Ο Ευαγγέλιος σο Γραφιντάς ο Ματθαίος 27:1-66
-
Ο Ιησούς ντιντιόλα κο Πιλάτος (1, 2)
-
Ο Ιούδας μουνταρέλα-πες (3-10)
-
Ο Ιησούς ανγκλάλ κο Πιλάτος (11-26)
-
Κχελένα πουμένγκε λέσαρ ανγκλάλ κο τζενέ (27-31)
-
Ιμπλαβένα-λες κο κας κο Γολγοθάς (32-44)
-
Μεριπέ ι Ιησούσκο (45-56)
-
Τσσουβένα ο σώμας ι Ιησούσκο κο μεζάρι (57-61)
-
Ο μεζάρι πφαντιόλα ντιπ λατσσές ντα τσσουβντιόνα στρατιώτες τι αρακχαβέν-λες (62-66)
27 Κο πρωί, σαρέ ο μπαρέ ιερείς ντα ο πρεσβύτεροι ι λαόσκε γκιντισάλε ντα κερντέ λάφι για τι μουνταρέν ι Ιησούς.
2 Πφαντέ-λες, λιντέ-λες οτθάρ ντα σοράν ντινέ-λες κο Πιλάτος σο κερέλας κουμάντος κι Ιουδαία.
3 Αζομάν ο Ιούδας, σο ντινάας ι Ιησούς λέσκε ντουσμανίνγκε βαστέντε, ντικχλάς ότι νικίστιλιας απόφαση τι μουνταρέν ι Ιησούς. Οτθάρ, λιντάς-λες μπουτ μπέτι ντα βουρτιντάς κο μπαρέ ιερείς ντα κο πρεσβύτεροι ο 30 ασημένια κέρματα.
4 Βακερντάς: «Αμαρτιντόμ σο ντινόμ τουμαρέ βαστέντε εκχέ αθώε τζενές». Βον βακερντέ: «Σο χάλα-αμέν ανάγκη; Τιρί μπουτί ισί!»*
5 Αζομάν φουρτιντάς ο ασημένια κέρματα κο ναός ντα νασλό. Σοράν, γκιλό ντα ιμπλαντάς-πες.
6 Αλλά ο μπαρέ ιερείς λιντέ ο ασημένια κέρματα ντα βακερντέ: «Να αβέλα-πες τι τσσουβάς-λεν κο άγιος τθαν σο γκίντασα ο λοβέ, σόσκε τσσορντιλό ρατ ανταλέ λοβένγκε».
7 Οτθάρ, γκιντισάλε ντα κερντέ-πες λάφι. Σοράν, κιντέ ανταλέ λοβέντζαρ εκ χωράφι* για τι πραχούνεν τζενέν σο ισινέ γιαβερέ τθεμένταρ.
8 Οντουλέσκε, ανταβά χωράφι βακέρντιβελα Χωράφι Ρατέσκο μέχρι αντιβές.
9 Αζομάν νικίστιλο μπαγιά οντουβά σο βακέρντιλοας αντράλ κατά προφήτης Ιερεμίας: «Ντα λιντέ ο 30 ασημένια κέρματα, ο λοβέ σο βακερντέ ο Ισραηλίτες ότι κερέλα ο τζενό,
10 ντα ντινέ-λεν για τι κινέν εκ χωράφι, αντικάς σαρ ντινάας εντολή ο Ιεχωβά».*
11 Ι Ιησούς γκερντέ-λες ανγκλάλ κο Πιλάτος, σο πουτσλάς-λες: «Τούι ισινάν ο βασιλιάς ι Ιουδαιόνγκο;» Ο Ιησούς βακερντάς: «Τούι κορκορό βακερέσα-λες».
12 Αλλά καζόμ κατηγορίνενας-λες ο μπαρέ ιερείς ντα ο πρεσβύτεροι, βοβ να βακερέλας καέκ λάφι.
13 Ο Πιλάτος βακερντάς λέσκε: «Να ασουνέσα καζόμ λάφια τσσουβένα τούκε;»
14 Αλλά βοβ να βακερντάς λέσκε ούτε εκ λάφι. Οτθάρ, ο Πιλάτος σαστισάλο.
15 Κάθε μπαρό ντιβές, ο Πιλάτος νικαβέλας κατά φυλακή εκχέ τζενές, κας μανγκέλας ο λαός.
16 Οντουβά βακίτι τθερένας κι φυλακή ι Βαραββάς, σο τζανένας σαρέ καζόμ γκεραλό* ισινέ.
