Dža ko teksto

Dža ko dujto meni

Dža ki sodržina

E Jehovaskere svedokija

romane (Makedonija)

Stražarsko kula (izdanie bašo proučibe)  |  juni 2017

Ma bistre e Jehovaskoro pravo te vladinel

Ma bistre e Jehovaskoro pravo te vladinel

Te džanen o manuša kaj samo tu, kaskoro anav tano Jehova, sian Najbaro upri celo phuv! (PS. 83:18)

GILJA: 46, 136

1, 2. a) So valjani te ovel važno sekole manušeske? b) Soske tano važno te poddržina e Jehova sar Najbaro Vladeteli?

BUTE manušenge o pare tane nešto najvažno ko životo. Ola mislinena samo ko adava sar te zarabotinen poviše pare hem sar te ikeren adala pare so isi len. A javerenge tane najvažna i familija, o sastipe ili o bukja so mangena te oven len ko životo.

2 Ama, isi nešto but považno — te dokažinel pe kaj e Jehova isi le pravo te vladinel upro sa. Nikogaš ma te bistra kobor tano važno akava. Ako na pazinaja, o bukja so keraja len sekova dive hem o problemija so isi amen šaj te len doborom but amaro vnimanie so ka bistra kobor tano važno te dokažinel pe kaj e Jehova isi le pravo te vladinel. Ako poddržinaja e Jehova sar Najbaro Vladeteli, ka šaj te ikljova ko krajo e problemencar so isi amen hem te ova popaše lea.

SOSKE TANO DOBOROM VAŽNO?

3. So vakerela o Beng bašo adava savo Vladeteli tano o Devel?

3 O Satana angja ko pučibe dali e Jehova isi le pravo  te vladinel. O Beng mangela o manuša te mislinen kaj o Jehova tano lošno Vladeteli hem kaj čhinavela lendar nešto šukar. Ov vakerela kaj o manuša ka oven pobahtale ako vladinena korkori (1. Moj. 3:1-5). Isto agjaar o Beng vakerela kaj nijekh manuš nane čače te ačhovel verno e Jehovaske hem ako arakhljovela ko but phare iskušenija, sekova manuš ka otfrlinel e Jehova sar Vladeteli (Jov 2:4, 5). Adaleske, o Jehova mukhela te nakhel vreme te šaj te dikhel pe kaj o životo bizo Devel nane le nisavi smisla.

4. Soske valjani te del pe odgovor ko pučibe dali e Devle isi le pravo te vladinel?

4 O Jehova džanela kaj adava so vakerela o Satana nane točno. Tegani, soske mukhlja te nakhel doborom but vreme te šaj o Satana probinela te dokažinel ple lafija? Adaleske so o odgovor ko e Satanaskere lafija vlijajnela upro sa o manuša hem o angelija. (Čitin Psalm 83:18.) O Adam hem i Eva otfrlingje e Jehova sar plo Vladeteli, a palo lende but javera da kergje adava. Adaleske, nesave manuša šaj te mislinen kaj o Beng tano ko pravo. Sa džikote pučena pe akava pučibe o manuša hem o angelija, našti te ovel čačutno mir hem jekhipe. Ama, keda ka dokažinel pe kaj e Jehova isi le pravo te vladinel, sekoj ka prifatinel e Jehova sar Najbaro Vladeteli ki celo večnost. Ko celo univerzum ka ovel mir (Ef. 1:9, 10).

5. Koja tani amari uloga ko pučibe bašo e Jehovaskoro pravo te vladinel?

5 E Jehovaskoro pravo te vladinel ka ovel opravdimo. Isto agjaar, ka dikhjol kaj o Satana hem o manuša našti te vladinen šukar, adaleske nane više te vladinen. O Devel uspešno ka vladinel preku o mesijansko Carstvo. Dži tegani, ka ovel dokažimo kaj o manuša šaj te poddržinen e Jehova sar Najbaro Vladeteli hem te ačhoven leske verna (Isa. 45:23, 24). Sigurno sekoj amendar mangela te ovel maškar adala verna manuša. Adaleske, nikogaš na mangaja te bistra kobor tano važno te dokažinel pe kaj e Jehova isi le pravo te vladinel.

