Dža ko teksto

Dža ko dujto meni

Dža ki sodržina

E Jehovaskere svedokija

romane (Makedonija)

Stražarsko kula (izdanie bašo proučibe)  |  januari 2018

„Ov dela sila okoleske soj tano umorno“

„Ov dela sila okoleske soj tano umorno“

Beršeskoro stiho bašo 2018: Okola so nadinena pe ko Jehova ka dobinen nevi sila (ISA. 40:31)

GILJA: 3, 47

1. Save problemija isi amen, ama soske o Jehova tano bahtalo? (Dikh o slike ko početok tari statija.)

O ŽIVOTO ko akava sveto nane lokho. Bute dženen amendar isi len pharo nasvalipe. A javera phralja hem phenja iako tane ko berša, grižinena pe nekaske tari pumari familija soj pophure. Nesave edvaj uspejnena te grižinen pe bašo ple familijakere osnovna potrebe. Bute dženen isi len poviše problemija taro jekh puti. Adava rodela but vreme, sila hem materijalna sredstvija. Ama, šaj te ova uverime kaj o Jehova ka pomožinel amenge. Džanaja kaj o bukja ka oven pošukar soske ov vetingja amenge adava. O Jehova but tano bahtalo adaleske so isi amen vera!

2. Sar ohrabrinela amen o Isaija 40:29, ama koja seriozno greška šaj te kera?

2 Dali nekogaš mislinea kaj tle problemija tane but phare hem našti više te izdržine? Ako osetinea tut agjaar, na sian korkori. Nesave Devleskere sluge taro purano vreme isto osetingje pe agjaar (1. Car. 19:4; Jov 7:7). So pomožingja lenge te izdržinen? Ola rodingje  sila taro Jehova. Ki Biblija pišinela kaj o Devel „dela sila okoleske soj tano umorno“ (Isa. 40:29). Žalno tano adava so nesave Devleskere sluge avdive mislinena kaj najšukar način te ikljoven ko krajo e problemencar tano nesavo vreme te na služinen e Jehovaske. Ola dikhena ki služba bašo Jehova sar teret, a na sar bereketi. Adaleske, čhinavena te čitinen i Biblija, te džan sostanokija hem ki služba. Baš adava mangela o Satana.

3. a) Sar šaj te na mukha o Satana te lel amari sila? b) Bašo so ka kera lafi ki akaja statija?

3 O Beng na mangela te ova zorale. A ov džanela kaj ovaja sa pozorale keda siem duhovno aktivna. Adaleske, keda osetinea tut fizički hem emocionalno umorno, ma cide tut taro Jehova. Ov popaše lea. Ki Biblija pišinela kaj ov ka kerel amen zorale (1. Pet. 5:10; Jak. 4:8). Ki akaja statija, taro Isaija 40:26-31 ka sikljova kaj o Jehova šaj te kerel amen zorale. Isto agjaar, ka kera lafi bašo duj situacie kola so šaj te tiknjaren amari revnost, hem ka sikljova sar o bibliska načelija šaj te pomožinen amenge te istrajna.

OKOLA SO NADINENA PE KO JEHOVA KA DOBINEN NEVI SILA

4. So šaj te sikljova taro Isaija 40:26?

O Jehova šaj te del amenge sila te istrajna ko problemija

4 Čitin Isaija 40:26. Nijekh manuš našti te gejnel sa o čerenja ko nebo. O naučnikija mislinena kaj samo ki amari galaksija šaj isi dži ko 400 milijarde čerenja. Ama, o Jehova dengja anav sekole čerenjake. So sikavela amenge akava baši leste? Ako e Jehovaske tane važna o čerenja, zamislin kobor považno sian leske tu! Tu služinea leske adaleske so mangea le, a na adaleske so mora (Ps. 19:1, 3, 14). Amaro manglo Dad džanela sa baši amende. Ki Biblija pišinela: „Tumenge čak sekoja bal taro šero tani gejmi“ (Mat. 10:30). O Jehova mangela te džana kaj ov „džanela taro so nakhena o pravedna“ (Ps. 37:18). Ov džanela sa o problemija so isi amen hem šaj te del amenge sila te istrajna.