17 Οτθάρ κάνα γκιντισάλο ο λαός, ο Πιλάτος πουτσλάς-λεν: «Κας μανγκένα τι νικαβάβ τουμένγκε, ι Βαραββάς ή ι Ιησούς, σο βακέρντιβελα Χριστός;»
18 Ο Πιλάτος τζανέλας ότι ντινέας-λες λέσκε βαστέντε σόσκε ζηλίνενας-λες.
19 Ντα καζόμ βοβ μπεσέλας κι καρέκλα κι δικαστηριόσκι, λέσκι ρομνί μπουτσσαντάς τι βακερέν λέσκε: «Μα κερ καέκ ζιάνι ανταλέ δίκαιε τζενέσκε, σόσκε αντιβές τσσιντιντόμ μπουτ κο σουνό ιτιρί λέσταρ».
20 Αλλά ο μπαρέ ιερείς ντα ο πρεσβύτεροι κερντέ ι τζενέν τι μανγκέν τι νικιόλ ο Βαραββάς ντα τι μερέλ ο Ιησούς.
21 Ο Πιλάτος βακερντάς λένγκε: «Κας κατά ντούι μανγκένα τι νικαβάβ τουμένγκε;» Βον βακερντέ: «Ι Βαραββάς».
22 Ο Πιλάτος βακερντάς λένγκε: «Ντα σο τι κεράβ ι Ιησούς, σο βακέρντιβελα Χριστός;» Σαρέ βακερντέ: «Ιμπλάβ-λες κο κας!»
23 Βοβ βακερντάς: «Σόσκε; Σο γκεραλιπέ κερντάς;» Όμως, βον ντένας βίκος ατζέ πο μπουτ: «Ιμπλάβ-λες κο κας!»
24 Κάνα ο Πιλάτος ντικχλάς ότι ναστί κερέλας τίποτα ντα ότι αβέλας-πες βαβούρα, λιντάς πανί ντα τθοντάς πο βαστά ανγκλάλ κο τζενέ. Βακερντάς: «Να τθεράβα οπρά-μάντε ο ρατ ανταλέ τζενέσκο. Ισί τουμαρί μπουτί».
25 Ντα σαρό ο λαός βακερντάς: «Λέσκο ρατ τι αβέλ οπρ’ αμέντε ντα οπράλ αμαρέ τσσαβέντε».
26 Αζομάν νικαντάς λένγκε ι Βαραββάς, αλλά τσσουντάς τζενέν τι νταπέν βουρδαλόσαρ* ι Ιησούς ντα ντινάς-λες λέντε για τι ιμπλαβέν-λες κο κας.
27 Αζομάν ο στρατιώτες σο τθερέλας ο Πιλάτος γκερντέ λέσκε κχερέστε ι Ιησούς ντα γκιντιντέ ντονταλάι λέσταρ σαρέ ι στρατιωτέν.
28 Νανγκιαρντέ-λες ντα ιριαντέ-λες εκ ντιπ λολό σέι.
29 Κχουντέ καντρέντζαρ εκ στέμμας ντα τσσουντέ-λες λέσκε σορέστε ντα τσσουντέ εκ καλάμι λέσκε δεξί βαστέστε. Πελέ κοτσίντζαρ ανγκλά-λέστε ντα κχελένας πουμένγκε λέσαρ ακαλέ λαφίντζαρ: «Γεια, βασιλιά ι Ιουδαιόνγκο!»
30 Τσσουνγκιαρντέ-λες ντα λιντέ ο καλάμι ντα τσαλαβένας λέσκο σορό.
31 Ντα αφού κχελντέ πουμένγκε λέσαρ, νικαντέ λέσταρ ο σέι σο τσσουντέας λέσκε, ιριαντέ-λες λέσκε αβραϊνέ σέα ντα λιντέ-λες οτθάρ για τι ιμπλαβέν-λες κο κας.
32 Καζόμ νικιόνας αβρί, αρακχλέ εκχέ τζενές σο ισινέ κατά Κυρήνη ντα βακέρντιβελας Σίμωνας. Λες τσσουντέ ζορίσαρ τι ακχαρέλ ο κας λέσκε ντουκχένγκο.*
33 Ντα κάνα ερεσλέ εκχέ τθανέστε σο βακέρντιβελας Γολγοθάς, σο μανγκέλα τι βακερέλ «μουλικανό σορό»,
34 ντινέ-λες τι πιλ μολ ναμιμέ κερκέ τσαργίντζαρ. Αλλά κάνα τσσουντέ οντιά μολ λέσκε μόστε, να μανγκλάς τι πιλ-λα.
