Dža ko teksto

Dža ko dujto meni

Dža ki sodržina

E Jehovaskere svedokija

romane (Makedonija)

Stražarsko kula (izdanie bašo proučibe)  |  januari 2017

„Neka ovel tut doverba ko Jehova hem ker adava soj šukar“

„Neka ovel tut doverba ko Jehova hem ker adava soj šukar“

Neka ovel tut doverba ko Jehova hem ker adava soj šukar... hem postapin verno (PS. 37:3)

GILJA: 133, 63

1. Save sposobnostija dengja o Jehova e manušen?

KEDA o Jehova kergja e manušen, dengja len posebna sposobnostija. Dengja amen sposobnost te razmislina, a adava pomožinela amen te rešina o problemija hem te kera planija baši idnina (Izr. 2:11). Dengja amen sila, te šaj te kera adava so planiringjem hem te ispolnina amare celija (Fil. 2:13). Isto agjaar dengja amen sovest, adava tano čuvstvo andre ki amende kova so pomožinela amenge te razlikujna soj tano ispravno a soj pogrešno. I sovest pomožinela amen te na grešina hem te poprajna amare greške (Rim. 2:15).

2. Sar mangela o Jehova te koristina amare sposobnostija?

2 O Jehova mangela te koristina amare sposobnostija ko šukar način. Soske? Adaleske so mangela amen hem  džanela kaj ka ova bahtale keda ka koristina o poklonija so dengja amen. Na primer, ko Hebrejska spisija, pišinela: „O planija e bukjarne manušeskere sigurno anena korist“ hem „sa so ka avel tuke ko vas te kere, ker le celo silaja“ (Izr. 21:5; Prop. 9:10). Ko Grčka spisija, pišinela: „Sa džikote isi amen prilika, te kera šukaripe sarinenge“ hem „služinen jekh jekheske sekoj e poklonea so dobingja le“ (Gal. 6:10; 1. Pet. 4:10). Akava sikavela kaj o Jehova mangela te koristina o sposobnostija bašo amaro hem e javerengoro šukaripe.

3. Save ograničuvanja isi e manušen?

3 O Jehova mangela te koristina amare sposobnostija, ama džanela kaj siem ograničime. Na primer, našti te cida i nesovršenost, o grevo hem o meribe (1. Car. 8:46). Isto agjaar, našti te kontrolirina javere manušen, soske sekas isi pravo korkori te odlučinel so ka kerel. Hem bizi razlika kobor džanaja ili kobor iskustvo isi amen, nikogaš nane te džana poviše taro Jehova ili te ova poiskusna lestar (Isa. 55:9).

Keda isi tut problemija, „neka ovel tut doverba ko Jehova hem ker adava soj šukar“

4. Bašo so ka kera lafi ki akaja statija?

4 Valjani sekogaš te mukha o Jehova te vodinel amen, te ovel amen doverba kaj ka pomožinel amen hem kaj ka kerel adava so amen našti te kera. Ama, o Jehova isto agjaar adžikerela amendar te razmislina sar šaj te rešina o problemija hem sar te pomožina e javerenge. (Čitin Psalm 37:3.) Valjani te ovel amen doverba ko Jehova hem te kera adava soj šukar. Isto agjaar, valjani te postapina verno.  Sar šaj te kera akava? Te dikha o primer e Noeskoro, e Davideskoro hem javere verna slugengoro kola so sine len doverba ko Jehova. Ka dikha kaj nesave bukja našti sine te keren len, ama ola koncentriringje pe ko bukja so šaj sine te keren len.

KEDA ISI BUT LOŠNIPE

5. Ki savi situacija sine o Noe?

5 O Noe živingja ko sveto kova so sine „pherdo nasilstvo“ hem nemoral (1. Moj. 6:4, 9-13). Iako džanela sine kaj o Jehova ka uništinel o lošno sveto, o Noe sigurno sine voznemirimo taro adava so kerena sine o manuša. Ov halilo kaj nesave bukja našti sine te kerel len, ama isto agjaar halilo kaj nesave bukja šaj te kerel len.

