуй сас важ и дила андэ свынто катуна и андо храмо. Андэр латэ сԥабарэнас и араматно смесь, пэ сави ԥэнэнас «фимиамо»; кадяжэ андэр латэ стидэнас о янгар па жэртвенико и оԥабардэ фитилёря (Исх 37:23; 2Лт 26:19; Евр 9:4).

• Каийпэ.

  Андэ Библия о алав «каийпэ» сыкавэл, кай лэ манушэстэ парудёл о гиндо и во хал корко пэс пала кода, сави жызня андярэлас, сави неправильно дила терэлас или пала кода, со во на стердя. Кала о мануш па чачимастэ каийпэ, када придэл лэсти зор тэ парувэл пэстири жызня (Мф 3:8; Дл 3:19; 2Пт 3:9).

• Калдуно.

  Када мануш, савэстэ исин зор лэ найвужэндар (Дл 13:6).

• Катунэнго празнико.

  Инке ԥэнэнас лэ Тэрминоско празнико или лэ Урожаёско празнико. Лэс справинас 15—21 этанимо. Кадэва празнико сыкавэлас, кай закончилась ла малятири бути, и о народо лошавэлас и блаӷодарияс лэ Иеговас, кай во дя лэнди баро урожаё. Кала жалас о празнико, о миро жувэлас андэ катуны или тала навесоря и вспоминал, сар во вижыля анда Египто. Лэ Катунэнго празнико сас ек анда трин празникоря, пэ савэ всаворэ израильски мурша трэбуй сас тэ авэн андо Иерусалимо (Лв 23:34; Езд 3:4; Ин 7:2).

• Ко́ро.

  Када мера, кай тэ измерин о весо лэ паести и лэ шукимасти, варикай 220 литроря. Виадинонас кодэлэстар, скати андэр латэ сас баторя (1Цр 5:11; Лк 16:7, сн.).

• Куй.

  Кадэлэса мериинас о лунгимос. Вой сас варикай ла куятар жы каринг о само лунго най. Обычно и израильтяноря мериинас о лунгимос ла куяса, сави сас варикай 44,5 см, но дэкала мериинас ла куяса, сави сас пэ палматэ май лунго и сас варикай 51,8 см (Бт 6:15; Мф 6:27; Лк 12:25; Тн 21:17).

• Куртенго празнико.

  Када ек анда трин ӷлавни празникоря, пэ саво всаворэ израильски мурш трэбуй сас тэ авэн андо Иерусалимо. Андэ Гречески  Писании пэр лэстэ ԥэнэнас «Панчже дэшэнго дес», или «Пятидесятница», важ кода кай кадэва празнико справинас по 50-⁠то дес посли 16 нисано, ай андэ Еврейски Писании пэр лэстэ инке ԥэнэн лэ Урожаёско празнико (Исх 23:16; 34:22; Дл 2:1, сн.).

Л

• Ладано.

  Када смола, сави исин андэ дэсавэ витки и кусторя анда видо босвеллия (Boswellia). Кала ла ԥабарэнас, латар жалас лашо запахо. О ладано шонас, кала терэнас и араматно смесь, сави трэбуй сас тэ авэл важ и дила андэ свынто катуна и андо храмо. Лэс кадяжэ стонас пэ лэ марнэстири жэртва и пэ кажно стопка свынто марно андэ Свынто комната (Исх 30:34—36; Лв 2:1; 24:7; Мф 2:11).

• Лащи новость.

  Андэ Гречески Писании када и новость пала лэ Дэвлэско Царство и пала кода, кай можно тэ спасынпэ через о Иисусо Христос (Лк 4:18, 43; Дл 5:42; Тн 14:6).

• Левиё; левиторя.

  Када лэ Иаковоско трито шаво, саво лэстэ арақаделя лэстиря хулаятар ла Лиятар; кадяжэ када о колено, пэ саво ԥэнэнас лэско алав. Лэ Левиёстирэ тринэ шавэндар жылэ трин ӷлавни ӷрупы анда левиторя. Хоть дэкала о алав «левиторя» ԥэнэнас пэ всаворэ лэ Левиёстирэ шавэ, обычно кардэ на ужанас и священикоря анда лэ Аароноско ери. Лэ Левиёстирэ колености на дорэсляпэ и пай, кала розделинас и обещано ԥув, но лэсти отделисардэ 48 фороря машкар авэр коленоря (Вт 10:8; 1Лт 6:1; Евр 7:11).

• Лепта.

  Андэ кодэя время, кала пистронас и Гречески Писании, када сас само цынёни еврейско манета анда харкум или анда бронза (Мк 12:42, сн.; Лк 21:2, сн.).

• Люма.

  Со май часто кадя можэт тэ пэрэандярдёл о греческо алав ко́смос, саво можэт тэ сыкавэл: 1) всаворэ́ манушэн, 2) лэ мироско порядко, 3) кодэлэ манушэн, савэндэ нинай дружба лэ Дэвлэса (Ин 3:16; 17:5; 1Ин 2:15—17). Алавэса «люма» кадяжэ пэрэандярдёл о греческо алав айо́н, кала и дума жал пала дила или пала особи маменторя, савэ терэнпэ андэ ек время. Кала о алав айо́н пэрэдэл кадэва гиндо, во кадяжэ пэрэандярдёл сар «щас», «англэ», «кадэя время» (Мф 12:32; Мк 10:30). И алава «кадэя люма» андэ Библия сыкавэн, со терэлпэ андэ люма, ай кадяжэ сави жызня андярэн кадэла люматирэ мануша (2Тм 4:10). Кала о Дэл стердя пэстирэ народоса лэ законоско доӷоворо, заляпэ и время (или и люма), пэ сави дэкала ԥэнэн лэ израильтянонэндири время, или лэ евреёнэндири. Через лэ Иисусостири лэ Христостири жэртва о Дэл стердя, кай тэ залэлпэ авэр время (или люма), сави сас сԥангли лэ Христостиря собранияса. Андэ кадэя время ля тэ ашэл кадя, сар сас ԥэндо андэ лэ Моисеёско законо (Мф 24:3; Мк 4:19; Рм 12:2). Кала о алав айо́н тердёл андо множэствено число, во сыкавэл разно время или разно порядко, саво сас дэлмут или авэла англэ (1Кр 2:7; 10:11). Дэкай о алав «люма» можэт тэ сыкавэл вся, со создал о Дэл, например о қам, о шон, и черӷая и ԥув (Евр 11:3).

М

• Магистраторя.

  Када барэ мануша, савэ хулаинас пэ захутилдэ области. Котэ лэндэ сас право тэ диқэн пала порядко и пала кода, сар тратинпэ и ловэ, ай кадяжэ па законо тэ сындон и тэ спушэн лэ манушэндар (Дл 16:20).

• Македония.

  Када область по северо андэ Греция, сави ашэля ашунгли, кала правияс о Александро Македонско, и пэр латэ нико на хулаияс, пока ла на захутилдэ и римляноря. И Македония сас римско область, кала о Павло пэрво разо сас андэ Европа. Во тривар сас андэ Македония (Дл 16:9).

• Мақэс.

  Ӷлавно гиндо, саво пэрэдэл о еврейско алав, — када «мақэс варисо жытко». О вулей шонас по мануш или пэ варисо авэр и кадэлэса сыкавэнас, кай када свынто или отделимэ важ и особо дила. Андэ Гречески Писании кадэва алав кадяжэ ԥэнэнпэ, кала и дума жал, кай о свынто зор дэлпэ кодэлэнди, ко сас витидо тэ жувэл по небо (Исх 28:41; 1См 16:13; Лк 4:18; Дл 10:38; 2Кр 1:21).

•  Мана.

  Када лэ израильтянонэнго постояно хамос, саво лэнди дэлас о Иегова 40 бэрш андэ пустыня. И мана кажно тэсара появияспэ пэ ԥув, кроме субота, посли кода сар прожалас и дросын. Кала пэрво разо и израильтяноря додиқлэ и мана, вонэ линэ тэ пушэн: «Со када?» — или по еврейски ман ху (Исх 16:13—15, 35). О Иисусо ԥэнэнас пала мана, кай тэ пэрэдэл авэр гиндо (Ин 6:49, 50).

• Манушэско Шаво.