5. Soske šaj te ova uverime kaj o Jehova šaj te del amenge sila?

5 Čitin Isaija 40:28. Taro Jehova avela sa i energija. Na primer, razmislin baši energija so dela la e Khameske. Jekh pisateli baši nauka, o Dejvid Bodanis, vakergja kaj sekoja sekunda o Kham mukhela energija koja soj tani isto sar i energija keda eksplodirinena milijarde atomska bombe. Jekh javer istražuvači računingja kaj i energija so ikljola taro kham jekhe sekundake šaj te del električno energija e manušenge ko celo sveto bašo 200 iljade berša. O Jehova, okova so dela energija e Khameske, šaj te del amenge da i sila te šaj te istrajna ko problemija.

6. Ki savi smisla e Isuseskoro jarem tano lokho hem sar adava vlijajnela upri amende?

6 Čitin Isaija 40:29. Kerela amen but bahtale adava so služinaja e Jehovaske. O Isus vakergja ple učenikonge: „Len mlo jarem upri tumende“. A palo adava vakergja: „Ka oven osvežime.  Soske, mlo jarem tano lokho te phiravel pe hem šaj te phiraven adava so rodava tumendar“ (Mat. 11:28-30). Kobor tane čačutne akala lafija! Ponekogaš, šaj siem umorna keda spreminaja amen te dža ko sostanok ili ki služba. Ama, sar osetinaja amen keda avaja amenge? Siem osvežime hem spremna te ikljova ko krajo e problemencar. O jarem e Isuseskoro čače tano lokho.

7. Vaker jekh iskustvo kova so sikavela kaj o lafija taro Matej 11:28-30 tane čačutne.

7 Razmislin bašo iskustvo jekhe phenjakoro. La isi la sindromi bašo hronično umor, depresija hem but dukhala la o šero. Adaleske, nekogaš lake but pharo te džal ko sostanokija. Jekh dive, otkeda but trudingja pe te šaj te džal ko sostanok, vakergja: „O govor kerela sine lafi bašo obeshrabruvanje. O misle sine vakerde ko jekh sočuvstvitelno hem ljubezno način hem adava but pogodingja man so čak počmingjum te rovav. Adava setinkergja man kaj tano but važno te džav ko sostanokija“. Oj sine but bahtali so trudingja pe te ovel ko adava sostanok.

8, 9. So manglja te vakerel o apostol Pavle keda pišingja: „Keda sium slabo, tegani sium silno“?

8 Čitin Isaija 40:30. Šaj isi amen but talentija, ama našti sa te kera samo amare silaja. Akava tano nešto so valjani sarine te sikljova. O apostol Pavle šaj sine te kerel but bukja, ama na sine le sila te kerel sa so manglja. Keda vakergja e Jehovaske sar osetinela pe, o Jehova vakergja leske: „Mli sila sikavela pe celosno keda sian slabo“. O Pavle halilo so manglja te vakerel leske o Jehova. Adaleske vakergja: „Keda sium slabo, tegani sium silno“ (2. Kor. 12:7-10). So manglja te vakerel adalea?

9 O Pavle halilo kaj isi bukja kola so našti te kerel len korkori ple silaja. Valjani sine leske pomoš nekastar soj but posilno. E Devleskoro sveti duh šaj sine te del le sila keda osetinela pe sine slabo. Ama, na samo adava. E Jehovaskoro sveti duh šaj sine te pomožinel e Pavleske te kerel bukja kola so nikogaš našti sine te kerel len ple silaja. Isto akava šaj te ovel amencar. Keda o Jehova dela amen plo sveti duh, ovaja posilna!

10. Sar o Jehova pomožingja e Davideske te istrajnel?

10 O psalmisti o David but puti osetingja sar e Devleskoro sveti duh dengja le sila. Ko jekh psalm ov vakergja: „Keda tu pomožinea man šaj te napadinav grupa čoren, keda pomožinela man o Devel šaj ko zido te ukljav“ (Ps. 18:29). Isto sar jekh učo zido kova so našti te uklja le, ponekogaš amare problemija tane doborom bare so našti korkori te rešina len. Valjani amenge pomoš taro Jehova.

11. Sar o sveti duh pomožinela amenge te ikljova ko krajo e problemencar?

11 Čitin Isaija 40:31. O orlo našti te ačhovel but vreme ko vozduh samo ple silaja. Ov koristinela i sila taro tato vozduh te šaj te vazdel pe upre ko nebo. Akava pomožinela leske te letinel podur hem te štedinel pli sila. Keda isi tut nesavo problemi so dikhjola tuke but baro, setin tut ko orlo. Molin e Jehova te del tut pobari sila preku „o pomošniko, o sveti duh“ (Jovan 14:26). Sekogaš, 24 saatija ko dive, šaj te roda taro Jehova te del amen plo duho. Šaj  posebno ka valjanel amenge pomoš taro Jehova keda isi amen problemi nesavi phralea ili phenjaja ko sobranie. Ama, soske šaj te avel dži ko problemi?