Na šunena keda propovedinaja (Dikh o pasusija 6-9)

6, 7. a) So našti sine te kerel o Noe? b) Sar amen da siem ki slično situacija sar o Noe?

6 So našti sine te kerel o Noe: O Noe verno propovedinela sine, vakerela sine e manušenge so ka kerel o Jehova. Ama ov našti sine te čhivel silaja e manušen te šunen le hem te kerel o Potop te avel posigate. E Noe valjangja te ovel le doverba kaj o Jehova ka ispolninel plo vetuvanje te čhinavel o lošnipa, hem kaj adava ka kerel le ko pravo vreme (1. Moj. 6:17).

7 Amen da živinaja ko sveto kova soj pherdo lošnipaja, hem džanaja kaj o Jehova ka uništinel le (1. Jov. 2:17). Isto agjaar, našti silaja te čhiva e manušen te prifatinen „o šukar haberi bašo Carstvo“. Hem našti te kera posigate te avel i „bari nevolja“  (Mat. 24:14, 21). Isto sar o Noe, valjani te ovel amen silno vera hem doverba kaj o Jehova panda hari ka čhivel krajo e lošnipaske (Ps. 37:10, 11). Amen siem uverime kaj o Jehova nane te mukhel akava lošno sveto te prodolžinel čak nijekh dive poviše taro adava kobor so valjani (Avak. 2:3).

Isto sar o Noe, valjani te ovel amen silno vera hem doverba kaj o Jehova panda hari ka čhivel krajo e lošnipaske

8. Ko so koncentriringja pe o Noe? (Dikh i slika ko početok tari statija.)

8 So šaj sine te kerel o Noe: Namesto te otkažinel pe adaleske so našti sine te kerel nesave bukja, ov koncentriringja pe ko bukja so šaj te kerel len. O Noe verno propovedinela sine kaj o Jehova ka uništinel adava sveto (2. Pet. 2:5). Agjaar, leskiri vera ačhili zorali. Ov isto agjaar šunela sine o upatstvija so dengja le o Jehova sar te gradinel i arka. (Čitin Evreite 11:7.)

9. Sar šaj te ova sar o Noe?

9 Isto sar o Noe, amen siem zafatime „ki buti e Gospodareske“ (1. Kor. 15:58). Na primer, šaj pomožinaja keda gradinena pe hem održinena pe amare dvorane hem o Kongresna sale, pomožinaja ko kongresija, ki podružnica ili ki kancelarija prevedibaske. Soj najvažno, siem zafatime e propovedibaja, kova so kerela amari nadež baši idnina pozorali. Jekh verno phen vakergja kaj keda kerela lafi e javerencar bašo bereketija taro e Devleskoro Carstvo, oj dikhela kaj e manušen nane len nisavi nadež hem mislinena kaj lengere problemija nikogaš nane te rešinen pe. Tari javer strana, amen isi amen nadež hem oj ovela pozorali keda keraja lafi e javerencar baši late. Akaja nadež pomožinela amen te ačhova ki trka bašo životo! (1. Kor. 9:24).

KEDA GREŠINAJA

10. Objasnin e Davideskiri situacija.

10 O David sine verno manuš hem o Jehova mangela le sine but (Dela 13:22). Ama, o David kergja nemoral e Vitsaveaja, adava sine baro grevo. Soj panda pološno, ov manglja te garavel plo grevo adalea so kergja plani e Vitsaveakoro rom o Urija te ovel mudardo ki vojna. O David čak dengja e Urijaske te ingarel o pismo kote so pišinela sine sar valjani te merel! (2. Sam. 11:1-21). Palo nesavo vreme, e Davideskere grevija sine otkrijme (Mar. 4:22). Sar reagiringja o David keda slučingja pe adava?

