So phenel e Biblia

 E Biblia phenel: “Le zhuvinde zhanen ke si te meren, numa le mule chi zhanen khanchi khanchestar” (Eclesiastés 9:5; Salmo 146:4). Pala godia kana varekon merel chi mai gindilpe ai nashtil te kerel khanchi.

“Kal pulveria si te amboldes”

 O Del phendias le pervo manusheske so sas te avel kana merela. Kana o Adan chi pakiaias o mui, o Del phendias leske: “Pulveria san ai kal pulveria si te amboldes” (Génesis 3:19). O Adan astardias te trail kana o Del kerdias les “anda le pulveria la phuviake” (Génesis 2:7). Pala godia kana mulo kerdilo pale pulveria.

 Agies si sa iek fialo. E Biblia phenel pa le manush ai le animaluria: “Savorhe aven andal pulveria ai savorhe ambolden kal pulveria” (Eclesiastés 3:19, 20).

E martia chi getol sa

 E Biblia butivar phenel ke e martia si sar iek lindri phari (Salmo 13:3; Iovano 11:11-14; Le Apostolengo 7:60). Kana iek manush sovel phares chi zhanel so si pasha leste, sa iek fialo kana iek manush merel chi zhanel khanchi khanchestar. Numa e Biblia sikavel ke o Del shai ushtiavel les ai te del les pale o traio (Job 14:13-15). Kana o Del ushtiavela le manushen kai mule, von dikhena ke e martia chi si te getol sa.