Dža ko teksto

Dža ko dujto meni

Dža ki sodržina

E Jehovaskere svedokija

romane (Makedonija)

Stražarsko kula (izdanie bašo proučibe)  |  fevruari 2017

I otkupnina — „sovršeno poklon“ taro amaro Dad

I otkupnina — „sovršeno poklon“ taro amaro Dad

Sekova šukar hem sovršeno poklon avela taro Dad (JAK. 1:17)

GILJA: 148, 109

1. Kola šukar bukja šaj te oven amen preku i otkupnina?

I OTKUPNO žrtva e Isuseskiri anela but bereketija. Na primer, oj phravela o udar sa e Adameskere čhavenge so mangena i pravednost, jekh dive te oven delo tari e Devleskiri familija. Preku i otkupnina ka šaj te živina večno hem te ova bahtale. Isto agjaar, oj tani povrzimi bukjencar kola soj tane but važna sarinenge ko nebo hem ki Phuv (Evr. 1:8, 9).

2. a) Kola važna bukja vakergja o Isus ki molitva? (Dikh i slika ko početok tari statija.) b) So ka dikha ki akaja statija?

2 Otprilika duj berš angleder te merel, o Isus sikavgja ple učenikon te molinen pe: „Amaro Dad so sian ko nebo, te slavinel pe tlo sveto anav. Te avel tlo Carstvo. Te ovel tli volja, sar ko nebo agjaar ki phuv“ (Mat. 6:9, 10). Te dikha sar i otkupnina tani povrzimi adalea te slavinel pe e Jehovaskoro sveto anav, te vladinel e Devleskoro Carstvo, hem te kerel pe e Devleskiri volja.

 „TE SLAVINEL PE TLO SVETO ANAV“

3. So pretstavinela e Jehovaskoro anav? Sar o Satana kaljargja e Jehovaskoro sveto anav?

3 Ki molitva o Isus prvo spomningja te slavinel pe e Devleskoro sveto anav. Leskoro anav, Jehova, pretstavinela koj tano ov hem savo tano. Ov tano pravedno hem isi le najbari mokj ko celo univerzum. Isto agjaar, o Isus vakergja baši leste kaj tano „Sveto Dad“ (Jovan 17:11). Adaleske so o Jehova tano sveto, sa leskere postapke hem o zakonija so dela tane sveta. Ama, ki rajsko gradina o Satana kergja te izgledinel kaj e Devle nane le pravo te del zakonija e manušenge. Ov vakergja hovavne bukja bašo Jehova, hem adalea kaljargja e Jehovaskoro sveto anav (1. Moj. 3:1-5).

4. So kerela sine o Isus te šaj te slavinel e Devleskoro sveto anav?

4 O Isus čače mangela sine e Jehovaskoro anav hem dengja sa pestar te šaj te slavinel le (Jovan 17:25, 26). Ple postapkencar hem e propovedibaja ov pomožingja e javerengje te haljoven kaj o zakonija e Jehovaskere tane pravedna hem kaj sa so rodela amendar tano bašo amaro šukaripe. (Čitin Psalm 40:8-10.) Ov ačhilo verno e Devleske čak keda o Satana kergja but te cidel muke hem te merel bare dukhencar. Agjaar sikavgja kaj jekh sovršeno manuš šaj te ovel poslušno ko sa e Jehovaske.

5. Sar šaj te slavina e Jehovaskoro sveto anav?

5 Sar šaj amen da te sikava kaj mangaja e Jehovaskoro anav? Amare postapkencar. O Jehova rodela amendar te ova sveta. (Čitin 1. Petrovo 1:15, 16.) Akava značinela te služina samo leske hem te ova leske poslušna taro vilo. Čak keda siem progonime daja sa amendar te šaj te živina agjaar sar so sikavela amen o Jehova. Adalea so ikeraja amen ko leskere zakonija, keraja te slavinel pe leskoro anav (Mat. 5:14-16). Isto agjaar, sikavaja kaj e Jehovaskere zakonija tane šukar, a o Satana tano hovavno. Tari javer strana, amen na siem sovršena hem adaleske grešinaja. Ama keda grešinaja, iskreno kajnaja amen hem trudinaja amen te na kera više o bukja so anena ladž e Jehovaskere anaveske (Ps. 79:9).

6. Soske šaj o Jehova te vakerel kaj siem pravedna iako siem nesovršena?

6 Preku i otkupnina o Jehova prostinela o grevija adalengere so sikavena vera. Sarine so dena lafi e Devleske kaj ka služinen leske ovena leskere sluge. Bašo pomazanikija vakerela kaj tane pravedna hem prifatinela len sar ple čhave. A bašo „javera bakhre“ vakerela kaj tane pravedna hem prifatinela len sar ple amala (Jovan 10:16; Rim. 5:1, 2; Jak. 2:21-25). Adaleske, panda akana preku i otkupnina šaj te ova paše amare Dadea hem te slavina leskoro sveto anav.