ADAVA TANO POVAŽNO TARO AMARO SPASENIE

6. Kobor tano važno te dokažinel pe e Jehovaskoro pravo te vladinel?

6 Te dokažinel pe kaj e Jehova isi le pravo te vladinel tano but považno taro amaro bahtalipe. Ama, akava na značinela kaj e Jehovaske nane važno dali ka spasina amen ili kaj na grižinela pe amenge. Soske vakeraja akava?

Te dokažinel pe kaj e Jehova isi le pravo te vladinel tano but považno taro amaro bahtalipe hem taro adava te ova spasime

7, 8. Savi korist isi amen taro adava so ka dokažinel pe e Jehovaskoro pravo te vladinel?

7 O Jehova but mangela e manušen. Adaleske so siem leske but važna ov dengja ple čhave te šaj te živina večno (Jovan 3:16; 1. Jov. 4:9). Ako o Jehova na ikerela pe ko ple vetuvanja so dengja len amenge, o Satana hem o javera protivnikija ka oven ko pravo.  O Beng vakerela kaj o Jehova hovavela, kaj vladinela nepravedno hem garavela o šukar bukja taro manuša. Nesave protivnikija asandor vakerena: „Kaj tani leskiri prisutnost so vetingja la? Panda otkeda mule amare dada, sa o bukja ačhile ista panda taro vreme keda o Devel kergja e manušen“ (2. Pet. 3:3, 4). Ama, o Jehova ka kerel adava so vetingja. Ov ka spasinel ple verna slugen soske adava tano povrzimo leskere pravoja te vladinel. (Čitin Isaija 55:10, 11.) O Jehova vladinela mangipaja. Adaleske šaj te ova sigurna kaj ov sekogaš ka mangel hem ka ceninel ple verna slugen (2. Moj. 34:6).

8 Iako tano but važno te dokažinel pe e Jehovaskoro pravo te vladinel, adava na značinela kaj nane leske važno amen te ova spasime. O Jehova but grižinela pe amenge. Ama, valjani te na bistra koja buti tani považno hem verno te poddržina e Jehova sar Vladeteli.

SAR POČMINGJA O JOV TE DIKHEL POJAVER KO BUKJA

9. So vakergja o Satana bašo Jov? (Dikh i slika ko početok tari statija.)

9 But tano važno ispravno te dikha ko pučibe bašo e Jehovaskoro pravo te vladinel. Akava šaj te dikha taro lil bašo Jov, jekh taro prva lila so sine pišime ki Biblija. Ki late čitinaja sar o Satana vakergja kaj ako o Jov cidela but bari dukh, tegani ov ka iranel dumo e Devleske. O Satana čak rodingja taro Jehova te kerel o Jov te cidel muke. O Jehova na kergja adava, ama dozvolingja e Satanaske te ispitinel e Jove. O Devel vakergja leske: „Sa so isi le tano ko tle vasta“. (Čitin Jov 1:7-12.) Palo kratko vreme, o Jov našavgja ple slugen hem o bukja so sine le. Tegani, šungja kaj leskere deš čhave mule. O Satana kergja te dikhjol kaj akala nevolje avena taro Devel (Jov 1:13-19). Palo adava, o Satana kergja o Jov te nasvaljovel taro jekh but pharo nasvalipe (Jov 2:7). Te oven o bukja panda pološna, i romni e Joveskiri hem leskere trin hovavne amala but dukhavgje le hem obeshrabringje le ple lafencar (Jov 2:9; 3:11; 16:2).

10. a) Sar sikavgja o Jov kaj tano verno e Devleske? b) Soske valjangja o Devel te pomožinel le ispravno te dikhel ko bukja?

