Dža ko teksto

Dža ko dujto meni

Dža ki sodržina

E Jehovaskere svedokija

romane (Makedonija)

So sikavela amen i Biblija?

 DEŠTO POGLAVJE

O čačipe bašo angelija

O čačipe bašo angelija

1. Soske valjani te džana bašo angelija?

E JEHOVAJA ko nebo živinena o angelija. Ov mangela te džana nešto poviše baši lende soske ola tane delo tari leskiri familija. I Biblija lenge vakerela kaj tane „e Devleskere čhave“ (Jov 38:7). So kerena o angelija? Sar ola ko purano vreme pomožinena sine e manušenge? Šaj li avdive te pomožinen amenge? (Dikh i 8 fusnota.)

2. Koj kergja e angelen? Kobor angelija sine kerde?

2 Amen valjani te džana koj kergja e angelen. Ko Kološanite 1:16 pišinela kaj prvo o Jehova kergja e Isuse, a palo adava „sine kerdo sa soj ko nebo hem ki phuv“. Adava sikavela kaj kergja e angelen da. Kobor angelija kergja? I Biblija vakerela kaj isi but milionija angelija (Psalm 103:20; Otkrovenie 5:11).

3. So sikljovaja taro Jov 38:4-7 bašo angelija?

3 I Biblija isto agjaar sikavela amen kaj o Jehova angleder te kerel i Phuv kergja e angelen. Sar osetingje pe ola keda dikhle i Phuv? Ko lil Jov vakerela kaj ola sine bahtale. Ola sine sar jekh paše familija so služinena e Jehovaske zaedno (Jov 38:4-7).

O ANGELIJA POMOŽINENA E DEVLESKERE SLUGENGE

4. Kotar džanaja kaj e angelenge tane važna o manuša?

4 O angelija otsekogaš mangena sine te džanen bašo manuša hem baši e Jehovaskiri namera e Phuvjaja hem e manušencar (Izreki 8:30, 31; 1. Petrovo 1:11, 12). Ola but sine tažna keda o Adam hem i Eva buningje pe protiv o Jehova. Lenge tano panda popharo  avdive keda dikhena sar poviše manuša na šunena e Jehova. Ama, keda nekoj kajnela pe hem iranela pe e Devleske, o angelija tane bahtale (Luka 15:10). E angelenge tane but važna o manuša so služinena e Devleske. O Jehova koristinela e angelen te pomožinel hem te arakhel ple slugen ki Phuv (Evreite 1:7, 14). Te dikha nesave primerija so sikavena amenge adava.

„Mlo Devel bičhalgja ple angele hem phanlja o muja e lavengere“ (Daniel 6:22)

5. Sar o angelija ko purano vreme pomožingje e Devleskere slugenge?

 5 Keda o Jehova valjangja te uništinel o dizja Sodom hem Gomor, ov bičhalgja duje angelen te pomožinen e Loteske hem leskere familijake te našen taro adala dizja (1. Mojseeva 19:15, 16). But berša palo adava, o proroko Daniel sine frdimo ki jekh dupka pherdi lavencar, ama leske na ulo ništo soske o „Devel bičhalgja ple angele hem phanlja o muja e lavengere“ (Daniel 6:22). Palo nesavo vreme, keda o apostol Petar sine phanlo, o Jehova bičhalgja jekhe angele te oslobodinel le (Dela 12:6-11). O angelija, isto agjaar, pomožingje e Isuseske keda sine ki Phuv. Na primer, keda krstingja pe, „o angelija služinena leske sine“ (Marko 1:13). Angleder te mudaren e Isuse, jekh angeli ohrabringja le (Luka 22:43).

6. a) Kotar džanaja kaj o angelija pomožinena e Devleskere slugenge avdive? b) Save pučiba ka oven odgovorime?

6 Avdive o angelija na pojavinena pe e manušenge. Ama o Devel panda koristinela len te šaj te pomožinel ple slugenge. I Biblija vakerela: „O angeli e Jehovaskoro zaštitinela okolen so darana taro Devel, hem spasinela len“ (Psalm 34:7). Soske valjani o Devel te zaštitinel amen? Adaleske so isi amen silna dušmanja so mangena te keren amenge lošnipa. Koj tane ola? Kotar avena? Sar kerena amenge lošnipe? Te šaj te odgovorina ko akala pučiba, te dikha so ulo palo adava keda o Jehova kergja e Adame hem e Eva.

DUŠMANJA SO NAŠTI DIKHAJA LEN

7. So kergje but manuša adaleske so hovavgja len o Satana?

7 Ko trinto poglavje siklilem bašo jekh angeli so protivingja pe e Devleske hem manglja te vladinel upro javera. I Biblija vikinela le Beng hem Satana (Otkrovenie 12:9). O Satana manglja javera da te protivinen pe e Devleske. Ov hovavgja e Eva hem čhivgja la te  na šunel e Devle, hem panda hovavela bute manušen. Ama, nesave manuša sar so sine o Avel, o Enoh hem o Noe, ačhile verna e Jehovaske (Evreite 11:4, 5, 7).