  Кадя ԥэнэнпэ по Иисусо Христос андэ Евангелия варикай 80 раз. Када сыкавэл, кай о Иисусо арақаделя пэ ԥув, и сас па чачимастэ мануш, ай най просто ля пэсти манушыкани тила, сар када терэнас авэр анӷелоря. Инке кадэва алав сыкавэл, кай о Иисусо трэбуй сас тэ стерэл кадя, сар сас запистромэ андэ книӷа Даниило 7:13, 14. Андэ Еврейски Писании кадя ԥэнэн по Иезекиилё и по Даниило, и када сыкавэл, сави разница исин машкар обычни мануша, савэ пэрэдэнас и новость лэ Дэвлэстар, и машкар о Дэл, савэстар жал кадэя новость (Иез 3:17; Дан 8:17; Мф 19:28; 20:28).

• Мастеро па ӷлина.

  Или «ӷанчаро». О еврейско алав, саво пэрэандярдо сар «мастеро па ӷлина», ворта сыкавэл кодэлэс, ко вилепий или придэл форма. Кода, со о мастеро можэт тэ стерэл анда ӷлина, поможый тэ полас, со о Иегова можэт тэ стерэл анда кажно мануш или анда народо (Иса 64:8; Рм 9:21).

• Мидяноря; Мидия.

  Када народо, саво жыля лэ Мадаёстар, лэ Яфетостирэ шавэстар. Вонэ линэ тэ жувэн пэ Ирански плая и стердэ пэстири страна Мидия. И мидяноря сас андо Иерусалимо, кала жалас лэ Куртенго празнико андо 33 бэрш андэ амари эра (Дл 2:9).

• Мина.

  Андэ Гречески Писании ек мина ашэлас 100 драхмы. Лако весо сас 340 ӷ (Лк 19:13).

• Мира.

  Када араматно смола, сави вилэн анда разни калючи кусторя и анда найвуче витки, савэ анда видо коммифора (Commiphora). И мира сас андо свынто вулей, савэса мақэн. Ла шонас пэ ӥда и пэ постель, кай драго тэ қандэл, ай кадяжэ дошонас андо вулей важ о масажо и андэ касметика важ и тила. Ла зӷаминас лэ виноса, кай тэ авэл пимос, саво залярэл. Кадяжэ ласа мақэнас лэ мулэстири тила, англа кода сар тэ притидэн (Исх 30:23; Пр 7:17; Мк 15:23; Ин 19:39).

• Моӷилка.

  Кадэва алав сыкавэл лэ манушэстири моӷилка, кай во притидо; опщё моӷила важ всаворэ мануша. Май часто всаворэстар, кадя пэрэандярдёл о еврейско алав шео́л и о греческо алав ха́дес, савэстэ точно кацаво жэ гиндо. Кадэла алава сыкавэн кабута исин ҭан, кай находинпэ и мулэ, или кай вонэ нисо не моӷут тэ терэн (Бт 47:30; Эк 9:10; Мф 27:61; Дл 2:1).

• Моисеёско Законо.

  Дик ЗАКОНО.

• Молохо.

  Када дэл, савэсти тэлёнас и аммонитяноря. Возможно, када кодэва дэл, пэ саво ԥэнэн Малхамо или Милкомо (Дл 7:43).

• Мэлалимос; мэлало.

  Кадэла алава моӷут тэ сыкавэн обычно мэл или чик, ай кадяжэ, кала варико жал против лэ Дэвлэстирэ законоря. Но андэ Библия кадэла алава часто ԥэнэн каринг кода, со мэлало или найвужо па лэ Моисеёско законо (Лв 5:2; 13:45; Мф 10:1; Дл 10:14; Эф 5:5). Дик ВУЖЫМОС; ВУЖО.

• Мэримос лэ насвалимастар.

  Када любо насвалимос, саво ӥто пэрэдэлпэ, и саво можэт фартэ тэ розжалпэ и тэ анэн каринг и смэрть (Лк 21:11).

Н

• Назаретянино.

  Кадя ԥэнэнас по Иисусо, важ кода кай во вибареля андо форо Назарето. Можэт, кадэва алав жал лэ еврейсконэ алавэстар, саво сыкавэл «росточко» и пистромэ андэ Исайя 11:1. Потом «назаретяноря» кадяжэ ԥэнэнас пэ лэ Иисусостирэ ученикоря (Мф 2:23; Дл 24:5).

• Найвужэ.

  Када найлашэ анӷелоря, савэ на дицон и савэ пэбутэстэ май зоралэ лэ манушэндар. О Дэл не создал лэн, кай вонэ тэ авэн вэрыти: андэ Библия пэр лэндэ ԥэнэнпэ «лэ чачунэ Дэвлэстирэ шавэ» и «анӷелоря» (Бт 6:2; Ид 6). Кадэла анӷелоря ашэлэ лэ Дэвлэстирэ вороӷоря, важ кода кай андэ лэ Ноёстири время на канглэ лэ Дэвлэс и сԥанглэпэ лэ Сатанаса, кай тэ жан против о  Иегова (Вт 32:17; Лк 8:30; Дл 16:16; Иак 2:19).

• Найлашо.

  Кадэя звания ԥэнэнпэ по Сатана Бэнг, саво жал против о Дэл и против лэско правильно законо (Мф 6:13, сн.).

• Най наестар.

  Или «пядь». Када мера, кай тэ измерин о лунгимос; када о лунгимос машкар и ростодэ ная лэ барэ наестар жы кай о мизинцо. Если тэ адинос, кай и куй андо лунгимос сас 44,5 см, тоди вижал и пядь сас 22,2 см (Исх 28:16; 1См 17:4).

• Нардо.

  Када кучутно вулей, савэстэ сас лоло цвето; лэс вилэнас кати анда растения, пэ сави ԥэнэнпэ кадяжэ нардо (Nardostachys jatamansi). Через кода, кай о нардо сас фартэ кучутно, лэс часто розбавинас аврэ вулеенца, савэ сас най кацавэ дэ лашэ, и терэнас дажэ найчачуно нардо. Интересно, кай, сар ԥэндя о Марко и о Иоанно, лэ Иисусости по шэро и пэ пэрнэ вишутэ «вужо нардо» (Ин 12:3; Мк 14:3).

• Нисано.

  Кадя посли вавилонско плено линэ тэ ԥэнэн по авиво, по пэрво шон андо еврейско свынто календарё; андо опщё календарё када седьмо шон. Па амарятэ када епаш марто и епаш апрелё (Не 2:1). И иудейско Патради справинас андо 14 нисано, и о Иисусо Христос стодя пэстири мисяйля андэ кадэва дес (Лк 22:15, 19, 20). Андэ кадэва жэ дес лэс казнисардэ по столбо (Лк 23:44—46).

• Нэво шон.

  Када пэрво дес андэ кажно шон па еврейско календарё. Андэ кадэва дес и израильтяноря стидэнаспэ ӷуртом пала ек мисяйля, ай кадяжэ анэнас особи жэртвы лэ Дэвлэсти. Потом кадэва дес ашэля важно празнико важ вся о народо, кала и мануша на терэнас бути (Чс 10:10; 2Лт 8:13; Кл 2:16).

О

• Обещания.

  Када кала варико дэл алав лэ Дэвлэсти тэ стерэл варисо, тэ анэн жэртва или подарко, тэ залэл тэ терэл и особо дила или тэ ритярдёл май дур кодэлэстар, со на жал против законо. Кода жэ, со тэ дэс алав (Чс 6:2; Эк 5:4; Мф 5:33).

• Обрезания.

  Када кала лэ муршэнди отшынэн и крайнё мурцы. Када сас трэбуй тэ терэл о Авраамо и всаворэ, ко лэстар жыля, но и христианоря на трэбуй када тэ терэн. Кадэва алав инке ԥэнэн, кала камэн тэ пэрэдэн авэр гиндо (Бт 17:10; 1Кр 7:19; Фп 3:3).

• Оджас лэ чачимастар.

  О греческо алав апостаси́а сыкавэл «оджас; отделиспэ; зваздэспэ». Во жыля лэ алавэстар, саво ворта сыкавэл «оджас андэ риг». Андэ Гречески Писании обычно кадя ԥэнэн пэ кодэла, ко оджыля лэ чачимастар и звазгляпэ против о Дэл (Пр 11:9; Дл 21:21; 2Фс 2:3).

• Одялэ подаркоря.