12, 13. a) Soske ponekogaš avela dži ko problemija maškar amende? b) So sikljovaja bašo Jehova taro životo e Josifeskoro?

12 Adaleske so siem nesovršena, šaj te avel dži ko problemija maškar amende. Ponekogaš, šaj ka nervirinel amen adava so nekoj ka vakerel ili ka kerel, ili palem, amen ka nervirina nekas. Akava šaj te ovel pharo ispit baši amari vera. Ama, adava dela amen prilika te sikava e Jehovaske kaj siem leske verna. Sar? Agjaar so ka sikljova te sorabotina ko jekhipe amare phralencar hem phenjencar. O Jehova mangela len iako tane nesovršena, adaleske amen da valjani te manga len.

O Jehova na mukhlja e Josife, hem nane ni tut te mukhel (Dikh o pasus 13)

13 O Jehova dozvolinela leskere sluge te oven ispitime. Adava šaj te dikha le taro primer e Josifeskoro. Keda o Josif sine terno, leskere phralja sine leske ljubomorna. Ola bikingje le sar robo, hem sine ingardo ko Egipet (1. Moj. 37:28). O Jehova dikhlja sa adava hem sigurno sine leske pharo keda dikhela sine kobor lošno ponašinena pe e Josifea, kova so sine leskoro amal hem verno sluga. Ama, o Jehova na čhinavgja adava. Palo nesavo vreme, keda krivingje e Josife kaj manglja te silujnel e Petefrijaskere romnja hem keda phanle le, o Jehova palem na spasingja le. Ama, dali o Jehova mukhlja le korkori? Na. I Biblija vakerela kaj o Jehova sine e Josifea hem pomožingja leske te uspejnel ko sa so kerela sine (1. Moj. 39:21-23).

14. Savi korist isi amen keda cidaja amendar i holi?

14 Javer primer tano o David. But džene nikogaš na doživingje doborom bare nepravde sar leste. Ama, o David, e Devleskoro amal, nikogaš na mukhlja te ovel pherdo holjaja. Ov pišingja: „Cide tutar o gnev hem mukh i holi, ma nervirin tut soske adava anela samo lošnipe“ (Ps. 37:8). I najvažno pričina soske na valjani te ova holjame tani adaleske so mangaja te ova sar o Jehova. Ov „na postapinela amencar sprema amare grevija“,  nego prostinela amenge (Ps. 103:10). Ama, ka oven amen javera da koristija ako cidaja i holi. Na primer, i holi šaj te kerel amenge problemija sastipaja, sar soj učo pritisok hem problemija dišibaja. Šaj te oštetinel o kalo bukho, o pankreas hem šaj te anel dži ko adava te ovel amen digestivna problemija. Isto agjaar, keda siem holjame na razmislinaja sekogaš jasno. Šaj ka vakera ili ka kera nešto so ka dukhavel e javeren hem adaleske šaj te ova ki depresija poviše vreme. But pošukar tano te ačhova smirime. I Biblija vakerela: „O mirno vilo dela životo e teloske“ (Izr. 14:30). So šaj te kera ako nesavo phral dukhavela amen hem sar šaj te smirina amen amare phralea? Ko adava šaj but te pomožinen amenge o mudra sovetija tari Biblija.

KEDA SIEM RAZOČARIME AMARE PHRALENDAR

15, 16. So valjani te kera keda nekoj ka dukhavel amen?

15 Čitin Efešanite 4:26. Na siem iznenadime keda o manuša so na služinena e Jehovaske ponašinena pe amencar lošno. Ama, keda nesavo phral, phen ili nekoj tari familija ka vakerel ili ka kerel nešto kolea so ka dukhavel amen, adava šaj but te razočarinel amen. So ako našti te bistra adava so slučingja pe amenge? Dali ka ova holjame poviše vreme, šaj čak beršencar? Ili ka šuna o mudro sovet tari Biblija sigate te rešina o problemija maškar amende? Kobor poviše adžikeraja te kera lafi e phralea ili e phenjaja bašo problemi, doborom popharo ka ovel amenge te smirina amen lea ili laja.

