Dža ko teksto

Dža ko dujto meni

Dža ki sodržina

E Jehovaskere svedokija

romane (Makedonija)

Šukar haberi taro Devel!

 8 LEKCIJA

Soske o Devel panda mukhela te ovel o lošnipe hem o muke?

Soske o Devel panda mukhela te ovel o lošnipe hem o muke?

1. Sar počmingja o lošnipe ki Phuv?

O Devel mukhlja e manušenge dovolno vreme te vladinen te šaj te dikhel pe kaj našti te rešinen e manušengere problemija

O lošnipe počmingja ki Phuv keda o Satana vakergja o prvo hovajbe. Ov sine kerdo sar sovršeno angeli ama ,na ačhilo ko čačipe‘ (Jovan 8:44). Ov manglja o manuša leske te služinen, ama adava pravo isi samo e Devle. O Satana hovavgja e prvo džuvlja, e Eva, hem vakergja lake kaj ka ovel lake pošukar ako šunela le, a na e Devle. O Adam, isto sar i Eva, na šungja e Devle. E Adameskiri odluka sarinenge angja muke hem meribe. Čitin 1. Mojseeva 3:1-6, 19.

Keda o Satana hovavgja e Eva te na šunel e Devle, ov buningja pe protiv e Devleskoro pravo te vladinel, hem protiv adava kaj o Devel tano o Najbaro. Pobuter manuša odbinena e Devle sar lengoro Vladeteli hem ovena tari e Satanaskiri strana. Agjaar o Satana ulo ,o vladeteli e sumnaleskoro.‘ Čitin Jovan 14:30; 1. Jovanovo 5:19.

2. Dali o Devel kergja greška džikote kergja e angelen hem e manušen?

Sa so kergja o Jehova tano sovršeno. O prva manuša hem o angelija šaj sine te oven leske poslušna ko sa (5. Mojseeva 32:4, 5). O Devel mukhela amen korkori te birina dali ka kera šukaripe ili lošnipe. Agjaar šaj te sikava kobor mangaja le. Čitin Jakov 1:13-15; 1. Jovanovo 5:3.

3. Soske o Devel panda mukhela te ovel pharipa?

O Jehova mukhlja i pobuna protiv leskoro pravo te vladinel te trajnel nesavo odredeno vreme. Soske? Te šaj o vreme te sikavel kaj o manuša našti korkori te vladinen (Propovednik 7:29; 8:9). Nakhle 6.000 berša sar so vladinena o manuša  hem šaj jasno te dikhel pe kaj e manušengere vlade našti cidena o vojne, o kriminal, o nepravde ili o nasvalipe. Čitin Eremija 10:23; Rimjanite 9:17.

O Devel nane sar o manuša, Ov vladinela bašo šukaripe ple narodoske (Isaija 48:17, 18). Panda hari, o Jehova ka čhivel krajo sa e vladenge. Samo okola manuša so ka birinen e Devle sar lengoro Vladeteli, ka ačhoven te dživdinen ki Phuv (Isaija 11:9). Čitin Daniel 2:44.

4. Savi prilika isi amen adaleske so o Jehova tano strplivo?

O Satana vakerela kaj o manuša služinena e Jehovaske tari korist, a na so mangena le. Ka mange li te sikave kaj akava nane agjaar? Te mangljan, tu šaj te kere adava! Adaleske so o Devel tano strplivo, isi amen prilika te sikava dali mangaja te vladinel amencar Ov ili o manuš. Adalestar sar dživdinaja ka dikhjol so biringem. Čitin Jov 1:8-12; Izreki 27:11.

5. Sar ka sikava kaj biringem e Devle sar amaro Vladeteli?

Amare odluke ka sikaven dali mangaja o Devel te ovel amaro Vladeteli

Ka sikava kaj biringem e Devle te vladinel amencar ako keraja adava so pišinela ko leskoro Lafi, ki Biblija (Jovan 4:23). Ka sikava kaj na mangaja o Satana te vladinel adalea so nane te mešina amen ki politika hem ko vojne. Čitin Jovan 17:14.

O Satana koristinela pli mokj te širinel o nemoral hem o lošna bukja. Keda na keraja asavke bukja, nesave tari amari familija ili amala šaj te asan ili te protivinen pe amenge (1. Petrovo 4:3, 4). Adaleske, sekoj valjani korkori te birinel. Ka družina amen li manušencar so mangena e Devle? Ka dživdina li spored leskere mudra zakonija, dende bašo amaro šukaripa? Ako keraja adava, ka sikava kaj o Satana hovavgja keda vakergja kaj nijekh manuš nane te služinel e Devleske keda leske pharo. Čitin 1. Korinkjanite 6:9, 10; 15:33.

Adava so o Devel mangela e manušen dela amen garancija kaj ka avel krajo e lošnipaske hem e mukenge. Adala so sikavena kaj verujnena ko akava ka dživdinen večno ki Phuv. Čitin Jovan 3:16.