8. a) Sar nesave angelija ule demonija? b) Sar spasingje pe o demonija taro Potop?

8 Ko vreme e Noeskoro nesave angelija protivingje pe e Jehovaske, mukhle plo than ko nebo hem hulile te živinen ki Phuv sar manuša. Soske kergje adava? I Biblija vakerela kaj ola mangle te len peske romnja. (Čitin 1. Mojseeva 6:2.) Ama adava so kergje sine pogrešno (Juda 6). Isto sar akala lošna angelija, but manuša ko adava vreme ule rumime hem nasilna. Tegani o Jehova odlučingja te uništinel e lošno manušen agjaar so kergja te ovel Potop ki celo Phuv. Ama, ov spasingja adalen so ačhile leske verna (1. Mojseeva 7:17, 23). O lošna angelija irangje pe palal ko nebo hem agjaar spasingje pe. I Biblija akale lošna angelen vikinela len demonija. Ola biringje te oven tari e Bengeskiri strana kova so protivingja pe e Jehovaske, hem agjaar o Beng ulo lengoro vladeteli (Matej 9:34).

9. a) So ulo e demonencar keda irangje pe palem ko nebo? b) Bašo so ka sikljova poviše akana?

9 Keda irangje pe ko nebo, o lošna angelija našti sine palem te služinen e Devleske zaedno e verna angelencar adaleske so protivingje pe leske (2. Petrovo 2:4). O demonija avdive našti te keren pe sar manuša, ama ola panda hovavena celo sveto (Otkrovenie 12:9; 1. Jovanovo 5:19). Te sikljova poviše sar ola hovavena bute dženen. (Čitin 2. Korinkjanite 2:11.)

SAR O DEMONIJA HOVAVENA E MANUŠEN

10. Sar o demonija hovavena e manušen?

10 O demonija hovavena e manušen ko but načinija. But manuša kerena lafi e demonencar direktno ili  preku nekaste, sar na primer preku o manuša so kerena magie ili lafi e duhoncar. O kontakt e demonencar vikinela pe demonizam ili spiritizam. I Biblija dela zapoved te cida amen dur taro bilo save bukja povrzime e demonencar (Galatite 5:19-21). Soske? Isto sar jekh lovdžija so koristinela stapice te šaj te astarel e životnen, agjaar o demonija da koristinena različna stapice te astaren hem te kontrolirinen e manušen. (Dikh i 26 fusnota.)

11. So kerena o manuša te šaj te džanen so ka ovel ki idnina, hem soske na valjani te kera adava?

11 Jekh stapica e demonengiri tani so hovavena e manušen te koristinen različna bukja te šaj te dikhen so ka ovel ki idnina ili te doznajnen nešto. Nesave kerena akava agjaar so čitinena horoskop, verujnena ko znakija, čitinena tarot karte, dikhena ki kristalno topka ili ko vas. But manuša mislinena kaj akala bukja nane štetna, ama nane agjaar. Adala bukja tane but opasna. Na primer, i Biblija vakerela kaj o demonija hem o manuša so dikhena so ka ovel ki idnina kerena zaedno buti. Ko Dela 16:16-18 pišinela kaj jekh demoni pomožinela sine jekhe čhajake te vakerel so ka ovel ki idnina. Keda o Pavle cidingja e demone tari adaja čhaj, oj našti sine poviše te vakerel so ka ovel ki idnina.

12. a) Soske tano opasno te probina te kera lafi e mulencar? b) Soske e Devleskere sluge na valjani te keren adetija e mulenge?

12 O demonija isto agjaar koristinena javer stapica te hovaven e manušen. Ola mangena te čhiven amen te verujna kaj šaj te kerel pe lafi e mulencar, kaj o mule živinena negde javerthe, hem kaj šaj te keren amenge lošnipe. Na primer, nesave manuša, keda merela lendar nekoj soj lenge paše, džana ko manuša so vakerena kaj šaj te keren lafi e mulencar. Adava manuš šaj te vakerel nesave bukja bašo mulo hem čak šaj  te imitirinel leskoro glaso (1. Samoilova 28:3-19). But manuša kerena adetija keda merela lendar nekoj soske verujnena kaj o mule panda živinena negde javerthe. Adala adetija kerena len keda parunena e mulen, kerena o dive e muleskere, delinena hajbe e muleskere dušake ili arakhena e mule i rat keda merela. Sa akala adetija tane povrzime e demonencar. Keda e Devleskere sluge na kerena asavke adetija, lengiri familija ili o komšie šaj te vakeren lenge lošna bukja, te vredžinen len ili nane te mangen te ovel len ništo lencar. Ama, e Devleskere sluge džanena kaj o manuša keda merena, ola na živinena ko javer than. Adaleske našti te kerel pe lencar lafi hem ola našti te keren amenge lošnipa (Psalm 115:17). Nikogaš ma probin te kere lafi e mulencar ili e demonencar hem nikogaš ma ker asavke adetija. (Čitin 5. Mojseeva 18:10, 11; Isaija 8:19.)

