Dža ko teksto

Dža ko dujto meni

Dža ki sodržina

E Jehovaskere svedokija

romane (Makedonija)

Stražarsko kula (izdanie bašo proučibe)  |  juli 2017

Pučiba taro čitatelija

Pučiba taro čitatelija

Valjani li e Devleskere slugen te ovel len oružje, sar na primer pištoli ili puška, te šaj te zaštitinen pe taro javera manuša?

E Devleskere sluge šunena o načelija tari Biblija keda birinena sar ka zaštitinen pe hem sar ka braninen pe e javerendar. Akala načelija sikavena kaj tano pogrešno jekh sluga e Devleskoro te ovel le oružje, sar na primer pištoli ili puška, te šaj te zaštitinel pe taro javera manuša. Razmislin bašo akala bukja:

O manušikano životo tano sveto anglo Jehova. O David bašo Jehova pišingja: „Tutar avela o životo“ (Ps. 36:9). Adaleske, ako jekh sluga e Devleskoro birinela te braninel pes ili plo imot, ov valjani te kerel sa so šaj ma te ovel vinovno bašo rat, ili javere lafencar, ma te ovel krivo bašo nekaskoro meribe (5. Moj. 22:8; Ps. 51:14).

Točno i adava kaj bilo savo predmeti so ka koristinel nekoj te braninel pe, šaj te kerel le te ovel vinovno bašo rat. Ama, ako isi amen oružje polokho tano te mudara nekas, sajekh dali namerno ili nenamerno. * (Dikh i fusnota.) Isto agjaar, nekoj so napadinela amen obično tano nervozno, hem ako dikhela oružje, i situacija šaj te ovel poopasno hem nekoj šaj te merel.

Keda o Isus vakergja ple učenikonge te len pea mačija, ov na phengja adava te šaj te zaštitinen pe (Luka 22:36, 38). Namesto adava, o Isus manglja te sikavel jekh buti: Leskere učenikija na valjani te oven nasilna, čak keda protiv lende avena manuša so isi len oružje (Luka 22:52). Keda o Petar koristingja plo mači te napadinel e prvosveštenikoskere robo, o Isus phengja leske te iranel o mači ko than. Tegani o Isus vakergja jekh načelo so vodinela amen avdive da: „Sarine so lena mači protiv nekaste, taro mači ka meren“ (Mat. 26:51, 52).

Ko Mihej 4:3 vakerela kaj e Devleskoro narodo „ka kovinen pumare mačija ko plugija hem pumare kopja ko lune“. O čačutne hristijanja tane pendžarde sar manuša so mangena o mir. Ola šunena o zapovedija so dengja o Devel preku o apostol Pavle kaj na valjani nikaske te iranen lošnipaja hem te oven ko mir sa e manušencar (Rim. 12:17, 18). Iako o Pavle sine ko phare situacie, sar na primer sine „ki opasnost taro čora“, ov nikogaš na phaglja o načelija tari Biblija samo kobor te zaštitinel pe (2. Kor. 11:26). Namesto adava, sine le doverba ko Devel hem džanlja kaj o mudro sovet tari Biblija tano „pošukar tari voeno oprema“ (Prop. 9:18).

E Devleskere slugenge o životo tano but povredno taro materijalna bukja. Amen džanaja kaj e manušeskoro životo „na avela taro bukja so isi le“ (Luka 12:15). Ako probinaja šukaripaja te kera lafi jekhe čorea so isi le pištoli ko vas, ama ov na mangela te šunel amen, tegani ka kera adava so vakergja o Isus: „Ma protivinen tumen okoleske soj lošno“. Akava šaj te značinel kaj valjani te da le sa so rodela (Mat. 5:39, 40; Luka 6:29). * (Dikh i  fusnota.) Džangjola pe, najšukar tano te izbegina asavke situacie. Jekh način sar šaj te kera adava tano ako šunaja o sovet tari Biblija ma te istaknina amen e bukjencar so isi amen (1. Jov. 2:16). Isto agjaar šaj te ovel amenge zaštita ako o komšie džanena kaj siem e Jehovaskere svedokija (Izr. 18:10).

E Devleskere sluge poštujnena i sovest e javerengiri (Rim. 14:21). Nesave phralja hem phenja ka oven iznenadime, čak šaj te smetinel len, ako šungje kaj jekhe phrale isi le oružje te zaštitinel pe taro javera. Iako šaj isi amen zakonsko pravo te ovel amen oružje, amen mangaja amare phralen, adaleske nikogaš nane te kera nešto so ka spotakninel len (1. Kor. 10:32, 33; 13:4, 5).

E Devleskere sluge mangena te oven šukar primer e javerenge (2. Kor. 4:2; 1. Pet. 5:2, 3). Ako jekhe phrale isi le oružje te šaj te zaštitinel pe taro javera manuša, o starešine ka den le sovet tari Biblija. Ako odlučinela te zadržinel o oružje so isi le, tegani ov nane te ovel šukar primer. Adaleske, ka našti te ovel le odgovornostija ili zadače ko sobranie. Isto akava važinela jekhe phraleske so kerela buti kote so mora te phiravel pea oružje. Ka ovel pošukar ako trudinela pe te arakhel javer buti. * (Dikh i fusnota.)

Sekoj korkori valjani te anel odluka sar ka zaštitinel pes, ple familija, plo imot, hem kote ka kerel buti. Ama, keda anaja odluke, valjani te ovel amen ki godi o bibliska načelija. Amaro mudro Devel dengja amen akala načelija soske mangela amen. Adaleske, adala soj paše e Jehovaja birinena ma te ovel len oružje kolea so ka zaštitinen pe taro javera manuša. Ola džanena kaj, ako isi len doverba ko Devel hem ako šunena o bibliska načelija, ka oven večno bezbedna (Ps. 97:10; Izr. 1:33; 2:6, 7).

Ki bari nevolja, e Devleskere sluge ka ovel len doverba ko Jehova hem nane te probinen korkori te braninen pe

^ pas. 3 Jekh sluga e Devleskoro šaj ka odlučinel te ovel le oružje (sar na primer pištoli ili puška) te šaj te mudarel životne baši hrana ili te zaštitinel pe taro diva životne. Keda na koristinela o oružje, valjani te ikalel lestar o kuršumija, čak šaj te rasklopinel le ko delija, hem te phandel le ko sigurno than. Ko thana kote soj zabranimo te ovel nekas oružje, ili kote so i vlada ograničinela ili kontrolirinela kas šaj te ovel oružje, jekh sluga e Devleskoro valjani te ovel poslušno e zakoneske (Rim. 13:1).

^ pas. 6 Poviše informacie bašo adava sar šaj te branine tut taro silujba šaj te arakhe ko lil Mladite prašuvaat — delotvorni odgovori, tom 1, 228-234 str.

^ pas. 2 Poviše informacie baši buti kote so valjani te phiravel pe oružje šaj te čitine ki Stražarsko kula ki makedonsko čhib taro 1 noemvri 2005 berš, 31 str.