Dža ko teksto

Dža ko dujto meni

Dža ki sodržina

E Jehovaskere svedokija

romane (Makedonija)

So sikavela amen i Biblija?

 DEŠUTRINTO POGLAVJE

Te sikava kaj ceninaja o životo

Te sikava kaj ceninaja o životo

1. Koj dengja amen o životo?

O JEHOVA „tano dživdo Devel“ (Eremija 10:10). Ov tano amaro Stvoriteli hem dengja amen o životo. Ki Biblija pišinela: „Tu kergjan sa o bukja, hem ola postojnena soske tu agjaar mangljan“ (Otkrovenie 4:11). Oja, o Jehova manglja amen te živina. O životo tano skapoceno poklon lestar. (Čitin Psalm 36:9.)

2. Sar šaj te ovel amen bahtalo životo?

2 O Jehova dela amen o bukja so ikerena amen ko životo, sar soj o hajbe hem o pani (Dela 17:28). Hem na samo adava, ov mangela te uživina ko životo (Dela 14:15-17). Te šaj te ovel amen bahtalo životo, valjani te šuna e Devleskere zakonija (Isaija 48:17, 18).

SAR DIKHELA O DEVEL KO ŽIVOTO

3. So kergja o Jehova keda o Kain mudargja e Avele?

3 Tari Biblija džanaja kaj amaro hem e javerengoro životo tano skapoceno e Jehovaske. Na primer, keda o Kain, e Adameskoro hem e Evakoro čhavo, sine but holjamo ple potikne phraleske e Aveleske, o Jehova phengja leske kaj valjani te smirinel pli holi. Ama, o Kain na šungja e Devle hem holjangja doborom but e Aveleske hem mudragja le (1. Mojseeva 4:3-8). O Jehova kazningja e Kaine adaleske so mudargja e Avele (1. Mojseeva 4:9-11). I holi hem i omraza tane opasna soske ola šaj te keren amen te ova nasilna hem surova. O manuša soj asavke našti te ovel len večno životo. (Čitin 1. Jovanovo 3:15.) Te šaj te kera  e Jehovaskiri volja, amen mora te sikljova te manga sa e manušen (1. Jovanovo 3:11, 12).

4. Kova zakoni so dengja le o Jehova e Izraelconge sikavela amenge kobor skapoceno tano o životo?

4 But berša palo adava, o Jehova sikavgja kaj o životo tano skapoceno keda dengja e Mojsejeske o Deš zapovedija. Jekh taro adala zakonija tano: „Ma mudar“ (5. Mojseeva 5:17). Ako nekoj namerno mudarela sine nekas, tegani ov ili oj valjani sine te oven mudarde.

5. Sar dikhela o Jehova ko abortus?

5 Sar dikhela o Jehova ko abortus? Leske tano skapoceno čak o životo jekhe čhaveskoro so panda nane bijamo. Ko Zakoni so dengja le o Jehova e Izraelconge, ov vakergja kaj ako jekh manuš povredingja jekhe khamne romnja hem lakoro bebe merela, tegani adale manuše valjani sine te mudaren le. (Čitin 2. Mojseeva 21:22, 23; Psalm 127:3.) Akava sikavela amenge kaj o abortus tano pogrešno. (Dikh i 28 fusnota.)

6, 7. Sar šaj te sikava e Jehovaske kaj ceninaja amaro životo?

6 Sar šaj te sikava e Jehovaske kaj amaro životo hem o životo e javerengoro amenge tano skapoceno? Agjaar so nane te kera nešto so ka čhivel ki opasnost amaro hem e javerengoro životo. Adaleske nane te koristina cigare ili droga soske ola tane štetna hem šaj te mudaren amen.

7 O Devel dengja amen o životo hem amaro telo, adaleske valjani te koristina len sar ov so mangela. Valjani šukar te grižina amen bašo amaro telo. Ako na keraja adava, ka ova melale anglo e Devleskere jakhja (Rimjanite 6:19; 12:1; 2. Korinkjanite 7:1). Amen našti te obožavina e Jehova kova so dengja amen životo, ako na ceninaja amaro životo. Iako šaj te ovel but pharo te mukha o lošna navike, o  Jehova ka pomožinel amen soske adalea sikavaja kaj ceninaja amaro životo.

