Dža ko teksto

Dža ko dujto meni

Dža ki sodržina

E Jehovaskere svedokija

romane (Makedonija)

Šukar haberi taro Devel!

 4 LEKCIJA

Koj tano o Isus Hristos?

Koj tano o Isus Hristos?

1. Sar počmingja e Isuseskoro dživdipe?

Kola e Isuseskere osobine kerena sine o manuša te mangen te oven paše lea? (MATEJ 11:29; MARKO 10:13-16)

Angleder te bijangjovel ki Phuv, o Isus dživdinela sine ko nebo sar duhovno ličnost (Jovan 8:23). O Devel kergja le najangle taro sa hem ov pomožingja te keren pe sa o javera bukja. Samo o Isus tano kerdo direktno taro Jehova adaleske bašo leske vakerela pe kaj tano e Devleskoro ,edinorodno‘ Čhavo (Jovan 1:14). But bukja so mangela sine te vakerel o Devel vakerela sine preku o Isus, adaleske ov tano ,o Lafi‘. Čitin Izreki 8:22, 23, 30; Kološanite 1:15, 16.

2. Soske o Isus alo ki Phuv?

O Devel bičalgja ki Phuv ple Čhave agjaar so kergja te bijanel le i evrejsko čhaj i Marija. Znači, e Isuseskoro dad na sine nesavo manuš (Luka 1:30-35). O Isus alo ki Phuv: 1) te sikavel e manušen o čačipe bašo Devel, 2) te del amen primer sar te kera e Devleskiri volja čak keda amenge pharo, hem 3) te del plo sovršeno dživdipe sar ,otkupnina‘. Čitin Matej 20:28.

3. Soske valjani amenge i otkupnina?

I otkupnina tani i cena koja so valjani te platinel pe nekaske te ovel oslobodimo tari kazna te merel (2. Mojseeva 21:29, 30). O Devel niked na manglja o manuša te phujron hem te meren. Kotar džanaja adava? O Devel vakergja e prvo manušeske, e Adameske, kaj ka merel ako kergja adava so i Biblija vakerela kaj tano ,grevo‘. Znači, te na grešinel sine, o Adam niked nane te merel sine (1. Mojseeva 2:16, 17; 5:5). I Biblija vakerela kaj o meribe ,khuvgja‘ ko manuša preku o Adam. Agjaar, o Adam angja o grevo sa e manušenge, a i kazna bašo  grevo tano meribe. Adaleske valjani amenge i otkupnina te šaj te ova oslobodime taro meribe, i kazna so mukhlja amenge o Adam. Čitin Rimjanite 5:12; 6:23.

Koj šaj te platinel sine i otkupnina te šaj te oslobodinel amen taro meribe? Keda meraja platinaja i kazna samo bašo amare grevija. Nijekh nesovršeno manuš našti te platinel bašo e javerengere grevija. Čitin Psalm 49:7-9.

4. Soske o Isus mulo?

O Isus na sine sar amende, ov sine sovršeno. Ov na valjani sine te merel ple grevonge soske niked na kergja grevo. Ama, mulo bašo javerengere grevija. O Devel sikavgja kobor but mangela amen adalea so bičhalgja ple Čhave te merel amenge. O Isus da sikavgja kaj mangela amen adalea so šungja ple Dade hem dengja plo dživdipe bašo amare grevija. Čitin Jovan 3:16; Rimjanite 5:18, 19.

5. So kerela o Isus akana?

Keda sine ki Phuv, o Isus sasljargja e nasvalen, vazdingja e mulen hem kergja javera čudija te pomožinel e manušenge. Agjaar sikavgja so ka kerel sa e poslušno manušenge (Matej 15:30, 31; Jovan 5:28). Palo e Isuseskoro meribe, o Devel vazdingja le taro mule sar duhovno ličnost (1. Petrovo 3:18). Palo adava ov bešlja hem adžikergja tari e Devleskiri desno strana sa džikote o Jehova na čhivgja le te vladinel sar Cari upri celo Phuv (Evreite 10:12, 13). Akana o Isus vladinela sar Cari ko nebo, a leskere sledbenikija vakerena adava šukar haberi ko celo sumnal. Čitin Daniel 7:13, 14; Matej 24:14.

Panda hari, o Isus ka sikavel kobor silno Cari tano adalea so ka anel krajo sa e mukenge hem sa okolenge so anena dži adava. Sa okola so sikavena vera ko Isus adalea so šunena le, ka dživdinen ko raj ki Phuv. Čitin Psalm 37:9-11.