  Када помощь кодэлэнди, ко попэля андэ ԥари ситуацыя. Хоть андэ Еврейски Писании ворта на ԥэнэнпэ пала «одялэ подаркоря», андэ лэ Моисеёско законо ԥэнэнаспэ, кай израильтяноря трэбуй сас тэ поможын лэ чорорэнди (Мф 6:2, сн.).

• Опара; закваска.

  Када добавка, сави шонас андо хумэр или андо паи, кай во тэ ваздэлпэ. Обычно када сас которо шукло хумэр, саво ашэляпэ аврэ заӷамимэ хумэрэстар. Андэ Библия о алав «опара» часто сыкавэл о гиндо пала бэзэх или пала варисо римомэ, ай кадяжэ сыкавэл вся, со ӥто барёл, но када на дицол (Исх 12:20; Мф 13:33; Гл 5:9).

• Особено черӷай.

  Или «тэсарутни черӷай». Када черӷай, сави послиднё лэл тэ дицол по небо, англа кода сар тэ ваздэлпэ о қам. Вой, можно тэ ԥэнэс, сыкавэл, кай залэлпэ о нэво дес. Дэкала пэ кацавэ черӷая ԥэнэн, кай вонэ появинпэ англа тэсара (2Пт 1:19; Тн 22:16).

• Особо халавдицко отрядо.

  Када отрядо анда римски халавдэ, савэн стодэ тэ фэрин лэ ӷлавнонэ римсконэ правителёс. Кай кадэва особо отрядо сас баро зор андэ палитика, саво подритярэлас лэ правителёнэн или жэ сшолас лэн па троно (Фп 1:13).

• Охранико.

  Или «сторожо». Обычно кацавэ манушэн стонас пэ лэ форостирэ стины и пэ башни, важ када вонэ моӷли тэ додиқэн, ко пашол. Андэ халавдия пэ сторожоря ԥэнэнас часови.  И пророкоря, можно тэ ԥэнэс, сас сар сторожоря важ о израильско народо, важ кода кай вонэ май данглал ԥэнэнас, кай ӥто дэла бида (Мф 27:65; 28:4).

П

• Панчже дэшэнго дес.

  Дик КУРТЕНГО ПРАЗНИКО.

• Патради.

  Кадэва празнико справинас кажно бэрш андо 14 авиво (пэ саво потом линэ тэ ԥэнэн нисано), кай тэ на бистрэн, сар и израильтяноря вижылэ анда Египто. Кай тэ справин кадэва празнико, израильтяноря трэбуй сас тэ зашынэн и тэ запрыжын лэ бакрорэс или лэ бузнорэс. Пэ кадэва празнико ханас о мас киркя зэлэняса и преснонэ марнэса (Исх 12:27; Ин 6:4; 1Кр 5:7).

• Перӷаменто.

  Када бакрани, бузняни или гурувани мурцы, сави драго вужарэнас и вишутярэнас, кай пэр латэ тэ пистрон. О перӷаменто сас май састо и май долӷо ритярдёлас, чем о папирусо, и пэр лэстэ пистронас и книӷи анда Библия. Можэт, андэ перӷаментни свиткоря, савэ о Павло мангля тэ анэн лэсти, сас дэсавэ котора анда Еврейски Писании. Анда перӷаменто сас стердэ дэсавэ свиткоря, савэ виарақлэ паша Мули моря (2Тм 4:13).

• Печать.

  Када вещь, сави ашавэлас слидо (обычно пэ ӷлина или по воско па свечка). И печать потвердияс, кай варикасти варисо прижал, сыкавэлас, кай варисо чачуно, или доԥэнэнас, кай сас стердо о доӷоворо. Андэ дэлмутни время и печать терэнас анда састо материало (бар, слоново кокали или витка), пэ саво вишынэнас наоборот и буквы или о рисунко. Инке о алав «печать» можэт тэ пэрэдэл о гиндо, кай варисости исин патяимос, кай варикасти варико или варисо прижал или кай варисо згарадо (Мф 27:66; Ин 6:27; Эф 1:13; Тн 5:1; 9:4).

• Пимастири жэртва.

  Када вино, саво вишонас по жэртвенико, ай кадяжэ саво сԥабарэнас вместе бутэ аврэ жэртвэнца. О апостало Павло сыстосардя пэс кацавэ виноса, саво роспитялпэ па жэртвенико. Кадэлэса во камля тэ сыкавэл, кай отдэл вся пэско зор важ и ԥрала и ԥэя (Чс 15:5, 7; Фп 2:17).

• Писания.

  Када свынти книӷи, савэ ужан андо Алав лэ Дэвлэстар. Када пистромэ кати андэ Христиански Гречески Писании (Лк 24:27; 2Тм 3:16).

• Полынь.

  Кадя ԥэнэн пэ чаря, савэндэ фартэ кирко вкусо и савэ фартэ қандэн. Андэ Библия ԥэнэнпэ, кай посли кода сар варико терэл билажавардимос, тасавэл пэ авэр, обжалпэ аврэнца несправедливо и оджал лэ Дэвлэстар, лэсти ашэл кадя жэ дэ киркэс, сар кадэла чарятар. Андэ Свынто тайна 8:11 о алав «полынь» сыкавэл варисо кирко и ядовито.

• Помошнико андэ собрания.

  Кадя пэрэандярдёл греческо алав диа́коносо, саво обычно сыкавэл кодэлэс, ко поможый, терэл дила. И помошникоря андэ собрания дэн зор лэ старейшынонэнди. Кай тэ терэл кадэя дила, во трэбуй тэ авэл кацаво, сар пала када пистромэ андэ Библия (1Тм 3:8—10, 12).

• Порнейа.

  Дик БИЛАЖАВАРДИМОС.

• Послидни деса.

  Кадя ԥэнэнпэ андэ Библия пэ время, кала трэбуй тэ прожан дэсавэ событии, савэ терэнпэ андэ люма (Иез 38:16; Дан 10:14; Дл 2:17). Андэ Библия май данглал можэт тэ авэл ԥэндо, кай и «послидни деса» моӷут тэ жан набут или бут время. Май ӥто всаворэстар, кадэла алава сыкавэн пэ послидни деса кадэла найлащя люмати андэ кодэя время, кала рияпэ о Иисусо (2Тм 3:1; Иак 5:3; 2Пт 3:3).

• Послидни деса кадэла люмати.

  Када время, кала пашол конец кадэла найлащя люмати, пэ сави хулай о Сатана. Кадэя время заляпэ тоди, кала рисайля о Христос. Лэ Иисусостирэ алавэстар и анӷелоря «отделина лэ найлашэн лэ лашэндар» и умарэна лэн (Мф 13:40—42, 49). Лэ Иисусостирэ ученикоря фартэ камэнас тэ уӷанэн, кала авэна и «послидни деса кадэла люмати» (Мф 24:3). Англа кода сар о Иисусо тэ рийпэ по небо, во дя алав пэстирэ учениконэнди, кай авэла лэнца, пока на поджала и время кадэла люмати (Мф 28:20).

• Посто.

  Када время, кала о мануш нисо на хал. И израильтяноря ритярэнас посто андо Примирительно дес, ай кадяжэ  кала лэндэ тердяпэ варисави бида или вонэ аштярэнас лэ Дэвлэстар помощь. И евреёря штарвар андо бэрш ритярэнас посто, кай тэ сэрэн пала бида, сави сас лэндирэ народоса. И христианоря на трэбуй тэ ритярэн о посто (Езд 8:21; Иса 58:6; Мф 4:2; 9:14; Лк 18:12; Дл 13:2, 3; 27:9).

• Правильно дила; праведно.

  Андэ Библия кадэлэ алавэнца пэрэдэлпэ о гиндо пала кода, со правильно важ о Дэл, саво ԥэнэн, со лашо, ай со най (Бт 15:6; Вт 6:25; Сф 2:3; Мф 6:33).

• Пресно марно.

  Када марно, андэ саво нинай опара (Вт 16:3; Мк 14:12; 1Кр 5:8).

• Преснонэ марнэско празнико.

  Пэрво анда трин ӷлавни празникоря, савэ прожанас кажно бэрш андо Израилё. Во залэласпэ 15 нисано, пэ авэр дес посли Патради, и жалас 7 деса. Пэ кадэва празнико и израильтяноря ханас о пресно марно и вспоминали, сар вонэ вижылэ анда Египто (Исх 23:15; Мк 14:1).