10 Dali adava so vakergja o Satana sine čače? Na. Iako o Jov cidingja but muke, ov nikogaš na irangja dumo e Jehovaske (Jov 27:5). Ama, nesavo vreme o Jov bistergja soj čače važno hem mislinela sine samo bašo ple problemija. Vakerela sine kaj na kergja ništo lošno hem kaj zaslužinela te džanel soske cidela asavke muke (Jov 7:20; 13:24). Šaj te haljova sar osetinela pe sine o Jov. Ama, o Jehova džanlja kaj o Jov dikhela sine pogrešno ko bukja hem adaleske pomožingja leske ispravno te dikhel ko bukja. Sar kergja adava?

11, 12. Sar o Jehova pomožingja e Joveske te dikhel ispravno ko bukja hem sar reagiringja o Jov?

11 Taro 38 dži ko 41 poglavje taro lil bašo Jov, šaj te čitina so vakergja o Jehova e Joveske. O Devel na vakergja leske soske cidela adala muke. Namesto adava, manglja te pomožinel le te haljovel kobor tano tikno ki sporedba lea. O Jehova sikavgja e Jove kaj isi bukja kola soj tane but považna taro leskere problemija. (Čitin Jov 38:18-21.) E Jehovaskere lafija  pomožingje e Joveske te dikhel ispravno ko bukja.

12 Dali o Jehova na sine obzirno e Jovea adaleske so kergja lea lafi ko asavko način palo sa o muke so cidingja? Na, ni o Jov na mislingja agjaar. Ov halilo hem ceningja o sovet so dengja le o Jehova. Čak vakergja: „Iranava palal sa so vakergjum, hem kajnava ma“ (Jov 42:1-6). Angleder adava, jekh terno manuš o Eliu isto agjaar pomožingja e Jove te dikhel ispravno ko bukja (Jov 32:5-10). Keda o Jov šungja e Jehovaskoro sovet hem počmingja ispravno te dikhel ko bukja, o Jehova sikavgja e javerenge kaj tano zadovolno adalea so o Jov ačhilo leske verno (Jov 42:7, 8).

13. Sar e Jehovaskoro sovet šaj pomožingja e Joveske keda završingje leskere muke?

13 O sovet so dobingja o Jov taro Jehova koristingja leske čak keda završingje leskere muke. O Jehova dengja but poviše bereketija e Jove palo leskere muke nego angleder so sine le. Palo nesavo vreme, ule le efta čhave hem trin čhaja (Jov 42:12-14). Iako o Jov mangela sine akale čhaven, sigurno falinena leske sine okola so mule. Hem verojatno nikogaš na bistergja sa o phare bukja so slučingje pe leske hem leskere familijake. Čak ako palo nesavo vreme o Jov halilo soske cidingja sa adala muke, šaj pučela pe sine soske o Devel dozvolingja te mučinel pe doborom but. Ako e Jove sine le asavke misle, šaj sine te setinel pe so vakergja leske o Jehova. Adava ka utešinel le sine hem ka pomožinel le te dikhel ispravno ko bukja (Ps. 94:19).

Ka setina amen li soj najvažno keda isi amen problemija? (Dikh o pasus 14)

14. So šaj te sikljova taro adava so slučingja pe e Joveske?

14 Adava so ka razmislina bašo bukja so slučingje pe e Joveske, šaj te pomožinel amen te dikha ispravno ko bukja hem te del amen uteha. O lil bašo Jov tano delo taro izveštaija so o Jehova mukhlja te oven pišime „baši amari pouka, hem isi amen nadež soske e Devleskoro lafi dela amen sila hem pomožinela amen  te izdržina“ (Rim. 15:4). Taro akava lil sikljovaja kaj na valjani doborom but te mislina ko amare problemija so ka bistra kobor tano važno te dokažinel pe e Jehovaskoro pravo te vladinel. Isto sar o Jov, amen da poddržinaja e Jehova sar Najbaro Vladeteli agjaar so ačhovaja leske verna ko phare da situacie.

