Dža ko teksto

Kobor Jehovaskere svedokija isi ko celo sveto?

Kobor Jehovaskere svedokija isi ko celo sveto?

2021 Izveštaj

Broj taro Jehovaskere svedokija ko celo sveto:

8.686.980

Sobranija:

119.297

Phuvja kolende so propovedinena e Jehovaskere svedokija:

239

2021 Izveštaj

2021 Detalno izveštaj

Sar odredinena o broj e Jehovaskere svedokongoro?

 Ko akava broj tane samo adala so propovedinena sekova masek o šukar haberi bašo e Devleskoro Carstvo (Matej 24:14). Ki lende tane vklučime okola soj krstime sar Svedokija hem okola so nane panda krstime, ama ispolninena o uslovija te učestvujnen ko propovedibe.

Dali nekoj valjani te del pare te šaj te ovel pe e Jehovaskoro svedoko?

 Na. O parična prilogija na vlijajnena upro adava dali nekoj ka ovel členi taro e Jehovaskere svedokija ili, palem dali ka dobinel nesavi zadača ili odgovornost ki amari organizacija (Dela 8:18-20). Najbaro delo taro prilogija tane anonimna. Sekova Jehovaskoro svedoko sprema ple želbe hem okolnostija dela taro plo vreme, sila hem sredstvija bašo propovedibe so kerela pe ko celo sveto (2. Korinkjanite 9:7).

Kotar džanena kobor džene aktivno propovedinena?

 Sekova masek, ko pumare sobranija e Jehovaskere svedokija dena izveštaj bašo adava kobor učestvujngje ko propovedibe. Akava izveštaj dela pe dobrovolno.

 O podatokija taro sobraniska izveštaija čhivena pe ko tabele, hem o vkupna brojke bičhalena pe ki lokalno podružnica. Sekoja podružnica bičhalela o vkupna brojke tari pli phuv ili regioni dži ko amaro glavno sedište.

 Ko krajo taro sekova službeno berš, * odredinela pe o najbaro broj e Svedokongoro baši sekoja phuv. Akala brojke khedena pe te šaj te dobinel pe o vkupno broj taro e Jehovaskere svedokija ko celo sveto. Detalna izveštaija baši sekoja phuv, hem iskustvija taro propovedibe, objavinena pe ko Godišniko e Jehovaskere svedokongoro. Adava kerela amari vera pozorali. Ko prvo da veko o hristijanja sine ohrabrime keda šunena sine slična izveštaija (Dela 2:41; 4:4; 15:3).

Dali ko tumare izveštaija vklučinena adalen kola soj ko kontakt tumare organizacijaja, ama na propovedinena?

 Iako na vklučinaja asavke manušen ko vkupno broj taro e Jehovaskere svedokija, amen radujnaja amen so avena ko amare sostanokija. Poviše lendar avena sekova berš keda setinaja amen ko e Isuseskoro meribe. Lengoro broj otprilika šaj te odredinel pe ako taro broj so sine prisutna ki Spomen-svečenost ikalela pe o broj taro e Jehovaskere svedokija. Ko 2021 berš, ko akava sostanok sine 21.367.603 džene.

 Amen bizo pare proučinaja i Biblija butencar so na avena ko amare sostanokija. Ko periodi taro 2021 berš, sekova masek ko prosek vodinaja sine 5.908.167 bibliska kursija. Ko nesave taro adala kursija isi poviše džene.

Soske ko popis taro nesave phuvja o broj taro e Jehovaskere svedokija tano pobaro taro broj so izvestinena le tumen?

 O državna zavodija baši statistika but puti avena dži ko ple brojke agjaar so pučena e manušen ki koja religija tane. Na primer, sprema o Zavod baši statistika ko SAD, o istražuvanja so kerena len „isi len cel te dikhen dali o manuša dikhena pes sar delo tari nesavi versko zaednica“. Ola isto agjaar vakerena kaj o podatokija ko krajo „temelinena pe ko lično mislenje a na ko faktija“. Ama, amen vakeraja kaj nekoj tano e Jehovaskoro svedoko samo ako ov propovedinela hem dela izveštaj baši pli služba, a na samo ako vakerela kaj tano Svedoko.

^ O službeno berš počminela taro 1 septemvri dži ko 31 avgust. Na primer, 2015 službeno berš trajngja taro 1 septemvri 2014 dži ko 31 avgust 2015.