• Примирительно дес.

  Или «дес, кай тэ витинэн». Само важно свынто дес важ и израильтяноря, саво вонэ справинас 10 этанимо. Инке пэр лэстэ ԥэнэнас Йомо Киппуро (лэ еврейсконэ алавэстар йомо хаккиппури́мо, со сыкавэл «дес, саво ушаравэл»). Кати андэ кадэва дес, еқвар андо бэрш, о ӷлавно священико зажалас андэ Само свынто комната андэ свынто катуна, ай май интя андо храмо. Во зажалас интя лэ жывотнонэндирэ ратэса, савэн во анэнас важ пэстирэ бэзэха, важ аврэ левитонэндирэ бэзэха и важ лэ народостирэ бэзэха. Андэ кадэва дес о народо стидэласпэ, ай кадяжэ ритярэлас о посто. Инке во сас сар субота, дес, кала нащи сас тэ терэн нисави бути (Лв 23:27, 28; Дл 27:9; Кл 1:20; Евр 9:12).

• Примирительно крышка.

  Када крышка па сэртари важ и важни лила. Англа латэ о ӷлавно священико андо Примирительно дес брызӷиияс лэ жывотнонэнго рат, савэн сԥабарэнас сар жэртва важ о бэзэх. Алавэнца «примирительно крышка» пэрэандярдёл о еврейско алав, саво жал лэ алавэстар «тэ ушаравэс (о бэзэх)» или, можэт, «тэ стрис (о бэзэх)». И примирительно крышка и дуй херувиморя пэ латирэ краёря сас стердэ анда сомнак. Дэкала пэр латэ ԥэнэн просто крышка (Исх 25:17—22; 1Лт 28:11; Евр 9:5).

• Прозелито.

  Када мануш, саво приля нэви вера. Андэ Библия кадя ԥэнэн пэ кодэва, ко приля иудейско вера; и мурша, кай тэ ашэн прозелиторя, трэбуй сас тэ стерэн образания (Мф 23:15; Дл 13:43).

• Проказа; прокажоно.

  Када ԥаро насвалимос пэ тила. Кала андэ Библия ԥэнэнпэ алав «проказа», и дума на жал кати пала насвалимос, саво исин адес, важ кода кай кадя ԥэнэнас най кати пэ мануша, но и пэ ӥда и пэ здания. Прокажоно — када мануш, савэстэ пэ тила исин проказа (Лв 14:54, 55; Лк 5:12).

• Пропасть.

  Греческо алав а́биссос означает «фартэ ӷлыбоко; состэ нинай дно; состэ нинай краё». Кала андэ Гречески Писании тердёл кадэва алав, во пэрэдэл о гиндо пала ҭан, саво сар баруно, или кала андэ варисостэ нинай свобода. Кадяжэ кадэва греческо алав можэт тэ сыкавэл и моӷилка, но най кати ла (Лк 8:31; Рм 10:7; Тн 20:3).

• Пэрво бэято.

  Лэ дадэско барэдэр шаво (най ла дако). Андэ библейско время лэ пэрвонэ шавэсти доросэласпэ дувар май бут, чем аврэ лэстирэ ԥралэнди, и во залэлас почотно ҭан андо ери и ашэлас хулай по ери, посли кода сар мэрэлас о дад. О Иисусо най кати лэ Иеговаско барэдэр шаво, но и пэрво анда вся, со сас создано, и пэрво анда мулэ (Бт 25:33; Исх 11:5; Кл 1:15; Тн 1:5).

• Пэрво урожаё.

  Само пэрво, со стидэн пэ маля; пэрво варисостар или варикастар. О Иегова аштярэлас, кай и израильтяноря тэ отдэн лэсти «пэрво урожаё»: лэ пэрвонэ бэятонэн и жывотнонэн и само пэрво анда вся, со вибарёл. Всаворэ́ народостар и израильтяноря анэнас лэ Иеговасти само пэрво, со дя и ԥув, кала сас лэ Преснонэ марнэско празнико и лэ Куртенго празнико. Кадяжэ най ворта кадэва алав поджал каринг о Иисусо и каринг лэстирэ избрани ученикоря (Чс 15:21; Пр 3:9; 1Кр 15:23; Тн 14:4).

 Ԥ

• Ԥаро столбо.

  Кадя дэкала пэрэандярдёл греческо алав стауро́со, саво сыкавэл «прямо столбо; каш». Пэ кацаво столбо казнисардэ лэ Иисусос. Нисо на доԥэнэн, кай о алав стауро́со означает трушул, саво шолпэ пэ кода, со авэр народоря использовали андэ пэстири вера важ бут викоря жы каринг о Христос. О алав «ԥаро столбо» драго сыкавэл о гиндо, саво исин андэ кадэва греческо алав, важ кода кай кадэва алав тожэ ԥэнэн, кала и дума жал пала ԥаримос, пала бида и пала лажаимос, саво исин кай лэ Иисусостирэ ученикоря (Мф 16:24; Евр 12:2). Дик СТОЛБО.

Р

• Раё.

  Када шукарно парко или садо, саво шолпэ по парко. О Иегова создал кацаво ҭан андо Эдэмо важ и пэрви мануша. Кала о Иисусо дэлас дума лэ чордэӷареса, саво амбладёлас паша лэстэ по столбо, во дя лэсти тэ полэл, кай вся и ԥув ашэла раё. Андо 2 Коринфо 12:4, май ӥто всаворэстар, ԥэнэнпэ пала раё пэ ԥув, саво авэла англэ, ай андэ Свынто тайна 2:7 — пала раё по небо (Псн 4:13; Лк 23:43).

• Роӷо.

  Лэ жывотнонэндирэ роӷоря сас сар посуда, кай тэ шон о пимос и тэ гаравэн о вулей, инке вонэ сас сар вазы важ и чернила и важ и касметика, ай кадяжэ вонэ сас трэбуй важ и музыка и кай тэ ӷудин, кала жалас и бида (1См 16:1, 13; 1Цр 1:39; Иез 9:2). «Роӷо» часто ԥэнэнас, кай тэ пэрэдэн авэр гиндо, кала варикастэ исин баро зор или кала варико вицэлдя или победисардя (Вт 33:17; Мх 4:13; Лк 1:69).

• Роӷоря по жэртвенико.

  Када найбарэ востри састря, савэ тэрчинас пэ штар вуӷлоря по жэртвенико и шонаспэ пэ роӷоря (Лв 8:15; 1Цар 2:28; Тн 9:13).

С

• Садукеёря.

  Када ашунгли иудейско секта. Андэ кадэя секта ужанас и барвалэ и ашунглэ мануша, ай кадяжэ и священикоря, савэндэ сас баро право андо храмо. И садукеёря на ритярэнас бут традицыи, савэ на сас пистромэ андо законо, и най андэ вся лэнго гиндо зжаласпэ лэ фарисеёнэнца. Вонэ на патянас, кай исин анӷелоря и кай и мануша моӷут тэ жундён. И садукеёря жанас против о Иисусо (Мф 16:1; Дл 23:8).

• Сажэнё.

  Кадэлэса мериинас и ӷлубина. Када сас 1,8 м (Дл 27:28).

• Самаритяноря.

  Спэрва кадя ԥэнэнас пэ израильтяноря, савэ жувэнас андо северно царство. Но посли кода сар андо 740 бэрш жы кай амари эра и Ассирия захутилдя и Самария, о алав «самаритяноря» линэ тэ ԥэнэн и пэ мануша анда авэр страны, савэн интя пэрэандярдэ и ассирийцоря. Андэ лэ Иисусостири время о алав «самаритянино» май бут сыкавэлас, сави кай о мануш вера, ай най анда саво во народо или анда сави во страна. Кадя обычно ԥэнэнас пэ кодэла, ко сас анда секта, сави со май фартэ ашундёлас андо дэлмутно Шехемо и андэ Самария. Андэ дэсо кадэя секта сытярэлас совсем най кадя, сар сытярэнас андэ иудейско вера (Ин 8:48).

• Самария.