35 Κάνα ιμπλαντέ-λες κο κας, τσσουντέ κλήρος για τι ιλιαβέν λέσκε αβραϊνέ σέα.
36 Ντα μπεσλέ οτθέ ντα αρακχαβένας-λες.
37 Ντα τσσουντέ οπράλ λέσκε σορέσταρ εκ ταμπέλα σο βακερέλας σόσκε μουνταρντέ-λες: «Ανταβά ισί ο Ιησούς, ο βασιλιάς ι Ιουδαιόνγκο».
38 Αζομάν ιμπλαντέ κο καστά πασέ λέστε ντουέ τσορέν,* εκχές δεξιά ντα εκχές αριστερά.
39 Ο τζενέ σο νακχένας οτθάρ κουσένας-λες, κουνιαβένας πουμαρό σορό
40 ντα βακερένας: «Τούι σο κα περαβέας ο ναός ντα κα λατσσαρέας-λες αντρέ τρινέ ντιβεσέντε, σώνε-τουτ! Άμα ισινάν τσσαβό ι Ντεβλέσκο, γούλι κατά ντουκχένγκο κας!»*
41 Κχελένας πουμένγκε λέσαρ ο μπαρέ ιερείς ντα γιεκ λέντζαρ ο γραμματείς ντα ο πρεσβύτεροι ακαλέ λαφίντζαρ:
42 «Γιαβερέν σωντάς-λεν. Πες ναστί σώνελα-πες! Ισί βασιλιάς ι Ισραηλίσκο. Τι γουλίλ ακανά κατά ντουκχένγκο κας* ντα κα πακιάς λέστε.
43 Ντινάς μπέσα κο Ντεβέλ. Τι σώνελ-λες ακανά Βοβ άμα μανγκέλα-λες, σόσκε βακερντάς: “Ισινόμ Τσσαβό ι Ντεβλέσκο”».
44 Πρασάνας-λες ατζέ-ντα ο τσορά σο ισινέ ιμπλαντέ κο καστά πασέ λέστε.
45 Πασέ 12:00 κο μεσημέρι* πελό καρανίκι οπράλ σαρό κο τθεμ μέχρι πασέ 3:00 κο μεσημέρι.*
46 Πασέ 3:00 κο μεσημέρι, ο Ιησούς ντινάς βίκος ζουρανές: «Ηλί, Ηλί, λαμά σαβαχθανί;» σο μανγκέλα τι βακερέλ: «Ντέβλα μου, Ντέβλα μου, σόσκε μουκχλάν-μαν;»
47 Κάνα ασουντέ-λες ανταβά, μερικοί σο ισινέ οτθέ αρχισάλε τι βακερέν: «Ντέλα βίκος ι Ηλιάς».
48 Οντιά στιγμή εκ τανό λένταρ τθαβντισάλο, λιντάς εκ σφουγγάρι, σουσλιαρντάς-λες σουταλέ μολιάσαρ, τσσουντάς ο σφουγγάρι οπράλ εκχέ καλαμίστε ντα ντινάς-λες τι πιλ.
49 Αλλά ο γιαβερά βακερντέ: «Μουκχ τι ντικχάς άμα κα αβέλ ο Ηλίας τι σώνελ-λες».
50 Ο Ιησούς ντινάς πάλι βίκος ζουρανές ντα μουλό.*
51 Αζομάν η κουρτίνα ι ναόσκι πφαράντιλι κο ντούι, οπράλ μέχρι τελέ, ντα η πφουβ κουνιάντιλι ντα ο βεσά πφαράντιλε.
52 Ο μεζάρια* πουτάρντιλε ντα μπουτ σώματα αγιόνγκε σο σοτέας ο σοϊπέ ι μεριμάσκο νικίστιλε αβρί
53 ντα ντικχλέ-λεν μπουτ τζενέ. (Ντα μερικά τζενέ σο νακχλέ κατά μεζάρια, αφού ιστίντιλο κατά μουλέ, ντινέ αντρέ κι άγια πόλη).
54 Κάνα ο αρχηγός ι στρατόσκο ντα οντουλά σο αρακχαβένας ι Ιησούς λέσαρ ντικχλέ ο σεισμός ντα οντουλά σο αβένας-πες, πφερντιλέ νταρ ντα βακερντέ: «Ισινέ μπαγιά Τσσαβό ι Ντεβλέσκο».
