Dža ko teksto

Dža ko dujto meni

Dža ki sodržina

E Jehovaskere svedokija

romane (Makedonija)

Stražarsko kula (izdanie bašo proučibe)  |  april 2017

Tlo spremno stavi neka falinel e Jehova!

Tlo spremno stavi neka falinel e Jehova!

O narodo spremno gelo, adaleske falinen e Jehova! (SUD. 5:2)

GILJA: 150, 10

1, 2. a) So vakergje o Elifaz hem o Vildad bašo adava sar dikhela o Devel ki amari služba? b) Sar dikhela o Jehova ko adava so keraja baši leste?

ANGLEDER but berša, trin manuša gele ko Jov. Jekh lendar, o Elifaz taro Teman, pučlja le nesave interesna pučiba: „Isi li e Devle nesavi korist taro manuš? Isi li le nesavi korist taro mudro manuš? Radujnela pe li o Semokjno adaleske so sian pravedno hem dobinela li nešto taro adava so živinea verno?“ (Jov 22:1-3). O Elifaz mislinela sine kaj o odgovor ko akala pučiba tano na. Javer lendar, o Vildad taro Suj, vakergja kaj o manuš našti te ovel pravedno anglo Devel. (Čitin Jov 25:4.)

Sekoja šukar osobina ili sposobnost so isi amen avela taro Devel hem ov dikhela sar koristinaja la

2 O Elifaz hem o Vildad mangle o Jov te mislinel kaj tano džabe adava so služinela e Jehovaske hem kaj amen na vredinaja poviše taro jekh kirmo anglo Jehova (Jov 4:19; 25:6). Dali ola vakergje akava adaleske so sine ponizna? (Jov 22:29). Čače tano adava kaj o Jehova tano najbaro hem kaj amen siem but tikne. Na primer,  ako dikhaja tele tari nesavi uči planina ili taro avioni, tegani haljovaja kobor siem tikne. Ama, sar dikhela o Jehova ki amende hem ko sa so keraja baši leste hem bašo Carstvo? O Jehova vakergja e Elifazeske, e Vildadeske hem e Sofareske kaj lengere lafija tane hovavne. Palo adava, o Devel vakergja kaj tano zadovolno taro Jov, hem bašo Jov vakergja kaj tano leskoro sluga (Jov 42:7, 8). Adava sikavela amenge kaj o nesovršena manuša šaj te keren nešto bašo Devel.

SO DEA E DEVLESKE?

3. So vakergja o Eliu bašo adava so trudinaja amen te služina e Jehovaske hem so mislingja adalea?

3 Jekh terno manuš, o Eliu šunela sine so kerena lafi o Jov hem akala trin manuša. Keda završingje, o Eliu pučlja e Jove bašo Jehova: „Ako sian pravedno, so dea le adalea hem so priminela ov tutar?“ (Jov 35:7). Dali o Eliu manglja te vakerel kaj džabe tano adava so trudinaja amen te služina e Devleske? Na. O Jehova na isprajngja e Eliu, sar so kergja okole trine manušencar. O Eliu manglja te vakerel nešto javer. Ov manglja te vakerel kaj e Devleske na valjani ništo hem adaleske ov na zavisinela taro adava dali amen ka služina leske. Amen našti te kera le pobarvalo ili pozoralo. Sekoja šukar osobina ili sposobnost so isi amen avela taro Devel hem ov dikhela sar koristinaja la.

4. Sar dikhela o Jehova ko adava keda keraja šukaripe e javerenge?

4 Keda keraja šukaripe adalenge so služinena e Jehovaske, o Jehova dikhela ko adava sar te phene kergjem nešto leske. Ko Izreki 19:17 čitinaja: „Koj sikavela šukaripe e čoroleske, dela zaem e Jehovaske hem bašo adava so kerela ov ka platinel leske“. O Jehova dikhela sekova puti keda keraja šukaripe e javerenge. Iako ov tano o Stvoriteli taro celo univerzum, o Jehova dikhela ko asavke postapke sar zaem soj dendo leske hem ka iranel amenge adalea so ka nagradinel amen. Akava isto agjaar vakergja le o Isus, e Devleskoro čhavo. (Čitin Luka 14:13, 14.)