15. Savo tano o rezultati keda ačhovaja verna e Jehovaske ko nevolje?

15 O iskustvo e Joveskoro utešinela amen adaleske so sikavela kaj o nevolje so isi amen na značinena kaj o Jehova tano holjamo upri amende. O nevolje dena amen prilika te poddržina e Jehova sar Najbaro Vladeteli (Izr. 27:11). Keda verno izdržinaja, radujnaja e Jehova hem amari nadež ovela pozorali. (Čitin Rimjanite 5:3-5.) E Joveskoro iskustvo sikavela kaj „o Jehova tano pherdo sočuvstvo hem milost“ (Jak. 5:11). Ako poddržinaja e Jehova sar Vladeteli, ov ka nagradinel amen. Akava pomožinela amen te izdržina, te ova strpliva hem bahtale (Kol. 1:11).

MA BISTRE SOJ NAJVAŽNO

16. Soske sekogaš valjani te setina amen ko adava kobor tano važno te dokažinel pe e Jehovaskoro pravo te vladinel?

16 Keda isi amen problemija ko životo šaj polokhe te bistra kobor tano važno te dokažinel pe kaj e Jehova isi le pravo te vladinel. Čak o tikne problemija šaj te dikhjon amenge but bare ako but mislinaja ki lende. Adaleske, sekogaš valjani te setina amen ko adava kobor tano važno te poddržina e Jehova sar Najbaro Vladeteli bizi razlika save problemija isi amen.

Keda siem zafatime e službaja, adava pomožinela amen te na bistra soj tano čače važno

17. Sar adava so ka ova zafatime ki služba e Jehovaske pomožinela amen te na bistra soj čače važno?

17 Keda siem zafatime e službaja, adava pomožinela amen te na bistra soj tano čače važno. Na primer, jekh phen so vikinela pe Rene, sine la mozočen udar, sine la stalno dukha hem  isto agjaar sine la rako. Džikote sine ki bolnica, oj propovedinela sine adalenge so kerena buti adari, e pacientenge hem okolenge so avena sine ki poseta. Jekh puti, keda i Rene ačhili dujtekvaš kurke ki bolnica, oj propovedingja 80 saatija. Adava so poddržingja e Jehova sar Najbaro Vladeteli, dengja la mir.

18. So šaj te sikljova tari Dženifer?

18 Šaj isto agjaar te poddržina e Jehova sar Najbaro Vladeteli keda isi amen potikne problemija. Jekh phen so vikinela pe Dženifer adžikergja trin dive avioni ko aerodrom te šaj te iranel pe khere. Nekobor avionska letija jekh palo jekh sine otkažime hem adaleske oj sine but umorno. Ama, namesto te mislinel samo ki pli phari situacija, oj molingja pe e Jehovaske te pomožinel la te propovedinel e manušenge so adžikerena sine ko aerodrom. Propovedingja bute manušenge hem dengja but literatura. I Dženifer vakerela: „Iako sium sine ki phari situacija, o Jehova blagoslovingja man hem dengja man sila te vakerav bašo leskoro anav“.

19. Koja tani jekh razlika maškar i čačutni hem i hovavni religija?

19 Samo e Jehovaskoro narodo haljovela kobor tano važno te dokažinel pe kaj e Jehova isi le pravo te vladinel. Akaja tani jekh razlika maškar i čačutni hem i hovavni religija. Adaleske sekoj jekh amendar valjani te del pestar sa te šaj te poddržinel e Jehova sar Najbaro Vladeteli.

20. Sar dikhela o Jehova ko sa adava so keraja te šaj poddržinaja le sar Najbaro Vladeteli?

20 O Jehova dikhela hem ceninela sa adava so keraja te šaj poddržinaja le sar Najbaro Vladeteli džikote služinaja leske verno hem izdržinaja nevolje (Ps. 18:25). Ki javer statija ka dikha soske o Jehova zaslužinela te poddržina le sar Vladeteli hem ko savo način šaj te kera adava panda poviše.