55 Ισινέ οτθέ μπουτ τζουβλιά-ντα σο ντικχένας ντουράλ. Οντουλά τζουβλιά γκιλέας παλάλ κο Ιησούς κάνα νασλόας κατά Γαλιλαία για τι υπηρετίνεν-λες.
56 Λέντζαρ ισινέ η Μαρία η Μαγδαληνή ντα η Μαρία, σο λάκε τσσαβέ ισινέ ο Ιάκωβος ντα ο Ιωσής. Ισινέ η ντάι-ντα ι τσσαβένγκι σο τθερέλας ο Ζεβεδαίος.
57 Κο απόγευμας, αβιλό εκ χουλανό τζενό σο ισινέ κατά Αριμαθαία ντα βακέρντιβελας Ιωσήφ. Βοβ-ντα αβιλόας μαθητής ι Ιησούσκο.
58 Γκιλό κο Πιλάτος ντα μανγκλάς ο σώμας ι Ιησούσκο. Ο Πιλάτος βακερντάς τι ντεν-λες λέστε.
59 Ο Ιωσήφ λιντάς ο σώμας, πακιαρντάς-λες εκχέ πάκι ντα μπουτ λατσσέ λινέ κοτορέσαρ
60 ντα τσσουντάς-λες πι νεβέ μεζαρίστε σο χαντζουντάας κο βες. Σοράν ταρτιντάς εκ μπαρό μπαρ ανγκλάλ κο μεζάρι ντα νασλό.
61 Αλλά η Μαρία η Μαγδαληνή ντα η γιαβέρ Μαρία ατσσιλέ οτθέ ντα μπεσένας ανγκλάλ κο μεζάρι.
62 Ο γιαβέρ ντιβές, σο ισινέ Σάββατος,* γκιντισάλε ο μπαρέ ιερείς ντα ο Φαρισαίοι ανγκλάλ κο Πιλάτος
63 ντα βακερντέ: «Κύριε, ντάσα-αμέν γκοντί ότι οντουβά ψεύτης βακερντάας κάνα τζουβντιόλας ατζέκ: “Σοράν τρινέ ντιβεσένταρ κα ιστιάβ κατά μουλέ”.
64 Οτθάρ, βάκερ τι αρακχάντιβελ ο μεζάρι μέχρι κο τρίτος ντιβές, για μα τι αβέν λέσκε μαθητές τι τσορέν-λες ντα τι βακερέν κο λαός: “Ιστίντιλο κατά μουλέ!” Σόσκε ανταβά κα αβέλ πο μπαρό χουχαϊπέ κατά πρώτος».
65 Ο Πιλάτος βακερντάς λένγκε: «Λεν στρατιωτέν. Τζαν ντα αρακχαβέν ο μεζάρι σαρ αγαβένα».
66 Οτθάρ, γκιλέ ντα πφαντέ ντιπ λατσσές ο μεζάρι ι μπαρέσαρ* ντα τσσουντέ στρατιωτέν τι αρακχαβέν-λες.
Υποσημειώσεις
^ Γιαβέρσοϊ «Τιρό πρόβλημας ισί!»
^ Κι Πουρανί Μπαλαμανί βακέρντιβελας «ο χωράφι ι τζενέσκο σο κερέλα πράγματα τσικάταρ».
^ Ντικχ Παλαϊνέ Σελίδες Α5.
^ Γιαβέρσοϊ «μπίλατσσο, κακός».
^ Γιαβέρσοϊ «μαστιγιόσαρ».
^ Ντικχ Λεξικός κο λάφι «Ντουκχένγκο κας».
^ Γιαβέρσοϊ «τσορνέν».
^ Ντικχ Λεξικός κο λάφι «Ντουκχένγκο κας».
^ Ντικχ Λεξικός κο λάφι «Ντουκχένγκο κας».
^ Κι Πουρανί Μπαλαμανί βακέρντιβελας «Κατά έκτος σαάτι».
^ Κι Πουρανί Μπαλαμανί βακέρντιβελας «μέχρι κο ένατος σαάτι».
^ Γιαβέρσοϊ «τσσιναντάς τι λελ πο σουλούι».
^ Γιαβέρσοϊ «λιμόρια».
^ Κι Πουρανί Μπαλαμανί βακέρντιβελας «σοράν κατά Παρασκευή». Ντικχ Λεξικός κο λάφι «Προετοιμασία».
^ Γιαβέρσοϊ «πφαντέ ντιπ λατσσές ο μεζάρι ντα σφραγιντέ ο μπαρ».