5. Bašo kola pučiba ka kera lafi?

5 Ko purano vreme, o Jehova kaningja e proroko, o Isaija, te služinel leske ko jekh posebno način (Isa. 6:8-10). O Isaija spremno prifatingja i pokana hem vakergja: „Ake sium me! Bičhal man!“ Avdive da o Jehova dela prilika e verna manušenge te služinen leske. But sluge e Jehovaskere isi len isto stavi sar o Isaija. Ola spremno prifatinena zadače hem služinena ko različna thana hem načinija, bizi razlika ko save okolnostija ka oven hem kobor pharo ka ovel. Ama, nekoj šaj te mislinel peske: „Ceninava i prednost so isi man te služinav e Jehovaske,  ama dali tano čače važno adava so kerava me? Nane li o Jehova te završinel i buti bizi mande da?“ Dali nekogaš mislingjan agjaar? Te dikha sar adava so slučingja pe duje verna slugenge taro purano vreme, i Devora hem o Varak, šaj te pomožinen amen te dobina odgovor ko akala pučiba.

O DEVEL KERELA I DAR TE OVEL HRABROST

6. Soske e Javineskiri vojska šaj sine lokhe te pobedinel e Izraelcon?

6 O Varak sine Izraelsko vojniko, a i Devora prorokujnela sine. Biš berš o Izraelcija sine but mučime taro hanaansko cari o Javin. E Javineskiri vojska sine but surovo adaleske o Izraelcija so živinena sine ko gava darana sine te ikljoven taro ple khera. Leskere vojska sine la 900 voena kočie sastrnale čhurikencar, a e Izraelcon na sine len oružje so valjangja lenge te šaj te borinen pe hem te zaštitinen pe (Sud. 4:1-3, 13; 5:6-8). * (Dikh i fusnota.)

7, 8. a) So zapovedingja o Jehova e Varakoske? b) Sar o Izraelcija pobedingje e Javineskere vojska? (Dikh i slika ko početok tari statija.)

7 Ki sporedba e Javineskere vojskaja, o Izraelcija sine slaba hem lokhe šaj sine te pobedinen pe. Ama o Jehova preku i Devora zapovedingja e Varakoske: „Dža ki planina Tavor hem le tuja deš milje manuša taro Neftalim hem Zavulon. Ki dolina Kison ka anav tuke e Sisara, o zapovedniko e Javineskere vojskakoro, leskere voena kočiencar hem leskere bute vojnikoncar, hem ka dav len ko tle vasta“ (Sud. 4:4-7).

8 Rodingje pe dobrovolcija so ka džan adari, hem 10.000 murša khedingje pe ki planina Tavor. Tegani o Varak hem leskere manuša gele te maren pe ko than Tanah. (Čitin Sudiite 4:14-16.) Dali o Jehova pomožingja e Izraelcon? Oja. Taro jekh puti pelo baro bršim hem o than ulo čikalo. Adava pomožingja e Izraelcon. O Sisara hem leskiri vojska počmingje te našen, a o Varak brkingja len 24 kilometre, sa dži ko than so vikinela pe sine Aroset. Džikote našela sine, e Sisaraskiri kočija zaglavingja ki čik. Ov hulingja tari kočija hem našlja ko Sananim, verojatno paše uzo Kedes. Adari o Sisara gelo te garavel pe ko šatori jekhe džuvljakoro so vikinela pe sine Jaila. O Sisara sine umorno hem zasukja. Džikote sovela sine, i Jaila hrabro mudargja le (Sud. 4:17-21). O Jehova kergja o Izraelcija te pobedinen! * (Dikh i fusnota.)

RAZLIČNA STAVIJA

9. So pišinela ko Sudiite 5:20, 21 baši borba protiv o Sisara?

9 Šaj but te sikljova bašo nastanija soj vakerde ko Sudiite 4 poglavje ako čitinaja o 5 poglavje. Ko Sudiite 5:20, 21 pišinela: „O čerenja taro nebo boringje pe, taro ple drumija ola boringje pe protiv o Sisara. O potok Kison ingargja len“. Dali akava značinela kaj o angelija pomožingje e Izraelconge ki vojna,  ili kaj perena sine meteorija sar bršim? I Biblija na objasninela. Ama, razumno tano te mislina kaj o Jehova spasingja ple narodo agjaar so kergja te perel baro bršim ko točno than hem vreme, te našti o 900 voena kočie te dvižinen pe lokheste. Ko Sudiite 4:14, 15 trin puti pišinela kaj i zasluga baši pobeda tani dendi e Jehovaske. Adaleske, nijekh taro 10.000 murša so gele dobrovolno ki vojna našti sine te vakerel kaj tano zaslužno baši pobeda.