  Када форо, саво варикай 200 бэрш сас ӷлавно форо андо Израилё, андо северно царство; кадяжэ када вся и територия кадэлэ царствостири. О форо Самария сас построимэ по плай, пэ саво ԥэнэнас кадя жэ. Андэ лэ Иисусостири время и Самария сас римско область, сави сас машкар Галилея по северо и машкар Иудея по юӷо. О Иисусо на росԥэнэнас пала Дэл андэ Самария, но дэкала прожалас через латэ и дэлас дума котэ лэ манушэнца. Лэ самаритянонэнди сас дино о свынто зор, кала о Пётро ла дуйтона тияса, можно тэ ԥэнэс, ԥэрнадя лэнди о дром андо Царство (1Цр 16:24; Ин 4:7; Дл 8:14).

• Само свынто комната.

  Послиднё комната андэ свынто катуна и потом андо храмо, кай тердёлас о сэртари важ и важни лила. Па лэ Моисеёско законо андэ Само свынто комната моӷ тэ зажал кати о ӷлавно священико еқвар андо бэрш, кала жалас Примирительно дес (Исх 26:33; Лв 16:2, 17; 1Цр 6:16; Евр 9:3).

• Саранча.

  Када ек видо кузнечикоря, савэ барэ стаенца парувэн разни ҭана. Па  лэ Моисеёско законо лэн можно сас тэ хан. И барэ стаи, савэ схан вся, со лэнди попэрдёл, и нисо на ашавэн посли пэстэ, сас сар чоро насвалимос (Исх 10:14; Мф 3:4, сн.).

• Сатана.

  Када еврейско алав, саво означает «вороӷо; кодэва, ко жал против». Кала пэ кодэла шыба, пэ савэ появисайля кадэва алав, англал добавляеца ек буква (артиклё), тоди и дума жал пала Бэнг, пала лэ Дэвлэско ӷлавно вороӷо (Иов 1:6; Мф 4:10; Тн 12:9).

• Свитко.

  Када лунго листо анда перӷаменто или анда папирусо, пэ саво пистронас еқа ригатар и саво обычно заболдэнас пэ каштуни рувли. И книӷи вимэкэнас сар рулоноря андэ кодэя время, кала пистронас и Библия, важ када и библейски книӷи пистронас или пэрэпистронас пэ свиткоря (Лк 4:17—20; 2Тм 4:13).

• Свободно мануш.

  Кала правияс о Римо, «свободно мануш» ԥэнэнас пэ кодэва, кас одмэклэ анда рабство. Кала лэ рабос одмэкэнас и правителя, лэсти дэнас римско ӷражданство, но во не моӷ тэ ашэл барэ манушэса андэ страна. Ай кала лэ рабос одмэкэнас най и правителя, во ашэлас свободно, но лэстэ на сас кацаво жэ право, сар кодэлэндэ, кастэ исин ӷражданство. «Свободно» ԥэнэнас по мануш, савэстэ жы бэятостар сас право сар кодэлэстэ, кастэ исин ӷражданство, и саво никала на сас рабо (1Кр 7:22).

• Свынто.

  Када кала варико или варисо андэ вся вужо лэ найлашымастар, идеально и особо (Исх 28:36; 1См 2:2; Ин 17:11). Кала и дума жал пала мануша (Мк 6:20; Дл 3:21), пала мищимос (Рм 7:12; 11:16; 2Тм 3:15), пала ҭана (Мф 4:5; Дл 7:33; Евр 9:1) и пала дила (Исх 36:4), о еврейско алав пэрэдэл о гиндо, со отделимэ или отдино лэ свынтонэ Дэвлэсти и трэбуй кати важ лэстири дила. Андэ Гречески Писании и алава, савэ пэрэандярдён сар «свынто», кадяжэ ԥэнэн, кала и дума жал, кай варико андярэл пэс андэ вся вужэс и пэр лэстэ нинай нисави дош (2Кр 7:1; 1Пт 1:15, 16).

• Свынто зор.

  Через кадэва зор о Дэл терэл вся, со загиндой. Пэ кадэва зор ԥэнэн свынто важ кода, кай во жал лэ Иеговастар, саво само вужо и праведно, и важ кода, кай во кадэлэ зорэса терэл пэстири свынто дила, сави уӷодно лэсти (Лк 1:35; Дл 1:8).

• Свынто комната.

  Пэрво комната андэ свынто катуна или храмо, сави сас май бари, чем и Само свынто комната. Андэ пэрво комната андэ свынто катуна сас сомнакуни лампа, сомнакуно жэртвенико важ и араматно смесь и о столо важ о свынто марно. Андо храмо андэ кадэя комната тердёлас о сомнакуно жэртвенико, дэш сомнакунэ лампы и дэш столоря важ о свынто марно (Исх 26:33; Евр 9:2).

• Свынто марно.

  12 круӷли марнэ, савэ анэнас лэ Дэвлэсти и вистонас андэ дуй стопки (по шов андэ кажно) по столо андэ Свынто комната андэ свынто катуна и андо храмо. Дэкала пэр лэстэ просто ԥэнэнас марно. Кажно субота лэс парувэнас по свижо марно. О пурано марно моӷли тэ хан кати и священикоря (Исх 25:30; Лв 24:5—9; 2Лт 2:4; Мф 12:4; Евр 9:2).

• Свынто тайна.

  Кода, со о Дэл згарадя пэ дэсави время и дэл тэ ӷанэн када кати кодэлэнди, касти камэл тэ росԥэнэн (Мк 4:11; Кл 1:26).

• Свынто ҭан.

  Када ҭан, кай тэлён лэ Дэвлэсти; часто кадя ԥэнэн пэ свынто катуна или по храмо андо Иерусалимо. Инке кадя ԥэнэн по небесно ҭан, кай находийпэ о Дэл (Исх 25:8, 9; 2Цр 10:25; 1Лт 28:10; Тн 11:19, сн.).

• Священико.

  Када мурш, саво сас лэ Дэвлэско прецтавителё англа мануша и сытярэлас лэн пала Дэл и пала лэстирэ законоря. Во кадяжэ сас лэ народоско прецтавителё англа Дэл, кала анэнас и жэртвы, и зашоласпэ пала мануша. Инке сар на сас лэ Моисеёско законо, и дила, сави прижал лэ священикости, терэлас о хулай андо ери. Па лэ Моисеёско законо и священикоря трэбуй сас тэ авэн и мурша анда лэ Аароноско ери, анда лэ Левиёско колено, ай авэр левиторя тэ поможын лэнди. Кала сас  стердо о нэво доӷоворо, лэ Дэвлэско Израилё ашэля народоса анда священикоря, ай о Иисусо Христос — ӷлавно священико (Исх 28:41; Евр 9:24; Тн 5:10).

• Секта.

  Када круӷо манушэн, савэ кандэн кодэлэс, ко ӷлавно андэ лэндири вера, и па пэстирятэ полэн лэ Дэвлэс. Кадэва алав ԥэнэнаспэ пэ дуй ӷлавни ӷрупы андэ иудейско вера — фарисеёря и садукеёря. Пэ христианоря ԥэнэнас «секта» или «лэ назаретянонэндири секта», важ кода кай, можэт, гиндонас, кай вонэ вижылэ анда иудейско вера. Ӷэт май интя секты появисайлэ и андэ христианско собрания. Например, андэ книӷа Свынто тайна ԥэнэнпэ пала «лэ Николаёстири секта» (Дл 5:17, сн.; 15:5, сн.; 24:5; 28:22; Тн 2:6, сн.; 2Пт 2:1).

• Синагога.

  Кадэва алав сыкавэл «собрания; мероприятия», но май часто кадя ԥэнэн пэ здании или пэ варисавэ ҭана, кай стидэнаспэ и евреёря. Котэ вонэ адинонас и Писания, сытёнас правильно пэс тэ андярэн, дэнас дума пала Дэл и мангэнаспэ. Андэ лэ Иисусостири время и синагога сас почти андэ всаворэ найбарэ израильски фороря, ай андэ барэ фороря лэн моӷло тэ авэл май бут чем ек (Лк 4:16; Дл 13:14, 15).

• Синедрионо.

  Када Иудейско ӷлавно сындо андо Иерусалимо. Андэ лэ Иисусостири время андэ кадэва сындо сас 71 сындомаря. Машкар лэндэ сас о ӷлавно рашай, и рашая, савэ варикала сас ӷлавни, лэндирэ чаче, лэ народостирэ барэдэра, и барэдэра андэ коленоря и андэ еря, ай кадяжэ и законикоря (Мк 15:1; Дл 5:34; 23:1, 6).