8. So keraja te na ana ki opasnost amaro hem e javerengoro životo?

8 Siklilem kaj o životo tano skapoceno poklon. E Jehova isi le doverba kaj amen nikogaš nane te ana ki opasnost amaro hem e javerengoro životo. Adaleske, amen pazinaja sar vozinaja amaro vrda, motori ili javer prevozno sredstvo. Izbeginaja sport soj tano opasno ili nasilno (Psalm 11:5). Isto agjaar, trudinaja amen amaro kher te ovel bezbedno. O Jehova zapovedingja e Izraelconge: „Ako kerea nevo kher, isto agjaar ker ograda ko krovi, agjaar nikoj nane te perel lestar hem tu nane te ove krivo bašo nekaskoro rat“ (5. Mojseeva 22:8).

9. Sar valjani te postapina e životnencar?

9 E Jehovaske tano but važno sar postapinaja e životnencar. Ov dozvolinela te mudara životne bašo hajbe hem bašo urajbe, ili keda valjani te zaštitina amen lendar (1. Mojseeva 3:21; 9:3; 2. Mojseeva 21:28). Ama, na valjani lošno te postapina e životnencar ili te mudara len samo baši zabava (Izreki 12:10).

TE CENINA O ŽIVOTO SOSKE OV TANO SVETO

10. Kotar džanaja kaj o rat pretstavinela o životo?

10 O rat tano sveto anglo Jehova soske pretstavinela amaro životo. Keda mudargja o Kain e Avele, o Jehova vakergja leske: „O rat tle phraleskoro vikinela man tari phuv“ (1. Mojseeva 4:10). E Aveleskoro rat pretstavinela sine leskoro životo hem adaleske o Jehova kazningja e Kaine so mudargja le. Palo potop so sine ko vreme e Noeskoro, o Jehova palem sikavgja kaj o rat pretstavinela o životo. O Jehova dozvolingja e Noeske hem leskere familijake te han mas taro životne. Ov vakergja lenge: „Sekova životno  so dvižinela pe hem tano dživdo šaj te koristinen le hajbaske. Sa adava dava tumenge, isto sar so dengjum tumen o zelena rastenija“. Ama, o Jehova zabraningja lenge te han mas ratea, soske o rat pretstavinela o životo (1. Mojseeva 1:29; 9:3, 4).

11. Savi zapoved bašo rat dengja o Jehova e Izraelconge?

11 Palo otprilika 800 berša odkeda vakergja o Jehova e Noeske te na hal rat, ov palem zapovedingja ple narodoske: „Sekova Izraelco ili stranco so živinela maškar tumende, keda lovinela hem astarela divo životno ili ptica so šaj te hal pe, mora te mukhel te cedinel pe lakoro rat hem te učharel o rat phuvjaja“. Ov isto agjaar vakergja: „Na smejnena te han rat“ (3. Mojseeva 17:13, 14). O Jehova ponadari da mangela sine leskoro narodo te dikhel ko rat sar sveto. Ola šaj sine te han mas ama na o rat. Keda mudarena sine životne hajbaske, ola valjani sine te mukhen o rat te cedinel pe ki phuv.

12. Sar dikhena o hristijanja ko rat?

12 Nekobor berša palo e Isuseskoro meribe, o apostolija hem o starešine taro sobranie ko Erusalim, khedingje pe te odlučinen kola bukja taro Zakoni so sine dendo e Izraelconge panda važinena e hristijanenge. (Čitin Dela 15:28, 29; 21:25.) O Jehova pomožingja lenge te haljoven kaj o rat panda tano skapoceno leske hem kaj ola da valjani te dikhen ki leste sar sveto. O hristijanja taro prvo veko na valjani sine te han ili te pien rat, ili te han mas so na sine šukar cedimo lestar o rat. Adava sine isto doborom baro grevo sar keda obožavinena pe idolija ili kerela pe nemoral. Od tegani, o čačutne hristijanja na mangena sine te han ili te pien rat. Sar tano avdive? O Jehova panda mangela te dikha ko rat sar sveto.

13. Soske o hristijanja na priminena rat preku transfuzija?

 13 Dali adava značinela kaj o hristijanja isto agjaar na valjani te priminen rat preku transfuzija? Oja. O Jehova dengja amen zapoved te na ha hem te na pija rat. Ako o doktori vakergja tuke te na pie alkohol, dali adava značinela kaj šaj te primine le preku infuzija? Džangjola pe kaj na. Isto akava važinela bašo rat da, i zapoved te na ha hem te na pija rat značinela kaj nane te primina rat preku transfuzija. (Dikh i 29 fusnota.)

