O JEHOVA pottikningja e Pavle te pišinel enja osobine kola so avena taro sveti duh (Gal. 5:22, 23). Akala šuže osobine vikinena pe „plodija e duhoskere“. * (Dikh i fusnota.) Ola tane delo tari „nevi ličnost“ koja so o hristijanja valjani te uraven la (Kol. 3:10). Isto sar jekh kaš so ka del plodija ako redovno čhivela pe leske pani, agjaar jekhe manuše da ka oven le akala šuže osobine ako mukhela o sveti duh te vlijajnel ko leskoro životo (Ps. 1:1-3).

I prvo osobina so vakergja la o Pavle tani o mangipe. Kobor tani vredno akaja osobina? O Pavle vakergja kaj ako nane le mangipe, na vredinela ništo (1. Kor. 13:2). Ama, soj tano o mangipe, sar šaj te bajrara le hem te sikava le sekova dive?

SOJ TANO O MANGIPE?

Iako tano pharo te objasninel pe točno soj tano o mangipe, ki Biblija pišinela sar šaj nekoj te sikavel mangipe. Na primer, ki late pišinela kaj o mangipe tano „strplivo hem ljubezno“ hem kaj „radujnela pe bašo čačipe“. O mangipe „sa podnesinela, ko sa verujnela, ko sa nadinela pe, sa trpinela“. Adale so isi le mangipe tano taro vilo povrzimo e javerencar, iskreno grižinela pe lenge hem tano verno amal. Ama, okole so nane le mangipe tano ljubomorno, gordo, nepristojno, sebično hem na prostinela. Amen na mangaja te sikava asavke lošna osobine, nego mangaja te sikava iskreno mangipe kova so „na rodela pli korist“ (1. Kor. 13:4-8).

O JEHOVA HEM O ISUS DENGE AMEN SOVRŠENO PRIMER BAŠO MANGIPE

„O Devel tano mangipe“ (1. Jov. 4:8). Adava dikhjola taro sa o bukja so kerela len. O Jehova sikavgja najbaro mangipe adalea so bičhalgja e Isuse te cidel muke hem te merel bašo manuša. O apostol Jovan pišingja: „E Devleskoro mangipe baši amende sikavgja pe agjaar so: O Devel bičhalgja ple edinstveno bijame Čhave ko sveto, te šaj preku leste te dobina životo. Ov bičhalgja ple Čhave te del plo životo te šaj te ova ko mir e Devlea. Kergja adava soske manglja amen, a na soske amen manglem le“ (1. Jov. 4:9, 10). Adaleske so o Devel mangela amen amare grevija šaj te oven prostime hem šaj te ovel amen nadež hem večno životo.

O Isus sikavgja kaj mangela e manušen agjaar so dengja plo životo te šaj te kerel e Devleskiri volja. O apostol Pavle pišingja: „Spored adaja ’volja‘ posvetime siem preku o Isus Hristos, okova so dengja plo telo sar žrtva jekh puti zasekogaš“ (Evr. 10:9, 10). Nijekh javer manuš našti sine te sikavel pobaro mangipe. O Isus vakergja: „Nikas nane pobaro mangipe taro akava, te del plo životo ple amalenge“ (Jovan 15:13). Šaj li o nesovršena manuša te sikaven isto mangipe sar so sikavgje o Jehova hem o Isus? Oja! Te dikha sar šaj te kera adava.

 „ŽIVINEN KO MANGIPE“

O Pavle ohrabrinela amen: „Postapinen sar o Devel, sar leskere mangle čhave hem živinen ko mangipe, isto sar o Hristos so manglja tumen hem dengja pe tumenge“ (Ef. 5:1, 2). So značinela te živina ko mangipe? Adava značinela sekogaš te sikava mangipe. O mangipe valjani te sikava le amare postapkencar da, a na samo lafencar. O Jovan pišingja: „Čhavalen, ma te manga amen lafencar ili čhibjaja, nego iskreno te sikava adava e bukjencar so keraja len“ (1. Jov. 3:18). Na primer, propovedinaja o šukar haberi bašo Carstvo adaleske so mangaja e Jehova hem e javere manušen (Mat. 24:14; Luka 10:27). Isto agjaar, sikavaja mangipe keda siem strpliva, ljubezna hem keda prostinaja e javerenge. Šunaja o sovet tari Biblija: „Sar o Jehova spremno so prostingja tumenge, agjaar keren tumen da“ (Kol. 3:13).

Ako sovetinaja ili ukorinaja nekas, adava na značinela kaj na mangaja le. Na primer, nesave roditelija mukhena o čhavo te kerel sa so mangela samo kobor ma te rovel. Ama, jekh roditeli so čače mangela ple čhave ka ovel strogo keda valjani. Slično, iako o Devel tano mangipe, ov ukorinela adalen so mangela len (Evr. 12:6). Znači, sikavaja mangipe isto agjaar keda daja ukor keda valjani (Izr. 3:11, 12). Ama valjani te pamtina kaj sarine grešinaja hem but puti na sikavaja mangipe. Adaleske, sekova jekh amendar šaj te sikljol sar pošukar te sikavel mangipe. Sar šaj te kera adava? Te dikha trin načinija.

SAR ŠAJ TE SIKAVA PANDA POBARO MANGIPE?