• Сионо.

  Кадя ԥэнэн по форо Иевусо, саво састэс тердёлас по плай. Прожыля время, и во ля тэ прижал лэ Иерусалимости и сас по юӷо-востоко андо форо. Кала о царё Давидо победисардя лэ иевусеёнэн и захутилдя о Сионо, во стердя котэ пэско цэр. Посли када пэ кадэва ҭан линэ тэ ԥэнэн «лэ Давидоско форо» (2См 5:7, 9). Кала о Давидо пэрэандярдя по плай Сионо о свынто сэртари, важ о Иегова кадэва плай ашэля особо свынто ҭан. Ӷэт май интя Сионо кадяжэ линэ тэ ԥэнэн пэ лэ храмостири територия по плай Мориа, ай дэкала и пэ вся о Иерусалимо. Андэ Гречески Писании кадэва алав часто ԥэнэн, кай тэ сыкавэн авэр гиндо (Пс 2:6; 1Пт 2:6; Тн 14:1).

• Сирия; сирийцоря.

  Андэ Гречески Писании и Сирия сас римско область, андэ сави ӷлавно форо сас Антиохия. Вой сас почти кацави жэ, сар и кодэя Сирия (кадяжэ ԥэнэнас Арамо), пала сави пистромэ андэ Еврейски Писании. О барэдэр пэ Сирия кадяжэ хулаияс пэ вся Палестина (Лк 2:2; Дл 18:18; Гл 1:21).

• Сирто.

  Кадя ԥэнэнас пэ дуй барэ заливоря паша береӷо, кай находийпэ адесутно Тунисо и Ливия (Северно Африка). Андэ дэлмутни время и морякоря даранас лэндар, важ кода кай котэ неожыдано моӷли тэ авэн буӷроря анда чишай, савэ появинаспэ, кала авэлас и оджалас о паи (Дл 27:17).

• Собрания.

  Када ӷрупа манушэн, савэ стидэ́пэ важ варисави дила. Андэ Еврейски Писании кадэва алав ԥэнэнас пэ вся израильско народо, ай кадяжэ пэ дэсавэ мануша, савэ стидэнаспэ важ и особо дила, например пэ празникоря па лэ Дэвлэстири время или важ и мероприятии, савэ исин андэ лэндирэ традицыи. Инке «собрания» ԥэнэнас, кала стидэнаспэ андэ кодэя время, сар сас и празникоря па лэ Дэвлэстири время. Андэ Гречески Писании собрания ԥэнэн пэ отдельни лэ христианонэндирэ ӷрупы, но май часто кадя ԥэнэнпэ пэ всаворэ христианоря (1Цр 8:22; Дл 9:31; Рм 16:5).

• Соломоностири веранда.

  Андэ лэ Иисусостири время када сас садо пэ восточно риг ла баря градатири. Сас дума, кай кадэя веранда ашэляпэ анда лэ Соломоноско храмо. Ӥвэндэ пар латэ ԥирэлас о Иисусо, и котэ стидэнаспэ и пэрви христианоря, кай тэ тэлён лэ Дэвлэсти (Ин 10:22, 23; Дл 5:12).

• Сԥабарди жэртва.

  Жэртва, сави полностью сԥабарэнас по жэртвенико. О мануш, саво анэнас и жэртва (гурувэс, бакрэс, бузнэс, ӷолубка или тэрнэ ӷолубос), нисо андар латэ пэсти на ашавэлас (Исх 29:18; Лв 6:9; Мк 12:33; Евр 10:6).

•  Старейшына.

  О алав «старейшыноря» ԥэнэн пэ мурша, савэ састэ андэ вера и савэн стодэ тэ заботинпэ пала христианско собрания. Андэ Гречески Писании алавэса «старейшына» пэрэандярдён алава пресби́терос и эпи́скопос. Лэдуй кадэла алава еқэндар сыкавэн кодэлэс, ко руководий андэ христианско собрания, кати о алав пресби́терос шол сама, пэскати о мануш дэ састо андэ вера, ай о алав эпи́скопос ԥэнэн пала дила, сави лэсти динэ. Ӷлавно гиндо, саво пэрэдэл о алав эпи́скопос, — када кай кацаво мануш диқэл пала авэр, кай тэ заботийпэ пала лэндэ и тэ фэрий лэн. Кадэва алав исин андэ Дила 20:28; Филиппы 1:1; 1 Тимофеё 3:2—7; Тито 1:7; 1 Пётро 2:25 (сноска); 5:2. Ай аврэтэ, например андо 1 Тимофеё 5:17, алавэса «старейшына» пэрэандярдо греческо алав пресби́терос. Ай о алав «барэдэр» ԥэнэн по мурш, саво май ԥуро аврэндар и савэсти май бут бэрш, чем аврэнди. Но андэ Библия када кадяжэ ԥэнэн пэ муршэстэ, савэстэ исин право тэ хулаий и саво терэл бари дила машкар народо (Исх 4:29; Пр 31:23). Кадяжэ андэ книӷа Свынто тайна пэ анӷелоря ԥэнэнпэ барэдэра (Тн 4:4).

• Статуэтка.

  Статуэтка — када варикастири или варисостири чачуни изображэния или варисо вигиндомэ, через со и мануша тэ тэлён (Пс 115:4; Дл 17:16; 1Кр 10:14).

• Стоикоря.

  Кадя ԥэнэнас пэ мануша анда греческо школа важ о стоицызмо. Вонэ патянас, кай важ и бах о мануш трэбуй тэ ладий всаворэса андэ природа и тэ жувэл пэстиря годяса. Па лэндирятэ, па чачимастэ годявэрно мануш на шол сама пэ дук и на цырдэлпэ пала раимос андэ жызня (Дл 17:18).

• Столбо.

  Када каш, саво састэс тердёлас андэ ԥув. Лэс использовали дэсавэ народоря, кай тэ казнин лэ манушэн и/или кай тэ вистон лэ мулэс, савэс казнисардэ, кай авэр тэ диқэн, со лэнца можэт тэ авэл, или кай тэ лажаварэн кадэлэ манушэс. И ассирийцоря, савэ сас фартэ жэстоки, казнинас лэ манушэн, кала бэшарэнас по востро каш кадя, кай во прожалас через о ело и дожалас жы каринг о колин. Па еврейско законо лэ манушэс, саво сас дошало андо баро бэзэх, например, найпативалэс дэлас дума пала Дэл или тэлёлас лэ хохавнэ дэвлэнди, спэрва зашонас барэнца или варисар па аврятэ умарэнас, ай потом лэстири тила амблавэнас по столбо или пэ витка, кай авэр тэ диқэн, со лэнца можэт тэ авэл (Вт 21:22, 23; 2См 21:6, 9). И римляноря дэкала просто приԥандэнас лэ манушэс каринг о столбо, и через дэсавэ деса о мануш мэрэлас кодэлэстар, кай мучияспэ ла дуқатар, кай камэлас тэ пэл, лэ боқалимастар и лэ қамэстар. Андэ авэр ситуацыи, например, кала казнисардэ лэ Иисусос, лэ манушэстирэ вас и пэрнэ примарэнас каринг о столбо (Лк 24:20; Ин 19:14—16; 20:25; Дл 2:23, 36). Дик ԤАРО СТОЛБО.

• Стон и вас.

  По мануш стонас и вас, кай тэ дэн лэсти тэ терэл особо дила, тэ блаӷословин лэс, тэ исцэлин или тэ пэрэдэн лэсти о свынто зор (Чс 27:18; Дл 19:6; 1Тм 5:22).

• Субота.

  Када седьмо дес андо еврейско курко (кодэлэстар, сар зажал о қам в пятницу, жы каринг кода, сар зажал о қам в суботу). Кадэва алав жыля лэ еврейсконэ алавэстар, саво сыкавэл «отцыёс; парашэс». Пэ дэсавэ празнични деса андо бэрш, ай кадяжэ по кажно седьмо и пятидесято бэрш тожэ ԥэнэнас субота. В суботу нащи сас тэ терэн бути; кати и священикоря моӷли тэ терэн лэ Дэвлэстири дила андо свынто ҭан. Андо суботнё бэрш пэ ԥув нащи сас нисо тэ садин, ай и евреёря не моӷли тэ мангэн тэ рин лэнди о вужылимос лэ манушэндар анда лэнго народо. Вся, со сас ԥэндо андэ лэ Моисеёско законо пала субота, када сас годявэрнэс. Но через и время и барэдэра андэ вера достодэ бут со пэстар, важ када, кала о Иисусо сас пэ ԥув, тэ ритярэн и субота сас найвушэро (Исх 20:8; Лв 25:4; Лк 13:14—16; Кл 2:16).

