Dža ko teksto

Dža ko dujto meni

Dža ki sodržina

E Jehovaskere svedokija

romane (Makedonija)

Sikav te čhaven tari Biblija

 LEKCIJA 5

O Samoil kerela sine šukar bukja

O Samoil kerela sine šukar bukja

Panda sar tikno, o Samoil služinela sine ko e Devleskoro šatori hem živinela sine paše uzi leste. Adari o manuša džana sine te obožavinen e Jehova. Džanea li sar o Samoil gelo adari? Ajde prvo te sikljova nešto baši leskiri daj, i Ana.

But berša, e Ana našti sine te oven la čhave, a oj but mangela sine adava. Adaleske molingja e Jehova te del la čhavo. Oj vetingja e Jehovaske kaj ako sine la murš čhavo, ka legarel le te služinel ko e Devleskoro šatori hem adari te živinel. O Jehova šungja lakiri molitva hem oj dobingja murš čhavo. Leskoro anav čhivgja Samoil. I Ana kergja agjaar sar so vetingja. Keda e Samoile sine le trin ili štar berš, legargja le ko šatori te služinel e Devleske.

Ko e Devleskoro šatori o Ilij sine prvosvešteniko. Ov pretstavinela sine e manušen anglo Devel. Leskere duj čhave, isto agjaar služinena sine adathe. Sigurno setinea tu, o šatori sine than kote so obožavinela pe sine o Devel. Adathe o manuša valjani sine te keren šukar bukja. Ama e Ilijeskere čhave kerena sine but lošna bukja. O Samoil dikhela sine sa adava. Dali o Samoil da kerela sine lošna bukja sar lende?— Na, ov kerela sine šukar bukja, sar so siklilo pe dadestar hem pe dajatar.

So mislinea, so valjani sine o Ilij te kerel pe čhavenge?— Valjani sine te kazninel len. Na valjangja te mukhel len te služinen ko šatori. Ama, ov na kergja adava. Adaleske o Jehova holjangja leske hem leskere čhavenge hem rešingja te kazninel len.

O Samoil phengja e Ilijeske adava so vakergja leske o Jehova

Jekh rat keda sovela sine, o Samoil šungja sar nekoj vikinela le: ,Samoil!‘ Ov prastandilo ko Ilij, a o Ilij vakergja leske: ,Me na vikingjum tu‘. Agjaar ulo duj puti. Palo trito puti, o Ilij vakergja e Samoileske te šungja palem adava glaso, te vakerel: ,Vaker Jehova, šunava tu‘. O Samoil agjaar kergja. Togaš o Jehova vakergja leske: ,Vaker e Ilijeske kaj ka kazninav  len bašo lošna bukja so kerena len‘. So mislinea, sine li lokho e Samoileske te vakerel akava?— Na, na sine. O Samoil darala sine, ama palem kergja adava so rodingja lestar o Jehova. Sar so vakergja o Jehova, agjaar ulo. O Ilij hem leskere čhave mule.

Šukar tano te ova sar o Samoil. Ov kerela sine šukar bukja čak keda dikhela sine kaj o javera kerena lošna bukja. So ka kere tu? Ka ove li sar o Samoil, tu da te kere šukar bukja? Te kergjan agjaar, o Jehova, to dat hem ti daj ka oven radosna.

ČITIN KI BIBLIJA

  • 1. Samoilova 2:22-26; 3:1-21