10, 11. So sine o Meroz hem soske sine leske dendi arman?

10 Akana te dikha nešto interesno. Keda o Izraelcija pobedingje, i Devora hem o Varak giljavgje falbe e Jehovaske. Ola giljavgje: „,Den arman e Meroze‘, vakerela e Jehovaskoro angeli, ,den arman adalen so živinena ki leste, soske na ale te pomožinen e Jehovaske, na pomožingje e Jehovaske e hrabra manušencar‘“ (Sud. 5:23).

11 So sine o Meroz? Na džanaja točno. Ama, i arman so sine dendi bašo Meroz astargja doborom but so ništo na ačhilo lestar. O Meroz šaj sine diz hem o manuša so živinena sine ki leste na mangle te džan sar dobrovolcija ki vojna e Varakoja. Adaleske so 10.000 dobrovolcija gele ki vojna protiv o hanaancija, o manuša taro Meroz sigurno šungje keda rodena pe sine dobrovolcija. Ili, o Meroz šaj sine diz kotar so nakhlja o Sisara keda našela sine taro Varak. Šaj e manušen taro Meroz sine len prilika te astaren e Sisara, ama na kergje adava. Zamislin tuke sar dikhena akale opasno vojniko ko lengere ulice sar našela te spasinel plo životo! Ola šaj sine te keren nešto hem agjaar te pomožinen te kerel pe e Jehovaskiri namera. Te keren sine adava, o Jehova ka nagradinel len sine. Ama, keda sine len prilika te keren nešto bašo Jehova, ola na kergje adava. Izgleda o manuša taro Meroz sine but pojavera tari Jaila, koja so sine hrabro (Sud. 5:24-27).

Valjani te razmislina save stavea služinaja e Jehovaske

12. Baši savi razlika ko stavija pišinela ko Sudiite 5:9, 10? Sar adava valjani te vlijajnel upri amende?

12 Ko Sudiite 5:9, 10 dikhaja kaj o stavi so sine e 10.000 dobrovolcon sine but različno taro stavi adalengoro so na mangle te džan sar dobrovolcija ki vojna. I Devora hem o Varak falingje e zapovednikon ko Izrael kola so gele sar dobrovolcija e narodoja. Ola sine but pojaver taro adala manuša so mislinena sine baši peste kaj tane but važna hem adaleske našti te džan sar dobrovolcija. Baši lende pišinela kaj bešena ko „skupa kilimija“ hem „phirena ko drumija“, so sikavela kaj mangena sine udobno životo. Ama, o dobrovolcija spremno gele e Varakoja te maren pe ki planina Tavor hem ki čikali dolina Kison. Adalenge so mangle udobno životo sine vakerdo: „Razmislinen!“ Ola valjani sine te  šunen hem te razmislinen bašo prilike so našavgje len adalea so na prijavingje pe te oven dobrovolcija. Avdive, amen da valjani te razmislina save stavea služinaja e Jehovaske.

13. Sar o stavi taro plemija Ruvim, Dan hem Aser sine pojaver taro stavi so sine len o plemija Zavulon hem Neftalim?

13 E 10.000 dobrovolcon sine len prilika te dikhen sar o Jehova sikavgja kaj tano Najbaro vladeteli upro sa. Ola šaj sine te vakeren e javerenge bašo adava keda kerena sine lafi e „pravedna bukjenge so kergja len o Jehova“ (Sud. 5:11). Tari javer strana, o plemija Ruvim, Dan hem Aser, poviše grižinena pe sine bašo plo barvalipe, na primer bašo stado, brodija hem pristaništa, a na baši služba e Jehovaske (Sud. 5:15-17). Ama, na sine sa o plemija asavke. O plemija Zavulon hem Neftalim čhivgje plo životo ki opasnost te šaj te pomožinen e Devora hem e Varako (Sud. 5:18). Šaj but te sikljova taro lengere različna stavija baši dobrovolno služba.

