1. Soske valjani nekoj te vodinel amen ko amaro dživdipe?

Sar o bibliska načelija pomožinena amen te arakha amaro dživdipe? (PSALM 36:9).

O Jehova tano but pomudro amendar. Ov tano amaro Dad so but mangela amen hem grižinela pe amenge. Keda kergja amen, leskiri namera na sine te ova nezavisna lestar (Eremija 10:23). Isto sar so jekhe tikne čhaveske valjani vodstvo taro roditelija, agjaar amenge da valjani vodstvo taro Devel (Isaija 48:17, 18). O bibliska načelija dena amen vodstvo kova so i poklon taro Jehova. Čitin 2. Timotej 3:16.

E Jehovaskere zakonija hem načelija sikavena amen sar najšukar te dživdina hem sar šaj te dobina večno dživdipe. Adaleske so o Devel kergja amen, ov zaslužinela te ova blagodarna bašo leskoro vodstvo. Čitin Psalm 19:7, 11; Otkrovenie 4:11.

2. So i o bibliska načelija?

Načelo tano biblisko čačipe so sikavela so mangela o Devel te kera ko but situacie. A o zakon važinela samo ko dende situacie (5. Mojseeva 22:8). Valjani hor te razmislina te šaj te haljova sar jekh načelo važinela ki dendi situacija (Izreki 2:10-12). Na primer, i Biblija vakerela kaj o dživdipe tano poklon taro Devel. Akava načelo šaj te vodinel amen džikote siem ki buti, keda siem khere ili džikote džaja negde. Ako ikeraja ki godi kaj o dživdipe tano poklon taro Devel, amen nane te čhiva ki opasnost amaro hem javerengoro dživdipe. Čitin Dela 17:28.

3. Kola duj načelija tane najbare?

O Isus vakergja kola duj načelija tane najbare. O prvo načelo sikavela so i najvažno ko dživdipa — te pendžara e Devle, te manga le hem verno te služina leske. Akava načelo valjani te ovel amen ki godi keda anaja sekoja  odluka (Izreki 3:6). Adala so dživdinena spored akava načelo ovena paše e Devlea, čače tane bahtale hem ka dobinen večno dživdipe. Čitin Matej 22:36-38.

O dujto načelo pomožinela amenge te ova ko mir javerencar (1. Korinkjanite 13:4-7). Keda ikeraja akava načelo, amen postapinaja e manušencar sar so postapinela lencar o Devel. Čitin Matej 7:12; 22:39, 40.

4. Sar pomožinena amenge o bibliska načelija?

O bibliska načelija sikavena sarinen ki familija te mangen pe (Kološanite 3:12-14). Ki Biblija isi panda jekh načelo so zaštitinela e famlien, a adava tano kaj o brako valjani te ovel trajno vrska. Čitin 1. Mojseeva 2:24.

Adaleske so dživdinaja sar so sikavela i Biblija, siem materijalno hem emocionalno zaštitime. Na primer, o gazdija but puti rodena bukjake manušen so ikerena o načela tari Biblija so sikavena len te oven česna hem vredna (Izreki 10:4, 26; Evreite 13:18). I Biblija, isto agjaar, sikavela amen te ova zadovolna keda isi amen o bukja so valjani dživdipaske hem amaro paše odnos e Jehovaja te ovel amenge považno taro materijalna bukja. Čitin Matej 6:24, 25, 33; 1. Timotej 6:8-10.

Adava so dživdinaja spored o bibliska načela šaj te pomožinel amenge te arakha amaro sastipe (Izreki 14:30; 22:24, 25). Na primer, adava so šunaja e Devleskoro zakon te na makjova zaštitinela amen taro lošna bukja hem nasvalipe so šaj te len amaro dživdipe (Izreki 23:20). O Jehova mukhela te pija alkohol, ama umereno, a na te makjova (Psalm 104:15; 1. Korinkjanite 6:10). O načelija taro Devel tane bašo amaro šukaripe, ola pomožinena amen te pazina na samo ko amare postapke nego isto agjaar ko amare misle (Psalm 119:97-100). Ama, o čačutne hristijanija na ikerena e Devleskere načelija samo adaleske so ola tane bašo lengoro šukaripe. Ola ikerena len te šaj te slavinen e Jehova. Čitin Matej 5:14-16.