Prvo, molin e Devle te del tut plo sveti duh te šaj te pomožinel tut te sikave panda pobaro mangipe. O Isus vakergja kaj o Jehova dela „sveti duh adalenge so rodena lestar“ (Luka 11:13). Adaleske, šaj te ova uverime kaj ako molinaja amen bašo sveti duh hem dozvolinaja te pomožinel amen, ka sikava panda pobaro mangipe (Gal. 5:16). Na primer, ako sian starešina, šaj te moline tut o sveti duh te pomožinel tuke mangipaja te de sovetija tari Biblija e javerenge. Ili, ako sian roditeli, šaj te moline tut e Devleskoro sveti duh te pomožinel tuke te vospitine te čhaven mangipaja, a na holjaja.

Dujto, hor razmislin sar o Isus sikavgja mangipe keda o javera ponašingje pe lea lošno (1. Pet. 2:21, 23). Keda nekoj ka vredžinel tut ili ka doživine nepravda, puč tut: „So bi kerela sine o Isus?“ Jekh phen so vikinela pe Lea halili kaj akava pučibe pomožingja la te mislinel angleder te kerel nešto. Oj vakerela: „Jekh puti, jekh koleška bičhalgja imejl poraka ko javera kolege kolate so pišingja lošna bukja baši mande hem baši mi buti. Adava but povredingja man. Ama, tegani pučljum man: ’Sar šaj ki akaja situacija te postapinav sar o Isus?‘ Otkeda šukar razmislingjum baši akava pučibe, odlučingjum te mukhav o bukja sar soj hem te na kerav problemi taro adava. Palo nesavo vreme, šungjum kaj adale koleška sine la seriozno problemi sastipaja hem kaj sine la baro stres. Haliljum kaj na mislingja adava so pišingja. Adava so razmislingjum sar o Isus reagiringja keda o javera vredžinena le sine pomožingja man te sikavav mangipe me koleškake“. Ako džaja palo primer e Isuseskoro, sekogaš ka sikava mangipe e javerenge.

Trito, sikljov te sikave samopožrtvuvano mangipe. Taro asavko mangipe ka dikhel pe koj tane čače e Isuseskere učenikija (Jovan 13:34, 35). O Isus sikavgja asavko mangipe hem dengja amen sovršeno primer. Adalea so alo taro nebo, ov otkažingja pe taro sa o bukja so sine le sa dži ko plo meribe, hem adava kergja le baši amende (Fil. 2:5-8). Keda trudinaja amen te sikava sar e Isuseskoro samopožrtvuvano mangipe, ka počmina te razmislina hem te osetina amen sar leste. Adava ka ohrabrinel amen te čhiva e javerengere potrebe anglo amare.

 BEREKETIJA SO DOBINAJA LEN KEDA SIKAVAJA MANGIPE

Keda sikavaja mangipe dobinaja but bereketija. Te dikha duj primerija:

Save bereketija dobinaja keda sikavaja mangipe?

  • O PHRALIPE KO CELO SVETO: Adaleske so isi amen mangipe jekh jekheske, džanaja kaj ako džaja ko phralja hem phenja taro bilo kova sobranie ko sveto ka ova šukar dodžakerde. Čače tano baro bereketi te osetine o mangipe taro phralipe ko celo sveto (1. Pet. 5:9). Asavko mangipe isi samo maškar e Devleskoro narodo.

  • MIR: Keda trpinaja amen jekh jekhea mangipaja, maškar amende isi mir kova so pomožinela amen te ikera o jekhipa (Ef. 4:2, 3). Akava dikhaja le ko amare sostanokija hem kongresija. Na mislinea li tu da kaj asavko mir phare arakhela pe ko akava sveto? (Ps. 119:165; Isa. 54:13). Keda trudinaja amen te ova ko mir e javerencar, sikavaja kaj iskreno mangaja len hem adava but radujnkerela amare Dade (Ps. 133:1-3; Mat. 5:9).

„O MANGIPE IZGRADINELA“

O Pavle pišingja: „O mangipe izgradinela“ (1. Kor. 8:1). So značinela adava? Ko 1. Korinkjanite 13 poglavje, bašo kova nesave vakerena kaj tano „Himna e mangipaskiri“, o Pavle vakergja sar o mangipe izgradinela. Sar prvo, o mangipe ohrabrinela amen te čhiva o potrebe e javerengere anglo amare (1. Kor. 10:24; 13:5). Isto agjaar, ako mangaja e javeren ka ova obzirna, grižliva, strpliva hem ljubezna sprema o javera. A adava ka kerel amare familie te oven pobahtale hem kerela o jekhipe ko amaro sobranie te ovel pozoralo (Kol. 3:14).

Isi but načinija sar šaj te sikava mangipe bašo javera, ama amaro mangipe bašo Devel tano najvredno. Soske? Adaleske so adava mangipe kerela te ova sar jekh. Manuša taro različna rase hem čhibja zaedno služinena e Jehovaske (Sof. 3:9). Te ova odlučna sekova dive te sikava akaja but vredno osobina koja so avela taro e Devleskoro sveti duh.

^ pas. 2 Akaja tani i prvo taro enja statie kolende so ka kerel pe lafi bašo plodija taro sveti duh.