Purane grevija (Dikh o pasusija 11-14)

11, 12. a) Otkeda grešingja, so našti sine te kerel o David? b) So ka kerel o Jehova amenge ako kajnaja amen?

11 So našti sine te kerel o David: O David našti sine te iranel o vreme palal. Ov trpingja o posledice taro grevo so kergja le sa dži ko krajo taro plo životo (2. Sam. 12:10-12, 14). Adaleske, valjangja leske vera. Valjani sine te ovel le doverba kaj ako čače kajngja pe, tegani o Jehova ka prostinel leske hem ka pomožinel le te izdržinel o posledice taro ple postapke.

 12 Sarine amen grešinaja, adaleske so siem nesovršena. Nesave greške tane pobare taro javera hem isi greške so našti te popravina len. Amen da šaj ka valjani te trpina o posledice taro amare postapke (Gal. 6:7). Ama, isi amen doverba ko e Devleskere lafija kaj ako kajnaja amen, ov ka pomožinel amenge ko phare situacie, čak keda bašo adava siem korkori kriva. (Čitin Isaija 1:18, 19; Dela 3:19.)

13. Sar o David palem ulo paše e Jehovaja?

13 So šaj sine te kerel o David: O David manglja palem te ovel paše e Devlea. Adaleske ov mukhlja o Jehova te pomožinel le. Na primer, prifatingja o ukor taro proroko o Natan (2. Sam. 12:13). O David isto agjaar molingja pe e Jehovaske hem priznajngja ple grevija, a adalea sikavgja kaj čače mangela palem te ovel odobrimo taro Jehova (Ps. 51:1-17). Iako sine leske but pharo so grešingja, ov na dozvolingja adava te peravel le nego siklilo taro ple greške. Ov nikogaš palem na kergja asavke bare greške. Palo but berša, mulo sar verno manuš hem o Jehova sar asavko pamtinela le (Evr. 11:32-34).

14. So šaj te sikljova taro primer e Davideskoro?

14 So šaj te sikljova taro primer e Davideskoro? Ako kergjem baro grevo, valjani iskreno te kajna amen, te priznajna amaro grevo e Jehovaske, hem te roda lestar te prostinel amenge (1. Jov. 1:9). Isto agjaar, valjani te vakera e starešinenge, soske ola šaj te pomožinen amen palem te ova paše e Jehovaja. (Čitin Jakov 5:14-16.) Keda prifatinaja pomoš taro Jehova, sikavaja kaj isi amen doverba ko leskoro vetuvanje kaj ka prostinel amenge. Isto agjaar, valjani te sikljova taro amare greške hem ponadari da te ovel amen doverba džikote služinaja e Jehovaske (Evr. 12:12, 13).

KO JAVERA SITUACIE

Problemija sastipaja (Dikh o pasus 15)

15. So sikljovaja taro primer e Anakoro?

15 Šaj setinea tut ko javera da verna sluge tari Biblija kola so sine len doverba ko Jehova džikote kergje sa so šaj keda sine ko phare situacie. Na primer, nesavo vreme e Ana našti sine te oven la čhave. Oj našti sine te meninel i situacija. Ama, sine la doverba kaj o Jehova ka utešinel la. Adaleske, oj ponadari da džala sine ko sveto šatori hem ki molitva vakerela sine e Jehovaske sar osetinela pe (1. Sam. 1:9-11). Kobor šukar primer tani oj amenge! Keda isi amen problemija e sastipaja ili siem ki javer situacija so našti te menina la, amen mukhaja amare griže e Jehovaske hem isi amen doverba kaj ov grižinela pe amenge (1. Pet. 5:6, 7). Isto agjaar, keraja sa so šaj te ovel amen pobari korist taro sostanokija hem taro sa javer so dela amen e Jehovaskiri organizacija (Evr. 10:24, 25).