• Сындомарицко ҭан.

  Обычно када трибуна ступенькэнца. И барэ мануша, савэ котэ бэшэнас, взвинаспэ каринг всаворэ, ко стидяпэ, и ԥэнэнас пала  пэстирэ решэнии. И алава «лэ Дэвлэско сындомарицко ҭан» и «лэ Христоско сындомарицко ҭан» на трэбуй тэ полэн ворта. Када сыкавэл, со о Иегова стердя, кай тэ сындой лэ манушэн (Рм 14:10; 2Кр 5:10; Ин 19:13).

• Сэртари важ и важни лила.

  Када ящико анда витка акацыя, саво сас опшуто сомнакаса. Во тердёлас андэ Само свынто комната андэ свынто катуна, ай ӷэт май интя андо храмо, саво стердя о Соломоно. Пэ сомнакуни крышка сас дуй сомнакунэ херувиморя, савэ бэшэнас муй муестэ. Ӷлавно, со сас андо сэртари, када дуй бара, пэ савэ сас вимардэ и дэш законоря (Вт 31:26; 1Цр 6:19; Евр 9:4).

Т

• Таланто.

  Само бари еврейско мера важ и ловэ и важ о весо; андэр лэстэ сас 34,2 кӷ. О греческо таланто сас май цынёнё — варикай 20,4 кӷ (1Лт 22:14; Мф 18:24).

• Тартаро.

  Када лажаимос важ и найкандинэ анӷелоря, саво сар баруно. Кадя лэнди стердя о Дэл андэ лэ Ноёстирэ деса. О алав тартаро́о (озн. «шос андо тартаро»), саво исин андо 2 Пётро 2:4, на сыкавэл о гиндо, кай лэ анӷелонэн, савэ стердэ бэзэх, шутэ андо вигиндомэ тартаро (тэмно ҭан и баруно тала ԥув, кай заԥандадэ и дэвла). Кадэва алав пэрэдэл о гиндо, кай о Дэл тэлярдя лэн тэлэ моса, кала одля лэндар вся и патив и заля лэндар о ҭан по небо. Лэндири годи полностью андэ тэмнота, и вонэ совсем на полэн, саво лашымос загиндосардя о Дэл. Кадяжэ англэ лэн на аштярэл нисо лашо: сар ԥэнэнпэ андэ Библия, лэн навсегда умарэна вместе лэндирэ хуласа, лэ Сатанаса. Вижал, о тартаро сыкавэл, андэ саво баро лажаимос находинпэ кадэла найлашэ анӷелоря. О тартаро и «пропасть», пала сави ԥэнэнпэ андэ Свынто тайна 20:1—3, када най ек.

• Травурно ӥда.

  Када ӷрубо материя, анда сави терэнас и гонэ, например важ о зэрно. Кацаво гоно обычно сувэнас анда тэмно бузняни шэрсть; лэс цырдэнас пэр пэстэ сар травурно ӥда (Бт 37:34; Лк 10:13).

• Травуро.

  Када кала па мануш дицол, кай во умардо бидаса. Андэ библейско время трэбуй сас варисави-то время тэ ритярэн о травуро. Инке кацавэ мануша най кати фартэ ровэнас, но и ԥиравэнас особо ӥда, шонас по шэро о прахо, росшынэнас пэр пэстэ и ӥда и марэнас пэс андо колин. Кала гаравэнас лэ мулэс, ақарэнас манушэн, савэ спецально ӷанэнас тэ ровэн (Эс 4:3; Мф 11:17; Мк 5:38; Ин 11:33; Тн 21:4).

• Троснико.

  Кадэва алав ԥэнэн пэ дэсавэ растении, савэ обычно барён андо тиндимос. Со май часто и дума жал пала розбаро троснико (Arundo donax) (Мф 27:29; Тн 11:1).

• Труба.

  Када саструно инструменто, андэ саво ԥурдэнас, кай тэ подэн сиӷнало и тэ дилабэн. О звуко ла трубатар часто исин тоди, кай жал лэ Иеговаско сындо или авэр важни мероприятии па лэ Дэвлэстири дила (1Кр 15:52; Тн 8:7—11:15).

• Тэсарутни черӷай.

  Дик ОСОБЕНО ЧЕРӶАЙ.

Ф

• Фараоно.

  Када звания кай и египецки царёря. Андэ Библия пистромэ пала панч фараоноря: Сусакимо, Со, Тиргака, Нехо и Хофра. Но андэр латэ на ԥэнэнпэ, ко правияс, кала жувэлас о Авраамо, о Моисеё и о Иосифо (Исх 15:4; Рм 9:17).

• Фарисеёря.

  Када ашунгли секта андэ иудейско вера, сави сас андо пэрво вико андэ амари эра. И фарисеёря на сас анда лэ священиконэнго колено. Вонэ андэ вся ритярэнас лэ Моисеёско законо и тасавэнас пэ мануша, кай вонэ до мелочей тэ ритярэн лэс, и стердэ пэстирэ традицыи сар законо (Мф 23:23). И фарисеёря терэнас вся, кай нисо тэ на пэрэлэн лэ греконэндар. Пэр лэндэ стонас бари патив сар пэ кодэла, ко сытярэл лэ законости и фэрий всаворэ традицыи (Мф 23:2—6). Дэсавэ андар лэндэ сас анда Ӷлавно иудейско сындо. Часто и фарисеёря споринаспэ лэ Иисусоса пала кода, сар тэ ритярэн и субота и традицыи, ай кадяжэ пала кода, сар трэбуй тэ обжанпэ лэ бэзэхэстирэ манушэнца и лэ манушэнца анда налоӷово. Дэсавэ фарисеёря ашэлэ христианоря,  например о Савло анда Тарсо (Мф 9:11; 12:14; Мк 7:5; Лк 6:2; Дл 26:5).

• Фимиамо.

  Када араматно смесь, сави стерди анда смола и мази. Кала вой полокорэс ԥабол, латар жал лашо запахо. О особо фимиамо, саво стидэнас и зӷаминас анда штар части, использовали андэ свынто катуна и андо храмо. Лэс сԥабарэнас тэсара и вечером по жэртвенико важ о фимиамо андэ Свынто комната, ай андо Примирительно дес сԥабарэнас андэ Само свынто комната. О фимиамо сыкавэл и уӷодни молитвы, савэ жан лэ Дэвлэстирэ кандинэ манушэндар. И христианоря на трэбуй тэ сԥабарэн о фимиамо (Исх 30:34, 35; Лв 16:13; Тн 5:8).

Х

• Хадес.

  Дик МОӶИЛКА.

• Халавдицко ӥда.

  Када ӥда, сави ԥиравэнас и халавдэ, и сави лэн фэрияс. Када и саструни стади, саструни жылетка, кущик, сандали и щито (1См 31:9; Эф 6:13—17).

• Халдеёря.

  Када народо, саво жувэлас паша лэна Тигро и Евфрато. Андэ пурани время о форо Уро сас само важно важ и халдеёря. Када сас чачо форо лэ Авраамоско (Дл 7:4).

• Херувиморя.

  Када анӷелоря, савэ залэн май баро ҭан и терэн особо дила. Вонэ на шонпэ пэ серафиморя (Бт 3:24; Исх 25:20; Иса 37:16; Евр 9:5).

• Храмо.

  Када здания андо Иерусалимо; во сас ӷлавно ҭан, кай и израильтяноря тэлёнас лэ Иеговасти вместо и свынто катуна, сави пэрэандярэнас. О пэрво храмо строисардя о Соломоно, ай потом лэс розмардэ и вавило́няноря. О дуйто храмо вазгля о Зорова́велё, кала о народо рисайля анда Вавилоно, ай ӷэт май интя кадэва храмо пэрэстердя о Иродо Пэрво Ашунгло. Андэ Библия часто ԥэнэн по храмо «лэ Иеговаско цэр» (Мф 21:13; Лк 11:51; 1Лт 29:1; 2Лт 2:4; Мф 24:1).