„TE AVEL TLO CARSTVO“

7. Kola bereketija šaj te oven amen preku i otkupnina?

7 Ki molitva o Isus vakergja: „Te avel tlo Carstvo“. Sar i otkupnina tani povrzimi e Devleskere Carstvoja? Ko akava Carstvo, ili vlada, ka oven o Isus hem 144.000 manuša birime tari Phuv. Preku i otkupnina akala manuša šaj te oven voskresnime ko nebo (Otk. 5:9, 10; 14:1). Ola ka oven carija hem sveštenikija so ka vladinen iljada berša zaedno e Isusea upri Phuv. Ko adava periodi, o Jehova preku  akava Carstvo ka kerel i Phuv raj hem ka pomožinel sa e manušenge te oven sovršena. E Jehovaskere sluge ko nebo hem ki Phuv konečno ka oven jekh familija (Otk. 5:13; 20:6). O Isus ka uništinel e Satana hem ka cidel sa o problemija so kergja len (1. Moj. 3:15).

8. a) Sar pomožingja o Isus ple učenikonge te haljoven kobor tano važno e Devleskoro Carstvo? b) Sar sikavaja kaj siem verna sluge e Carstvoske?

8 O Isus pomožingja ple učenikonge te haljoven kobor tano važno e Devleskoro Carstvo. Keda krstingja pe, ov odma počmingja segde te propovedinel „o šukar haberi bašo e Devleskoro Carstvo“ (Luka 4:43). Isto agjaar, ov vakergja ple učenikonge kaj ka oven leske svedokija dži „ko najdur thana ki phuv“ (Dela 1:6-8). Avdive, preku o propovediba, o manuša ko celo sveto šaj te šunen baši otkupnina hem te oven podložna e Carstvoske. Sikavaja kaj siem verna sluge e Carstvoske agjaar so pomožinaja e pomazanikon te propovedinel pe o šukar haberi ko celo sveto (Mat. 24:14; 25:40).

„TE OVEL TLI VOLJA“

9. Soske šaj te ova sigurna kaj o Jehova ka ispolninel pli namera e manušencar?

9 So mislingja o Isus keda vakergja: „Te ovel tli volja“? Keda o Jehova vakerela nešto kaj ka ovel, adava sigurno ka ovel (Isa. 55:11). Adava so o Satana protivingja pe e Jehovaske našti te čhinavel le te ispolninel pli namera. Savi namera sine e Jehova e Phuvjaja? Ov manglja te phergjol celo Phuv sovršeno čhavencar taro Adam hem tari Eva (1. Moj. 1:28). Te meren sine angleder te ovel len čhave, e Devleskiri namera nane te ispolninel pe sine. Adaleske, o Jehova mukhlja te ovel len čhave. Preku i otkupnina, o Jehova dela prilika sarinen so sikavena vera te oven sovršena hem te živinen večno. O Jehova mangela e manušen hem mangela te dobina o prekrasno životo kova so sine delo tari leskiri namera.

10. Sar ka koristinel i otkupnina adalenge so mule?

10 So ka ovel sa okole manušencar kola so mule bizo te šunen bašo Jehova? O Jehova mangela o manuša te živinen. Adaleske, ov ka iranel ko životo adalen so mule. Preku i otkupnina, ola ka šaj palem te živinen. Tegani ka ovel len prilika te sikljoven bašo Jehova hem te živinen večno (Dela 24:15). Taro Jehova avela o životo. Keda o Jehova dela životo nekaske so mulo, ov ovela leske Dad (Ps. 36:9). Keda o Isus sikavgja ple učenikon sar te molinen pe, bašo Jehova vakergja: „Amaro Dad so sian ko nebo“ (Mat. 6:9). O Jehova dengja e Isuse but važno uloga keda ka voskresninen o mule. O Isus vakergja: „Me sium o voskresenie hem o životo“ (Jovan 6:40, 44; 11:25).

11. Savi namera isi e Devle bašo „baro mnoštvo“?

11 O Isus isto agjaar vakergja: „Sekoj so kerela e Devleskiri volja, ov mange phral, hem phen hem daj“ (Mar. 3:35). O Devel mangela o manuša taro sa o nacie, plemija hem čhibja te oven leskere sluge. Lenge i Biblija vakerela kaj tane „baro mnoštvo“ kova so nijekh manuš našti te gejnel le. Adale manušen isi len vera ki otkupnina hem mangena te oven poslušna e Devleske. Ola falinena le hem vakerena: „O spasenie avela taro amaro Devel, kova so bešela ko prestol, hem taro Bakhro!“ (Otk. 7:9, 10).

