Da li o Devel šunela amare molitve?
Da li nekad pućljan tut, da li o Devel šunela te molitve? Ako ja, tegani na hijan jedino. But manuša molinđe pe e Devlese te pomožini len te rešinen disave problemija, ama o problemija tane pana othe. Da li odova značini so o Devel na šunela amare molitve? Na. I Biblija uverini amen so Devel šunela amare molitve ked molinaja amen lese ko ispravno način. Te dikha so i Biblija vaćeri odolestar.
O DEVEL ĆAĆE ŠUNELA.
„Tu šuneja o molitve, koro tute avena sa o vrste ando manuša“ (Psalam 65:2).
Disave manuša molinena pe odolese so palo odova osetinena pe pošukar, čak iako na verujinena so neko šunela len. Ama, i molitva na pomožini amen samo te osetina amen pošukar. Ki Biblija pisini: „O Jehova a tano paše uzo sa okola so rodena le, uzo sa okola so iskreno rodena le [...] šunela olengi vika hem izbavini len“ (Psalam 145:18, 19).
Amen šaj te ova sigurna so o Jehova šunela o molitve ando pe sluge. Ov pherdo mangipaja phenela: „Tumen ka vićinen man, ka aven koro mande hem ka molinen tumen maje, a me ka šunav tumen“ (Jeremija 29:12).
O DEVEL MANGELA TE MOLINA AMEN OLESE.
„Istrajinen ki molitva“ (Rimljanima 12:12).
I Biblija podstaknini amen „uvek te molina amen“ hem „ki svako prilika“. Jasno tano so o Jehova, o Devel, mangela te molina amen olese (Matej 26:41; Efešanima 6:18).
Sose o Devel mangela te molina amen olese? Razmislin ando akava. Kova dad na bi mangela te šunel sar oleso ćhavo phenela lese: „Mo dad, šaj li te pomožine man?“ Naravno, jekh dad šaj već đanela so valjani olese ćhavese ja sar osetini pe. Ama, ked šunela sar oleso ćhavo rodela lestar pomoć, tegani đanela so verujini lese hem soj tano paše oleja. Isto ađahar, ked molinaja amen e Devlese, e Jehovase, amen mothovaja so verujinaja lese hem so mangaja te ova paše oleja (Poslovice 15:8; Jakovljeva 4:8).
O DEVEL ĆAĆE BRININI PE TUTAR.
„Sa tumare brige forden koro leste, sose ov brinini pe tumendar“ (1. Petrova 5:7).
O Devel mangela te molina amen olese odolese so mangela amen hem sose brinini pe amendar. Ov šukar đanela amare problemija hem amare brige hem mangela te pomožini amen.
O kralj David celo po životi molinđa pe e Devlese te pomožini le hem vaćerđa lese sostar razmislini hem sar osetini pe (Psalam 23:1-6). So o Devel osetinđa premalo David? Ov manglja e Davide hem šunđa olese molitve (Dela apostolska 13:22). Isto ađahar, o Devel šunela amare molitve sose brinini pe amendar.
„MANGAVA E JEHOVA, ODOLESE SO OV ŠUNELA MO GLASO“
Akala lafija pisinđa jekh psalmista. Ov hine sigurno so o Devel šunđa olese molitve hem odova but pomožinđa lese. Sebepi odova osetinđa soj tano popaše e Devleja hem odova dinđa le snaga te borini pe e problemencar kola hine le (Psalam 116:1-9).
Ked hijam uverime so o Devel šunela amare molitve, amen ka nastavina te molina amen. Amaro phral kova živini ki severno Španija, našalđa pe ćhave kova hine le 19 berš. Ov mulo ki saobraćajno nesreća. O Pedro ćućarđa po vilo e Jehovase ki molitva hem uvek rodinđa lestar uteha hem snaga. So ulo palo odova? Ov phenela: „O Jehova šunđa me molitve ađahar so prekalo amare amala dinđa maje hem me romnjaće snaga hem uteha.“
O Devel but putija odgovorini ko amare molitve ađahar so pomožini amen hem utešini amen prekalo amare amala
Iako o molitve na vazdinđe olese ćhave ando grobo, on but pomožinđe olese hem olese porodicaće. Olesi romni, i Marija Karmen, phenela: „O molitve pomožinđe man te iždržinav odija dukh. Đanđum so o Jehova haljola man odolese so ked molinđum man osetinđum baro mir ko vilo.“
I Biblija hem odova so avera nakhlje ko životi mothovi amenđe so o Devel ćaće šunela o molitve. Ama, jasno tano so o Devel na uslišini sa o molitve. Sose disave molitve na uslišini?
a Jehova tano e Devleso anav (Psalam 83:18).
Dikhen hem akava
OSNOVNA BIBLIJAKE SIKLJOVIBA
Da li o Devel šunela sa o molitve?
So ako neko molini pe samo andi korist? So ako jekh rom maltretirini pe romnja hem palo odova molini pe e Devlese aso blagoslov?