16 So ako nesavo phral dukhavgja tut hem našti te čhinave te razmisline bašo adava? So šaj te kere te ove ko mir e phralea? Prvo, molin tut e Jehovaske. Molin le te pomožinel tuke te keren lafi e phralea ko jekh šukar način. Ma bistre kaj tlo phral da tano amal e Jehovaja (Ps. 25:14). O Devel le da mangela le. O Jehova postapinela šukar ple amalencar hem ov adžikerela amen da te kera adava (Izr. 15:23; Mat. 7:12; Kol. 4:6). Dujto, šukar razmislin so ka vakere tle phraleske. Ma mislin kaj ov manglja te dukhavel tut. Šaj sine greška ili pogrešno haliljan i situacija. Ov spremno te priznajne kaj tu da šaj angjan dži ko adava te ovel problemi. Šaj te počmine te kere lafi agjaar so ka vakere leske: „Šaj sium previše čuvstvitelno, ama keda kergjan mancar erati lafi osetingjum man...“ Ako adava so kergjen lafi na pomožingja te smirinen tumen, probin te kere lafi ki javer prilika. Molin tut bašo tlo phral. Molin e Jehova te del le bereketi hem te pomožinel tuke te koncentririne tut ko leskere šukar osobine. Ov uverimo kaj o Jehova ka ovel zadovolno tuja keda trudinea tut te ove ko mir tle phralea, kova soj tano leskoro amal.

KEDA OSETINAJA AMEN KRIVA BAŠO BUKJA SO KERGJEM ANGLEDER

17. Sar pomožinela amenge o Jehova te ova lea palem paše keda ka kera seriozno grevo hem soske valjani te prifatina adaja pomoš?

17 Nesave mislinena kaj na zaslužinena te služinen e Jehovaske adaleske so kergje seriozno grevo. O čuvstvo kaj siem kriva šaj te lel amaro mir, bahtalipe hem sila. O David  kova so borinela pe sine asavke čuvstvoja, vakergja: „Keda čutinava sine, mle kokala šukile tari bari dukh so osetinava la sine po celo dive. Soske dive hem rat tlo vas mečinela man sine“. Ama, e Davide sine le hrabrost te kerel adava so o Jehova adžikerela taro ple sluge. Ov pišingja: „Ko krajo priznajngjum mlo grevo... Hem tu prostingjan mli greška, mle grevija“ (Ps. 32:3-5). Ako kergjan seriozno grevo, o Jehova tano spremno te prostinel tuke. Ov mangela te pomožinel tuke te ove lea palem paše. Ama, tu valjani te prifatine i pomoš koja so dela tut preku o starešine (Izr. 24:16; Jak. 5:13-15). Adaleske, ma adžiker! Tlo večno životo zavisinela taro adava. Ama, so valjani te kere ako ponadari da osetinea tut krivo iako o Jehova prostingja tuke?

18. Sar šaj o primer e Pavleskoro te pomožinel okolenge so mislinena kaj na zaslužinena te služinen e Jehovaske?

18 O apostol Pavle ponekogaš osetinela pe sine obeshrabrimo bašo grevija so kergja len angleder. Ov vakergja: „Me sium najtikno taro apostolija hem na zaslužinava te ovav vikimo apostoli, soske me progoninava sine e Devleskoro sobranie“. Ov isto agjaar vakergja: „Ama, o Devel sikavgja mange šukaripe so na zaslužinava le hem adaleske sium apostoli“ (1. Kor. 15:9, 10). O Jehova džanlja kaj o Pavle tano nesovršeno. Ov prifatingja e Pavle iako kergja lošna bukja angleder hem o Jehova manglja o Pavle te džanel kaj prifatingja le. Ako iskreno kainea tut bašo grevija so kergjan len angleder hem priznajngjan len anglo Jehova hem ako valjangja čak anglo starešine da, o Jehova sigurno ka prostinel tuke. Ov uverimo kaj o Jehova prostingja tuke hem prifatin adava! (Isa. 55:6, 7).

19. Kova tano e beršeskoro stiho bašo 2018 berš hem soske odgovorinela?

19 Sar so avaja popaše dži ko krajo taro akava sveto, šaj te adžikera kaj ka oven amen poviše problemija. Ama, nikogaš na valjani te bistra kaj o Jehova, kova so „dela sila okoleske soj tano umorno hem bari sila okoleske so nane le“ šaj te del amen sa so valjani te šaj ponadari da verno te služina leske (Isa. 40:29; Ps. 55:22; 68:19). Ko 2018 berš, ka setina amen ko akava važno čačipe sekogaš keda ka dža ko amare sostanokija hem ka dikha o lafija taro e beršeskoro stiho: „Okola so nadinena pe ko Jehova ka dobinen nevi sila“ (Isa. 40:31).