12. So sikljovaja baši e Jehovaskiri namera e manušencar tari e Isuseskiri molitva?

 12 Tari molitva e Isuseskiri sikljovaja but bašo Jehova hem baši leskiri namera e manušencar. Prvo, valjani te kera sa so šaj te slavina e Jehovaskoro sveto anav (Isa 8:13). I otkupnina, preku koja so šaj te ova spasime, slavinela e Jehovaskoro anav. Isto agjaar, o anav e Isuseskoro značinela „o Jehova tano spasenie“. Dujto, preku plo Carstvo, o Jehova ka del e poslušna manušenge o bereketija tari otkupnina. Hem trito, sigurna siem kaj ništo našti te čhinavel e Jehova te kerel pli namera (Ps. 135:6; Isa. 46:9, 10).

SIKAV TLI BLAGODARNOST BAŠI OTKUPNINA

13. So sikavaja keda krstinaja amen?

13 Jekh važno način sar sikavaja amari blagodarnost baši otkupnina tano adava so daja lafi e Jehovaske kaj ka služina leske hem krstinaja amen. Agjaar, sikavaja kaj isi amen vera ki otkupnina hem sikavaja kaj živinaja e Jehovaske (Rim. 14:8). Keda krstinaja amen, rodaja taro Jehova te del amen čisto sovest (1. Pet. 3:21). O Jehova odgovorinela amenge agjaar so koristinela i otkupno žrtva e Isuseskiri te čistinel amen. Sigurna siem kaj ov ka del amen sa so vetingja (Rim. 8:32).

Sar sikavaja amari blagodarnost baši otkupnina? (Dikh o pasusija 13-14)

14. Soske o Jehova dengja zapoved te manga e javeren?

14 Sa so kerela o Jehova, kerela taro mangipa. Ov mangela leskere sluge te oven sar leste hem te mangen pe jekh jekhea (1. Jov. 4:8-11). Keda mangaja e manušen, sikavaja kaj mangaja te ova „čhave amare Dadeskere soj ko nebo“ (Mat. 5:43-48). I prvo najbari zapoved tani te manga e Jehova, a i dujto, te manga e javeren (Mat. 22:37-40). Jekh način sar sikavaja kaj mangaja e manušen tano keda propovedinaja o šukar haberi bašo e Devleskoro Carstvo. Ako šunaja e Jehovaskiri zapoved te manga e javeren, posebno amare phralen, tegani sikavaja kaj celosno mangaja le (1. Jov. 4:12, 20).

I OTKUPNINA ANELA BEREKETIJA TARO JEHOVA

15. a) Save bereketija akana dobinaja taro Jehova? b) Save bereketija ka dobina ki idnina?

15 O Jehova prostinela amare grevija  keda sikavaja vera ki otkupnina. Ki Biblija ov uverinela amen kaj šaj celosno te kosel amare grevija. (Čitin Dela 3:19-21.) Sar so dikhlem angleder, preku i otkupnina o Jehova posvojnela nesave manušen tari Phuv te oven leskere čhave ko nebo. Adala tane o pomazanikija (Rim. 8:15-17). O Jehova isto agjaar kaninela „o javera bakhre“ te oven delo tari leskiri familija ki Phuv. Keda ka oven sovršena, palo adava posledno puti ka oven ispitime hem te ačhile verna, o Jehova lende da ka posvojnel te oven leskere čhave (Rim. 8:20, 21; Otk. 20:7-9). O Jehova sekogaš ka mangel sa ple čhaven hem ola večno ka dobinen bereketija so avena tari otkupnina (Evr. 9:12). Ov dengja amen i otkupnina hem akava skapoceno poklon nikoj našti te lel le amendar.

16. Taro so oslobodinela amen i otkupnina?

16 Ako kajnaja amen bašo amare grevija, tegani o Beng našti te čhinavel amen te ova delo tari e Jehovaskiri familija. O Isus alo ki Phuv hem mulo „jekh puti zasekogaš“. Znači, i otkupnina sine platimi zasekogaš (Evr. 9:24-26). O Adam angja amenge meribe, ama e Isuseskiri žrtva ka anel amenge večno životo. I otkupnina šaj te oslobodinel amen taro e Satanaskoro sveto hem tari dar taro meribe (Evr. 2:14, 15).

17. So mislinea tu bašo e Devleskoro mangipe?

17 Sa so vetinela o Devel sekogaš ispolninela pe. Isto sar so o zakonija ki priroda na meninena pe, agjaar o Jehova da na meninela pe. Ov nikogaš nane te razočarinel amen (Mal. 3:6). O Jehova na dela amen samo životo. Ov dela amen plo mangipe da. Ki Biblija pišinela: „Pendžargjem o mangipe so isi e Devle baši amende hem verujngjem ko leskoro mangipe. O Devel tano mangipe“ (1. Jov. 4:16). E Devleskere lafija sekogaš ispolninena pe. Panda hari, celo Phuv ka ovel but šužo raj hem sekova manuš ka sikavel mangipe savo so sikavela o Jehova. Tegani sa leskere sluge ko nebo hem ki Phuv ka vakeren: „I falba hem i slava hem i mudrost hem i blagodarnost hem i čest hem i mokj hem i sila tani amare Devleskiri ki celo večnost! Amin“ (Otk. 7:12).