14, 15. Kobor tano važno e hristijanenge te ceninen o životo hem te oven poslušna e Jehovaske?

14 So ako o doktori vakerela amenge kaj ka mera ako na priminaja rat? Sekoj korkori valjani te odlučinel dali ka šunel e Devleskoro zakoni bašo rat. O hristijanja but ceninena o životo so dengja len o Devel sar poklon, hem adaleske prifatinena javera načinija te lečinen pe te šaj te ačhoven dživde. Ama, ola na mangena te priminen rat.

15 Amen trudinaja amen te arakha amaro sastipe, ama adaleske so o rat prestavinela o životo hem tano skapoceno e Devleske, amen na mangaja te primina rat. Považno tano te ova poslušna e Jehovaske, nego te trudina amen te prodolžina amaro životo adalea so nane te šuna le. O Isus vakergja: „Koj mangela te spasinel plo životo, ka našavel le, a koj ka našavel plo životo baši mande, ka arakhel le“ (Matej 16:25). Amen siem poslušna e Jehovaske soske mangaja le. Ov džanela soj tano najšukar amenge, hem adaleske amen da isto sar leste dikhaja ko životo sar skapoceno hem sveto (Evreite 11:6).

16. Soske e Devleskere sluge šunena le?

16 E Devleskere verna sluge tane odlučna te šunen leskoro zakoni bašo rat. Ola nane te han ili te  pien rat, hem isto agjaar nane te prifatinen rat bašo medicinska pričine. * Ama, ka prifatinen javera tretmanja te šaj te spasinen pumaro životo. E Devleskere slugen isi len doverba kaj o Devel kova so dengja len o životo hem o rat džanela soj najšukar lenge. Dali verujnea kaj ov džanela soj najšukar tuke?

EDINSTVENO ISPRAVNO NAČIN SAR TE KORISTINEL PE O RAT

17. Samo ko kola prilike o Jehova dozvolinela sine e Izraelconge te koristinen rat?

17 Ko Zakoni so dengja le o Jehova preku o Mojsej, ov vakergja e Izraelconge: „I duša [o životo] e teloskoro tano ko rat, hem me odredingjum o rat bašo žrtveniko te ovel bašo čistibe tumare dušenge [ili, te prostinel pe tumenge]; o rat tano adava so kerela te oven čista“ (3. Mojseeva 17:11). Keda o Izraelcija kerena sine grevo, šaj sine te ovel lenge prostimo ako dena životno sar žrtva hem ako o svešteniko čhivela sine hari taro rat ko žrtveniko kova so sine ko hrami. Samo ko asavke prilike o Izraelcija šaj sine te koristinen rat.

18. Savi možnost isi amen adaleske so o Isus dengja plo životo sar žrtva?

18 Keda o Isus alo ki Phuv, ov zameningja o zakoni baši životinsko žrtva adalea so dengja plo životo, ili plo rat, te šaj te prostinen pe amare grevija (Matej 20:28; Evreite 10:1). E Isuseskoro životo so dengja le sar žrtva sine doborom but vredno, so o Jehova šaj sine te del sa e manušenge i možnost te živinen zasekogaš (Jovan 3:16; Evreite 9:11, 12; 1. Petrovo 1:18, 19).

Sar šaj te sikava kaj ceninaja o životo hem o rat?

19. So valjani te kera te šaj te ova čista taro sarinengoro rat?

 19 Amen siem blagodarna e Jehovaske so dengja amen o životo sar poklon. Adaleske mangaja te vakera sa e manušenge kaj ola da šaj te živinen večno ako sikavena vera ko Isus. Amen mangaja e manušen hem ka da amendar sa te šaj te sikava len sar te dobinen životo (Ezekiel 3:17-21). Tegani, isto sar o apostol Pavle, ka šaj te vakera: „Me sium čisto taro sarinengoro rat, soske na propuštingjum te vakerav tumenge sa baši e Devleskiri namera“ (Dela 20:26, 27). Oja, amen sikavaja kaj ceninaja o životo hem o rat adalea so vakeraja e javerenge bašo Jehova hem bašo adava kobor tano skapoceno o životo leske.

^ pas. 16 Poviše informacie bašo primibe rat preku transfuzija ka arakhe ki 77 dži ki 79 strana ko lil Začuvaj ja Božjata ljubov, ikaldo taro e Jehovaskere svedokija.