• Христианоря.

  Кадя, сар сас уӷодно лэ Дэвлэсти, линэ тэ ԥэнэн пэ кодэла, ко жыля лэ Иисусостирэ лэ Христостирэ дромэса (Дл 11:26; 26:28).

• Христос.

  Када лэ Иисусостири звания. Кадэва алав жыля анда греческо шыб, и во еқэндар лэ еврейсконэ алавэса, саво сыкавэл «избрано» (Мф 1:16; Ин 1:41).

• Христоско вороӷо.

  Кай кадэва греческо алав исин дуй гиндоря. Кадя ԥэнэн пэ кодэла, ко жал против (греч. а́нти) о Христос. Но кадэва алав можэт тэ сыкавэл и о «хохавно христос» — кодэлэс, ко залэл лэ Христоско ҭан. Лэ Христостирэ вороӷоря моӷут тэ авэн мануша, орӷанизацыи или ӷрупы, савэ хохавэн, кай вся терэн лэ Христостирэ алавэстар, и ԥэнэн пэр пэстэ избрани, или савэ жан против о Христос и против лэстирэ ученикоря (1Ин 2:22).

Ц

• Царско рувли.

  Или «скипетро». Када лэ правителёстири особо рувли, сави сыкавэл о право тэ правий (Бт 49:10; Евр 1:8).

• Царство лэ Дэвлэско.

  Само ӷлавно — кадэла алава пэрэдэн о гиндо, кай лэ Дэвлэстэ исин само баро право тэ правий пэ вся, и во кадэва право пэрэдя пэстирэ Шавэсти, лэ царёсти лэ Иисусости лэ Христости, и кодэлэнди, ко правий вместе лэса (Мф 12:28; Лк 4:43; 1Кр 15:50).

• Цэзарё.

  Кадэлэ алавэстар жыля и звания, сави ԥэнэнас пэ ӷлавни римски правителя. Андэ Библия по Августо, по Тибериё и по Клавдиё ԥэндо па алавэстэ, ай по правителё Нероно ԥэнэн кадэя звания. Андэ Гречески Писании алав «цэзарё» кадяжэ ԥэнэнпэ по правительство андэ страна (Мк 12:17; Дл 25:12).

• Цэмин важ и свобода.

  Или «выкупо». Када цэмин, кай тэ одмэкэн анда рабство, кай тэ на спушэн ни пала со, кай тэ улэн о ԥаримос, о бэзэх или дажэ варисавя дилатар. Кадэя цэмин най всегда потинэнас ловэнца (Иса 43:3). Тэ витинэн трэбуй сас андэ разни ситуацыи. Например, андо Израилё всаворэ барэдэр шаворэ, сар лэ манушэндэ, кадя и лэ жывотнонэндэ, прижанас лэ Иеговасти, и, если важ лэндэ на потинэнас и «цэмин, сави стоди»,  лэн трэбуй сас тэ отдэн лэ Дэвлэсти (Чс 3:45, 46; 18:15, 16). Если о израильтянино на следияс пала пэско гурув, саво марэлпэ, и кадэва гурув варикас умарэлас, тоди лэстирэ хулас трэбуй сас тэ умарэн или во трэбуй сас тэ потинэн и цэмин, кай тэ злэл пар пэстэ и дош (Исх 21:29, 30). Кодэлэс, ко загиндосардя и умардя варикас, нико не моӷ тэ витинэл (Чс 35:31). Андэ Библия со май бари сама шолпэ пэ цэмин, сави потиндя о Христос. Через лэстири смэрть и мануша, савэ кандэн лэ Дэвлэс, моӷут тэ ашэн свободни лэ бэзэхэстар и ла смэртятар (Пс 49:7, 8; Мф 20:28; Эф 1:7).

Ч

• Чудеса; удивительно дила.

  Кода, со сыкадёл и со терэлпэ; кода, со о мануш не можэт тэ стерэл пэстирэ зорэса и о миро гиндой, кай када терэлпэ необычнонэ зорэса. Алава «чудеса» и «удивительно дила» сыкавэн ек гиндо (Мф 11:20; Дл 4:30; Евр 2:4).

• Чукни.

  Кай и чукни, пала сави пистромэ андэ Гречески Писании, пэ краёря сас стердэ вузлоря, андэ савэ сас заԥанглэ и востри кокаля. Кацавя чукняса марэнас и шындярэнас и тила (Ин 19:1).

Ш

• Шаво лэ Давидоско.

  Часто кадя ԥэнэнас по Иисусо и кадэлэса сыкавэнас, кай лэсти, сар манушэсти анда лэ Давидоско колено, дорэсэлапэ о Царство, важ кода кай о Дэл стердя лэ Давидоса доӷоворо (Мф 12:23; 21:9).

• Шоварка.

  Када манушни, сави битинэл пэс важ и сэксуально связь. (О греческо алав по́рне, саво пэрэандярдёл «шоварка», жыля лэ алавэстар, саво означает «битинэс».) Хоть андэ Библия май часто ԥэнэнпэ, кай кадэла диласа залэнаспэ и жувля, андэр латэ кадяжэ пистромэ пала мурша, савэ терэнас кадэя дила. Андэ лэ Моисеёско законо сас пистромэ, кай нащи тэ терэн шоварицко дила, и кодэла ловэ, савэ о мануш затерэл кадэла диласа, во нащи сас тэ отдэл важ лэ Иеговастири свынто дила. И наоборот, кай авэр народоря андэ храморя, кай тэлёнас лэ хохавнэ дэвлэнди, и шоварки затерэнас ловэ (Вт 23:17, 18; 1Цр 14:24). Андэ Библия кадэва алав инке ԥэнэн, кай тэ сыкавэн авэр гиндо. Кадя ԥэнэн пэ мануша, пэ народоря и пэ орӷанизацыи, савэ тэлён лэ хохавнэ дэвлэнди, но и катэ жэ доԥэнэн, кай полэн лэ чачунэ Дэвлэс. Например, андэ книӷа Свынто тайна пала всаворэ хохавнэ веры, пэ савэ ԥэндо «Ашунгло Вавилоно», пистромэ сар пала шоварка. Вой вэдийпэ лэ правителёнэнца андэ кадэя люма, кай латэ тэ авэл право тэ хулаий и кай тэ розбарвадёл (1Лт 5:25; Тн 17:1—5; 18:3).

• Шырма.

  Када шукарни материя, пэ сави сас висувадэ и херувиморя. Вой сас андэ свынто катуна и андо храмо и розделияс машкар пэстэ и Свынто комната и Само свынто комната (Исх 26:31; 2Лт 3:14; Мф 27:51; Евр 9:3).

• Шэлуха.

  Када санёры шэлуха, сави вимарэнас, кала вужарэнас о зэрно. Вой сыкавэл варисо ненужно или состар нинай толко (Пс 1:4; Мф 3:12).

Э

• Эпикурейцоря.

  Кадя ԥэнэнас пэ кодэла мануша, савэ жувэнас кадя, сар сытярэлас о ӷрамотно мануш о Эпикуро, саво сас греко (341—270 ж. а. э.). Вонэ сытярэнас, кай само ӷлавно андэ жызня — када кай о мануш тэ раюий (Дл 17:18).

• Эфиопия.

  Када страна андэ дэлмутни время, сави сас найдур лэ Египтостар. Андэр латэ ужалас лэ адесутнэ Египтостири южно часть и лэ адесутнэ Суданостири северно часть. Дэкала Эфиопия ԥэнэн по краё, пэ саво и евреёря ԥэнэнас Кушо (Эсф 1:1).

Я

• Ягано возери.

  Кадэва ҭан, «саво марэл половняса», па чачимастэ нинай, и пэр лэстэ кадяжэ ԥэнэн «дуйто смэрть». Интя шона всаворэ́ бэзэхэстирэ манушэн, лэ Бэнгэс и дажэ и «смэрть и моӷилка» попэрэна интя. И яг не можэт тэ ԥабарэл лэ анӷелонэн, и смэрть и моӷилка, важ када можно точно тэ ԥэнас, кай о «ягано возери» сыкавэл, кай варикастар чи варисостар нисо на ашэлапэ, ай най кай варико лэла вечно тэ мучийпэ (Тн 19:20; 20:14, 15; 21:8).