„FALINEN E JEHOVA!“

14. Sar sikavaja kaj poddržinaja e Jehova avdive?

14 Avdive, amen na džaja ki vojna te šaj te poddržina e Jehova sar vladeteli. Amen sikavaja kaj poddržinaja le agjaar so propovedinaja hrabro hem celo vilea. Poviše taro bilo keda angleder, avdive valjani dobrovolcija ki služba e Jehovaske. But phralja hem phenja dobrovolno služinena ki polnovremeno služba, na primer, tane pionerija, služinena ko Betel, hem gradinena dvorane. A javera, terne hem phure, tane dobrovolcija ko kongresija. Nesave starešine služinena ko Odborija so pomožinena maškar o doktorija hem e Jehovaskere svedokija, ili organizirinena o kongresija. Šaj te ova sigurna kaj o Jehova ceninela amari spremnost  te služina leske ko bilo kova način hem ov nane te bistrel adava so keraja baši leste (Evr. 6:10).

Angleder te ane nesavi odluka, razmislin sar adava ka vlijajnel upri tli familija hem o sobranie (Dikh o pasus 15)

15. So šaj te pomožinel amen te dikha dali daja amaro najšukar ki služba e Jehovaske?

15 Valjani te razmislina savo stavi isi amen baši dobrovolno služba. Šaj te puča amen: „Dali mukhava e javerenge te keren pobaro delo tari buti? Dali mange považno te ovel man materijalna bukja ili te služinav poviše e Jehovaske? Dali sium verno hem hrabro sar o Varak, i Devora, i Jaila, hem o 10.000 dobrovolcija agjaar so kerava sa so šaj te služinav e Jehovaske? Dali razmislinava te selinav man ki javer diz ili phuv te šaj te ovel man poviše pare hem pošukar životo? Ako oja, dali molinava man e Jehovaske te pomožinel man te haljovav sar adava ka vlijajnel upri mli familija hem o sobranie?“ * (Dikh i fusnota.)

16. Iako e Jehova isi le sa, so šaj te da le amen?

16 O Jehova sikavela amenge bari čest adalea so mukhela te poddržina le sar Vladeteli. Panda taro Adam hem i Eva, o Beng manglja o manuša te oven protiv o Jehova. Ama, keda poddržinaja e Jehova sar Vladeteli, jasno sikavaja e Satanaske tari kaskiri strana siem. Amari vera hem poslušnost pottikninena amen dobrovolno te služina e Jehovaske hem adava kerela amen but bahtale (Izr. 23:15, 16). Tegani o Jehova šaj te odgovorinel e Satanaske (Izr. 27:11). Amari poslušnost tani nešto skapoceno so šaj te da e Jehovaske hem adava kerela le but bahtalo.

17. So sikljovaja taro Sudiite 5:31 bašo adava so ka ovel ki idnina?

17 Panda hari, sekova manuš ki Phuv ka mangel o Jehova te ovel Vladeteli. Edvaj adžikeraja adava vreme te avel! Osetinaja amen sar i Devora hem o Varak, kola so giljavgje: „Neka meren sa te dušmanja Jehova, adala so mangena tut te oven sar o kham so ikljola ple silaja“ (Sud. 5:31). Adava ka slučinel pe keda o Jehova ka anel krajo e Satanaskere lošno svetoske. Keda ka počminel o Armagedon, e Jehovaske nane te valjanen manuša sar dobrovolcija te uništinel e neprijatelen. Tegani, amen ka tergjova hem ka dikha sar o Jehova ka spasinel amen (2. Let. 20:17). Džikote na avela adava vreme, isi amen but šukar prilike hrabro hem revno te poddržina e Jehova sar Vladeteli.

18. Sar šaj tlo spremno stavi te služine e Jehovaske te vlijajnel upro javera?

18 I Devora hem o Varak počmingje pli gili agjaar so falingje e Jehova, a na e manušen. Ola giljavgje: „O narodo spremno gelo, adaleske falinen e Jehova!“ (Sud. 5:1, 2). Slično, keda isi amen spremno stavi te služina e Jehovaske, o javera šaj te oven ohrabrime te „falinen e Jehova“.

^ pas. 6 Akala čhurika sine oštra, bare, hem ponekogaš sine bange. Ola sine čhivde ko voena kočie, verojatno sine spojme ko avruno delo taro trkalakija, a adava kerela len sine te oven mašine mudaribaske.

^ pas. 8 Šaj te čitine poviše bašo akava ki statija „Stanav kako majka vo Izrael“ ki Stražarsko kula taro 1 avgust 2015.

^ pas. 15 Dikh i statija „Kako da se spravime so grižite — pari“ tari Stražarsko kula taro 1 juli 2015.