Dža ko teksto

Dža ko dujto meni

Dža ki sodržina

E Jehovaskere svedokija

romane (Makedonija)

Sikav te čhaven tari Biblija

 LEKCIJA 9

O Eremija sekogaš kerela sine lafi bašo Jehova

O Eremija sekogaš kerela sine lafi bašo Jehova

Soske o manuša holjange e Eremijaske?

O Jehova spasingja e Eremija

Nesavo puti, keda keraja lafi e manušencar bašo Jehova, ola holjanena ili asana amenge. Adava šaj te anel te na manga te kera lafi bašo Devel. Osetingjan tu li tu da nekogaš agjaar?— I Biblija vakerela bašo jekh terno čhavo, leskoro anav sine Eremija. Ov mangela sine e Jehova ama haričkaske ka čhinavel sine te kerel lafi bašo Jehova. Te sikljova pobuter baši leste.

Keda o Eremija sine terno, o Jehova vakergja leske te phenel e manušenge te na keren lošna bukja. E Eremijaske sine but pharo te vakerel adava hem darala sine. Ov vakergja e Jehovaske: ,Nadžanava so te vakerav. Panda sium čhavo‘. Ama o Jehova  vakergja leske: ,Ma dara. Me ka pomožinav tu‘.

Togaš o Eremija počmingja te vakerel e manušenge kaj o Jehova ka kazninel len ako na meninena pe. Šunge li o manuša e Eremija?— Na. Nesave asana sine leske, a javera holjange leske. Nesave čak mangle te mudaren le! So mislinea sar osetinela pe sine o Eremija?— Ov darandilo hem vakergja: ,Nane pobuter te kerav lafi bašo Jehova‘. Ama dali čače kergja adava?— Na, na kergja. Ov doborom but manglja e Jehova so našti sine te na kerel lafi baši leste. Adaleske o Jehova arakhela le sine.

Jekh puti, nesave lošna manuša frdinge e Eremija ki jekh hor dupka pherdi čikaja. Na sine le ni maro ni pani. Ola mangle te mukhen le te merel ki adaja dupka. Ama o Jehova pomožingja leske te ikljol adathar!

So sikljovea taro Eremija?— Ov nekobor puti darandilo, ama na čhinavgja te kerel lafi bašo Jehova. Keda kerea lafi bašo Jehova, o manuša šaj ka asan tuke ili ka holjanen tuke. Tu šaj ka ladža ili ka dara. Ama nikogaš ma čhinav te kere lafi bašo Jehova. Ov sekogaš ka pomožinel tu, sar so pomožingja e Eremija.

ČITIN KI BIBLIJA

  • Eremija 1:4-8; 20:7-9; 26:8-19, 24; 38:6-13