13. So kergje but manuša so angleder darana sine taro demonija?

13 O demonija na samo so hovavena e manušen nego daravena len da. Avdive, o Satana hem o demonija džanena kaj ačhilo len panda „hari vreme“ keda o Devel ka cidel len tari Phuv hem adaleske tane ponasilna hem poholjame nego bilo keda angleder (Otkrovenie 12:12, 17). Ama, but manuša so angleder darana sine taro demonija, akana na darana više. Sar oslobodingje pe tari adaja dar?

SAR TE OSLOBODINA AMEN TARO DEMONIJA?

14. Isto sar o hristijanja taro prvo veko, so valjani te kera amen da te šaj te oslobodina amen taro demonija?

14 I Biblija vakerela sar te protivina amen hem te oslobodina amen taro demonija. Na primer, nesave manuša tari diz Efes angleder te džanen o čačipe kerena sine lafi e demonencar. Sar oslobodingje  pe lendar? I Biblija vakerela: „But džene so kerena sine magie, khedingje pumare lila hem thargje len anglo sarinende“ (Dela 19:19). Adaleske so mangle te oven e Devleskere sluge, ola uništingje sa o lila so sine povrzime magiencar. Avdive da nesave manuša ka valjani te keren agjaar. Sarine so mangena te služinen e Jehovaske valjani te oslobodinen pe taro sa o bukja soj tane povrzime e demonencar. Adala šaj te oven lila, spisanija, horoskop, filmija, muzika, igre, čak posterija so dikhjona kaj nane štetna a šaj te oven povrzime magijaja hem demonencar. Isto agjaar, adala šaj te oven bukja so phiravena o manuša te šaj te zaštitinen pe taro lošnipa (1. Korinkjanite 10:21).

15. So valjani panda te kera te šaj te borina amen protiv o Satana hem o demonija?

15 Iako o manuša taro Efes uništingje sa o lila so sine povrzime magiencar, palo nesave berša o apostol Pavle pišingja kaj ola valjani sine panda te „borinen pe“ protiv akala „lošna duhovna sile“ (Efešanite 6:12). Oja, iako ola sine spremna te tharen pumare lila, o demonija panda trudinena pe sine te keren lenge lošnipe. So valjani sine ola panda te keren? O Pavle vakergja lenge: „Len o baro štiti e verakoro, kolea so ka šaj te ačhaven sa o jagale strele e Lošnoskere“ (Efešanite 6:16). Isto sar o štiti so zaštitinela jekhe vojniko ki vojna, agjaar amari vera da šaj te zaštitinel amen. Ako isi amen doverba kaj o Jehova šaj te zaštitinel amen, tegani ka borina amen protiv o Satana hem o demonija (Matej 17:20).

16. Sar šaj te kera pozorali amari vera ko Jehova?

16 Sar šaj te kera pozorali amari vera ko Jehova? Valjani te čitina i Biblija sekova dive hem te ovel amen doverba kaj ov šaj te zaštitinel amen. Ako isi  amen silno doverba ko Jehova, tegani o Satana hem o demonija našti te keren amenge lošnipe (1. Jovanovo 5:5).

17. So šaj javer te zaštitinel amen taro demonija?

17 So javer valjani sine te keren o hristijanja taro Efes? Ola živinena sine ki diz kote so sine but spiritizam. Adaleske o Pavle vakergja lenge: „Molinen tumen ki sekoja prilika“ (Efešanite 6:18). Ola valjani sine te roden taro Jehova sekogaš te zaštitinel len. Sar i tano amencar? Amen da živinaja ko sveto kote so isi but spiritizam. Adaleske amen da valjani te roda taro Jehova te zaštitinel amen hem valjani te koristina leskoro anav keda molinaja amen. (Čitin Izreki 18:10.) Ako rodaja taro Jehova te arakhel amen taro Satana, tegani o Jehova ka odgovorinel ko amare molitve (Psalm 145:19; Matej 6:13).

18, 19. a) Sar šaj te pobedina ki borba protiv o Satana hem o demonija? b) Kova pučibe ka ovel odgovorimo ko poglavje so avela?

18 Ako oslobodinaja amen taro sa o bukja soj tane povrzime e demonencar hem isi amen doverba kaj o Jehova ka zaštitinel amen, tegani ka šaj te protivina amen e Satanaske hem e demonenge. Na valjani te dara lendar. (Čitin Jakov 4:7, 8.) O Jehova tano but posilno taro demonija. Ov kazningja len ko e Noeskoro vreme hem ki idnina ka uništinel len (Juda 6). Ma bistre, na borinaja amen korkori. O Jehova koristinela e angelen te zaštitinel amen (2. Carevite 6:15-17). Šaj te ova sigurna kaj o Jehova ka pomožinel amen te pobedina ki amari borba protiv o Satana hem o demonija (1. Petrovo 5:6, 7; 2. Petrovo 2:9).

19 Ama, ako o Satana hem o demonija kerena doborom but lošnipe e manušenge, tegani soske o Devel panda na uništinela len? Akava pučibe ka odgovorinel pe ko poglavje so avela.