E Ana sine la doverba ko Jehova, adaleske oj ponadari da džala sine ko sveto šatori hem molinela pe sine

Čhave so čhinavgje te služinen e Jehovaske (Dikh o pasus 16)

16. So šaj te sikljoven o roditelija taro Samoil?

 16 Sar tano e roditelencar kola so lengere čhave čhinavgje te služinen e Jehovaske? O proroko o Samoil našti sine silaja te terinel ple vozrasna čhaven te ačhoven verna e Jehovaske (1. Sam. 8:1-3). Ov valjani sine te mukhel o bukja e Jehovaske ko vasta. Ama, o Samoil kergja sa so šaj te ačhovel verno e Devleske hem te kerel leskiri volja (Izr. 27:11). Avdive, but roditelija so služinena e Jehovaske tane ki slično situacija. Isto sar o dad tari sporedba e Isuseskiri bašo neposlušno čhavo, len isi len doverba kaj o Jehova tano sekogaš spremno te priminel adalen so kajnena pe (Luka 15:20). Sa dži tegani, o roditelija šaj te koncentririnen pe te ačhoven verna e Jehovaske hem te nadinen pe kaj lengoro primer ka pottikninel e čhaven palem te iranen pe ko Jehova.

Finansiska problemija (Dikh o pasus 17)

17. Soske o primer e čorole udovicakoro ohrabrinela amen?

17 Javer šukar primer tani i čoroli udovica taro e Isuseskoro vreme. (Čitin Luka 21:1-4.) Oj našti sine te meninel adava so ko hrami sine korupcija, hem našti sine te meninel adava soj čoroli (Mat. 21:12, 13). Ama, lakiri doverba ko Jehova pottikningja la te poddržinel o čačutno obožavanje. Oj sine darežlivo hem dengja „duj tikne pare“, a adava sine sa so sine la. Adaja verno džuvli sikavgja celosno doverba ko Jehova. Oj džanlja kaj ako čhivela i služba e Jehovaske ko prvo than, ov ka grižinel pe te ovel la sa so valjani lake. Slično sar late, amen da isi amen doverba kaj ako čhivaja e Devleskoro Carstvo ko prvo than, o Jehova ka grižinel pe te ovel amen sa so valjani amenge (Mat. 6:33).

18. Vaker primer taro jekh phral kova so sine le ispravno stavi.

18 But amare phralja hem phenja avdive sikavena slično doverba ko Jehova adalea so koncentririnena pe ko adava so šaj te keren, a na ko adava so našti. Razmislin bašo jekh phral so vikinela pe Malkolm, kova so ačhilo verno sa džikote na mulo ko 2015 berš. But berša ov hem leskiri romni služingje e Jehovaske. Ko adala berša sine len hem šukar hem phare momentija ko životo. Ov vakergja: „Nekogaš, o životo tano nepredvidlivo, nesigurno hem čak pharo te ikljove lea ko krajo. Ama o Jehova dela bereketi adalen so isi len doverba ki leste“. Savo sovet dengja o Malkolm? Ov phengja: „Molin e Jehova te pomožinel tut te de o najšukar ki služba. Koncentririn tut ko adava so šaj te kere, a na ko adava so našti“. * (Dikh i fusnota.)

19. a) Soske but šukar odgovorinela akale beršeskoro stiho? b) Sar ka primenine e beršeskoro stiho ko tlo životo?

19 Akava lošno sveto džala „taro lošno ko pološno“ hem adaleske šaj te adžikera kaj ka ovel amenge sa popharo hem popharo (2. Tim. 3:1, 13). Akana tano najvažno te na dozvolina te peraven amen amare problemija. Namesto adava, valjani te ovel amen bari doverba ko Jehova hem te koncentririna amen ko adava so šaj te kera. Adaleske, akale beršeskoro stiho but šukar odgovorinela: „Neka ovel tut doverba ko Jehova hem ker adava soj šukar“ (Ps. 37:3).

Beršeskoro stiho bašo 2017: Neka ovel tut doverba ko Jehova hem ker adava soj šukar (Psalm 37:3)

^ pas. 18 Dikh i Stražarska kula, 15 oktomvri 2013 berš, 17-20 strana.